Read Western Dani Yeremiya 25 Bible Online

Yeremiya 25 - Western Dani bible

Yeremiya 25

¹ Aap Nebukanetat it Mbaben mendek inowe endagembogut a'nuk, tahun aa'nduk paga wone lengganogo yorage, at Yotiya aput Yoyakim nogo it Yekura mendek inowe endagembogut a'nuk wonage kagak tahun kenagan eeppunuk, ambi age paga wone lengganogo yorage, eekwi iigak, Ala nen it aakumi Yekura mendek abok aret eeppiyoorak wone at Yeremiya yoreegerak.

²Yoge mbareegi, at Yeremiya nen it aakumi Yekura mendek abok aret inom, o Yerutalem wonogwe abok aret inom, yoragagerak nogo yi aret.

³“It Yekura mendek inowe endagembogut Amon aput Yotiya endagembogut a'nuk wonage kagak tahun 12 eeppunuk, ambi age paga nen nok, o yogondak kuli ti, tahun 23 aret agaarak me, at Aliku ALA nen wone yo'nege kenok, kit yokkiragak mban eekitak kwe, kinaruk konengga'lek aret monggotak o.

⁴Ndi, at Aliku ALA nen it aap at yorage kagak yoraga ayeloman mini nogo, abok aret kinowagam nappiya wagak mban eeketak kwe, inoone konenggwi, liippunuk waganggwi, eeka'lek aret monggotak o.

⁵Aliku ALA nen yorage kagak kit yokkirogo logonet, Aliku ALA nen yegerak nogo yi aret o. Inalitik-inalitak inobaabut maluk logonet eerit nugwi, maluk mban eerit nugwi, eeko menggaarak nogo mbo punuk, yungguk togon an nowagam wogwe iinok, an nen it inombomini inom inanggween wogoragagim time mondok-mondok logowak nduk, teppiyaagin o.

⁶An nen maluk inoba piyookwak, an wonage neegak kugiwak ayuk wuko logonet mugurok nogwe, ineenggi paga ogobakkigippunuk alut eekwi paga nanini eerogo panugwi, eerugwaarik, yegerak o,” yinuk, yokkiragak mban eeko nogogwaarak o.

⁷Aliku ALA nen ari logonet, “An yorage neegak yoraga inoone nogo inaruk konengga'lek taganogo punuk, ineenggi paga ogobakkigirik alut eeko logonet, nanini eerogo paneegwaarak paga maluk eerogo pateegwaarak o,” yinuk, yegerak me, yokkiragi o.

⁸Togop me, at Omaawi Lombok Menggerak Aliku ALA nen yegerak nogo yi aret. “It an noone yorage nogo inaruk konengga'lek iinok,

⁹yi aakumi ndi aakumi o omarip paga pa'nggwe wonogwe nogo abok aret inom, it Mbaben mendek inowe endagembogut nayeloman Nebukanetat inom, yonggo piyaminggirak wogo logonet, o yi tebenggola unggwogwe, it o yime menggaarak inom, yi aakumi ndi aakumi enaagan-ambokan wonogwe inom, abok aret tebenogo piigwi, eerugun o. It o yime menggaarak nogo mondok pup eerogo piige, inamineeri ne agan noorak mendek eerogo piige, inagi'ndok kanggo logowak nduk eerogo piige, ndi, o nggween yi, mondok mbuk aago mondok-mondok logowak nduk, eerogo pege, eerigin,” yegerak o.

¹⁰ “Ti eeke logonet, it wonogwe me time inale'nggen mbakwi, iniki ale'nggen nggelok ari, eeko logonet, inoone yogwe nogo lek eerogo pege, aap akwe kolage me inale'nggen nen noone-koone yogwe nogo lek eerogo pege, gandum yigika yugum oone ne-ne ari nogo lek eerogo pege, ndi, ndi wuninik nogo nogonogo pege, eerigin o.

¹¹ O yime abok aret aakumi lek me kugume arigin me, it aakumi inanebunu lombok yi, aap Mbaben inowe endagembogut ayeloman a'nuk wonogwe iigak, tahun 70 aret eerugun,” yegerak o.

¹²Aliku ALA nen ari logonet, “Ndi, tahun 70 abu aret eekwi iinok, it Mbaben mendek inowe endagembogut inom, at apuri it aakumi o Mbaben mendek inom, inomaluk onggo inoba kwippiige logonet, inanggween mondok-mondok mbuk aago logowak nduk eerogo pigin o.

¹³O it inanggween paga time aaninggin-paaninggin eerogo piyoorak yoragagirak mbuku yi paga liiru mbanak wonage inom, yi aakumi ndi aakumi eeppiyoorak an nen kat Yeremiya yokkege neegak yorage nagagindak inom, abok aret o nggween ti paga ndak-ndak aret eerogo pigin o.

¹⁴Ndi, it aakumi time menggaarak kunduk, aakumi inanebunu apit aret inom, aap inoweewi inendagembogut inom, nen inayeloman mini eeppiinok logowak nduk, eerogo piige logonet, it eeko nogogwaarak inom, ineenggi paga eeppiinet nogo nogogwaarak inom, onggo ndak-ndak eeppiige logogin o,” yinuk, yegerak o.

¹⁵Iterali inogoba Aliku Ala nen an yo'nege kagarak nogo yi aret. “An nanini mbake niyoowak anggur amburu toolak kwak neenggime wonage yi, wagangge logomenggendik, wonok it aakumi inanebunu lombok wonogwe me, nappagaminggirak nanuk it abok aret nawak nduk, wogoraanu o.

¹⁶Ndi, toolak wogoramenggendak ti, wooluwak paga inooruwak nduk, inenggela'me inawim nappiya woroorak kwak aret me, nenok, kumili kumbunuk, neyak-kweyak agan nugu logogun o.”

¹⁷Yo'nege mbaki, an niyoowak nogo Aliku ALA eenggime nen wagangge nagarik, wonok it aakumi inanebunu lombok wonogwe me, Nak, yo'negim nogome nanuk, it abok aret nawak nduk wogoranet nage kagarak.

¹⁸Amburu nawak nduk, “Wogoret,” yo'negerak nogo ti, o Yerutalem inom, o Yekura kota-kota inom, it aap inoweewi inendagembogut inom, inawuri inom eeka inom, maluk eerogo piigwi, Inogole o, yogwe, inagi'ndok kanggwi, pulunogo piigwi, eeko logowak nduk, yogondak eeppiigwi ndak-ndak eerogo piyoorak toolak kwak aret o.

¹⁹Ndi, amburu nawak nduk toolak wogorage kagarak ti, it Metit mendek inowe endagembogut Pirawun inom, ayeloman mini ake eeka inom, awuri inom eeka inom, at apuri aakumi Metit mendek abok aret inom,

²⁰it aap inambik o Metit time inom wonogwe nogo abok aret inom, it aap inendagembogut o Ut mendek inom, it aakumi Pilitin mendek o Atekelon kunduk, Nggata kunduk, Ekeron kunduk, it o Atorot eegu yumbunik nogo kunduk, inoweewi inendagembogut inom,

²¹it aakumi Erom mendek inom, Mowap mendek inom, Amon mendek inom,

²²it o Tirut-Tiron inoweewi inendagembogut inom, niyo kole yenggenak laut enebaga yi aa'nggi paga wonogwe inoweewi inendagembogut inom,

²³it aakumi o Nderan wonogwe inom, Tema wonogwe inom, Mbut wonogwe inom, it aap ineeruwak kondogok peenok-peenok nggarik-nggarek aago inom,

²⁴it Arap mendek inoweewi inendagembogut inom, it aakumi inambik o karume wonogwe inoweewi inendagembogut inom,

²⁵it o Timiri, Elam, Marayi mendek inoweewi inendagembogut inom,

²⁶it aakumi o omarip paga pa'nggwe nda-koorok wonogwe inoweewi inendagembogut inalitik-inalitak inom, it aakumi inabu'me piigo menggam o nggween paga wonogo menggaarak abok aret inom, amburu toolak ti wogorage nagarik, age yobok lombok ti, aap o Mbaben inowe endagembogut nawak nduk, wogoge kagarak.

²⁷Nogo wogoge mbaki, Aliku ALA nen an yo'nege logonet, “Amburu toolak nogo wogorage logomenggendik, it yorage logonet, at Omaawi Lombok Menggerak Iterali inogoba Aliku Ala nen yegerak nogo yi aret. Amburu toolak yi ti, wooluwak paga inooruwak nduk, nappiya woraminggirak inookwi kwak aret me, nonggo logowak o. Nenok kumili kunggwi, peyak wukwi, eeppunuk, ngginnarit namenggaarak mi'narugun abu lek aret, yegerak, yoret o.

²⁸Ndi, toolak keenggi paga wogoramenggendak waganogo noorak ineebi mbakwi iinok perak, at Omaawi Lombok Menggerak Aliku ALA nen yegerak yoroorak nogo yi aret. Noorak ineebi, yuurak lek mondok nunggo logowak, yegerak o.

²⁹At Omaawi Lombok Menggerak Aliku ALA nen ari logonet, Ala agota o, yinuk, an nendage kunogo yogo menggam yime aaninggin oba pikit nduk eeke me, ti eeke logonet, it aakumi kunduk aaninggin inoba piyoorak lek mbakop? It aakumi nggween paga wonogwe yi abok aret wooluwak paga inoori woraawak nduk, yonggo nappiige me, Nit mbo nagun mondok lek, mbako logowak o.

³⁰Togop me, an nen it eeppiyoorak yokkege yi, abok aret yorage logot o. It yorage logonet, Aliku ALA nen at tiyanak menggim logonet, oone engget-ngget kwi ari, At wonage menggim abu leenak me logonet, oone nggwok paga ari, At anggween eeppuurak paga oone engget-ngget kwi ari, It aap anggur anggen aambiranggo logonet, inoone yogo mengga kwak ari, It aakumi nggween paga wonogwe abok aret eeppiyoorak paga oone nggwok ari, Eerigin o.

³¹Yi aakumi ndi aakumi, Kit ndogop eekotak o, yinuk, Aliku ALA nen yoraagin me, Wim nggaganggo logonet, noone-koone yogwe nogo, o irip-irip time konenit nagun o. It aakumi abok aret inowak loonogo inawone mbangge logonet, it aap maluk eeka nogo wooluwak nen nawak nduk, eeppiyaagin o,” yinuk, Aliku ALA nen aret yegerak o.

³²At Omaawi Lombok Menggerak Aliku ALA nen ari logonet, “Aaninggin iya lombok yi aakumi ndi aakumi ambi inoba kwi'nagak, ambi inoba kwi'nagak, eerit wage, O irip-irip time abok aret wiya oone pu warit wage menggi kwak wage, Eeke ti, inigen kaawak o,” yinuk, yegerak o.

³³Ti eyom paga at Aliku ALA nen inoorogo piinet namenggerak nogo, o alome nen nok, o irip me ndak wa'narit nagin me, ineebe inoorak ti, inaleenggu maakwi, ineebe kuwak eerogo piya wa'nuk nggween taambiigwi, eerugun lek we nggween mili ake aret arugun o.

³⁴Kit kinenggaanok mbanogo pinagarak eyom muk aret panggoni wage, Niyoowak nggween nggabok paga abe ogobakkigirik wangge logonet, Telenak-mbelenak ma'nage menggi kwak, eekkinaburak eyom ari wage, Eekerak me, Kit aap ndomba ndegeninaka yi wae. Le yogwe, leenggu maakwi, Kit ndomba inarum waka yi wae. Wun paga lagak-mbagak yogwe, Eeko logonip o.

³⁵Aap ndomba ndegeninaka ti, kole mbaganit o ambime ari nogwe, It ndomba inarum waka ti, inagap ndakko'nok kole ambime nogwe, Eerugun mondok lek aret o.

³⁶At Aliku ALA nen inandomba inagari'ngga nenet nugo menggam maluk eerogo pege kenok, It aap ndomba ndegeninaka nen inoone yogwe, Ndomba inarum waka nen ai-ao yogwe, Eekwi ti, Kinaruk konenggo logonip o.

³⁷Iri'ngga mili mban me ndomba inagabiti lek logonet, ugun nenet nogo menggaarak kwe, Aliku ALA anini kani kunik negen paarogo pemenggerak paga yi oone ndi oone lek aret arigin o.

³⁸It tebenogo piiga nen wooluwak paga inoorit unggwogwe, Aliku ALA anini kani kunik negen inoba piinet nage, Eeremenggaarak paga Inanggween abu mbuk aremenggerak me, At singa wonage menggim nen mbo punuk, mbagangge menggi kwak, Aliku ALA nen togop aret eerigin o.