Read Western Dani Yeremiya 26 Bible Online

Yeremiya 26 - Western Dani bible

Yeremiya 26

¹ At Yotiya aput Yoyakim nogo it Yekura inowe endagembogut a'nuk awo wone lengganogo yorage kagak, Aliku ALA nen at Yeremiya yoge logonet,

²“Naliku ALA nen yokkege nogo yi aret. Kat Naliku ALA nawi wurik oore'nggam mi'nari nage logomenggendik, it aakumi Yekura kota-kota wonogwe abok aret nen nayuk wuruwok nduk, nawi wurik me kuwak ari wogwe nogo wone an yokkege yi, ambiriluk ambi wuppuurak ti mage o. Ata, abok aret yoramenggendak inaruk konembunuk, it maluk eekwi nogo mbo punuk, inalitik-inalitak iniyokan yungguninuk woroorak kagak eerukwak, abok aret yorage logot o. Ndi, iniyokan yungguninuk nowagam wogwe iinok, maluk eerit nugwi onggo aaninggin eeppiyaakit kooneegirak nogo eeppiyaagin lek niniki yanggoppunuk puk arigin o.

⁴Naliku ALA yagarak ambi yoroorak yi aret. Eeko logorak nawone yugu eeko logowak nduk, lengganogo yoragagirak nogo, konembunuk mugurok naga'lek mbo pugwi,

⁵ndi, yorage neegak yoraga nayeloman mini nappiigitak, Inoone koneniyak, Nineebi o, yogwe iigak, yoragak mban eekwi inoone nogo, konengga'lek teppugwi, eekwi iinok,

⁶ an nen nawi wurik yi, o Tilo kwak eerogo pege, yi aakumi ndi aakumi o nggween paga wonogwe nen o kota yi, pulunogo pegak eeko logowak nduk eeppiige, eerigin, yegerak, yoret o,” yinuk, yoge mbareegi, yoragagerak.

⁷Yorage mbareegi, at Yeremiya nogo Aliku ALA awi wurik me logonet yoragagerak ti, aap Ala unde inom, Ala nen yorage kagak yoraga inom, aakumi apit aret inom, inaruk koneneegwaarak.

⁸Aliku ALA nen, “Yoret,” yoreegerak nogo abok aret it aakumi apit aret yorage mbareegi, it aap Ala unde inom, it Ala nen yorage kagak yoraga inom, it aakumi abok aret inom, nen pippunuk, mba yogo logonet, “Kat mondok koorugun aret o!

⁹Ala awi wurik yi, o Tilo kwak eerogo pege, ndi, o kota yi, lek eerogo punuk, aakumi logorak lek aret eeppege, eerigin o, yinuk, Aliku ALA nen yegerak kenok yokkiragi o, yagandak ti, nonggop nduk?” Yogo nogogwaarik, Aliku ALA awi wurik me, at wonage me taati ninggireegwaarak.

¹⁰Ti eekwi nogo it aap Yekura inoweewi inengga warak nogo nen inaruk konembogo nogogwaarik, aap endagembogut awi o nggwok abe wurik me nen Aliku ALA awi wurik me nanuk, Aliku ALA awi wurik tungga endage, Ngget Mbanak o, yogwe nogome kwi'ndak wonogwe me,

¹¹it aap Ala unde inom, Ala nen yorage kagak yoraga inom, nogo nen it Yekura inoweewi inengga warak nogo kunduk, aakumi abok kuwak aago nogo kunduk, yorogo logonet, “Kit lombok kinaruk konenggotak nogo ndak-ndak at aap yi nen, O kota yi, maluk eeppuurak, Ala nen yegerak kenok yokkiragi o, ari me, aap yi, warogo puurak aret me, Wariyak aret, yinip o.”

¹²Yorogo mbareegwa, at Yeremiya nen it aap inoweewi inengga warak inom, it aakumi abok kuwak aago nogo inom, yorage logonet, “Kit wone abok konenggotak nogo ndak-ndak, o wurik yi inom, o kota yi inom, eeppuurak wone Aliku ALA nen, Yora nak o, yinuk, nappani wagaarak yokkirage me,

¹³Aliku kinogoba Ala nen yokkirage konembunuk, kinobaabut alik ngget mendek eekkologwe, alik ngget mendek eerit nugwi, eeko logonip o. Eekwi kiinok, aaninggin eeppinagarak yegerak nogo eeppinagagin lek iniki yanggoppunuk, puk arigin o.

¹⁴Ndi, an perak, kit kineenggime aret agarik o! Kineenggime wonage me, eeke neegotak nogo ndak-ndak eeppaniyak kenok ti, op aret o.

¹⁵Ti op aret kwe, wone yi, kit konenggwi kiigak yokkirage logokit nduk, Aliku ALA nen abet aret nappani wagaarak me, noorogo panugwi kiinok, an maluk eeka'lek neegak noorumonggotak namiya kinoba pakwi, it aakumi o kota yime wonogwe inoba piigwi, ndi, o kota yi kunduk, oba aret pugwi, eerumunggup, mbako logonip o,” yinuk, yoragagerak.

¹⁶Yorage mbareegi, it aap inoweewi inengga warak inom, it aakumi kuwak aago abok aret inom, nen it aap Ala unde kunduk, Ala nen yorage kagak yoraga kunduk, yorogo logonet, “Wologwe wae. Aap yi, Aliku ninogoba Ala yegerak kenok, yo'niragaarak me, eebe wariyak mondok mage o,” yinuk, yereegwaarak.

¹⁷Ti'nuk, aakumi o time mendek inoweewi wone kenaaka inenggela'me wonogwe nogo nen inaame mi'nari nanuk, it aakumi kuwak aago abok aret wone yorogo logonet,

¹⁸ “At Kitikiya it Yekura inowe endagembogut wonage eyom paga aap o Moreteyet mendek endage Mika nogo nen it Yekura mendek abok aret wone yorage logonet, At Omaawi Lombok Menggerak Aliku ALA nen yegerak nogo yi aret. O Tiyon ti, yabu waganggo mengga kwak eerogo pege, O kota Yerutalem ti, yigirik-noonom eerak logonak logowak nduk, eerogo pege, Ndi, puut paga nawi wurik wonage nogo eyoongga tibinik-wandinik eerogo pege, Eerigin, yegerak o, yinuk, yoragagerak.

¹⁹Wone ti yoragagerak paga it Yekura inowe endagembogut Kitikiya nen ilik, it aakumi Yekura menggaarak abok aret nen a, Mika warogo pereegwaarak mbakop? At Kitikiya nogo Aliku ALA agabiti mbake logonet, Ninabuwa mbaru o, yinuk, yoreegerak nogo lek a? Ndi, yoge mbareegi, Aliku ALA nen aaninggin eeppiyoorak yoragagerak nogo eeppiyoolik iniki yanggoppunuk, puk agagerak nogo lek a? Puk agagerak kwe, nit yi perak, aaninggin mondok iya lombok mendek ninoba kwippatiyak nduk, eeko ogoorik o,” yinuk, yorogogwaarak.

²⁰Ti yorogogwaarak nogo ti, o kota ti inom, o nggween ti inom, eeppuurak Ala yoge kagak at Yeremiya nen yorage nagagerak nogo ndak-ndak, aap alik ambi o Kiriyat-Yeyarim mendek Temaya aput endage Uriya kunduk, “Aliku ALA yegerak kenok, yokkiragi o,” yinuk, yorage nagagerak me,

²¹aap inowe endagembogut Yoyakim inom, at awuri inom eeka inom, aakumi inoweewi inengga warak abok inom, nen at Uriya wone ari nagagerak nogo inaruk konembunuk, aap endagembogut nen at Uriya warikit nduk eeke mbareegi, at Uriya nogo aruk konembunuk, agabiti nen kole o Metit nagagerak.

²²O Metit time kole nagagerak wonage me, at aap endagembogut Yoyakim nogo nen aap Akobot aput Elanatan aap ando inom nappiyareegerak

²³o Metit nanuk Uriya nogo o Metit nen wonok aap endagembogut Yoyakim nogo wogori wogo mbareegwa, Wa'nip o, yorage mbareegi, wooluwak paga wappogo nogogwaarik, eebe it aakumi inendage lek mendek taambiigo menggam nogome taambereegwaarak me, yorogogwaarak.

²⁴Togop kwe, aap Tapan aput Akikam nogo nen aap Yeremiya ari ti, op negen mbake me, aakumi nen waruwak nduk, wogoroolik ili eerogo pereegerak.