Read Western Dani Yeremiya 29 Bible Online

Yeremiya 29 - Western Dani bible

Yeremiya 29

¹ It aakumi inoweewi yumbunik o Mbaben piya nagagerak inom, it aap Ala unde inom, Ala nen yorage kagak yoraga inom, aakumi ando abok aret at Nebukanetat o Yerutalem nen wogoren o Mbaben piya nagagerak inom, inake Ala yoge kagak yoraga Yeremiya nen o Yerutalem logonet, liiru mbanogo nappiyareegerak wone nogo yi aret.

²Ti eereegerak nogo ti, it Yekura inowe endagembogut Yoyakin inom, at agalo kwe nggwok nogo inom, aap endagembogut awi o nggwok abe wurik me eyabu eeka inom, it aap inengga warak o Yekura mendek, o Yerutalem mendek, inarum menggaarak inom, it eyo paga, mbutiwak paga, ineenggi amburu lombok eeka inom, it abok aret o Yerutalem nen kugun wogoren o Mbaben piya nogogwaarak wonogwe iigak, liiru mbaneegerak.

³Liiru mbambunuk, at aap Yekura inowe endagembogut Terekiya nogo nen aap Tapan aput Elata inom, Kilikiya aput Nggemariya inom, aap endagembogut Nebukanetat o Mbaben wonage me, wone wonok nappiyareegerak nogwe me, liiru mbanak ti, inom wonok nawak nduk wogoragagerak. Liiru eebe mbanak nogo yi o.

⁴Kit aakumi o Yerutalem nen kugun wokkiren o Mbaben pinagi nawak nduk, at Omaawi Lombok Menggerak Iterali inogoba Aliku Ala nen eeppiige mbareegi, pinagi nogogwaarak wonogwe nogo wone yokkirage yi aret.

⁵“It o wuppunuk time aret ye mbambatinuk wonogwe, ineyabu eeppunuk, inale'nggen paga inambi-mbiingga nunggwi,

⁶inakuwi woppiinok, inapurilogwe kumi inom, aap inom, ndaganakwi, ndi, inombowologwe-komologwe ndaganako logowak nen inapuri inakuwi kolaawak nduk, komologwe inagalo-inogoba inom wone mbanggwi, inapurilogwe komologwe nogo inogonggelomini inom lambumbiigwi, eeko logowak o. Inapuri wigannaga'lek iyo, ambik aruwak nduk, ndaganakak mban eeko logowak o.

⁷An nen kugun wogoren piya noorak kooneegim o kota nogome wonogo logonet, o abolok lek kagak iniki ale'nggen paga logowak nduk eekwi, o ti, obeelom age kenok, it togon iniki ugun tayenak logogun me, o kota ti obeelom logowak nduk, Naliku ALA nggino yo'nugwi, eeko logowak,” yegerak o.

⁸At Omaawi Lombok Menggerak Iterali inogoba Aliku Ala nen abet aret yegerak nogo yi o. “It aap, Ndogop arigin, yaga inom, tili pagangga inom, inenggela'me logonet, pilit agan nugwi nogo inaruk konenggwi, inabi kagaatak mbininogo yorogwe nogo liippugwi, eerugwaarik o.

⁹It aap ti, an nen nappiya woroolik kagak, Ala nen yegerak o, yinuk, we piliret an nendage kunogo agan nugwi me, inoone konenugwaarik,” yegerak o.

¹⁰ At Aliku ALA nen yegerak nogo yi aret. “It an napuri aakumi Mbaben mendek inayeloman a'nuk wonogwe iigak, tahun 70 abu ari nage kenok, an liippiige logominggirik, iniyokan o yime piya woroorak koonogo pereegirak nogo ndak-ndak aret eerigin,” yegerak o.

¹¹Aliku ALA nen ari logonet, “It eeppiyoorak koonogo pereegirak nogo ti, an neenu aret o. An maluk eeppiyoorak koonulik o. Ata, iniki ugun tayenak wonogwe, Peebi obeelom eeppinaniyak o, yinuk, iniki abu lunik wonogwe, eeko logowak nduk, koonogo pereegirak o.

¹²Ti eyom paga, Yeenggwa niret o, yinuk, inoone nggwok paga yo'nugwi, ndi, nowagam woraanuk, tamban eekwi, eekwi iinok, inoone yogwe nogo naruk konenigin aret o.

¹³ Iniki mbere lek ambit a'nuk, kwaa'nabit wogo logomenggaarik, an kwaa'neyaagun,” yegerak o.

¹⁴Aliku ALA nen ari logonet, “It an kwaa'nabit nugwi iinok, neyaawak nduk, neebe nigiige logominggirik, keele maarogo piya nogogwam nen iniyokan wogoren wage, it mappiyareegirak yi aakumi ndi aakumi inenggela'me wonogwe me nen kuwak eerogo piinok, kugun wogoren nawak nduk, eeppiyareegim nogome nen iniyokan piya wage, eerigin o,” yinuk, Aliku ALA nen aret yegerak o.

¹⁵Kit yogo logonet, “Aliku ALA nen aap yorage kagak yo'niraga o Mbaben yime yo'nirogo logowak nduk, mippiyareegerak o,” yinuk, yogwe kwe,

¹⁶aap Ndawut wone lengganogo yorage nagagim endagembogut kwi'ndak wonage inom, it kinowe-kinawot kinom wokkiren noolik o kota yime iigak, nogogutak it aakumi abok aret inom, eeppiyoorak Aliku ALA nen yegerak nogo yi aret.

¹⁷At Omaawi Lombok Menggerak Aliku ALA nen abet aret yegerak nogo yi o. “An nen wooluwak paga inooruwak nduk, nappiya wage, mbi noogelo inoba piige, kugilingga inoba kwippiige, eeriminggirak paga eyo wuliinggen abu pili agaatak aakumi nunggulik kwak aganabigin o.

¹⁸It inom wim mbanak nen inookwi, mbi abu nen kanggwi, kugilingga inoba a'nuk kanggwi, eeruwak nduk, eeppiinet nage neenok, it aakumi inabu'me piinok o nggween paga wonogwe yi abok aret nen, Inogole o, yinuk, yogwe, it aakumi inanebunu lombok inenggela'me mak eerogo piyaminggirak nogo nen pulunogo piigwi, Yi aago nugwi yi, iya, yinuk, yogwe, inagi'ndok kanggwi, miyuk-meya eerogo piigwi, eeko logowak nduk, eerogo piyaagin,” yegerak o.

¹⁹Aliku ALA nen ari logonet, “It aap an nen yorage neegak yoraga nayeloman mini nen an noone yorogo logowak nduk kulinik-kalinik nappiya wagak mban eeke nagagirak kwe, it yime wonogwe nogo inaruk konenggwi, ndi, it wogoren nogogwaarak time wonogwe kunduk, togop aret inoone konenggwi, eeka'lek me, an togop aret eerigin o,” yinuk, Aliku ALA nen yegerak me, yokkiragi o.

²⁰Togop me, o Yerutalem nen kugun wokkiren o Mbaben pinagi nawak nduk eeppiyareegerak wokkiren nogogwaarak kit yi wae. Aliku ALA nen wone yegerak yi, kinaruk liirogon koneninip o.

²¹It aap Kolaya aput Akap inom, Maateya aput Terekiya inom, nen, “Ala yegerak me, yokkirogo o,” yinuk, Ala endage kunogo pilit yokkirogwe iinok, at Omaawi Lombok Menggerak Iterali inogoba Aliku Ala nen yegerak nogo yi aret. “An nen aap mbere ti, it Mbaben mendek inowe endagembogut Nebukanetat eenggime wogoge neenok, it ineebe ti, inoreewi inenggaanom paga aret inoorigin o.

²²It ti agan nugwi paga aakumi o Yekura nen kugun wogoren Mbaben piya nogogwaarak wonogwe nogo nen it ambi kugi pulunogo piyoorak mbakwi kenok, yogo logorak nogo yi aret. Aap Akap Terekiya imbirak it Mbaben inowe endagembogut nen ineenik ngge-ngge kani kunik me mambiyareegerak nogo kwak, Aliku ALA nen togop aret eekkinabuwak o, yinuk, yorogo logogun o.

²³It aap mbere ti, Iterali inenggela'me wonogo logonet, eeriyak lek mendek eerit nugwi, it inoreewi inakuwi aret kwe, kagak wuginakwi, ndi, an nen wone yoroolik neegak nendage kunogo inoone pilit agan nugwi, eeko menggaarak nogo an neenu wonage, ndi, yorogwe nogo nenegen iige, eeke minggirak me, it togop aret eerogo piyaagin o,” yinuk, Aliku ALA nen aret yegerak me, liiru yi mbanggiragi o, yinuk, liiru mbanogo nappiyareegerak ti aret.

²⁴Aliku ALA nen, “Aap Nekelam mendek endage Temaya wone yoru o,” yegerak nogo yi aret.

²⁵“At Omaawi Lombok Menggerak Iterali inogoba Aliku Ala nen ari logonet, At Temaya ti, alik endage paga liiru mbanogo it aakumi abok o Yerutalem wonogwe inake inom, aap Ala unde Maateya aput Tepaniya ake inom, it aap Ala unde ando abok aret inake inom, nappiya wage logonet, aap Tepaniya yoge,

²⁶Tepaniya wae. At Aliku ALA nen at eebe unde logonet awi wurik arum logonok nduk aap Ala unde Yoyara obaane'me kat aret mippagagerak o. Ndi, it aap Ala yorage kagak yoraga ti, kumili negen yogwe me, it aap ti mendek inoone agan nogwe iinok, ineenggi-iniyok keele maarogo piige, inenggaanok mbutigeele paga yilunogo piige, eeriyak aret me,

²⁷aap Anotot mendek endage Yeremiya nogo ti, kinenggela'me logonet, Ala nen yo'nege kagak yokkirage agarik o, yinuk, agan nage kagak nonggop nduk mberega'lek teppege agandik?

²⁸At Yeremiya nen wone agago nit o Mbaben yime wonogwe me nappinani wage logonet, Kit aap kugun wogo mendek ti, o time abu logorak togon me, o wuppunuk, time aret ye mbambatinuk wonogwe, kineyabu eeppunuk kinale'nggen paga kinambi-mbiingga nunggwi, eeko logonip o, yinuk, wone eerogo nappiya wagaarak me nduk, yokkigi o, yinuk, liiru mbanogo Tepaniya nappiya wagaarak, Ala nen yegerak, yoru o, yinuk, yegerak me, kat Temaya yokkigi o,” yinuk, yoreegerak.

²⁹Ndi, liiru mbanogo aap Ala unde Tepaniya nappiya wagaarak nogo, at Tepaniya nen Ala yoge kagak yoraga Yeremiya enggaanom paga luneegerak.

³⁰Lungge mbareegi, Aliku ALA nen Yeremiya yoge logonet,

³¹“Kat nen wone agago it aap kugun wogo mendek wonogwe me abok aret nappiyoorak nogo yi aret. At Aliku ALA nen aap o Nekelam mendek endage Temaya eeppuurak yegerak nogo yi o. An nen nappulik kagak at nen pilit wone it abet mbaruwak nduk, Ala nen yegerak o, yinuk, yorage nagagerak me,

³²Naliku ALA nen, Aap Nekelam mendek endage Temaya ti nen, Aliku ALA ari nogo woorak, Nineebi, mbako logonip o, yinuk, yorage nagagerak paga, at inom, at paga wiganak inom, aaninggin abet aret inoba kwippiyaagin me, it aap inanobak ti mendek ambi it inenggela'me time iigak, an napuri obeelom eeppiyaagin nogo, inigen kaagun abu lek aret o, yinuk, Aliku ALA nen aret yegerak me, Wone yogop yegerak o, yinuk, wone eerogo nappiyet o,” yinuk, yoreegerak.