Read Western Dani Yeremiya 30 Bible Online

Yeremiya 30 - Western Dani bible

Yeremiya 30

¹At Aliku ALA nen wone at Yeremiya yoreegerak nogo yi aret.

²“Iterali inogoba Naliku Ala nen wone an nen yokkege nagagirak ti abok aret mbuku ambi paga liiru mbanogo pu o,” ari nagagerik,

³“Napuri Iterali inom, Yekura inom, keele maageren piya nogogwam time me nen iniyokan piya woraagin o, yinuk, Naliku ALA nen aret yagi o. Piya wage logominggirik, it inombomini unde eeppatinuk logowak nduk, inanggween wogoragagim nogome aa'nduk wonogogwa kwak logowak nduk, eerogo piya woroorak eyom abet aret panggoni woraagin o, yinuk, Naliku ALA nen aret yagi o,” yoreegerak.

⁴At Aliku ALA nen it Iterali mendek inom, Yekura mendek inom, eeriyak wone yereegerak nogo yi aret. “At Aliku ALA nen ari logonet,

⁵Inagabiti nen inoone nggwok yogwe, Iniki ugun tayenak lek inamineeri ne agan nage kagak inoone yogwe, Eekwi nogo naruk konengge agaarik o.

⁶Wone kin wogiige logomenggendik, it yokkugwi liippuurak nogo yi aret. Aap nen elege ndaganaburak op mbaken? Lek aret kwe, Kumi elege ndaganaburak yagan wako logonet, ineenggi inaanogum tebenggologwe, Inenete ndongga kerenogo piige, eeko mengga kwak, It aap ti, nonggop nduk togop eeppatinuk wonogwe iige agarik o?

⁷Ne ti ari wage kenok, aakumi nen, Ne ti iya, mbakwi, Ne aa'nduk arit wagagerak ti kwak lek mondok alik negen age kogwe, Eeko logogun o. Ne ti eyom paga aaninggin mondok alik negen it Yakup mendek inoba kwi'narigin kwe, Inagap ndarigin,” yegerak o.

⁸At Omaawi Lombok Menggerak Aliku ALA nen ari logonet, “Ne ti eyom paga eyo aaninggin tapi inuut paga pugu nogo kalenogo pogo mengga kwak, Aaninggin inoba wonage nogo lek eerogo piige, Keele maarak negen aakumi inayeloman a'nuk eekwi nogo piinogo piige, Eerigin me, Aakumi inambik ambinom inayeloman a'nuk eeko logogun lek o.

⁹Ata, Naliku inogoba Ala an inom, at Ndawut mippiminggirak inowe endagembogut inom, Nit mban ninayeloman logonet, eeko logogun,” yegerak o.

¹⁰ “Togop me, nayeloman Yakup paga ndarak ti, inagabiti mbakwi, Iterali paga wiganak ti, inaganak wakwi, Eerugwaarik o,” yinuk, Aliku ALA nen aret yegerak me, yokkiragi o. At Aliku ALA nen ari logonet, “It o nda wonogwe me nen inagap ndake, It Yakup paga wiganak mbo piya nogogwam nen wogoren wundi wage, Eerigin o. It Yakup mendek aa'nduk o abolok lek kagak iniki ugun tayenak wonogogwa kwak togop aret logogun o. Op wonogwe me, it ambi nen iniki ma'naruwak nduk, eeppiyaagun lek o.

¹¹An ninom wonogwe me, inagap ndake logogin o. Yi aakumi ndi aakumi abok aret inenggela'me mak eerogo piyareegirak nogo it lek eerogo piyaagin kwe, It an napuri perak, lek eerogo piyaagin lek o. Iniki koonnaruwak nduk, maluk eekwi onggo inoba piyaagin lek ti lek, piyaagin aret kwe, Eerumenggaarak ndak-ndak mban inoba piyaagin o,” yinuk, yegerak me, yokkiragi o.

¹²Aliku ALA nen yegerak nogo yi aret. “Inawin nogo andi lek ariyak iinggen ambi lek aret o. Inawinde-inobaande aago nogo obeelom ariyak ti kunduk, meek aret o.

¹³Ineebe obeelom eeginake, ndi, inawin kunik lek ariyak iinggen kunduk wonage, lek aret me, It inawone mbaniyak ambi lek aret o.

¹⁴Inom iniki kunik mendek nogo nen ineebe muk inami ogwe, It inoba age nogo liippiigwi, Eeka'lek aret agaarik o. Wone yugu kagak iya tit taganggwi, Maluk abu nggwok lombok eekwi, eekwi paga It inom wim mbanak nen inooko mengga kwak, an nen inooke, It aap inogogun worokot nen yogwe iigak, taganggwi iinok, onggo inooko mengga kwak, inooke, Eereegirak o.

¹⁵Wone yugu kagak iya tit taganggwi, Ndi, maluk nggwok lombok eekwi, eekwi paga An nen aret aaninggin inoba piyareegirak me, Inawin kunik andi lek ariyak iinggen nogo lek kenok, andi nen, Nawin o, yinuk, nonggop nduk inoone nggwok paga yogo agaarik?

¹⁶Togop aret kwe, it an napuri inambeme yonggorinakwi nogo aakumi alik nen it inambeme yonggorinakwi, It an napuri wogoren mbo piya nogwe nogo, aakumi alik nen it wogoren mbo piya nogwe, It inamendek kugun waganggwi nogo, it inamendek kugun waganggwi, Ndi, it an napuri ineebe kugun wogoren nogwe nogo, aakumi nen it ineebe kugun wogoren nogwe, Eeruwak nduk, An nen eerogo piyaagin kwe,

¹⁷Aakumi nen, It yi, Tiyon mendek abu mbo pugu o, yinuk, yorogwe me, an nen obeelom eerogo piige, Inawin amburu eerogo obeelom eeginake, Eerigin o,” yinuk, Aliku ALA nen aret yegerak me, yokkiragi o.

¹⁸At Aliku ALA nen yegerak nogo yi aret. “It Yakup paga wiganak inawi alom paga aa'nduk abe wonogogwa kwak eerogo piige, Inabuwa nen it wonogo menggam inanggween nogo obeelom eerogo pege, Kota ti, yigirik-noonom agagim obaane'me wuruwak nduk, koongge, Ndi, aap inowe endagembogut awi o nggwok abe wurik wonagagim nogome wurik kaawak nduk, eeppiige, Eerigin o.

¹⁹Ti eeke neenok, inenggela'me nen, Wa! yo'nogo logonet, ndawi wakwi inoone konenggwi, Ndi, inale'nggen nen inoone yogwe konenggwi, Eeko logogun o. It ineebe mbuuluk aga'lek ambik aret wigannaruwak nduk, eerogo piige, It meek eerogo piiga'lek inendage tiyappiigo logowak nduk, eeppiige, Eerigin o.

²⁰Inapuri aa'nduk wonogogwa kwak wonogwe, Ndi, an napuri aa'nduk kuwak aago iige nagagi kwak wonogwe, Eerugun me, It aakumi ambi mendek nen it tebenogo piigwi iinok, an nen onggo eeppiige logogin o.

²¹It inowe inarum logorak nogo it mendek aret mi'nage, Ndi, it inowe endagembogut nogo inenggela'me nen mi'nage, Eerigin o. Ta nen iniki mba'nuk agabiti mbaka'lek nowagam woroorak mbakop? Lek me, an nen at ti, eeppege neenok, nowagam wa'nuk, nimbirak kunik aret logogin o.

²²It nen an napuri aret ogwe, ndi, an nen it inogoba age, eerugun o,” yinuk, Aliku ALA nen aret yegerak me, yokkiragi o.

²³O wiya nabuk togon wage menggi kwak, Aliku ALA anini mi'nage, Ndi, o wiya nombok-kombok warit wage menggi kwak, it aap maluk eeka nogo anini inoba kwippiinet wage, Eeke kaamunggup o.

²⁴At Aliku ALA anini kani kunik negen inoba kwippiinet wage logonet, Inikime nen, “Yogop eerikit,” mbake nogo worok togon eeka'lek kagak, iniki tayok yigin lek o. Peebi kit nen, “Nogo yi, nduk, yereegerak kogo o,” yinuk, kineenu arumunggup o.