Read Western Dani Yeremiya 35 Bible Online

Yeremiya 35 - Western Dani bible

Yeremiya 35

¹ At Yotiya aput Yoyakim nogo aakumi Yekura inowe endagembogut wonage kagak, Aliku ALA nen wone at Yeremiya yoreegerak nogo yi aret.

²“Kat nen it aap inanebunu Erekap mendek wonogwe me nage logomenggendik, Woraanip o, yoraanuk, ineebe wogoren Naliku ALA nawi wurik me ko ambi ogoorak me time piya wa'nuk, niyo anggur amburu toologo wogoraanu o.”

³Yo'nege mbareegi, nage nagagirik, at aap Kabatiniya ombooluk Yeremiya aput endage Yaataniya inom, owe-awot inom, apuri aap inom, it aap Erekap paga wiganak abok aret wogoren

⁴Aliku ALA awi wurik me at aap Ala wone liippega Yigaraliya ombowologwe aap Kanan apuri nogo, inago ogoorak me time piya wagagirak. It inago ogoorak ti, Ala awi wurik tu unggwogo menggam arum waka aap Talum aput Maateya ago ogoorak irimbaga wonage, ndi, ko abeenok ti, it aap inengga warak inago ogoorak wonage, eerak aret wonagagerak.

⁵Time piya wa'nuk, anggur amburu ene korok togon toolak inom, niyo kombet waka inom, waganogo it aap inanebunu Erekap inowagam pit nage nagagirik, “Anggur amburu yi, nanip o,” yinuk, yoragagirak.

⁶Yorage mbareegi, onggo yo'nogo logonet, “Nit ninombo Erekap aput Yonarap nen, Kit inom, kit paga nda'narugun inom, anggur amburu nonggo logorak mondok mage o, yinuk, wone lengganogo yo'niragagerak me, nit anggur amburu nunggulik o.

⁷Wone ti, yo'nirage logonet, Kit kinawi wukkologwe, yi mendek ndi mendek awi yumbunit nogwe, anggur awi yakwi, eeko logorak mage mban. Ata, kineenik nggorek logomunggup nduk, o nggween paga aap nggiru kwak ya agak nogo logonet, ooliya-ooliya wuppunuk, logomunggup, yo'niragagerak.

⁸At Erekap aput ninombo Yonarap wone lengganogo yo'niragagerak ti abok aret eerit wundi wogo logonet, nit inom, ninakuwi inom, ninapuri wologwe-komologwe inom, abok aret nen anggur amburu nunggwi,

⁹nit logorak ninawi wukkologwe, anggur awi yakwi, yi awi ndi awi yumbunit nogwe, awi mendaarogo pugwi, eekulik aret o.

¹⁰Ata, at ninombo Yonarap wone lengganogo yo'niragagerak nogo abok aret eeko logonet, ninawooliya wuppatinuk, time aret wonogo monggoorak o.

¹¹Togop eeko monggoorak kwe, at aap Mbaben inowe endagembogut Nebukanetat nogo, o yi tebenggolaakit nduk unggwi wage kagak, nit nen yogo logonet, It aakumi Mbaben mendek inom, it Aram mendek inom, inawuri ineegin warak nen nit ninoorukwak, o wunnarok kole Yerutalem nawok o, yinuk, o Yerutalem yime ari wogogurak wonogo ogoorik o,” yinuk, yo'nereegwaarak.

¹²Yo'nogo nogogwaarik, awo wonogwe iigak, Aliku ALA nen wone an yo'nereegerak nogo yi aret.

¹³“At Omaawi Lombok Menggerak Iterali inogoba Aliku Ala nen ari logonet, Kat nen it aap Yekura mendek inom, it aakumi o Yerutalem mendek inom, wonogwe me nage logomenggendik, wone yoroorak nogo yi aret. An wone yorage ti, it mamumbunuk eeko logorak meek ya? yinuk, Aliku ALA nen yegerak o.

¹⁴At Erekap aput Yonarap nen, Anggur amburu noorak mage o, yinuk, apuri wone lengganogo yoragagerak nogo, liirogon porogo logonet, inombo nen wone lengganogo yoragagerak mugurok, o yogondak kuli anggur amburu nengga'lek aret menggaarak kwe, it perak, an nen kulinik-kalinik yoragak mban eeke minggirak kwe, noone konembunuk eeka'lek aret agaarik o.

¹⁵Kulinik-kalinik an yorage neegak yoraga nayeloman mini nogo, nappiya wagak eeke neenok, At Ala wonage kagak kinagugiwak ayuk wuppunuk mugurok noorak mage o. Kit maluk eerit nugwi nogo mbo punuk, kiniyokan wogwe, kinobaabut alik ngget mendek eekkologwe, eekwi kiinok, Aliku ALA nen kit inom, kinombomini inom, nggween wokkiragagim nogome aret logomunggup o, yinuk, yoragak mban eeko nogogwaarak kwe, it nen an noone liippugwi, inaruk konenggwi, eeka'lek aret agaarik o.

¹⁶Aap Erekap aput Yonarap paga wiganak nen inombo wone lengganogo yoragagerak nogo, inaruk konembunuk liirogon aret eeko nogogwaarak kwe, it aakumi ti perak, an yorage nogo inaruk koneniyak ineebi mbako menggaarak, yegerak o.

¹⁷Togop me, at Omaawi Lombok Menggerak Iterali inogoba Aliku Ala nen yegerak nogo yi aret. It Yekura mendek inom, o kota Yerutalem wonogwe inom, an nen wone yorage nagagirak kwe, inaruk konenggwi, wiirage nagagirak kwe, Wae, yinuk, yo'nugwi, eeka'lek iinok, Aaninggin mondok alik negen kinoba kwippinagagin o, yinuk, yoragagirak nogo aret inoba kwippiyaagin abet aret mbako logowak, yegerak, yora nak o,” yinuk, an yo'nereegerak.

¹⁸Yo'nege mbareegi, an Yeremiya nen it inanebunu Erekap mendek nogo yorage logonet, “At Omaawi Lombok Menggerak Iterali inogoba Aliku Ala nen yegerak nogo yi aret. It inombo Yonarap nen wone lengganogo yoragagerak abok aret liirogon konembunuk eekwi, ndi, Yogop ee'nu ndogop ee'nu, yoragagerak nogo pippunuk mugurok nogwe, eeko menggaarak me,

¹⁹aap Erekap aput Yonarap paga wiganak nen it nake eekwi nogo, ineebe lek arugun lek mondok-mondok ambi mi'nagak ambi mi'nagak eeko logogun o, yinuk, At Omaawi Lombok Menggerak Iterali inogoba Aliku Ala nen yegerak me, yokkiragi o,” yinuk, yoragagirak.