Read Western Dani Yeremiya 36 Bible Online

Yeremiya 36 - Western Dani bible

Yeremiya 36

¹ At Yotiya aput Yoyakim nogo it Yekura inowe endagembogut a'nuk, wone lengganogo yorage kagak, tahun kenagan eeppunuk, ambi age paga Aliku ALA nen at Yeremiya wone yoreegerak nogo yi aret.

²“It aakumi Iterali inom, Yekura inom, aakumi inanebunu lombok abok aret inom, nen eeko logorak wone at Yotiya endagembogut logonet wone lengganogo yorage kagak yokkege nagagirak nen nok, yogondak kuli yokkege nogo abok aret mbuku pirik-perek aago wagangge logomenggendik, ti paga liiru mbanogo pu o.

³An nen it Yekura mendek aaninggin-paaninggin abok aret inoba kwippiyoorak koonogo pigirak nogo inaruk konenggo logomenggaarik, it inalitak lombok maluk eerit nugwi nogo mbo pugun ilik, lek a? Ndi, abet aret mbo pugwi iinok, noone taganogo punuk eekwi inom, it maluk eekwi inom, lek eerogo pigin o,” yinuk, yoreegerak.

⁴Yoge mbareegi, at Yeremiya nen aap Neriya aput Mbaruk wiige nagagerik, Aliku ALA nen wone at yoreegerak nogo abok aret at yoge kagak mbuku pirik-perek aago nogo paga liiru mbanogo pereegerak.

⁵Mbanogo pege mbareegi, at Yeremiya nen Mbaruk nogo yoge, “An ambi noba yiluk yegerak paga Aliku ALA awi wurik me ungguurak meek me,

⁶inambe mage negen eeppunuk wonogwe ne ti paga, Aliku ALA awi wurik me unggwi nage logomenggendik, wone an yokkege neegak mbuku pirik-perek aago paga liiru mbanogo pegendak nogo, aakumi kuwak aago wonogwe ti, inenggaanom paga lungge, it aakumi Yekura mendek inawi kota-kota nen wogwe kunduk, it abok inenggaanom paga lungge, eerumunggun o.

⁷Aliku ALA anini mbake, iniki aagi kani kunik negen mi'nage, eeke nogo, it aakumi yi, inoba kwippiyoorak yoragagerak ti mondok iya lombok mbanak me, lunemenggendak inaruk konembunuk, inalitik-inalitak Aliku ALA yogo logonet, Nit maluk eeko o, yinuk, inomaluk mbo pugwi iigak eerukwak, it abok inenggaanom lunumunggun o,” yinuk, yoreegerak.

⁸Yoge nagagerik, Ala yoge kagak yoraga at Yeremiya nen at Neriya aput Mbaruk yoreegerak nogo abok ndak-ndak eeke logonet, Aliku ALA awi wurik me time Aliku ALA nen yereegerak mbuku pirik-perek aago paga liiru mbanak nogo luni nagagerak.

⁹Aap Yotiya aput Yoyakim nogo aakumi Yekura inowe endagembogut a'nuk wone lengganogo yorage kagak, tahun 4 eeppunuk, ambi eerak tut 9 penenak ti paga, Ala enggaanom paga it aakumi Yerutalem mendek inom, o Yekura inawi kota-kota nen Yerutalem kuwak ari wogogwaarak abok aret inom, inambe mage negen eeppunuk logorak wone lengganogo yoragagerak me,

¹⁰at Yeremiya nen Mbaruk yoge kagak mbuku pirik-perek aago paga liiru mbaneegerak nogo, it aakumi abok aret Aliku ALA awi wurik me kuwak eerak wonogwe nogo, at o apit inake liiru mbangga Tapan aput Nggemariya ago ogoorak tu pak ambe Ngget Mbanak yogo menggam Ala awi wurik oore'nggam unggwi wogo menggam pa'nggwe irimbaga taati nen luneegerak.

¹¹Lungge mbareegi, aap Tapan ombooluk Nggemariya aput Mikaya nogo, Aliku ALA yereegerak mbuku pirik-perek aago mbanak luneegerak nogo aruk konengge nagagerik,

¹²wambi wa'nuk, it aap inengga warak, o abok inake liiru mbangga Elitama inom, at Temaya aput Ndelaya inom, Akobot aput Elanatan inom, Tapan aput Nggemariya inom, Kananiya aput Terekiya inom, aap inengga warak eegu alik abok aret inom, aap endagembogut awi o nggwok wurik me at o abok inake liiru mbangga ago ogoorak me nogome kwi'ndak wonogwe me, iya nagagerak.

¹³Iya nage nagagerik, at Mbaruk nen mbuku pirik-perek mbanak aakumi ambik inenggaanom paga lungge aruk koneneegerak nogo mbininogo yoragagerak.

¹⁴Aap Kuti nen aput Telemiya ndake, Telemiya nen aput Netaniya ndake, Netaniya nen Yekuri ndake, eereegwaarak me, it aap inengga warak nogo nen aap Yekuri nogo yogo logonet, “At aap Mbaruk nen mbuku pirik-perek aago paga liiru mbanak aakumi ambik inenggaanom paga lunggerak ti, wonok woraawak nduk, kat yori nak o.” Yoreegwaarak yori nage mbareegi, Mbaruk nogo mbuku pirik-perek aago liiru mbanak nogo wonok, it wonogwe me wagagerak.

¹⁵Wonok wage mbareegi, it nen Mbaruk yogo logonet, “Ninawot wa! Kwi'na'nuk wone ti, nit ninenggaanom lunu o.” Yogo mbareegwa, inenggaanom paga luneegerak.

¹⁶Wone luneegerak nogo abok aret inaruk konembunuk, inaganak ngginuk ari logonet, inigen pet-pet yinuk, Mbaruk nogo yogo logonet, “Wone yagandak abok aret ti, wonok aap endagembogut yori nawok o.”

¹⁷Yogo nogogwaarik, at Mbaruk ambinom yogo logonet, “Mbaruk wae. Nonggop eerogo wone yi, liiru mbanggendak nogo nit yo'niret o. At Yeremiya nen yokkege kagak liiru mbanggendak ilik, lek a?”

¹⁸Yogo mbareegwa, at Mbaruk nen, “E o. Wone yi abok aret at Yeremiya nen an yo'nege kagak amburu mili paga mbuku pirik-perek aago yi paga liiru mbanogo pigirak o.”

¹⁹Yorage mbareegi, it aap inengga warak nogo nen at Mbaruk yogwi, “Kat Yeremiya kimbirak mbet kumaa'nari nanip o. Ndi, kumaarak wonogo logonet, Nit yime ogoorik o, yinuk, aakumi yoroorak abu mage o,” yinuk, yoreegwaarak.

²⁰Yogo nogogwaarik, mbuku pirik-perek aago liiru mbanak nogo aap liiru mbangga Elitama ago ogoorak me pogo nogogwaarik, aap endagembogut awoore'nggam nanuk, wone ti abok aret aap endagembogut mbininogo yoreegwaarak.

²¹Yogo mbareegwa, aap endagembogut nogo nen mbuku pirik-perek aago nogo aap Yekuri, “Wa nak,” yoge mbareegi, mbuku nogo aap o apit inake liiru mbangga Elitama ago ogoorak me wonage me wonok wage nagagerik, aap endagembogut inom, aap inengga warak at inom mi'ndak wonogwe nogo abok aret inom, inenggaanom paga luneegerak.

²²Ti luneegerak nogo ti, tut 8 penembunuk, ambi penenak paga o togwi nggut-nggut eeke kenok wonagak nogome togolowak kole ogobakkigirik kani kunik me togwi worakkolage taati kwi'ndak wonage eyom paga luneegerak.

²³At Yekuri nen mbuku pirik-perek aago mbanak nogo mbere mbiginik lungge kenok, aap endagembogut nen at liiru mbangga owaruk mbuuluk nogo paga mbanogo kani kunik me nogome mambege, kenagan mbiginik lungge kenok, mbanogo kani kunik me mambege, eerit-eerit mbuku nogo lek eerogo kani kuneegerak.

²⁴At aap endagembogut inom, awuri at ake eeka inom, wone ti abok aret inaruk koneneegwaarak kwe, “Wone yi, iya lombok, kogo o,” yinuk, inagabiti mbakwi, inayum iluk ambi nibinogo pakwi, eerulik aret.

²⁵Ndi, it Elanatan inom, Ndelaya inom, Nggemariya inom, nen mbuku pirik-perek liiru mbanak kani kungge kenok, “Togop eeke ti mage o,” yoreegwaarak kwe, aap endagembogut nen it yogwi nogo, mondok aruk konenulik aret eereegerak.

²⁶At aap endagembogut nogo nen it yogwi, nogo inoone konembunuk, puk ariyak op kwe, kagak aret, at aput endage warak Yera'meen nogo inom, Atiriyen aput Teraya inom, Aberen aput Telemiya inom, nen aap liiru mbangga Mbaruk kunduk, Ala yoge kagak yoraga Yeremiya kunduk, imbirak piginabi nawak nduk, yoragagerak kwe, Aliku ALA nen it aap ti, ineebe kumaappiyareegerak me, kwaariyoolik aret.

²⁷At Yeremiya wone yoge kagak, at Mbaruk nen mbuku pirik-perek aago paga liiru mbaneegerak nogo, aap endagembogut nen kani kungge mbareegi, Aliku ALA nen Yeremiya yoreegerak nogo yi aret.

²⁸“Kat nen mbuku pirik-perek aago alik ambi wagangge logomenggendik, wone aa'nduk yugu it Yekura inowe endagembogut Yoyakim nen kani kuneegerak paga mbanak wonagagerak nogo abok aret liiru mbanu o.

²⁹Ndi, Aliku ALA nen yegerak o, yinuk, it Yekura inowe endagembogut Yoyakim yoriyak nogo yi aret. It Yekura inowe endagembogut nen mbuku pirik-perek aago liiru mbanak ti, kani kumbunuk, at Yeremiya yoge logonet, Aakumi Mbaben mendek inowe endagembogut wage logomenggerik, o yi lek eerogo pege logonet, aakumi inom, inaanggumi inom, inenggaawak lek eerogo piyaagin o, yinuk, nonggop nduk, liiru mbanogo pegendak?”

³⁰Yoreegerak ti paga at Yekura inowe endagembogut eeppuurak Nalik Ku ALA nen ari logonet, “Ndawut wone lengganogo yorage nagagim at Yoyakim apuri wiganak paga ambi wone lengganogo yorogo logogun mondok lek aret o. At eebe kambemenggerak mbo pemenggaarak endekem wonage kagak, o liingge paga mo andi wake, oonikiya paga togwi nen miin tu eerogo pege, eeke logogin o.

³¹Ndi, at inom, at paga wiganak inom, at ake eeko menggaarak inom, maluk eekwi paga aaninggin mondok nggwik togon inoba piige logonet, it o Yerutalem menggaarak inom, it aakumi Yekura wonogwe me inom, an ari inaruk konenggo logolik me, aaninggin-paaninggin inoba kwippiinet noorak yoragagirak nogo aret inoba kwippiyaagin, yegerak, yori nak o,” yinuk, yoreegerak.

³²Yoge mbareegi, at Yeremiya nogo nen mbuku pirik-perek aago ambi waganogo at Neriya aput liiru mbangga Mbaruk nogo wogo'nuk, yoge kagak at Mbaruk nen it Yekura inowe endagembogut Yoyakim wone yugu mbuku pirik-perek aago paga liiru mbanak kani kuneegerak nogo ndak-ndak liiru mbanogo pege, ndi, wone ti mendek alik ambi inom aret liiru mbanogo pege, eereegerak.