Read Western Dani Yeremiya 37 Bible Online

Yeremiya 37 - Western Dani bible

Yeremiya 37

¹ It Mbaben inowe endagembogut Nebukanetat nen at Yoyakim aput Yoyakin obaane'me Yotiya aput Terekiya nogo it Yekura inowe endagembogut logowak nduk, mippereegerak.

²Mippereegerak aret kwe, at Terekiya inom, at inom eeka inom, it aakumi o time menggaarak inom, Aliku ALA nen Yeremiya yoge kagak it yorage nogo liippega'lek aret wonogogwaarak.

³Togop aret wonogogwaarak kwe, ne ambi paga aap endagembogut Terekiya nen aap Telemiya aput Yukan inom, Maateya aput Ala unde Tepaniya inom, imbirak Ala nen yoge kagak yoraga Yeremiya yori nawak nduk, nappiige mbareegi, nogo nogogwaarik, “Nit ninake ninogoba Aliku Ala yo'nok nduk, yokkiri wogo o,” yoreegwaarak.

⁴At Yeremiya nogo awo keele maarogo mambega'lek aakumi inenggela'me time we ugun nege-wege eeke kagak,

⁵it aap Mbaben mendek o Yerutalem tebeni ungguwok nduk eekwi me, “Lek o. It aap Pirawun awuri ineegin warak inom o Metit nen muk wundi wagaarak o,” yogwe nogo inaruk konembunuk, o Yerutalem mbo punuk nogwe nogo eyom paga yori nogogwaarak.

⁶Yori nogo mbareegwa, Aliku ALA nen at yoge kagak yoraga Yeremiya wone yoreegerak nogo yi aret.

⁷“Iterali inogoba Aliku Ala nen ari logonet, Kin wokkeyaawak nduk, it nappiya wagaarak nogo nen Yekura inowe endagembogut yoriyak nogo yi aret. Aap Pirawun awuri ineegin warak yeenggwaaraawok nduk, wundi wagaarak nogo iniyokan iname o Metit nagun kwe,

⁸it Mbaben mendek perak, iniyokan wogo logomenggaarik, it inom wim eeko logonet, o kota yi, tebenogo piinok, o kani mbelak-mbalak eerogo pugun, yegerak o.

⁹Aliku ALA nen yegerak nogo yi aret. It aap Mbaben mendek nogo iname mondok aret nagaarak me, iniyokan woraagun lek, mbakwi ti paga it aret inambokan laganggologwe me, togop mbarugwaarik o. Woraagun aret!

¹⁰It aap Mbaben mendek inawuri wim eeka abok aret inoori wogwe nogo mugogo wumbiyoorak op nen, it mbaganggwi iigak, eegu maale warak ooliyana puk arit namenggaarak nogo nen aret wundi wogo logonet, o kota yi, kani pup eerogo pene, yegerak, yori nanip o,” yinuk, yoragagerak.

¹¹It aap Mbaben mendek ineegin warak nogo Pirawun awuri ineegin warak inom wogwe iinok, o kota Yerutalem mbo punuk nogo mbareegwa,

¹²at Yeremiya nogo o Mbeniyamin wonogo menggam owe-awot time wonogwe nogo nen inanggween yate kwak tumbukwi me, “An ambi wo'niruwak o,” yinuk, o Yerutalem nen wundi naakit nduk,

¹³Mbeniyamin Tu Unggwogo Menggam ari nage me, it aap tu pak mbanak arum waka inowe Kananiya ombooluk at Telemiya aput Yeriya nogo nen at Yeremiya pippunuk, yoge logonet, “Wulaga! Kat aap Mbaben mendek kinom ariyak nduk wundi nage keegi o.”

¹⁴Yoge mbareegi, at Yeremiya nen onggo yoge logonet, “Kat yagandak ti lek o. An aap Mbaben mendek ninom ariyak nduk nage lek o!” yoreegerak kwe, at aap Yeriya nogo aruk konengga'lek aret at Yeremiya piganok aap inengga warak wonogwe me nogome pi wagagerak.

¹⁵Pi wage mbareegi, it aap inengga warak nogo nen at Yeremiya mba yogo logonet, yawi wako nogogwaarik, o apit inake liiru mbangga Yonatan ame aakumi keele maarogo mambiigak eerogo pereegwaarak me nogome aret mambereegwaarak.

¹⁶Keele maarogo mambiigak o abu'na nggween nenaarogo pit nogogwam ambi me mambereegwaarak wonage kagak, o ndime ari nagagerak.

¹⁷Ari nage mbareegi, ne ambi paga aap endagembogut Terekiya nen aap endagembogut awi o nggwok abe wurik me at Yeremiya nogo pi woraawak nduk, yoragagerak wonok pi wogo mbareegwa, kote yoge logonet, “Aliku ALA nen wone ambi yokkegerak ilik?” Yoge mbareegi, “Ambi wonage o! Kat keebe waganogo aap endagembogut Mbaben mendek eenggime pagagun, yegerak o.”

¹⁸Yoge nagagerik, at Yeremiya nen aap endagembogut Terekiya nogo wone ambi yoge logonet, “Kat inom, kawuri kinom eeka inom, aakumi o yime wonogwe inom, maluk ngge eeppinagagirak kenok, an keele maarogo mambiigo menggam mambanggotak?

¹⁹Aap endagembogut Mbaben mendek nen kat koori wogwe, o tebenggologwe, eeri woraagun lek o, yinuk, it kat kawuri, Ndogop age kaamunggun o, yinuk, yokkogo menggaarak nogo ineebe ngge o?

²⁰Nogoba kendagembogut wae. An yokkirikit mbakirak yogondak yokkege yi, mbo puurak mage o. Ata, karuk liirogon konengge logot o. O apit inake liiru mbangga aap Yonatan ame niyokan nappanege keenok, kambigin aret me, time nappaniyak mage o.”

²¹Yoge mbareegi, at Terekiya nen at awi nggwok abe wurik arum waka inawoore'nggam, “Time logowak o,” yinuk, wone lengganogo yorage, ndi, “Tu it oroti worako menggam nen ko'lu-kii'me wonok iri wagak mban eekwi iigak, oroti ti lek aruwak o,” yinuk, yorage, eereegerak paga at Yeremiya nogo aap endagembogut awi nggwok abe wurik arum waka inawoore'nggam taati aret wonagagerak o.