Read Western Dani Yeremiya 4 Bible Online

Yeremiya 4 - Western Dani bible

Yeremiya 4

¹At Aliku ALA nen ari logonet, “It Iterali ti, yungguk togon nowagam woroorak mbakwi iinok, neya woraawak o. Inagugi ogut aago ogole warak ti, nenegen kage neyo, mbo pugwi, Iniki mbere lek ambit eeppunuk wonogwe,

²Ndi, Nit a'me nggelok mban eeppiinet nugwi, Obeelom mban eerit nugwi, Pilit lek abet aret eeko logogun o, yinuk, Neenik Minggirak Naliku ALA nendage kunogo kumbuk mbanggwi, Eekwi iinok, It aakumi inanebunu lombok nen, It eekwi ti, nit togop aret eeko logowok o, yinuk, Nale'nggen-kale'nggen yogo logonet, nendage tiyappanogo logogun o,” yinuk, yegerak me yokkiragi o.

³ At Aliku ALA nen it aakumi Yekura mendek inom, kota Yerutalem mendek inom, yoroorak yegerak nogo yi aret. “Alok-palok wonage me awi yumbunit nugwi ti, mbo punuk, Inanggween pena wonage nogo eeri ungguwak o.

⁴It aap Yekura mendek inom, o kota Yerutalem menggaarak inom, Ala apuri yelok iigo logowak nduk, Inagabolo mbanggo mengga kwak ineebe togop aret Naliku ALA nake leenogo pugwi, Inagabolo mbanogo mbo nappogo mengga kwak, iniki omaawi ti, mbo pugwi, Eeko logowak o. Togop eeka'lek iinok, kani wunuk ari logonet, yi mendek ndi mendek nenet nage kagak nogonogo puurak meek age menggi kwak, Maluk mban eeko menggaarak ti paga an nanini mi'nage logonet, togop aret eeginabit nagin,” yegerak me, yokkiragi o.

⁵“It o Yekura menggaarak inaruk paga pege, It Yerutalem menggaarak wone yoranet nage, Eeriyak nogo yi aret. An o omarip paga pa'nggwe nen aaninggin inoba piya wage, Abu alik negen eerogo piya wage, Eeke me, O yime abok aret oone nggwok eeka trompet nogo, Oone pu eeko logonip o, yorage, Kuwak eeppunuk, o kota-kota yugum pak wurik me time, Kole mbaganip o, yinuk, kuum-keek eerogo nappit nage, O Tiyon ena time o, ena time o, yinuk, ndiimbu walok eerogo nappuwak nduk, yorage, Puk aga'lek inagap ndakko'nok kole mbaganuwak nduk, yorage, Eeke logot o,” yinuk, yo'negerak me, yokkiragi o.

⁶

⁷At singa kwak kiraarak menggim nen wundi wage, Yi aakumi ndi aakumi lek eerogo piiga nogo wage, Kinanggween kugume eerogo pikit nduk at wonage menggim nen wage, eeke me, Kinawi kota-kota nogo aakumi lek me yigirik-noonom aago logowak nduk, eerogo pi woraagin o.

⁸At Aliku ALA anini kani kunik negen nit ninoba pegerak nogo lek aga'lek awo aret wonage me, kinayum nibinik maluk mendek yippunuk, kinale yikkologwe, Kinaleenggu maakkologwe, Eeko logonip o.

⁹At Aliku ALA nen ari logonet, “Ne ti eyom paga it aap inendagembogut inom, at awuri inom eeka inom, inomanggen tayok ari, It an neebe unde inamineeri ne agan nage, It an yorage neegak yoraga nogo, Iya, yinuk, inamili lobok ari, Eerigin,” yegerak o.

¹⁰Ari mbaki, an nen ari logonet, “Kaliku Kitok Menggendak nogoba ALA wae. Wooluwak ninikinggup paga pabunik wonage kagak, kat nen, Kiniki ugun tayenak logonip o, yo'nirage nagandak nogo paga nit aakumi yi inom, it o kota Yerutalem menggaarak inom, mondok iya ninambokan laganggendak mbaki o,” yinuk, yogirak o.

¹¹Ne ti eyom paga at Ala nen, “O wiya aganggen mendek o karume puut puluk ko aago paga nen napuri wonogwe me pa'nggwe warit wage logonet, ambit me logonogo pit nage, wonok mappit nage, eeruwak nduk, warit wage menggi kwak woraagin lek o.

¹²An nappi woraagin nogo ti, omaawi ambik aret o. Maluk onggo inoba eeppiyoorak koonak nogo yogondak aret eeriyak o, yinuk, it aakumi yi inom, it Yerutalem menggaarak inom, yorage logogin o,” yinuk, yegerak o.

¹³At wage yi, kinigen pekkaanip o. Ndugwi kilanogo nippit wage menggi kwak, at kin ari wage, O wiya nombok-kombok eerit wage menggi kwak, at anggweendo wim eeka togop aret wogwe, Towe nggindooni nggarek togon nogo menggaarak kwe, at aguda perak, mondok nggare agan wogwe, Eekwi paga Nit mondok lek eerogo pinanigin me, ninabuwa o!

¹⁴Kat Yerutalem yi wae. Maluk eeriyak kinikime koonit nage keegak, ne mande ari nagin o. Kagap ndaruwak nduk, komaluk kinikime wonage nogo abu nggarenogo mbo pege logot o.

¹⁵O Ndan nen yoranet wogwe, Maluk eerogo pinagi wage agaarik o, yinuk, puut tiyak-tebek Eparayim nen agan wogwe, Eekwi yi, Inoone konengge logot o.

¹⁶Aliku ALA nen ari logonet, “Wone yi, it yi aakumi ndi aakumi yorage, It kota Yerutalem wonogwe nogo yorage, Eeke logorak nogo yi aret. At kota Yerutalem nen, Ala yo'nege nogo eeriyak neebi o, yinuk, an mbo paneegerak me, Yerutalem oonda mbaniyak aap wim eeka o nda nen wogwe, It Yekura inawi kota-kota tebenogo piyaawok nduk, Nawim yi o, yinuk, nggomookwi, Eeppunuk, Aap ambi eyabu yarak anggen mbaniyak arum wake menggi kwak, at aret wakkunggo agaarik o,” yinuk, yegerak o.

¹⁷

¹⁸“It Yekura mendek eerogo piigwi abok aret ti, inalik nen inobaabut paga, eeko nogogwaarak paga, inoba pakaarak o. Eeko nogogwaarak onggo inoba piigwi ti aret me, iniki andi lombok eeginake, Iniki me mondok ndanuk yi unggwage, Eeke me, mondok iya o!” yinuk, Aliku ALA nen aret yegerak me, yokkiragi o.

¹⁹Wim eeriyak nduk nggomookwi, Oone nggwok eeka trompet nogo oone pu eekwi, Eekwi nogo Naruk konenggirak me, Niniki andi o! Niniki andi o! Niniki andi nen yagan yobak-nggolak wake, Niniki lombok nggoguk yi unggwage, Niniki mondok ponok-ponok ee'nake, Eeke me, Niniki ko wariyak mondok meek lombok ee'nake agaarik o.

²⁰Ne ambi paga yigirogo piya unggwagak, ne ambi paga yigirogo piya unggwagak, eeko logonet, O yi abok aret mondok maluk eerogo pugwi iigirak o. Ne ambit liingge an nawi wurik mi eerogo pugwi, Yini-panip nawooliya wurik nogo yinik-minik eerogo pugwi, Eekwi iigirak o.

²¹Ndiimbu walok eekwi nenegen kage neegak, ne mande ari nage, Ndi, oone nggwok eeka trompet oone pu eekwi naruk konengge neegak, ne mande age, Eerigin mbakop?

²²At Aliku ALA nen ari logonet, “An napuri ti, wi negen aret wonogwe, it an liippanega'lek wonogwe, Elege iniki lek pogom wonogwe, op ariyak maluk ariyak ineenggo'lek kobak aret wonogwe, Obeelom eeriyak mendek kobak logonet kwe, maluk eeriyak kenok perak, Iniki penenak logonet, aganggen kerek togon eerit nugwi, Eeko menggaarak,” yegerak o.

²³An nen o nggween yi pekkage logonet, Owak mbanak naalop-kaalop aago wonage kage, Mbogut paga nikkage logonet, o eya eeka lek aret kage,

²⁴Puut-puut tiyarogon nakkanet nage logonet, ndipuk eeke kage, Puut-puut teberogon pekkanet nage logonet, abok aret na'ndo-wa'ndo eeke kage,

²⁵Nenegen kanet nage logonet, aakumi ineebe lek iige, Yi towe ndi towe wiganinuk nugwi nogo, abu lek aret iige, Eeke kagarak o.

²⁶Nenegen kanet nage logonet, Aliku ALA wage, anini kani kunik negen aago wage, eeke kagak, Nggween abu mili lubunik nogo karume negen aret age, Ndi, o time kota-kota abok aret langgu-langgu wangge, Eeke kagarak o.

²⁷Aliku ALA nen yegerak nogo yi aret. “O yi, an nen abu lek eerogo pigin lek kwe, apit aret o kugume aret logogin o.

²⁸Ti eeriyak yagarak ti, mbo punuk alik ambi ari, Ndi, ti koonggirak ti, mbo punuk, alik ambi koongge, Eerigin lek me, O nggween yi nen, Ao, yinuk, le ari, ndi, mbogut nogo o apit age, Eerigin,” yegerak o.

²⁹It aap wim eeka kuda paga wogwe inom, it aap ineegin warak inom, Ineebe apit aago wogwe inoone inaruk konenggo logomenggaarik, It yi kota ndi kota wonogwe nogo mbo punuk kole mbaganit ando eyoongga inikime unggwit nogwe, Ando puut-puut yugum paga lagit nogwe, Eerugun me, Yi kota ndi kota aakumi logogun lek o wuum lu agan nage logogin o.

³⁰Kat maluk eerogo pagagaarak Yerutalem yi, wae. Kat nonggop eeriyak mbake agandik? Kayum maa'ngga kunik yikkolage, kalilibano eekkolagak mbuti emas paga ogobakkigirik yikkolage, Kenegen awi paga maa'ngga karok-mbarok eekkolage, Eeke ti, Nonggop eeke agandik? It kiniki kunik eeginake menggendak nogo ineebi kombako logonet, kooriyak eekwi iigak, eeke ti, Aanom warogo aret eeke agandik o.

³¹Kwe ambi aagaluk enegen paganak yagan wake logonet, kwa ari, Kwe ndugum aagaluk aa'nduk ndake logonet, ke'mbogonik ari, Eeko mengga kwak, O Tiyon Aagalukwe nogo iniki nggiluk ari, Eenggi ndek ari logonet, “Ninom wim mbanak nen nooriyak eekwi paga niniki ma'nage me, nabuwa o,” yinuk, ari, Eeke naruk konengge agarik o.