Read Western Dani Yeremiya 41 Bible Online

Yeremiya 41 - Western Dani bible

Yeremiya 41

¹ Tut 6 penembunuk, ambi penenak ti paga aap endagembogut at paga wiganak ineegin warak inowe endage tiyanak aap Elitama ombooluk Netaniya aput Itimayen nogo, aap ineebe 10 inom nen Akikam aput Nggeraliya o Mitipa wonage me, ka wogo mbareegwa, inom mbi awo nunggo logonet,

²Netaniya aput Itimayen aap ineebe 10 nogo inom mi'na'nuk, aap Mbaben mendek inowe endagembogut nen o Yekura unde logowak nduk mippereegerak aap Tapan ombooluk Akikam aput Nggeraliya nogo, wooluwak paga mondok aret warogo pereegwaarak.

³Warogo punuk, it aakumi Yekura mendek aap Nggeraliya inom o Mitipa wonogwe nogo inom, it aap Mbaben mendek ineegin warak wonogwe nogo inom, at Itimayen wungge logonet, abok aret inoorogo piyareegerak.

⁴At Nggeraliya wappunuk, ko'lu aakumi awo ineenggo'lek iigak,

⁵it aap o Tikem nen, Tilo nen, Tamariya nen, ineebe lambunik 80 aret me, inamboro wiirogo pakwi, inayum nibinogo pakwi, ineebe paga nggawi penek eerogo pakwi, eeko nogogwaarik, anggen yigirik inom, obari abe kaga inom, Aliku ALA awi wurik me ake wogoriyak nduk wonok wogwe me,

⁶at Netaniya aput Itimayen nogo inom aabuk arikit nduk, o Mitipa nen wungge nagagerik, le agan inom lambumbunuk, yorage logonet, “Kit aap Akikam aput Nggeraliya wonage me ka woraanip o.”

⁷Yoragagerak o kota oolo muundak ari wogwe me, at Netaniya aput Itimayen awuri inom wagagerak nogo inom wunggo logonet, inoorogo piinok, inoorak nogo waganogo niyo kabunik me mbo wuppiigwi me,

⁸it inookwi eegu ineebe 10 nen at yogwi, “Gandum inom, gandum mendek jelai inom, wam amburu inom, nggiin amburu inom, o kota endekem yime kumaappogoorak wonage me, nit ninooriyak mage o.” Yogo mbareegwa, it inoreewi inooke logonet, inom inoorulik teppiyareegerak.

⁹At Netaniya aput Itimayen nogo nen aap Nggeraliya wake logonet inom inoorogo piyareegerak ineebe abok aret niyo nggween kabunik me mbo wuppiyareegerak nogo ti, aap endagembogut Ata nogo nen aap Iterali inowe endagembogut Mbayeta awuri inom inoori unggwogwe iyo, o maan nggween nggwok kabunogo pereegim nogome aret aakumi inoorak nogo time yagabit eerogo wuppiyareegerak.

¹⁰At aap endagembogut eebe wonok nega inowe Nebutararan nen aap Akikam aput Nggeraliya inarum logowak nduk, mippereegerak o Mitipa wonogwe aakumi eegu yumbunik abok aret inom, aap endagembogut apurilogwe komologwe inom, abok aret at Netaniya aput Itimayen nen kugun wogonake nagagerik, wogoren o aakumi Amon mendek wonogwe me piya wundage me,

¹¹at Netaniya aput Itimayen maluk nggwok lombok eereegerak nogo, aap Kareya aput Yokanan awuri ineegin warak inoweewi inom inaruk konembunuk,

¹²at Netaniya aput Itimayen nogo, inom wim eeruwok nduk, inawuri abok aret wogoren nogo nogogwaarik, o Nggibeyon niyo kole yenggenak me nogome wonage me inom lambuni nogogwaarak.

¹³Nogo mbareegwa, at Itimayen it aakumi abok wogoren nage nogo nen at Kareya aput Yokanan awuri ineegin warak inoweewi inom wogwe inigen iigo nogogwaarik, inale'nggen ambik ogogwaarak.

¹⁴Inale'nggen ogo nogogwaarik, it aakumi at Itimayen o Mitipa nen kugun wogoren nage nogo abok aret melak togon aap Kareya aput Yokanan inom ari nogwe iigak,

¹⁵at Netaniya aput Itimayen awuri ineebe 8 inom aap Yokanan eenggime nen kole mbaganit aakumi Amon mendek wonogwe me nogogwaarak.

¹⁶Ndi, at aap Netaniya aput Itimayen nen aap Akikam aput Nggeraliya o Mitipa warogo pege logonet, yumbunogo piyareegerak aap ineegin warak inom, kumi inom, wologwe-komologwe inom, aap endagembogut ame eyabu eeka inom, o Nggibeyon nen wogoren nage me, aap Kareya aput Yokanan awuri ineegin warak inoweewi inom nen ndininabeegwaarak nogo wogoren

¹⁷aap Mbaben mendek inowe endagembogut nen aap Akikam aput Nggeraliya o Yekura unde logowak nduk mippereegerak nogo, at Netaniya aput Itimayen nen wareegerak paga, “It Mbaben mendek nen ninookwi iyo,” yinuk, inagabiti nen, “O Metit mbaganit nawok o,” yinuk, nogo logonet, o Mbe'lekem koorok o Kim-kam nogome puk ari nogogwaarak.