Read Western Dani Yeremiya 44 Bible Online

Yeremiya 44 - Western Dani bible

Yeremiya 44

¹It aakumi Yakuri mendek o Metit niyo Nin ambut nogome kota Migiron inom, Tapanaket inom, Membit inom, ndi, eneerime o Patorot inom, wonogwe nogo eeppiyoorak at Yeremiya yoreegerak yi aret.

²At Omaawi Lombok Menggerak Iterali inogoba Aliku Ala nen ari logonet, “An nen o Yerutalem inom, o Yekura kota-kota abok aret inom, aaninggin mondok iya inoba kwippiige neyareegwaarak nogo o. It maluk lombok eerit nogo nogogwaarak paga yogondak o ti, aakumi wonogwe lek, o wogo langgu-langgu eerak aret agaarik o. An wonage neegak kwe, inombomini inom, it inom, inagugi ineenggo'lek mendek ake obari abe kaga kani kunggwi, abu'me tebe yinuk ayuk wukwi, eeko nogogwaarak paga nanini nen o ti maluk eerogo pereegirak o.

⁴Ogole warak mendek eekwi an neebi lombok mbake minggirak nogo, Mbo pinip o, yoraawak nduk, nayeloman mini an yorage neegak yoraga kulinik-kalinik nappiigak mban eeke nagagirak kwe,

⁵inaruk konenggwi, liippugwi, it maluk eekwi ti, mbo punuk iniyokan nowagam wogwe, kugi ake obari abe kaga kani kunggwi nogo mbo pugwi, eerulik me,

⁶an nanini kani kunik negen mi'nage logonet, o Yekura kota-kota inom, o Yerutalem tu paga tu paga inom, nanini kilirogo wuppit wagagirak paga o ti, aakumi wonogwe lek nggween mbuk eerogo pereegirak yogondak inigen kogwe ti aret o,” yinuk, yegerak o.

⁷At Omaawi Lombok Menggerak Iterali inogoba Aliku Ala nen yegerak nogo yi aret. “It eekwi paga aap inom, kumi inom, wologwe-komologwe inom, elege awo ngget ndarak inom, inenggaawak lek eerogo pakwi me, it Yekura mendek ando yumbunogo teppiyoorak lek, lek eerogo piyoorak eekwi ti, nonggop nduk, Aaninggin togop aret eeppinanuwak o, yinuk, eeko agaarik o?

⁸It nen o Metit aap nggiru negen ari wa'nuk wonogo logonet, an wonage neegak ineenggi paga ogobakkigirik inagugiwak nogo ake obari abe kaga kani kunggwi paga nanini wunduwak nduk, nonggop nduk eeko agaarik? Inenggaawak lek eerogo pakwi, yi aakumi ndi aakumi o nggween paga wonogwe inenggela'me iigak, aakumi nen, Pulunik aret, inombaruwak nduk eekkologwe, meek eerogo piyaawak nduk eekkologwe, eeko agaarik o.

⁹It inom, inakuwi inom, o nggween Yekura paga kunduk, o Yerutalem tu paga tu paga kunduk, maluk lombok eerit nugwi, ndi, it inombomini inom, it aap Yekura inoweewi inendagembogut inom, inoweewi inendagembogut inakuwi inom, maluk mondok iya tit eerit nugwi, eeko nogogwaarak nogo kobak eeppunuk eeko agaarik ya?

¹⁰Aa'nduk nen nok, o yogondak kuli iniki tebeppakwi, nayuk wukwi, eeka'lek logonet, eeko logorak wone yoragagirak Muta liiru mbaneegerak inom, it inombomini inom eeko logorak wone lengganogo yoragatak inom, liirogon mugurok naga'lek aret agaarik o,” yinuk, yegerak me yokkiragi o.

¹¹Togop aret eekwi me, at Omaawi Lombok Menggerak Iterali inogoba Aliku Ala nen yegerak nogo yi aret. “An nen aaninggin lombok inoba piige, it Yekura kunduk abok aret inenggaawak lek eerogo piige, eeriyak abu aret koonogo pereegirak o.

¹²It Yekura mendek eegu yumbunik o Metit lombok nogo logomonggoorik, ye mbambatinuk logorak, mba'nuk, wogogwaarak nogo, o Metit yime logonet, wooluwak paga inoorak kanggwi, mbi noogelo paga kanggwi, eerugun o. Inendage warak inendage lek abok aret wooluwak paga, mbi noogelo paga, aret kanggo logogun o. Aakumi nen, It yi, pulunik aret, yogwe, inamineeri ne agan nage iigwi, inendage kumbunuk pulunogo piigwi, meek eerogo piigwi, eeko logogun o.

¹³An nen it o Yerutalem wonogwe nogo aaninggin inoba piyareegi kwak it o Metit yime wonogwe nogo aaninggin inoba kwippiige logonet, wooluwak paga inoorak kanggwi, mbi noogelo paga kanggwi, kugilingga paga kanggwi, eerugun me,

¹⁴it aakumi Yekura mendek eegu yumbunik o Metit ari wa'nuk wonogwe nogo, abok aret inagap ndakko'nok kole mbaganggwi, ndi, Niname niniyokan nogo logomonggoorik, ye mbambatinuk logowok lak, ao, yinuk, mbaremenggam nogome teppiyamenggaarak iniyokan nogwe, eerugun lek aret o. Ata, it ambitak mban inagap ndakko'nok iniyokan o time ari nagun, yegerak me, yokkiragi o,” yinuk, yoragagerak.

¹⁵Yorage mbareegi, it aap Yekura mendek inakuwi Ala ake lek it inagugi ake obari abe kaga kani kunggwi ineenu nogo inom, it kumi ambik kuwak ari nogogwaarak taati wonogwe nogo inom, it aakumi o Metit niyo Nin eneeri-ambut wonogwe ineebe apit aago inom, nen Yeremiya yogo logonet,

¹⁶“At Aliku ALA yegerak me, yokkiragi o, yinuk, yo'nirage nogo, nit ninaruk konenggo logogun lek aret o.

¹⁷Nit ninombomini inom, ninoweewi inendagembogut inom, ninoweewi inengga warak inom, nen o Yekura kota-kota kunduk, o Yerutalem tu paga tu paga kunduk, ninagugigwe endage, Mbogut-Kwe, ake obari abe kaga kani kunggwi, ake anggur amburu kilirogo pugwi, eeko nogogwa kwak, nit ndak-ndak aret eeko logogun o, yinuk, yogoorak nogo aret eeko logogun o. Ake wogogwi eyom ti paga ninambi ndonggorogon nunggwi, ninale'nggen paga wonogwe, andi ee'ninaka'lek obeelom aret wonogwe, eeko nogogurak kwe,

¹⁸ninagugigwe endage, Mbogut-Kwe ti, ake obari abe kaga kani kunggwi, ake anggur amburu kilirogo pugwi, eeka'lek puk wonogwe eyom ti paga nen ninamindik-ninamendek abok aret lek age, wooluwak paga lek eerogo pinanege, mbi noogelo nen nineebe kanggwi, eekwi me nduk, yokkogo o,” yinuk, yoreegwaarak.

¹⁹Yogo mbareegwa, it kumi nogo nen wone ambinom at yogo logonet, “Ninagugigwe Mbogut-Kwe ake obari abe kaga kani kunggwi, ake anggur amburu kilirogo pugwi, eeko logonet, at ogut ndak-ndak ake oroti ogobakkigirogo worakwi, ake anggur amburu kilirogo pugwi, eekwi ti, ninogonggelomini ineenggo'lek iigak eeko ogoorik mbaken? Ineenu aret o!”

²⁰Yogo mbareegwa, at Yeremiya nen it kumi inom, aap inom, wone yogwe nogo abok aret onggo yorage logonet,

²¹“Kit inom, kinombomini inom, kinoweewi inendagembogut inom, it aap kinoweewi inengga warak inom, it aakumi o yime menggaarak inom, abok aret nen o Yekura kota-kota kunduk, o Yerutalem tu paga tu paga kunduk, obari abe kaga kani kunit nogo nogogutak nogo, at Aliku ALA nen kinoba abekkinake, liippinagage, eeke logolik mbakop?

²²Kit maluk lombok eekwi, ogole warak mendek mban eerit nugwi, eekwi me, Aliku ALA nen ambinom puk ariyak meek age kenok, kinanggween ti pulunik aret wonage, ndi, aakumi lek o wogo aret wonage, eerak o yogondak kogwe ti aret.

²³At Aliku ALA yokkirage nogo konembunuk eekwi, wone yokkiragagerak Muta nen liiru mbaneegerak inom, wone lengganogo yokkiragagerak inom, Yogop ee'nu ndogop ee'nu, awone yugu inom, mugurok nogwe, eeka'lek logonet, Aliku ALA ake obari abe kaga kani kungga'lek kugi ake kunggo logonet, at maluk eeppogo nogogutak paga o yogondak aaninggin kinoba kwippinagagerak wonage kogwe yi aret o,” yinuk, yoragagerak.

²⁴Yorage nagagerik, at Yeremiya nen aakumi abok aret inom, kumi nogo inom, wone yorage logonet, “Kit aakumi Yekura mendek o Metit yime wonogwe nogo abok aret Aliku ALA nen yegerak yokkirage yi, kinaruk konenggo logonip o.

²⁵At Omaawi Lombok Menggerak Iterali inogoba Aliku Ala nen wone yegerak nogo yi aret. It aap inom, inakuwi kumi inom, nen, Nit ninagugigwe Mbogut-Kwe ake obari abe kaga kani kunggwi, ake anggur amburu kilirogo pugwi, eeko logogun o, yinuk, kumbuk mbaneegurak me, eeko logogun aret o, yinuk, inoone abuk nggaruk togon yereegwaarak nogo ti, ndak-ndak eerit wogwe iigirak me, eeko logorak yereegwaarak nogo ndak-ndak eekwi, kumbuk mbaneegwaarak nogo ndak-ndak aret eekwi, eeko logowak o, yinuk, yegerak me,

²⁶kit aap Yakuri mendek o Metit wonogwe abok aret, at Aliku ALA nen yegerak yi, kinaruk konenggo logonip o. At Aliku ALA nen ari logonet, It aakumi Yekura mendek o Metit yi awi ndi awi wonogwe abok aret nen, Ndogop eerigin o, yinuk, an nendage kunggwi, At mondok eenik Aliku Itok Menggerak ALA owak o, yinuk, kumbuk mbanggwi, eekwi nogo ambinom eeko logogun lek o.

²⁷An nen obeelom eerogo piyaakit nduk eekeelik maluk eerogo piyaakit nduk nenegen wogoren nege me, it aap Yakuri mendek o Metit paga wonogwe nogo, wooluwak paga inoorak kanggwi, mbi noogelo paga kanggwi, eerit-eerit irip paga inenggaawak lek eerogo patugun o.

²⁸It aap mbereeluk mban wooluwak paga woppatinuk, o Metit nen iniyokan o Yekura nagun o. Nogwe iinok, it Yekura mendek eegu yumbunik o Metit ari wogogwaarak wonogwe nogo abok aret nen it inoone yereegwaarak a'me agaarak ilik, an noone yagarak a'me agaarak a? yinuk, ineenu arugun, yegerak me, yokkiragi o.

²⁹Aliku ALA ari logonet, It o yime wonogwe iigak aaninggin eeppiyoorak yagarak nogo, abet aret arigin ineenu aruwak nduk, ineenu agak eeppiyoorak nogo yi aret.

³⁰ An nen it o Yekura mendek inowe endagembogut Terekiya nogo at wariyak eerit nega awim it Mbaben mendek inowe endagembogut Nebukanetat eenggime pereegi kwak, it Metit mendek inowe endagembogut Pirawun Kopara nogo at awim nen eebe wariyak eekwi nogo ineenggime piyaagin, yegerak me, yokkiragi o,” yinuk, yoragagerak.