Read Western Dani Yeremiya 5 Bible Online

Yeremiya 5 - Western Dani bible

Yeremiya 5

¹Aliku ALA nen ari logonet, “Kat o kota Yerutalem yiru-ndiru yime pekkanet nage, Pekkanet nage logonet, kenegen li'lak yambonit nage, Wone mbanggo menggam nggween aagome abok aret yambik-yambek eeke, Eerit nage logot o. Eerit nage logonet, aap ambi iniki abe koonak a'me nggelok mban eeke menggerak ambi wonage kage kenok, Aakumi o kota yime menggaarak ineebe lek eerogo piyaagin lek, inomaluk lek eerogo piyaagin kwe, lek me meek o.

²It nen, Nit abet aret ndogop eeko logowok o, yinuk, at eenik menggerak Aliku ALA endage kumbunuk yogo o, yinuk, kumbuk mbanggwi kwe, Inoone piliret kumbuk mbanogo yogo menggaarak o,” yinuk, yegerak o.

³Kaliku nogoba ALA o! It aap iniki abu koonak logonet, li'lak eeko menggaarak nogo kenegen pegiinet nage menggendak nogo lek a? Yawi paga inookendak kwe, it nen andi kogwe, Aan lebenogo piigendak kwe, iniki koonnage, Eeka'lek aret agaarik o. It inanobak yugum pogom eeppatinuk, “Ninomaluk mbo puurak, Nineebi,” mba'nuk agaarik o.

⁴An nen mbake logonet, “It ti, ambi eekkoloorak lek wi negen wonogwe me, Aliku ALA eeke menggerak liippega'lek wonogwe, Inogoba Ala yereegerak wone yugu nogo kobak wonogwe, Eekwi iigak,

⁵Inoweewi perak, Aliku ALA eeke menggerak liippugwi, Inogoba Ala yereegerak wone yugu nogo ineenu ogwe, Eekwi nogo abet aret ineenu me, Iya nage logominggirik, yoraagin o,” Mbake nagarik, yora nagarak kwe, “Yum aaninggin kwak, Ala wone yugu aaninggin me ambinom eeriyak nineebi o, yinuk, nggoorogo mbo pugwi, Wone yugu paga nit keele maarak negen wonogwe nogo mbanogo mbo pugwi, Eeruwok o,” yinuk, Iniki ambit eeppunuk, muk mbo pegaarak iigirak o.

⁶Togop me, it Ala wone taganogo punuk, alik lombok eerit nugwi, Tu abe kagak alik paga nomo agan nogo logonet, maluk alik negen eekwi, Eekwi iinok, Singa negen eyonggaame nen wundi wage logomenggerik, ineebe inoorogo piige, Nggeewo owo negen karume nen wundi wa'nuk ineebe nibinogo nengge, Aakumi wundi wogwe iyo, inoorogo ineebe nibinogo pegak nawok nduk, Nggeewo kwak ineeruwak yabenggek-ndabenggek aago nen inawi kota-kota inigen wo yagak nugwi, Eerugun o.

⁷Aliku ALA nen ari logonet, “O kota Yerutalem aagalogwe nen an mbo paninuk, it an kwak lek inagugi inendage kumbunuk, kumbuk mbanggwi, It inambi wogorage paga ndonggorogon nunggwi kwe, Aap nen akwe mbo punuk, ugun eerit nege menggi kwak, An mbo paninuk ugun eerit nugwi, Kumi terak eeginako menggam ninggiri unggwogwe, Eekwi me, An nen nonggop togon at omaluk ti, lek eerogo puurak mbake agaarik?

⁸Kuda wali eebe piirik aganggen eeke kenok, kooli kwaarinabit nege menggi kwak, Inoreewi inakuwi kagak iniki nengge kenok ugun aret eeginabit nugu menggaarak.

⁹It ti eerit nugwi iigak, an nen onggo eeppiiga'lek teppiyoorak op mbaken? It aakumi togop eekwi paga nanini mbake nogo tayo yuwak nduk, eeppiyoorak lek mbaken? Eeppiyaagin aret o.

¹⁰It inawim nogo nen napuri ineyabu anggur yarak me lagi nogo logomenggaarik, Maluk eerogo pit noorak op aret kwe, abu lek eerogo pugwaarik o. It aakumi yi, Naliku an ALA napuri lek negen iigirak me, Eno'mbak mbanogo mbo nappit nogo mengga kwak it togop aret eeppiinet nogo logowak o.

¹¹It Iterali paga wiganak inom, Yekura paga ndarak inom, an ari liippunuk, mondok eeka'lek aret agaarik o,” yinuk, at Aliku ALA nen aret yegerak o.

¹²It aakumi ti nen Aliku ALA eeppiige menggerak kagak pilit pugunogo alik agan nugu logonet, “At nen ambi eeppinanigin lek aret o. Nit aaninggin ninoba kwi'nage, wooluwak ninoba age, mbi noogelo ninoba age, Eerigin lek o.

¹³It aap Ala nen yorage kagak yoraga nogo Ala wone inikime lek logonet, inoone we wiya warit nugwi me, Nit ninoba pinaniyak yugu nogo it inoba aret aruwak o,” yinuk, yogo menggaarak.

¹⁴Togop me, at Omaawi Lombok Menggerak Aliku ALA nen yegerak nogo yi aret. “It aakumi ti, inoone togop agan nugwi me, an yokkege neegak yorage nogo kani kunik negen eerogo pege, Ndi, it aakumi yi, ineebe kani enom warak negen eerogo piige, eerigin me, Koone yorage ti paga ineebe kani nengge kwak eerogo piyaamunggun o,” yinuk, yo'negerak me yagi o.

¹⁵Aliku ALA nen ari logonet, “It Iterali paga wiganak ti, aakumi ambi inoone ineenggo'lek me, yogwe liippugulik wonogwe, O aa'nduk nen nok yogondak kuli inendage lek ageelik mondok ki wonage, Eeke menggerak nogo O nda nen tebenogo piya woraawak nduk, nappiya woraagin o.

¹⁶It aap nappiya woraminggirak abok aret ti, Aap wim eeka wakaa'ngget inomaale kani kunik negen wonage me,

¹⁷Iterali paga wiganak ineyabu eerak anggen yugu inom, inambi-mbiingga inom, lek eerogo nenet nogwe, Inapuri wologwe-komologwe lek eerogo piigwi, Inaanggumi kambin-ndomba inom, lembu-tapi inom, lek eerogo pit nogwe, Ineyabume anggur yarak ero inom, eyo wuli ero inom, muurogo pit nogwe, Ndi, inawi kota-kota yugum pak wurik me iniki ti paga panggonak wonogwe nogo pup eerogo pugwi, Eeko logogun o,” yinuk, yegerak me yokkiragi o.

¹⁸Aliku ALA nen ari logonet, “Togop aret eerugun kwe, ne ti eyom paga ineebe abok aret lek eerogo piyaagin lek o.

¹⁹It inowe-inawot nen, Aliku ninogoba Ala nonggop nduk yi abok aret eeppinanege agaarik o? yinuk, yokkugwi iinok, kat nen, Lek o. Ala mbo punuk, kit kinanggween lombok paga logonet, Ala wonage kagak kwe, aap inambik inagugiwak ayuk wuko logonet, mugurok nogo nogotak ndak-ndak, yogondak togop aret kit kinanggween paga lek aakumi inambik inanggween paga logonet, inayeloman mini a'nuk inake eerit nogo logorak, yoraamunggun o,” yinuk, an yo'negerak.

²⁰Aliku ALA nen ari logonet, “Wone it Yakup paga wiganak yorage, It o Yekura wonogwe me yoranet nage, Eeke logorak nogo yi aret.

²¹ It inigen wonage kwe, inigen kaga'lek wonogwe, Ndi, inaruk wonage kwe, inaruk konengga'lek wonogwe, Eekwi iniki lek wi-wa ti, Wone inaruk konenggo logorak nogo yi aret.

²² It an nayuk wukwi, an paga inaganak wake, eeriyak ti, maluk mbakop?” Yinuk, yegerak o. “Niyo nggwok yenggenak laut nogo endekem kilak togon wundi waga'lek mondok-mondok kuli mbanak logowak nduk, mbini pereegirak nogo lek a? Niyo kilaarak-mogonik eeke kwe, endekem kilak togon wungge, Oone, Wo! eerogo wunabi wage kwe, kuli mbanak kagak wungge, Eeka'lek aret menggerak o.

²³Togop eeke menggerak kwe, it yi perak, inogogumbuk logonet, an yorage nogo, Eeriyak nineebi, mban mbakwi, Tu abe kagak alik paga nomo agan kobak ari nogwe, Eeko agaarik o.

²⁴It inikime nen, O mayu wage menggim ari wage kenok, mayu wuppi wage nagaatik, amburu mbangge menggim ari wage kenok, kibi loongge, Ndi, yakootak anggen mbanogo puwok nduk o kibi kagak, Tamban ndi kuli aruwak o, yinuk, koonogo pinanege, Eeke menggerak Aliku ninogoba Ala ayuk wuruwok o, yinuk, iniki me mbariyak kwe, Mbaka'lek aret wonogo menggaarak.

²⁵Ti eerogo piyoorak nogo abok aret it lombok inobaabut maluk eekwi ti paga non mbanogo pakwi, Ndi, obeelom eeppiyoorak nogo inomaluk paga lek eerogo pakwi, Eeko menggaarak o.

²⁶It an napuri inenggela'me time aap maluk eeka mendek wonogwe me, Keele pugume towe ineenik ngge-ngge yiluninake menggi kwak aakumi yilunogo piigwi, Pagi wariyak ta'na pogo mengga kwak aakumi maluk eeppiigwi, Eeruwok nduk, Toriigo menggaarak.

²⁷Towe ineenik inawina yagabit eerogo mambiinok tu keele maarogo piigo mengga kwak, It iname logonet, aakumi wi-wi eerogo piyoorak mban koombunuk, inamendek waganogo iname yagabit eerogo patit unggwogwe, Ineenggi warak eekkologwe, inendage tiyappakwi,

²⁸Abe mban nunggwi paga ineebe kole inamburu tene yogwe wonogwe, Eeko menggaarak. Maluk mban eerit nogo logonet, Ti kuli aret o, yogwe, Elege moono inawone amburu mbanggo logonet, it eeppiyoorak koonggwi, It aakumi ineenggi lek op eeppiyoorak koonak nogo eeppiyoorak inaana'le mbanggwi, Eekulik aret o.

²⁹Ti eerit nugwi iigak, an nen onggo eeppiiga'lek teppiyoorak op mbakop? It aakumi togop mban eekwi paga nanini mbake nogo tayo yuwak nduk, eeppiyoorak lek mbakop?

³⁰Maluk ambi mondok iya ninamineeri ne agan noorak mendek o yime agaarak nogo yi aret.

³¹It aap an nen wone yorage neegak yoraga nogo nen, Ndogop eeke kaamunggup o, yinuk, we pilit pugunit nugwi, It aap an neebe unde nogo nen it iniki mbakwi mban mamuninabit nugwi, Ndi, it ti eekwi nogo it an napuri kunduk, inikilom mbako logonet konenggwi, Eekwi ti aret me, O age yobok panggoni wage kenok it nano eerugun o?” yinuk, yegerak me, yokkiragi o.