Read Western Dani Yeremiya 50 Bible Online

Yeremiya 50 - Western Dani bible

Yeremiya 50

¹ It aakumi Mbaben mendek wonogo menggam o Mbaben eeppuurak Aliku ALA nen at yoge kagak yoraga Yeremiya yoreegerak nogo yi aret.

²“Aakumi inanebunu lombok inenggela'me yorage, Inaruk liirogon konenuwak nduk wone yoranet nage, Ineenu agak ndiimbu walok eeke logonet, koone nggwok paga yoranet nage, Eeke logonet, Wone ambi kumaarogo puurak lek abok yoroorak nogo yi aret. O Mbaben nogo muk tebenggola unggwogwe, Agugi Mben nogo abu enggali age, Agugi Merorak nogo iniki ma'nage, Inagugi ogut aago nogo inenggali age, Inagugiwak abu yigirik-noonom age, Eerigin o.

³Aakumi ambi o omarip paga pa'nggwe nen o Mbaben oonda mbani unggwogwe, Anggween ti, kugun me eerogo pugwi, Eerugun o. O time aakumi inom, ndiimbu-nggwiya inom, abok aret kole ma'narit nagun me, Aakumi ambiriluk ambi o time logogun abu lek,” yegerak o.

⁴At Aliku ALA nen ari logonet, “Ne ti paga eerigin o, yinuk, yoragagirak ti eyom paga It aakumi Iterali mendek inom, it Yekura mendek inom, ambugwi aret Leenggu maarit inogoba Naliku Ala kwaa'nabit wogo logonet,

⁵Tu o Tiyon nogwe nogo ngge o? yinuk, aakumi ineegwa'me waganggaatak yorogwe iinok, ina yime nggwe aret wogo logonet, At Aliku ALA nit ninom a'nuk eeko logowok o, yinuk, neya wogo logomenggaarik, Wone inami ogo logorak lek mendek mondok eeko logorak ninom amburu nggaruk togon koonogo pugun o.

⁶It an napuri nogo ndomba kobak aago kwak nugwi, It ndegeninaka nen nomonogo tu alik paga piya nogwe, Puut-puut time iri'ngga kwaarogo nenet nugu logowak nduk, mbo piigwi, Eeko mbareegwa, Iname nogo yogo menggam woroorak kobak a'nuk, puut ambime nen puut ambime agak nugwi, Eerit nugwi me,

⁷Aakumi ambi inom aabuk a'nuk inambeme yonggorinakwi, Ndi, it inawim nen yogo logonet, It inagari'ngga abe nenet nugu menggam kwak ti, Aliku ALA aret me, at maluk eerogo pugwi, Inombomini iniki lunik Aliku ALA maluk eerogo pugwi, Eereegwaarak kenok, Inooreegurak me, nit maluk eerulik o, yinuk, yogwe, Eereegwaarak o.

⁸ Togop me, it aakumi inanebunu nggwok lombok o omarip paga pa'nggwe nen kuwak eerogo piinok, O Mbaben tebenogo puurak inikime eeppiyaminggirak abet aret nappiya woraagin me, It o Mbaben menggaarak nogo mbaganit nogwe, It o Mbaben wonogo menggam mbo punuk, wundit nogwe, Kambin ngguunok aa'nduk a'nuk kooli aagalogwe inom wogoren nege menggi kwak, inaa'nduk kole mbaganggwi, Eeruwak o. It aakumi nggwok aago ti, wogo logomenggaarik, wim eeriyak ina koonogo piinok, O kota Mbaben tebenggola unggwogo logonet, Aap wim wakaa'ngget lombok inomaale nambukaatak nggween wakeelik aap inagabolo paga mban age menggi kwak togop aret arigin o.

⁹

¹⁰O Mbaben ti, yi mendek ndi mendek abok aret kugun waagun me, Kugun wogo nogo tumbukkologo logonet, iniki ndonggo yigin o,” yinuk, Aliku ALA nen aret yegerak o.

¹¹“It an neyate kwak niniki kundugu nogo maluk eerogo piigwi nen inale'nggen mbakwi, Ale'nggen inikime nggelok ari logonet, noone-koone agan nugwi, Tapi aagalogwe iri'ngga mili nenet nugu logonet, ineeruwak anen pera eerogo piige kwak eerak nugwi, Kuda ngguunok inoone ku agan nugwi kwak eekwi, Eerit nugwi me,

¹²Inagalo nogo enggali lombok age, At ndaganabeegerak nogo endage maluk age, Eerigin o. At o Mbaben nogo ti, it iname time o karume aakumi lek nggween abu mbuk puluk ko aago aret eerigin me, Yi aakumi ndi aakumi iya negen iigak kwe, o Mbaben perak, abu tebenak endage lek aret arigin o.

¹³Naliku ALA nanini oba piminggirak paga o Mbaben ti, aakumi wonogwe lek, o wogo aret wonage kenok, Aakumi tu ti paga nogo logonet, Enete abu maluk aago yi, iya, yinuk, Inamineeri ne agan nage logogin o.

¹⁴It aap ineenggi woloonak abok aret ti, Wim namburiyak o Mbaben yendok-wandok wakkumbunuk maale namburogo nappugwi, O Mbaben ti, Naliku ALA maluk eeppanege me, inomaale ambi teppuurak lek, abok aret namburogo nappugwi, Eeruwak o.

¹⁵O Mbaben yendok-wandok mi'na'nuk, Nawim o, yinuk, keekok piyanggogo logonet, unggwogwe iinok, At eegin-omaale munogo punuk, Wim mage o, yinuk, eenggi nippege, Wim nggayo wurik nogo mi-mi wangge, Yugum pak wurik langgu-langgu wangge, Eeke agaarik o. Naliku ALA maluk eeppanege onggo eeppuurak yi aret me, eeppanege onggo eeppogo logonet, At nen aakumi eeppiige nagagi kwak at ndak-ndak eerogo pogo logowak o.

¹⁶It aap o Mbaben awi yumbungga inom, anggen mbaniyak eyom ari wage kenok anggen mbangga inom, lek eerogo piyaawak o. Aap inooka awooluwak ayuk nen inalitak lombok iniyokan inowe-inawot wonogwe me nogwe, Inalitak nen inawi alom paga kole mbaganit nogwe, Eeruwak o,” yinuk, yegerak me yokkiragi o.

¹⁷“Singa nen ndomba mappiigaatak inalitak mak aago nugu mengga kwak, Iterali togop aret mappiigo logonet, Aa'nduk it Atiyut mendek inowe endagembogut nen ambeme yonggorinake, Ti'nuk, yogondak yi, it Mbaben mendek inowe endagembogut Nebukanetat nen inowak nenenogo nengge, Eereegwaarak,” yegerak o.

¹⁸Togop me, at Omaawi Lombok Menggerak Iterali inogoba Aliku Ala nen yegerak nogo yi aret. “It Atiyut mendek inowe endagembogut nen eeppiyareegerak paga an nen aaninggin at oba kwippereegi kwak, It o Mbaben mendek inowe endagembogut inom togop aret maluk inoba kwippiyaagin kwe,

¹⁹It Iterali perak, wogoren iniyokan inagari'ngga nenet nogo menggam piya woraminggirak O Mbatan paga inom, puut Karemen paga inom, inagari'ngga nenet nugwi, Puut-puut teberogon Eparayim paga inom, Nggileyat paga inom, nenet nogo logonet, ndonggoppiige kenok, puk ogwe, Eeko logogun,” yegerak o.

²⁰Aliku ALA nen ari logonet, “Ne ti paga eerigin o, yinuk, yoragagirak ti eyom paga An nen eegu yumbunogo piyaminggirak nogo inomaluk lek eerogo piyaagin me, Aakumi nen, Iterali maluk ndogop eekaarak o, yinuk, kwaaremenggaarak kwe, eerulik aret iigwi, Ndi, it Yekura kunduk, Maluk ndogop eekaarak o, yinuk, yemenggaarak kwe, eerulik mban aret iigwi, Eerugun o,” yinuk, yegerak o.

²¹“O Meratayim nanuk wim eeri unggwogwe, Aakumi o Pekot wonogwe nogo ineebe inoorogo piigwi, Eeruwak o. Inoorogo piigwi, ineebe lek eerogo piigwi, Yoragarak ndak-ndak aret eekwi, Eeko logowak o,” yinuk, Aliku ALA nen aret yegerak me yokkiragi o.

²²“O time wim nggoguk ari, o maluk eerogo pit nogwe, Eeko logonet, Inoone agan nogwe nogo konenit nogo agaarik o.

²³O nggween paga yime yi aakumi ndi aakumi yigirogo piiga ndo nggwik mbanak kwak ti, Kalok ari, yigi'nage, eekerak ti, iya o! Yi aakumi ndi aakumi inenggela'me o Mbaben abu maluk aago wonage yi, iya!

²⁴At Mbaben ti, Naliku ALA tebenogo panegak eekerak paga Pagi enggaanok nggerok yuurak keele pogo mengga kwak An nen at eeppuurak keele pigirak kagak at kobak nage me, Enggaanok nggerok yegerak wonage me, pigaganggirak o.

²⁵Nomaawi Lombok Naliku Nitok Minggirak an ALA nen aakumi o Mbaben wonogo menggam ambi eeriyak agaarak me, An neegin-nomaale pege minggim tu paarogo punuk, nanini nen eeppiyoorak ndak-ndak waganogo wunabi wagarak me,

²⁶Agi-ogu nen, aru-ogwe nen, o Mbaben tebeni unggwogwe, At gandum pege menggim tu paarogo pit nogwe, Gandum anggen mbanak kuwak eerogo nippogo mengga kwak, it ineebe inoorogo nippiigwi, Eegu yumbunogo piyoorak lek abok aret lek eerogo piigwi,

²⁷Ndi, tapi ngguunok inili yaga'lek inenggaanok mbanuwak nduk wonok nogo mengga kwak, Inawuri ineegin warak wakaa'ngget nogo teppiyoorak lek tigitogon inoorogo piigwi, Eeruwak o. It aakumi Mbaben mendek eeppiyoorak eyom ari wage, Eereegwaarak onggo inoba kwippiyoorak eyom muk panggoni wage, Eekerak me, inabuwa o!

²⁸It aakumi o Mbaben nen muk aago inagap ndakko'nok mbaganit o Tiyon wa'nuk yogo logonet, At ninogoba Aliku Ala nen it Mbaben mendek eereegwaarak nogo onggo eeppiige, At awi wurik maluk eerogo pereegwaarak onggo eeppiige, Eekerak, mbininggwi nogo Inaruk konenuwak o.

²⁹ O Mbaben ti, iniki wogoppake logonet, An Kikak Nakeelik Nalik Leenak Iterali inogoba Naliku ALA nogo meek eerogo panegerak me, It aap ineenggi woloonak inom, ineegin warak inom, nen o Mbaben tebeni woraawak nduk, inayonggo piyaawak o. Wogo logomenggaarik, ambiriluk ambi inagap ndakko'nok mbaganukwak, O Mbaben yendok-wandok inawooliya wukkologwe, At eeke menggerak onggo ndak-ndak eeppugwi, At eeppinet nage nagagi kwak, at togop aret eeppugwi, Eeruwak o.

³⁰Ti eekwi iinok, it inapuri wologwe tawe inooremenggaarak tu paga kambit nogwe, Ne ti eyom paga at awuri ineegin warak abok aret inooremenggaarak inoone nggobo agan nogwe, Eerugun o,” yinuk, Aliku ALA nen aret yegerak o.

³¹At Omaawi Lombok Menggerak Aliku nogoba Ala nen ari logonet, “At iniki wogoppaka ti, abet aret nawim nimbirak ogoorak me, At eeppuurak eyom panggoni wage, Eekerak onggo aaninggin oba kwippuurak eyom ari wage, Eekerak me,

³²At iniki wogoppaka ti, iyogobit lik togon ngginnarigin me, it ambi nen at piyanogo mippugun lek aret o. At awi kota-kota kani paarogo pit naminggirak enaagan-ambokan wonogwe nogo abok aret pup eerogo nenet nagin o,” yinuk, yegerak.

³³At Omaawi Lombok Menggerak Aliku ALA nen ari logonet, “It aakumi Iterali mendek inom, Yekura mendek inom, tebenogo piinok, wonogo agaarik o. It wogoren piya nogogwaarak nen teppiyoorak ineebi mba'nuk, tebembiirogo agaarik o.

³⁴Togop eerogo piinok wonogwe kwe, an Wondet Eerogo Piiga ti, nomaawi wonage, Nendage ti, Nomaawi Lombok Minggirak Naliku ALA aret o. An nen aret it Iterali inanggween paga wonogo logonet, inabolok lek logorak eerogo piige, Ndi, it o Mbaben wonogwe perak, inabolok mban yogo logorak eerogo piige, Eeruwak nduk, Iterali inawone liirogon amburu mbanogo piige logogin,” yegerak o.

³⁵Togop me, Aliku ALA nen ari logonet, “Wooluwak nen it Mbaben mendek nengge, It aakumi o Mbaben wonogwe inom, o kota Mbaben menggaarak inom, inoweewi inengga warak inom, inogobamini iniki warak inom, nengge,

³⁶Wooluwak nen aap inobagari negen yaga nogo wi kunogo piige, Wooluwak nen it aap wim eeka wakaa'ngget nogo iniki mak eerogo piige,

³⁷Wooluwak nen it inaguda inom, inanggweendo inom, yigirogo piige, Wooluwak nen it aap at awuri ineegin warak inenggela'me nenggelak-kenggelak wonogwe nogo kumi kwak eerogo piige, Wooluwak nen amindik-amendek onggo nggwok kuwak eerogo pugu nogo, kugun wonok nawak nduk, eerogo piige,

³⁸O Mbaben ti, kugi ogut aago ambik wonage, inayuk nen inamineeri ne agan nage logonet, kumili kunggwi, eekwi me, Wooluwak nen aniyo nage nogo porok yuwak nduk, eerogo pege, Eeruwak o.

³⁹ Togop aret eerigin me, ndiimbu-nggwiya karume mendek inom, mba'ngge eyonggaame mendek inom, towe mumayo inom, O time inawingga mbanggola unggugun me, Aakumi o time ambi wonaga'lek mondok o wogo aret kagak, aakumi nda'narit wundi nogo logogun o.

⁴⁰ Aa'nduk lombok at Ala nen o Torom inom, Nggomora inom, o kota-kota enaagan-ambokan wonogwe nogo inom, Abok pup eerogo piyareegi kwak, o Mbaben ti, lek eerogo pigin me, O time it aakumi ambiriluk ambi logogun lek o wogo aret logogin o,” yinuk, at Aliku ALA nen aret yegerak o.

⁴¹“It aap wim eeka apit aago o omarip paga pa'nggwe nen wogwe, Aakumi inanebunu nggwok lombok aago wogwe, Aap inendagembogut lombok o irip-irip time mi'narit nogwe, Eeko logonet,

⁴²Ineegin-inomaale inom, inarege-inawooluwak inom, li'luk ee'nuk wogwe, Aakumi inabuwa mbaka'lek inogogumbuk aret wogwe, Niyo yenggenak laut oonebu ari menggi kwak, inaguda paga kwi'na'nuk wogwe iniyogobit oone lo-lo agan wogwe, O Mbaben Aagalukwe kwak it Mbaben mendek ti, inooruwok nduk, ambo'me-ambo'me a'nuk wogwe, Eeko agaarik o.

⁴³At aap it Mbaben mendek inowe endagembogut nogo, it wogwe aruk konembunuk, Omanggen tayok ari, iniki mondok ma'nage, Kwe elege enegen paganak yagan wake menggi kwak, yagan wake, eeke agaarik o.

⁴⁴Singa niyo Yoreran ndirok eyoongga ku'mbanak me nen wundi woraanuk, Ndomba anggenogo omaawi wurik kagak obaga mbo unggwage menggi kwak, An pilak ari logonet, it o Mbaben wonogwe nogo yini-panip wumbiyaagin o. Wumbiige logominggirik, aap ambi leenogo mippiminggirak wone lengganogo yorage logogin me, Ta nen an nimbirak ndak-ndak me, nimbirak wakkage, Kat ti, nonggop nduk eekendak o? yinuk, ta nen an yo'nege, Ndi, it ndomba ndegeninaka ambi ta nen an eeriyak mbake nogo non mbanogo pege, Eerigin mbakop? Mondok lek aret,” yegerak o.

⁴⁵Togop aret me, at Aliku ALA nen o Mbaben eeppuurak nogo koonogo pege, Ndi, it o Mbaben wonogwe eeppiyoorak nogo koonogo pege, Eekerak yi, Konenggo logonip o. Ndomba aagalogwe kwak, inapuri elege-aabologwe nogo niik eerogo wumbiige, Ndi, ndomba inagari'ngga nenet nogo menggam kwak it wonogo menggam time abu maluk eerogo pege, Eerigin o.

⁴⁶O Mbaben tebenggola unggwi waga o, yinuk, keekok yogwe paga nggween nuk ari, Le yi-yi wo-wo yogwe nogo, yi aakumi ndi aakumi wonogwe me ari nage, Eerigin o.