Read Western Dani Yeremiya 51 Bible Online

Yeremiya 51 - Western Dani bible

Yeremiya 51

¹Aliku ALA nen yegerak nogo yi aret. “O Mbaben tebenogo pege, it aakumi Mbaben mendek tebenogo piige, Eeruwak nduk, Aakumi maluk eerogo piiga mendek inikime limbege neyaagun o.

²Gandum ameneno wiya nen wonok nawak nduk, yumbunogo nippugwi kwak, o Mbaben togop aret eerogo pugwi, Aakumi o time wonogwe nogo mondok pup eerogo piigwi, Eeruwak nduk, O Mbaben aaninggin oba puurak eyom paga aap inambik nappiya woraminggirak wogo logomenggaarik, Wakkumbunuk, agi-ogu nen, aru-ogwe nen, oonda mbanit unggwogo logonet, abok pup eerogo pogo logogun o.

³It ineenggi woloonak nen ineegin agale wukwi, Inarin yikkologwe, awo eeka'lek iigak inookwi, Inapuri wologwe tawe nogo inili yaga'lek inookwi, Inawuri ineegin warak aago nogo mondok pup eerogo piigwi, Eeruwak o.

⁴O Mbaben time inooremenggaarak ngginnarit nogwe, Inoorak tu paga nggiluk agan puk arit nogwe, Eerugun o.

⁵It Iterali inom, Yekura inom, wonogogwam time maluk lombok ndak warak wonage nogo An Kikak Nakeelik Nalik Leenak Iterali inogoba nenegen kage kwe, An Nomaawi Lombok Minggirak inogoba Naliku Ala nen it mbo piyaagin lek nduk, yagi,” yegerak o.

⁶“Togop me, Naliku an ALA nen it aakumi o Mbaben eekwi onggo aaninggin inoba piyoorak koonogo pereegirak eyom ari wagaarak me, At maluk eeke nagagerak onggo oba pege logonet, it an napuri inom nggelenogo piyookwak, It aakumi Mbaben wonogwe inenggela'me nen mbaganggwi, Inili eekko'nok kole mbaganggwi, Eeko logowak o.

⁷ O Mbaben nogo ti, niyoowak emas paga ogobakkigirik kwak Nalik Ku ALA neenggime logonet eeriyak yoge neegak, Aakumi nggween paga abok kumili kunuwak nduk anggur amburu wogorage nagagerak. Anggur amburu toologo pereegerak nogo yi aakumi ndi aakumi nunggo nagaarik, kumili kunik aret agaarik o.

⁸O Mbaben logonuk lek yini-panip tebenogo pogo logonet, Yigirik-noonom eerogo pugun me, ale yikkolage logowak o. Agabolo mbanit namenggerak andi nogo obeelom age kagak eerukwak, Awin amburu wappuurak kwaari nawak o.

⁹ At Mbaben tebembiinok wonogwe nogo nen yogo logonet, O Mbaben andi obeelom eerogo puwok mbakoorak kwe, at maluk eeke onggo oba puurak ti, Mbogut koorok piga lagangge, ndugwi koorok ari lagangge, Eekerak kenok, Obeelom ariyak meek me, Nit nggelenninabukwak, o yi teppunuk, niname lombok nawok o.

¹⁰Nit aakumi obeelom niigak, maluk yo'nirogwe nogo kin niyaawak nduk, Aliku ALA nen eeppinanegerak me, Ninogoba Aliku Ala eeppinanegerak nogo, aakumi o Tiyon wonogwe me, mbininogo yora nawok o, yinuk, yogo agaarik,” Yegerak me, yokkiragi o.

¹¹“Naliku an ALA nen it Mbaben mendek eereegwaarak nogo onggo eeppiige, Ndi, an nawi wurik maluk eerogo pereegwaarak nogo onggo eeppiige, Eeriyak koonogo pereegirak nogo eeppiige logonet, o Mbaben pup eerogo piyaawak nduk, It Meriya mendek inoweewi inendagembogut kini wuppiige logonet, Inawuri wim nambuka nen inomaale ngget mbulunggwi, inarin pipuk eerogo pakwi,

¹²O Mbaben yugum pak wurik langgunogo puwak nduk, ndiimbu walok eekwi, Wim inoba wundi wogwe iyo, tum logowak nduk piigwi, Pen warit nawak nduk, inaa'nduk nappiigwi, Ku tebembunuk logowak nduk eerogo piigwi, Eeko logowak o. Naliku an ALA eeriyak kooneegirak nogo aret eeke, Ndi, it aakumi o Mbaben wonogwe nogo eeppiyoorak wone lengganogo yoragagirak nogo aret eeke, Eerigin me,

¹³ It aap ineenggi warak niyo nggwok nage aa'nggi paga menggaarak inendage tiyanak wonogwe nogo Inendage lek ariyak eyom ari wage, Obeelom mban logowok, mbakwi nogo lek ariyak eyom panggoni wage, Eeke agaarik o.

¹⁴Yibila kombogonak nogwe kwak, aakumi o Mbaben yagabit ari ungguwak nduk nappiya woraminggirak tebenogo punuk, Abu tebenogo pogo o, yinuk, keekok piyanggaagun o, yinuk, Nomaawi Lombok Minggirak Naliku ALA nendage kumbatinuk kumbuk mbanggi o,” yinuk, yegerak me, yokkiragi o.

¹⁵At Ala eenggi omaawi paga o yi ogobakkigike, Iniki warak nen o nggween yi ena koonogo pege, At eenu paga mbogut mbiganogo nappege, Eereegerak o.

¹⁶At oone ngguurubu negen ari kenok, niyo mbogut paga narak wonage nogo kilak-tamok eeke, Ameraakot o ilin-unggut nen nippit wage, O yabok pindanogo nappege logonet, mayu wuppit wage, O wiya kuwak eerogo pege menggim nen nappit wage, Eeke menggerak o.

¹⁷It aakumi abok ti, iniki lek wi negen aret agaarik o. It aap mbuti emas paga eeka nen ogut ogobakkigirogo pugwi ti, Oone lek ogut mban ogobakkigirogo pugwi me, inenggali ogo menggaarak o.

¹⁸Kugi inogut eerak nogo ti, we aanom warogo aret eerak kenok, aakumi nen meek eerogo pugwi me, Eeko menggaarak onggo inoba piyoorak eyom panggoni wage kenok, inenggaawak lek aret arugun o.

¹⁹At Yakup iniki kunik mbake nogo perak, togop lek o. At nen yi mendek ndi mendek abok aret wakkage nagagerik, Eyate kwak inanebunu Iterali mendek warak eerogo piyareegerak nogo ti, Endage, Omaawi Lombok Menggerak Aliku ALA aret o.

²⁰Aliku ALA nen ari logonet, “At Mbaben ti, nando nggwik mbanak kwak, wim eeka neegin kwak aret wonage me, At paga aakumi inanebunu lombok tebenogo piige, At paga aakumi inabu'me piinok menggam lek eerogo piige,

²¹At paga aap inaguda inom yigirogo piige, At paga aap wonok nega inanggweendo inom yigirogo piige,

²²At paga aap inom, kumi inom, inoorogo piige, At paga aap inanggok inom, aap tawe inom, inenggaawak lek eerogo piige, At paga wologwe inom, komologwe inom, lek eerogo piige,

²³At paga aap ndomba ndegeninaka andomba inom inoorogo piige, At paga lembu nggween kabungga aap yabu eeka inom inoorogo piige, At paga it aap o unde waka inom, inom eeka inengga warak inom, inoorogo piige, Eeke minggirak o.

²⁴Togop me, it Mbaben mendek nen it o Tiyon wonogwe nogo maluk eeppiinet nogogwaarak paga onggo at enegen kagak o Mbaben eeppege, it aakumi o Mbaben wonogwe nogo eeppiige, eerigin o,” yinuk, Aliku ALA nen yegerak me, yokkigi o.

²⁵“At o Mbaben ti, puut nen aakumi aambiranogo piige menggi kwak aakumi o nggween paga abok aret lek eerogo piiga nawim aret me, At lek eerogo pikit nduk, an neenggi titik ege, Puut paga nen yugum langgunogo nappogo mengga kwak eerogo pege, Puut kani wunuk ari nagaatik noguk ari menggi kwak eerogo pege, Eerigin o,” yinuk, at Aliku ALA nen aret yegerak me yokkigi o.

²⁶“Kaliirubu pup eerogo piminggirak wonage me, aap ambi nen, Yugum iyaalok ogowa yi paga pit nage, Yugum ambi waganogo owak kwippege, Eerigin o, yinuk, wa nagin lek aret o,” yinuk, Aliku ALA nen aret yegerak me, yokkigi o.

²⁷“At aap inowe endagembogut o omarip paga pa'nggwe wonage nogo nen o nggween paga yi, ndiimbu walok eeke, Yi aakumi ndi aakumi inenggela'me oone nggwok eeka trompet oonebu eeke, Aakumi inanebunu lombok inenggela'me o Mbaben wim eeri ungguurak eyak maganake, O Ararat inom, Mini inom, Atekenak inom, nen o Mbaben tebenogo pi ungguwak nduk, inayonggo piige, Wim eeriyak ineegin warak inowe mippege, Wurin ninggirik mengga kwak kuda paga kwi'na'nuk inaa'nduk nappiige,

²⁸O Mbaben inom wim eeriyak nduk, aakumi inanebunu lombok abok aret pipuk eeke, It aap o Meriya mendek inom, o unde menggaarak inoweewi inom, inawuri inom eeka inengga warak inom, It inabu'me piinok menggam abok aret ineegin warak inom, pipuk eerogo piige, Eeko logowak o.

²⁹At Aliku ALA nen o Mbaben time aakumi wonogo logokwak pup eerogo puurak koonogo pereegerak nogo aret eerigin me, O Mbaben ti, aganak wake, andi nen yagan yobak-nggolak wake, eeke agaarik o.

³⁰O Mbaben pak wurik tungga yinik-minik eerogo pit nogwe, O kani mbelanogo pugwi, Eekaarak paga Aap o Mbaben mendek ineegin warak nogo wim eeka'lek puk ogwe, Yugum pak wurik me time puk a'nuk wonogwe, inomaawi lek ogwe, it kumi kwak ogwe, Eerak aret agaarik o.

³¹It aakumi tu andogon-andogon abok aret unggwi wogo logonet, o kota tebeni unggwi wogwe, Niyo ayo mbaninuk wundogo menggam inogo ndoonogo kwi'nogwe, Inoori unggwogwe iyo, yugum pak wurik kani paarogo pit nagaarak paga aan ndu-ndu wangge, Aap ineegin warak inomanggen tayok ari, Eekerak o, yinuk, Mbe agan aap o Mbaben inowe endagembogut eenu aruwak nduk, wone yugu ambi yori nagak, ambi yori nagak, eekwi, Wone wonok ambi nappegak, ambi nappegak, eekwi, Eeko agaarik o,” Yinuk, yegerak o.

³²

³³Togop aret me, at Omaawi Lombok Menggerak Iterali inogoba Aliku Ala nen yegerak nogo yi aret. “O Mbaben Aagalukwe kwak it Mbaben mendek ti, Aap gandum agabolo mbelanggo logonet, iniyok aambiranogo pogo menggam kwak Eerogo piyoorak eyom muk panggonak aret agaarik o.

³⁴Aakumi Mbaben mendek inowe endagembogut Nebukanetat nen ambeme yonggo'ninake, Mak eerogo pinanege, Niyo toolak porok togon nunggwi kwak eerogo pinanege, Waalo tinambe nen yonggorinake menggi kwak, nit yonggo'ninake, Waalo ombat abe kenok ndonggorogon nenok, kilirogo pege menggi kwak togop aret eerogo pinanege, Eereegerak me,

³⁵Ninapuri ninom maluk eerogo pinanugwi ti, it Mbaben mendek inoba aruwak o, yinuk, it Tiyon mendek nen yogwe, Ninoorogo pinanugwi ninamiya it o Mbaben wonogwe nogo inoba aret aruwak o, yinuk, it Yerutalem nen yogwe, Eeko agaarik o,” yinuk, yegerak o.

³⁶Togop aret me, Aliku ALA nen yegerak nogo yi aret. “An nen napuri Iterali inawone mbanogo piige, It maluk eeppiigwi onggo eeppiige, O Mbaben aniyo laut yenggenak nogo woloonogo pege, Aniyo eneeri nogo poronogo pit nage, Eeke neyaagun o.

³⁷O Mbaben ti, langgu-langgu aago kagak wonage, Mba'ngge kumaarak logowam age, O time aakumi lek inamineeri ne agan nage logowam age, Aakumi meek eerogo pogo logowam age, Eerigin o.

³⁸Singa inanini nen inoone kole agan nugu mengga kwak o Mbaben aagalogwe inoone togop aret agan nugwi, Singa inaagalogwe inanini nen inoone nggininu-ngganinu yogo mengga kwak yogwe, Eekwi iinok,

³⁹Ineenik aga'lek inale'nggen paga nogo nggaruk togon yuwak nduk, mbi larogo wogorage, Niyo kumili aganaka toologo wogorage, Eerigin o.

⁴⁰Ndomba aagalogwe inooriyak nduk wogoren wogwe kwak, Ndomba-kambin ngguunok inooruwak nduk, piya wogo mengga kwak, It togop eeppiyaawak nduk, wogoren piya woraagin o,” yinuk, at Aliku ALA nen aret yegerak o.

⁴¹“O Mbaben tebenogo pugwi nogo ti, iya! Aakumi o nggween paga wonogwe abok aret nen tiyappogo menggaarak o Mbaben tebenogo kologwe nogo ti, mondok iya o! O Mbaben ti, mondok maluk eerak kenok, it aakumi inanebunu lombok nen, Iya! yinuk, inamineeri ne agan nage agaarik o.

⁴²Niyo kole yenggenak laut wu'nuk wage logonet, o Mbaben taani wage, Niyo laut oonebu ari logonet, kilaarak-mogonik eerogo o Mbaben tebeni wage, Eerigin o.

⁴³O Mbaben kota-kota ti, o wogo aret age, Nggween mbuk karume aret age, eeke kenok, Aakumi o time wonogwe, tu ti paga nogwe, eeka'lek aret logogun o.

⁴⁴Kugi Mben o Mbaben wonage nogo aaninggin oba kwippege, Yi mendek ndi mendek at ambeme yonggoleegerak nogo kilirogo wumbi woraawak nduk, eeppege, Eerigin me, Aakumi inanebunu lombok at owagam wagak eekwi nogo ambinom eeko logogun lek o. Ndi, o Mbaben ayugum pak wurik kunduk, langguk yigin o,” yinuk, Alik Ku ALA nen yegerak o.

⁴⁵“Togop me, it an napuri o time nen mbo punuk, mbaganggo logowak o. Inili eekko'nok mbaganggwi, Naliku ALA nanini kani kunik negen inoba piige me, it nggelenogo piyookwak, Inagap ndakko'nok kole mbaganggwi, Eeruwak o.

⁴⁶It o time logonet, Ndogop arigin o, yinuk, yogwe, Tahun yi paga, Yogop arigin o, yinuk, yogwe, Tahun peebi paga, Ndogop arigin o, yinuk, yogwe, Inoone aganggen kereembu yogo logonet, O time maluk eeppiinet nogo agaarik o, yinuk, yogwe, Aap inendagembogut nen it aap inendagembogut tebenogo piigwi o, yinuk, yogwe, Eekwi nogo Inaruk konenggwi iinok, iniki ma'nage, inogut nggigik ari, eerugwaarik o.

⁴⁷Inagugi ogut eerak o Mbaben wonage nogo yigirik-noonom eerogo piyoorak eyom abet aret panggoni woraagin me, Ari wage kenok, yigirik-noonom eerogo piyaagin o. Piige neenok, it o time wonogwe abok aret inenggali ogwe, It inenggela'me time aakumi inooremenggaarak nggween paga ngginnarit nogwe, Eerugun o.

⁴⁸ It aap o maluk eerogo pega o omarip paga pa'nggwe nen wogo logomenggaarik, O Mbaben lek eerogo pugwi ti eyom mbogut inom, nggween inom, yi mendek ndi mendek it paga wonogwe nogo inom, abok aret nen, O Mbaben nogo lek aga o, yinuk, inale'nggen nen keekok yogo logogun o,” yinuk, Aliku ALA nen aret yegerak o.

⁴⁹ “Aa'nduk it aap Mbaben mendek nen eeppiinet nogo nogogwaarak paga aakumi o nggween paga wonogwe abok aret inenggaawak lek arit nogo nogogwaarak nogo ndak-ndak, It Iterali mendek inoorogo piigo nogogwaarak paga it aret inenggaawak lek eerogo piyaagun me,

⁵⁰It eegu inoorulik yumbunik nogo ti, puk ariyak lek o ti mbo punuk, kole mbaganggwi, O nda ninawi alom paga Aliku ALA ninom wonogogurak o, yinuk, abekwi, O Yerutalem ti nonggop agagi, yinuk, iniki koonggwi, Eeruwak o.

⁵¹It aakumi inambik nen Aliku ALA awi alik leenak wurik me muk ari unggunuk wonogwe paga ninendage maluk age, Aakumi nen miyuk-meya eerogo pinanugwi paga ninenggali age, Eekerak o, Yinuk, yugun kwe,

⁵²It o Mbaben inagugi ogut eerak yigirik-noonom eerogo piyoorak eyom abet aret panggoni woraagin me, Ari wage kenok, o time inookwi andi nen yagan warit nogwe nogo inoone inaruk konenggo logogun o,” Yinuk, Aliku ALA nen aret yegerak.

⁵³“It aakumi Mbaben mendek nen aakumi tebenogo wuppiya woroobok me, mbogut paga lagi nanuk, O time wuppunuk, pak omaawi lombok wurogo pemenggaarak kwe, Tebenogo wuppiya woraawak nduk, it aap o maluk eerogo pega nogo time aret nappiya woraagin o,” yinuk, Aliku ALA nen aret yegerak.

⁵⁴“O Mbaben nen le nggwok yogwe, It Mbaben wonogo menggam maluk eerogo pit nogo logonet, noone-koone yogwe, Eekwi nogo Inaruk konenggo agaarik o.

⁵⁵Naliku ALA nen o Mbaben maluk eerogo pege, Inale'nggen nen agan nugwi nogo lek eerogo pege, Eerigin o. Niyo kole laut kilaarak-mogonik eeke menggi kwak inawim togop aret aago unggwogwe, Niyo laut oonebu ari menggi kwak, inoone togop aret agan wogwe, Eerugun o.

⁵⁶Naliku ALA ti, eekaatak ndak-ndak onggo eeppiige minggirak an Ala aret o. An nen o Mbaben eekerak ndak-ndak onggo oba kwippigin me, It o maluk eerogo pega nogo o Mbaben wogo logomenggaarik, maluk eerogo pogo logonet, At awuri wim eeka nogo piginakwi, ineegin kalenogo pugwi, Eerugun o.

⁵⁷It o Mbaben inoweewi inengga warak inom, inoweewi iniki warak inom, it o Mbaben unde menggaarak inom, Inawuri inom eeka inom, inawuri aap wim eeka inom, abok aret Niyo kumili aganaka wogoraminggirak nenok ineenik aga'lek mondok-mondok nogo nggaruk togon yogo logogun o,” yinuk, at endagembogut endage ti, Omaawi Lombok Menggerak Aliku ALA nen aret yegerak o.

⁵⁸At Omaawi Lombok Menggerak Aliku ALA nen yegerak nogo yi aret. “O Mbaben yugum pak wurik ambe wiganak nogo yigirogo kobak-kobak eerogo pugwi, Tungga pak tiyarogon mbanak nogo kani nawak nen paarogo pugwi, Eerugun me, It aakumi inanebunu lombok nen inomaawi lik-lek eereegwaarak ti, aanom warogo aret eekwi, Ndi, yi aakumi ndi aakumi yabu ta'liila eereegwaarak ti, kani noorak ake aret eerogo pugwi, Eereegwaarak kaagun o,” Yinuk, yegerak o.

⁵⁹At aap Terekiya nogo Yekura inowe endagembogut logonet, wone lengganogo yorage kagak tahun kenagan eeppunuk, ambi age ti paga, aap Mateya ombooluk Neriya aput aap endagembogut eebe wonok nega Teraya nogo, Terekiya imbirak o Mbaben nogwe me, at Ala yoge kagak yoraga Yeremiya nen yoreegerak nogo yi aret.

⁶⁰At Yeremiya nen aaninggin-paaninggin o Mbaben oba kwi'nariyak abok aret wone mbuku pirik-perek aago paga liiru mbaneegerak me,

⁶¹aap Teraya nogo wogoge logonet, “Kat o Mbaben ari nanuk, wone liiru mbanggirak wokkege yi abok aret, aakumi o Mbaben inenggaanom paga mondok lunumunggun o.

⁶²Lungge logomenggendik, Aliku ALA yoge logonet, Kaliku ALA wae. Kat nen, O kota yi, lek eerogo pege logonet, aakumi inom, inaanggumi inom, ambi logogun lek, o wogo mondok-mondok aret logogin, yagandak o, yinuk, tamban eerumunggun o.

⁶³ Wone yi abok aret lungge, tamban eeke, eeke logomenggendik, yugum ambi waganogo mbuku pirik-perek mbanak yi, enggela'me punuk, keele maarogo niyo Eparat inikime mbo mambumunggun o.

⁶⁴Mambunuk yorage logonet, Aliku ALA nen, O Mbaben yi, aaninggin nggwok lombok oba piminggirak paga yugum yobok togon wanggerak ti kwak eerogo pigin me, pilak yigin lek endage lek aret logogin, yegerak, yoraamunggun o,” yinuk, yoreegerak. At Yeremiya nen wone yorage nagagerak irip paga ti aret.