Read Western Dani Yeremiya 52 Bible Online

Yeremiya 52 - Western Dani bible

Yeremiya 52

¹Aap Terekiya nogo ndarak kagak tahun 21 age paga endagembogut a'nuk, o Yerutalem logonet, wone lengganogo yorage kagak, tahun 11 eereegerak. At agalo ti, awi Libina mendek aap Yeremiya apuluk kwe Kamutan aret.

²Aap Yoyakim nogo maluk eeke nagagerak ndak-ndak, at Terekiya nen Aliku ALA enegen kagak maluk eeke nagagerak.

³It aakumi o Yerutalem mendek inom, Yekura mendek inom, aaninggin inoba kwi'nagagerak nogo ti, at Aliku ALA anini inombareegerak paga eerogo piinok, “It inoba aberak logorak neebi o,” yinuk, mbo piyareegerak ti aret. Ti'nuk, aap Terekiya nen, “Aap Mbaben inowe endagembogut wone lengganogo yo'nirage logorak neebi o,” yinuk, mbo pereegerak.

⁴ Mbo pege nagagerik, aap Yekura inowe endagembogut a'nuk wone lengganogo yorage kagak, tahun 8 eeppunuk, ambi eeke tut 9 penembunuk ambi penenak tanggal 10 tut ti paga at aap Mbaben inowe endagembogut Nebukanetat apuri ineegin warak abok aret o Yerutalem tebenggolaawok nduk, wogogwaarak. Wogo nogogwaarik, o kota endekenggwe time inawooliya wuppatinuk, o pak wurik obaga mbo ungguwok nduk, nda'nggi pit nogwe, nggween pit laganggwi, eeko nogogwaarik,

⁵wakkagak eekwi tit iigak, aap endagembogut Terekiya wone lengganogo yorage kagak tahun 11 eeke ti paga aret ari nagagerak.

⁶Ndi, tut 4 penenak tanggal 9 paga o kota time aakumi inambi noorak abu lek aret agagerak me, mbi abu mondok iya aganabeegerak.

⁷ Aganake mbareegi, it aap Yekura ineegin warak abok aret oonikiya it aap Mbaben mendek o kota wanggeppiinok wonogwe iigak, o kota yugum pak wurik nogo, eno pelembunuk, aap endagembogut eyabu yarak me koorok owa'nagat peenok-peenok wurik kagak, oolo tu unggwogo menggam nogo paga wundi nogo nogogwaarik, kole mbaganit o Araba niyo Yoraran kobappaga ari nawok nduk nogwe me,

⁸it aap Mbaben mendek ineegin warak nen muguren, o Yeriko kobappaga taati awuri kole ma'nogwe iigak,

⁹inowe endagembogut Terekiya nogo piganok, aap Mbaben inowe endagembogut o Kamat kota Iribila wonage me pi nogo mbareegwa, taati nen, “Ndogop eeppagagun o,” yinuk, yoreegerak.

¹⁰Yoge nagagerik, o Iribila taati, it Mbaben mendek inowe endagembogut nen at Terekiya enegen kagak apuri inoorogo piige, it Yekura mendek inom eeka inengga warak kunduk inoorogo piige, eeppunuk,

¹¹ at Terekiya enegen kilirogo pege, mbuti keele tembaga paga ogobakkigirik nogo paga eenggi-iyok maarogo pege, ee'nuk, wonok o Mbaben pi nage nagagerik, keele maarak menggam mambereegerak nogome logonet kambeegerak.

¹²Ndi, aap Nebukanetat nogo aap Mbaben mendek inowe endagembogut wonage kagak, tahun 18 eeppunuk, ambi eerak tut 5 penenak tanggal 10 paga, aap endagembogut inom eeka ambi at eebe wonok nega inowe endage Nebutararan o Yerutalem wagagerak.

¹³ Wage nagagerik, Aliku ALA awi wurik inom, aap endagembogut awi o nggwok abe wurik inom, it aap nagawan-nagawan inawi wurik o Yerutalem wonage abok aret inom, kani pit nage nagagerik,

¹⁴it aap Mbaben mendek ineegin warak aago abok aret at inom o Yerutalem pak wurik langgunogo pit nogogwaarak.

¹⁵Pit nogo nogogwaarik, aap endagembogut eebe wonok nega inowe Nebutararan nogo nen it aakumi eekkoloorak meek ineenggi abu lek eegu inom, it aakumi ando iigak nogogwaarak o kota time wonogwe nogo inom, it aap ineenggi amburu eeka ando inom, it aap Mbaben inowe endagembogut inom ogogwaarak inom, wogoren naakit nduk koonogo piige,

¹⁶ndi, it aap ineenggi abu lek ando perak, anggur yarak me yabu eerit nogwe, yi mendek ndi mendek yarak wola yit nogwe, eeko logowak nduk, time aret teppiige, eereegerak.

¹⁷ Eeke mbareegi, at awuri Mbaben mendek nen Aliku ALA awi wurik eyak mbuti tembaga paga ogobakkigirik mippugu nogo inom, Aliku ALA awi wurik me ineenggi kookak niyo toolak wonok negak inom, togolowak kole endage, Niyo Yenggenak, mbuti tembaga paga ogobakkigirik nogo inom, minogo punuk, mbuti tembaga kero mban, o Mbaben wonok nawok nduk, ponggonogo waganggwi,

¹⁸togolowak tenggap kwak inom, nggween tege inom, ndi keele abo mbanggak inom, niyo kilirogo pit nagak togolowak inom, Ala awi wurik me aakumi inake eekak yi mendek ndi mendek mbuti tembaga paga ogobakkigirik inom, abok aret waganggwi, eekwi iigak,

¹⁹aap endagembogut eebe wonok nega inowe nogo nen yi mendek ndi mendek mbuti perak-emas paga ogobakkigirik togolowak kole tenggap kwak inom, kaninggen ndoongga inom, niyo kilirogo pit nagak togolowak inom, togolowak tabak inom, ndi wuninik alom ogobakkigirik inom, ake kilirogo pegak amburu tookak inom, abok aret waganeegerak.

²⁰Ti waganeegerak nogo ti, at Talomo nen Aliku ALA awi wuke logonet, o awe eyak imbirak ti, agi nggorek metet 8 wakkagak ogobakkigirogo pege, obate paga komaarak metet 5 eeppunuk, ambi oolo wakkagak ogobakkigirogo pege, ndi, oolo mbo punuk, ambe yendok-wandok ineenggi tabak kwak eerogo pege, eeke nagagerik, irip kwippuurak mbuti tembaga paga agi nggorek metet ambi eeppunuk, ambi oolo paga wakkagak ogobakkigirogo punuk, mbuti omanggen paga yum ogut negen yigogo tugumbunuk, tembaga paga eyo delima anggen ogut negen yendok-wandok eerogo pit nage, ndi, o eyak ore nogo togop aret ogobakkigirogo punuk, mbuti omanggen tembaga paga yum ogut negen yigogo tugumbege, eeke logonet, eyo delima anggen ogut negen yendok-wandok eerak ti 96 aret eerogo pege, ndi, yum ogut negen yigogo tugunik irimbaga ti, 100 aret eerogo pege, eereegerak nogo inom, Aliku ALA awi wurik me logowak nduk niyo toolak ineenggi kookak wonok nega inom, togolowak kole endage, Niyo Yenggenak, nogo inom, minogo punu(...)

²⁴Aap endagembogut eebe wonok nega Nebutararan nogo nen aap Ala unde inowe Teraya inom, awot abu'me mendek Tepaniya inom, Ala awi wurik tungga arum waka ineebe kenagan inom, piginake,

²⁵ando iigak nogogwaarak o kota awo wonogwe nogo, aap endagembogut inom eeka ambi it wim eeka inowe nogo inom, aap endagembogut ake liirogon koongga ineebe 7 inom, aap ineegin warak inowe nen aakumi inenggela'me ineegin warak aruwak nduk, inendage liiru mbangga nogo inom, at awuri ineebe 60 o time wonogwe iyareegerak nogo inom, wogonake, eeke nagagerik,

²⁶abok aret wogoren aap Mbaben inowe endagembogut o Iribila wonage me, piya nagagerak.

²⁷Piya nage mbareegi, o Kamat kota Iribila time at endagembogut nogo nen inooruwak nduk, awuri yorage mbareegi, inoorogo piyareegwaarak. It aakumi Yekura mendek inanggween paga nen keele maageren mbo piya nogogwaarak nogo ti aret o.

²⁸Aap Nebukanetat nen it aakumi wogoren o Mbaben piya nagagerak nogo ti, At endagembogut logonet wone lengganogo yorage kagak tahun 6 eeppunuk, ambi age paga it Yakuri mendek ineebe tiga ribu dua puluh tiga wogoren nage,

²⁹At endagembogut logonet, wone lengganogo yorage kagak tahun 17 eeppunuk, ambi age paga o Yerutalem nen ineebe delapan ratus tiga puluh dua wogoren nage,

³⁰Ndi, endagembogut logonet, wone lengganogo yorage kagak tahun 22 eeppunuk, ambi age paga aap endagembogut eebe wonok nega inowe Nebutararan nen it Yakuri mendek ineebe tujuh ratus empat puluh lima wogoren nage, eereegwaarak ineebe lambunik ti empat ribu enam ratus aret.

³¹Ndi, aap Yekura endagembogut Yoyakin wonok, o Mbaben keele maarogo mbo pi nagagerak wonage kagak, tahun 36 eeppunuk, ambi age paga aap Ewin-Merorak o Mbaben inowe endagembogut agagerak. Age nagagerik, tahun ti paga tut 11 penembunuk, ambi penenak tanggal 25 tut ti paga, at Yoyakin nogo keele maarogo mambiigo menggam wonage me, piinogo wumbereegerak.

³²Wumbege nagagerik, abuwa mba'nuk, wone yoge, it inoweewi inendagembogut at o Mbaben inom wonogogwaarak nogo tebenak negen iigak, at Yoyakin ayuk warak tiyarogon logowak nduk mippege, eereegerak.

³³Eeke mbareegi, at Yoyakin nogo keele maarak logonet, ayum yirik wonagagerak nogo mbo punuk, abe mendek yikko'nok, aap endagembogut inom mbi nonggo menggam nogome, inom nengge kagak, kambuurak kuli aret ari nagagerak.

³⁴Ndi, kambuurak kuli ari nage kagak, amendek lek kenok kunggolaawak nduk, aap endagembogut nen kulinik-kalinik awu wogoge nagagerak.