Read Western Dani Yeremiya 6 Bible Online

Yeremiya 6 - Western Dani bible

Yeremiya 6

¹Aliku ALA nen ari logonet, “It aap Mbeniyamin mendek ti, owunarok mbaganggwi, O Yerutalem teppunuk, mbaganggwi, Eeruwak o. O omarip paga pa'nggwe nen aaninggin inoba ari wage, Maluk mondok iya lombok inoba kwi'narikit nduk wage, Eeke me, O Tekowa paga nen oone nggwok eeka trompet oone pu eekwi, O Mbet-Kerem irimbaga nen kani ka'luk eekwi, Eeruwak o.

²O Tiyon Aagalukwe ti, abu kigirikwe obaabut yanggonak lombok kagak kwe, an nen maluk eerogo pigin o.

³At aret tebenogo puwok nduk, it aap ndomba ndegeninaka kwak inaanggumi inom wogwe, Inalitak lombok inawooliya at wonage me yengget-wangget wurogo patit nogwe, Inalitak lombok pumbunuk, nenet nogwe, Eerugun o,” Yinuk, yegerak me, yokkiragi o.

⁴It ti nen yogo logonet, “At ninom wim eeruwok nduk li'luk eekwi, O liingge paga aret oba kwi'nari ungguwok nduk nogwe, Eeruwok o, Mbakoorak me, wologwe! Oonegen abu kilu yi nage logonet, ninagalu'mak abu aret ninambo'me ari nage me,

⁵Yogondak oonikiya yi paga aret oba kwi'nari unggwogwe, Obak wurik nogo langgunogo pugwi, Eeruwok o,” Yinuk, yereegwaarak.

⁶At Omaawi Lombok Menggerak Aliku ALA nen yegerak nogo yi aret. “Eyo muurogo pit nogwe, Iniyok punuk ungguurak nda'nggi pit laganggwi, Eeko logowak o. O kota aken time at ambi nen at ambi tebenogo pegak mban eerit nugwi me, Teppiyoorak lek it maluk eekwi onggo inoba kwippiigo logowak o.

⁷Niyo eneeri kila-kila wundi wage menggi kwak o Tiyon Aagaluk Kwe nogo ti, Maluk lombok togop aret eerit nage menggerak. O kota aken time aakumi iniki worokot logonet maluk eeppiinet nugwi, Piyak-payak eerogo piinet nugwi, Eekwi nogo mban naruk konengge, At andi kage, yawi paga awinde-obaande eerak wonage, eeke nogo mban nenegen kage, Eeke agarik o.

⁸At Yerutalem ti, an kurumbi yoge yi, liippuwak o. Liippega'lek kenok, an nen nambokan pege, It aakumi o yime logorak meek mbaruwak nduk, anggween o wogome eerogo pege, Eerigin o,” yinuk, yegerak me, kat kota Yerutalem yokkigi o.

⁹At Omaawi Lombok Menggerak Aliku ALA nen yegerak nogo yi aret. “Anggur anggen eegu pugulik pup eerogo mbanggo mengga kwak It aakumi Iterali eegu yumbunik ti, togop aret pup eerogo piyaawak o. Aap anggur anggen mbambunuk, eegu ambitak wonage kero kwaarogo eenggi paga mbanit nage menggi kwak, Iterali yumbunik eegu ambitak wonogwe iyo, maluk eeppiyoorak ne ambi liirogon kwaarinabit nawak,” yegerak o.

¹⁰“Wone yi taani yorage, ta mini kurumbi yorage, eeriyak mbaken? Ndi, yorage neenok, taani nen liippugun mbaken? It aakumi ti, inaruk paarak lek me inaruk koneniyak meek aret o. Kaliku ALA ari menggendak nogo inikilom mbaka'lek miyuk-meya eerogo pugwi me,

¹¹Kat kanini it inoba piyoorak nogo an ninikime kani pogom kerek togon eerogo pani wage paga puk ariyak meek tit ee'nake agaarik o.” Yoge mbaki, at Aliku ALA nen, “Nanini kinikime wonage ti, Elege tu paga wonogwe nogo inoba piinet nage, It aap tawe kuwak aago nogo inoba piige, Eeke logot o. Eeppiinet nage keegak, kumi-aap inogonggelomini-inakuwi inom wogoren nogwe, Aap inanggok inom, it aakelo inom, abok piginakwi, Eerugun o.

¹²O it wonogwe me yime abok aret aaninggin inoba piyaakit nduk, neenggi nippege neenok, Inawi wurik inom, inakuwi inom, ineyabu aago inom, it aap alik unde eekkolaagun o,” yinuk, yegerak o.

¹³“It aap inendage lek inom, inendage warak inom, abok aret ambi kolaawok nduk mugurok nugwi, It an wone yorage neegak yoraga inom, it an neebe unde inom, abok ndak-ndak inoone pilit pugunggo logonet, aakumi wi-wi eeginabit nugwi, Eeko menggaarak.

¹⁴ Eeko logonet, inawin kunik kwak an napuri inoba aaninggin wonage kwe, Ti iya lek o, yinuk, yorogwe, Iniki ugun tayenak lek iigak, Kiniki ugun tayenak logonip o. Kiniki ugun tayenak logonip o, yinuk, yorogwe, Eeko menggaarak.

¹⁵ Ineraambe maluk lombok logonet, ogole warak mendek eerit nugwi nogo paga inenggali mbariyak kwe, inenggali lek aret nugwi, Inenggali nen inuut wutik nugu logorak op kwe, inenggali lek a'nuk nugwi, Eeko menggaarak. Togop me, aap inoorak kanggo logonet, it inom aret inoorak kanggwi, Ndi, maluk eekwi onggo eeppiige neegak, it inom aret inenggaawak lek ogwe, Eerugun o,” yinuk, Aliku ALA nen aret yegerak o.

¹⁶Aliku ALA nen yegerak nogo yi aret. “Tu nandogon-kandogon ari nanuk, yambonggwi, Tu aa'nduk lombok nogo nogogwaarak nogo ngge o? yinuk, yorogwe, Tu obeelom nogo menggaarak ngge o? yinuk, yorogwe, Eekwi iinok, Tu yi aret, yorogwe iinok, ti paga aret nogwe, Eeko logowak o. Ti eekwi iinok, iniki kwi'narigin o, yinuk, yoragagirak kwe, It nen, Tu ti paga noorak nineebi o, yinuk, yogwe,

¹⁷Inarum logowak nduk, aap mippiinok, Oone nggwok eeka trompet oone pu ari kenok inaruk liirogon konenggo logowak o, yinuk, yoragagirak kwe, It nen, Ninaruk koneniyak nineebi o, yinuk, yogwe, Eereegwaarak nogo o.

¹⁸Togop me, it yi aakumi ndi aakumi ti, inaruk konenggwi, An eeke neyaawak nduk, kuwak aago ti, it an napuri inoba ariyak nogo liippugwi,

¹⁹It aakumi o nggween paga wonogwe ti, inaruk konenggwi, Eeko logowak o. It an napuri yi wone ndi wone yoragatak nogo liirogon konengga'lek taganogo pugwi, Eeko logorak wone yoragatak nogo mbo pugwi, Eeko logonet, Iniki koonogo punuk eerit nugwi paga an nen aaninggin mondok nggwok lombok it aakumi ti, inoba pege agarik o.

²⁰It nen obari abe kaga o Tiyeba nen wonok nake pi wogwe, En weeri amburu aberogon o nda nen wonok niri wogwe, Eekwi ti, Nano ake eeko agaarik? Ti we aanom warogo aret! Warogo nake kani kunggwi ti, ninikilom mbake, Warogo wo'nugwi ti, nale'nggen mbake, Eekeelik mban aret o,” yinuk, yegerak me yokkiragi o.

²¹Togop me, at Aliku ALA nen yegerak nogo yi aret. “Iniyogobit lik togon yigeebu wanggak nogo mendek it aakumi yi, inaru non mbanogo pit naminggirak me, Inogobamini inom, inapuri inom, iniyogobit lik togon yigeebu wanggwi, Inoreewi inom, it inom menggaarak inom, iniyogobit lik togon wanggwi, Eeko logogun,” yegerak o.

²²At Aliku ALA nen yegerak nogo yi aret. “It aap wim eeka aago o omarip paga pa'nggwe nen wogwe, It aakumi inanebunu nggwok ambi o irip-irip nen woraawak nduk, inikime manabit nugwi, Eekwi ti, abet aret o.

²³It ti, ineegin-inomaale inom, tege-wooluwak inom, mondok li'luk ee'nuk, wogwe, Inabuwa mbaka'lek inigen kubuk yinuk, mondok nappiigak-wappiigak eerogo inookwi, Niyo yenggenak kole laut oonebu ari menggi kwak, inaguda paga kwi'na'nuk, keekok agan wogwe, O Tiyon Aagalukwe ti, waruwok nduk, wim eeriyak oba teben-teben ee'nuk unggwogo mengga kwak, unggwogwe, Eeko agaarik o,” yinuk, yegerak me, kat o Tiyon Aagalukwe yokkigi o.

²⁴It inabok agan wogwe nogo ninaruk konembunuk, ninaganak ngginuk ari, Kwe ambi elege ndariyak enegen paganak yagan wake menggi kwak, andi negen ee'ninake, Eeke agaarik o.

²⁵Kinom wim mbanak ti, inarege-inawooluwak mik-kwit eeppunuk wonogwe, Ndi, kinaagan-kinambokan kinamineeri ne agan noorak aago wonogwe kogwe, Eekwi me, Kineyabu eerit wunggwi, tu nggwok paga nogwe, eeriyak mage o.

²⁶Nawuri yi wae. Ninooriyak nduk yini-panip ninoba kwi'narigin me, aap ambi apuluk ambolom ndarak kangge kenok, ale yimbegeelik-mbambegeelik ari menggi kwak, Kinayum nibinik maluk mendek yikkologwe, Wun paga lagak-mbagak yogwe, Kiniki puru yinuk, kinale yikkologwe, Eeko logonip o.

²⁷Aliku ALA nen ari logonet, “Kat nen an napuri eerit nugwi nogo liippiige, inabut mbangge, eeke logonok nduk, Aap mbuti abut mbangga nen, Mbuti omaawi kaamun ilik? yinuk, abut mbangge menggi kwak eerogo pagareegirak o.

²⁸It napuri abok ti, inogogumbuk an ari eeriyak ineebi mbaka wonogwe, Aakumi meek eerogo piinet nugwi, Mbuti tembaga inom, abe mbuti inom, omaawi menggi kwak, iniki omaawi togop aret wonogwe, Eerak wonogo logonet, Eeriyak lek mendek kagak eerit nugu menggaarak.

²⁹Mbuti worako logonet, kani eyak nen mbuti enggela'me mili leennaruwak nduk, Oone puubu ari kagak worako mengga kwak eeginake minggirak kwe, It aap maluk eeka nogo ineebe leennage lek initok wonogwe me, we aanom warogo eeginake minggirak.

³⁰Naliku ALA nen it nogo mbo piyareegirak me, Mbuti perak mbo pugu mendek it aret, yogo menggaarak o,” Yinuk, yo'negerak me, yagi o.