Read Western Dani Yeremiya 7 Bible Online

Yeremiya 7 - Western Dani bible

Yeremiya 7

¹Aliku ALA nen at Yeremiya wone ambi yoge logonet,

²“Naliku ALA nawi wurik me tu unggwogo menggam mi'nari nage logomenggendik, koone nggwok paga wone yoroorak nogo yi aret o, It aakumi Yekura mendek nen Naliku ALA nabu'me tebe yinuk nalut eeruwak nduk, tungga ti paga unggwogwe ti,

³Nomaawi Lombok Minggirak Iterali inogoba Naliku Ala nen yagarak yoroorak nogo yi o. It inobaabut inom, eeko menggaarak inom, abok aret mbo punuk, alik ngget mendek ogwe iinok, o yime logorak an nen, Op aret, yoraagin kwe,

⁴it aakumi nen, Aliku ALA awi wurik wonage me, op aret logomunggup o. Op aret logomunggup o. Op aret logomunggup o, mban pilit pugunogo yorogwe ti, Yi abet aret yo'nirogo agaarik o, yinuk, mbarugwaarik o.

⁵Inobaabut inom, eeko menggaarak inom, mbo punuk, alik ngget mendek ogo logomenggaarik, inalitak lombok a'me nggelok eeppiigak mban eekwi,

⁶aap nggiru inenggela'me wonogwe inom, elege moono inom, kumi togwe inom, tebenogo piigo logonet, wi-wi aganaka'lek obeelom mban eeppiigwi, o yime it aap maluk eeka'lek iigak, inamiya wunaka'lek teppiigwi, kugi eerit nugwi paga maluk inoba paka'lek an mban mu'neren wogwe, eekwi iinok,

⁷aa'nduk it inombomini mondok-mondok logowak nduk, O wogoragagim yime logorak op aret o, yinuk, an yoraagin kwe,

⁸it aakumi nen wone pilit aanom warogo kagak agan nugwi nogo, Abet aret yaga, mbakwi iigirak o.

⁹It nen kote kiraakwi, aap inookwi, mbabi eekwi, pilit kagak, Abet aret o, yinuk, kumbuk mbanggwi, kugi Mba'an ake obari abe kaga kani kunggwi, an inogoba Ala aret kwe, it ineenggo'lek alik mendek kagak mugurok nogwe, eeko logonet,

¹⁰an nendage ki logorak koonogo pereegim nawi wurik me time it an nenggaanom mi'nari wa'nuk, Nit ugun obeelom aret ogoorik o, yogo logonet kwe, ti'nuk, ogole warak mendek ti nogo ambinom eerit nogo menggaarak o.

¹¹ An nendage ki logorak koonogo pereegim nawi wurik me time aakumi yogoot woppunuk, ari unggwogo menggam aret agaarak mbakop? It eekwi ti, Naliku ALA nenegen wogonake minggirak o,” yinuk, yegerak me, yokkiragi o.

¹² “An nendage ki logorak nawi aa'nduk wurogo pereegim o Tilo time nogo logomenggaarik, it an napuri Iterali maluk mban eeko mbareegwa, eerogo pereegirak nogo pekka nawak o.

¹³It maluk eekak mban eekwi iinok, Naliku ALA nen, Kinomaluk mbo pinip o, yoragak mban eekitak kwe, inaruk konenggwi, wiiragatak kwe, onggo yo'nugwi, eeka'lek iinok,

¹⁴an nendage ki logorak eerogo pereegim it inom, inombomini inom, inake nawi wurogo piyareegirak iniki panggonak wonogwe nogo aa'nduk o Tilo eerogo pereegi kwak yogondak eerogo pigin o.

¹⁵It inowe-inawot aakumi Eparayim mendek aa'nduk maluk eeko mbareegwa, an wonage me nen wumbiyareegirak nogo pogom, it togop aret an wonage me nen wumbiyaagin,” yegerak me, yokkiragi o.

¹⁶Aliku ALA nen an yo'nege logonet, “It aakumi yi, inake tamban eeke, Yeenggwaaret o, yinuk, an nggino yo'nege, it ambi mendek lek kenok, Eeppiyet o, yinuk, yo'nege, eeriyak mage o. Kat nggino yo'nirimenggendak nogo an konenigin lek o.

¹⁷O Yekura kota-kota nogome inom, o Yerutalem tu paga tu paga inom, eerit nugwi nogo kat kenegen iiga'lek agandik?

¹⁸ Kugigwe endage, Mbogut-Kwe, ake wologwe-komologwe nen kani kuwak eerogo pi wogwe, it inogobamini nen kani kunggwi, ndi, it kumi nen gandum yigirik amok mbanogo punuk, oroti worakwi, eeppunuk, iri wogwe, ndi, niniki waruwok mba'nuk, an nalut eeko logorak wonage neegak kwe, inagugi inake amburu kilirogo wogora wogwe, eeko menggaarak.

¹⁹Ti eekwi paga an niniki wariyak nduk mban eekwi mbakop? Lek o! It kunduk maluk eekkologo logonet, inenggali ariyak kagak eeko menggaarak nogo lek a?”

²⁰Yo'nege nagaarik, Aliku Itok Menggerak ALA nen yegerak nogo yi aret. “Nanini kani kunik pogom o yi paga wuppi woraminggirak paga aakumi ineebe inom, inaanggumi inom, inageyo inom, ineyabu yarak anggen mbanak inom, abok aret nenet nage logogin me, nogonogo puurak meek aret kaagun,” yegerak o.

²¹At Omaawi Lombok Menggerak Iterali inogoba Aliku Ala nen yegerak nogo yi aret. “An nake warogo wo'nogo logonet, nake warogo kani kunggwi nogo mendek oba lunogo punuk, enggaanggum nogo inobaalombok nunggo logowak o.

²²It inombomini o Metit nen wogoren wundi wage neegak, an nake warogo kani kunggwi, nake warogo wo'nugwi, eeko logonip o, yinuk, an nen wone ti mendek mban lengganogo yoroolik o.

²³Ata, wone eeko logorak lengganogo yoragagirak nogo yi aret. An noone ari inaruk liirogon konembunuk eekwi iinok, an it inogoba age, ndi, it an napuri ogwe, eeko logogun o. Ndi, ineebe obeelom inale'nggen paga logowak nduk, an nen, Yogop ee'nu, ndogop ee'nu, yorage nogo ndak-ndak eerit nogo logowak o, yinuk, yoragagirak kwe,

²⁴it nen an noone inaruk konenggwi, liirogon eekwi, eerulik inogogumbuk logonet, maluk eeriyak iniki koonggwi nogo mban mugurok nogo nogogwaarak me, an ari nogo inengga loolo punuk, mugurok naga'lek inambokan yungguninuk nogo nogogwaarak.

²⁵It inogobamini o Metit nen wogoren wundi wagagirak kuli nen nok, yogondak yi kuli, it aap an yorage neegak yoraga nayeloman mini nogo ko'lu-kii'me, kulinik-kalinik, yoragak yuwak nduk, nappiigak mban eeke nagagirak kwe,

²⁶an yorage nogo inaruk konenggwi, iniki liippugwi, eeka'lek inogogumbuk logonet, inombomini maluk eeko nogogwa kwak lek it yogondak wonogwe yi, abunuk nggwok lombok eeko menggaarak,” yegerak me, yokkiragi o.

²⁷At Aliku ALA nen an yo'nege logonet, “Wone yokkege yi abok aret, yorage keenok, it nen konenggwi, ndi, Wone yokkirage yi, koneninip o, yoramenggendak kwe, inoone onggo ambi yokkugwi, eerugun lek me,

²⁸kat nen it yorage logonet, It aakumi inogoba Naliku ALA noone konembunuk eekwi, iniki koonnaruwak nduk eeppiige nogo waganggwi, eeka'lek mbo pogo menggaarak it aret o. Iniki koonak logonet, liirogon eerit nugwi nogo lek agaarak me, inoone inambe paga yuurak kunduk meek aret aga o.

²⁹Naliku ALA nanini it aakumi yogondak ndarak yi, inoba agaarak wonage nogo, Neebi o, yinuk, mbo piigirak me, ineeruwak mbanogo mbo punuk, puut puluk ko aago paga lagi nanuk, le ndawi piyanggo logowak, yegerak, yoret o,” yinuk, yo'negerak o.

³⁰Aliku ALA nen ari logonet, “It aap Yekura mendek nen an nenggaanom paga maluk lombok eeko logonet, inagugi ogut eerak ogole warak mendek nogo an nendage yogo menggam nawi wurik me nogome mippit nagaarak ti paga maluk eerogo pegaarak o.

³¹ An nen, Yogop ee'nip o, yinuk, wone lengganogo yorage, niniki kunduk, Togop eerugun, mbake, eerulik kagak, it nen inapuri wologwe inom, komologwe inom, inoorogo kani kuninakak yuwak nduk puut endage Topet Kobappaga Mben-Kinom time inoorogo punuk, kani kuninako logorak wurit nagaarak,” yegerak o.

³²Aliku ALA nen ari logonet, “O Topet inoorak nggween taambiigak mban yogwe iigak, o tenak ambi lek arigin me, aakumi nen, O Topet o. O Kobappaga Mben-Kinom o, yinuk, ambinom yogo logogun lek, O Kobappaga Aakumi Inooko Menggam o, yinuk, yogo logorak eyom panggoni woraagin me, liippogo logowak o.

³³Ti eyom panggoni wage kenok, inoorak nogo towe wiga agan nugu menggaarak inom, ndiimbu-nggwiya nggween paga nugu menggaarak abok aret inom, aap ambi nen mugogo nappiyoorak ineebe lek me, inambi-inambiingga pogom inoorak ti, ugun nenet nogo logogun o.

³⁴ O yime nggween mondok mbuk arigin me, Yekura kota-kota inom, o Yerutalem tu paga tu paga inom, iniki ale'nggen nen inoone amburu paga agan nugwi, kumi-aap lambuninako logonet, inoone agan nugwi, eekwi nogo an nen lek eerogo piyaagin,” yegerak o.