Read Western Dani Yeremiya 8 Bible Online

Yeremiya 8 - Western Dani bible

Yeremiya 8

¹Aliku ALA nen ari logonet, “Ne ti eyom paga it aakumi Yekura inoweewi inendagembogut inowak nggininik inom, it inawuri nagawan-nagawan inowak nggininik inom, it aap neebe unde inowak nggininik inom, it aap an nen yorage neegak yoraga inowak nggininik inom, it aakumi Yerutalem mendek inowak nggininik inom, nggween taanak me nen abok aret kabologo wumbiya wa'nuk,

²it iniki kunik aganakwi, inake eerit nugwi, muguren nogwe, Nonggop o? yinuk, kin wogonakwi, inayuk wukwi, eeko nogogwaarak inagugi oonegen inom, tut inom, laaluguragan mbogut paga wonogwe abok aret inom, it abok inenggaanom kin paga piyaagun me, kuwak eerogo piigwi, taambiigwi, eerugun lek yabume nggween mili ake aret arugun o.

³Ndi, it aakumi inobaabut maluk eeka yi awi ndi awi an mappiyaminggirak ando yumbunik nogo ti, ineenik logorak ineebi mba'nuk, kambuurak mban inikilom mbarit nugu logogun o,” yinuk, at Omaawi Lombok Menggerak Aliku ALA nen yegerak o.

⁴“Aliku ALA nen yegerak yi aret o,” yinuk, yorage logorak yo'negerak nogo yi aret. “Aap ambi iyogobit lik togon ngginna'nuk, pilak-palak mi'nage, Ndi, aap ambi tu kobak age kenok, iyokan yungguk togon wage, Eeko menggaarak nogo lek a?

⁵Eeko menggaarak kagak, it aakumi yi, nonggop nduk tu nomo agan mban nogwe, It Yerutalem wonogwe nogo nonggop nduk nomoninuk nogwe, Eeko agaarik mbakop? Aakumi inambokan lagangga kagak mugurok nogo logonet, iniyokan woroorak ineebi mbako menggaarak.

⁶It aakumi yi, yogwe nogo naruk liirogon konengge nagagirak kwe, abe koonak yogwe ambi naruk konengge, An maluk nonggop eeki? mba'nuk, Mbo pi o, yogwe ambi konengge, Eeka'lek aret agarik o. It aap wim namburiyak kuda paga kwi'ndak mbe agan nogo mengga kwak, It yungguninuk waga'lek eeriyak mbakwi nogo mban mugurok nogo menggaarak.

⁷Towe wiga agan nege menggerak lu nogo, o mayu wage menggim eyom ari wage kenok, kibi wonage me ari nage, Ti'nuk, o kibi age kenok, iyokan ari wage, eeriyak eyom eenu wonage, Ndi, towe puume inom, wuni'nuk inom, uuni inom, nen o kibi menggim nogwe, ti'nuk, iniyokan wogwe, eeriyak eyom liippugwi, Eeko menggaarak kwe, It an napuri perak, eeko logorak Naliku ALA nen yoragagirak nogo liippugulik kobak aret menggaarak o.

⁸It aap liiru mbangga nen eeko logorak wone Naliku ALA yoragagirak nogo liiru mbanggo logonet, Eebe yugu kagak alik pugunogo liiru mbaneegwaarak kagak waganeegwaarak me, Eeko logorak wone Aliku ALA nen yereegerak nit porogo wonogwe me, niniki warak aret o, Yinuk, yogwe ti, nonggop togon yogwe mbakop?

⁹It aap niniki warak mbako menggaarak nogo inenggali aret ogwe, Kobak ogwe, inoone lek eerogo piigwi, eerugun o. Naliku ALA noone yugu nogo mbo pereegwaarak me, nano wone paga panggombunuk, Iniki warak agaarak me yogo agaarik mbakop? Lek aret me,

¹⁰ It inakuwi ndinogo aap alik wogorage, Ndi, ineyabu eerak nogo it aap o tebengga wogorage, Eerigin o. It aap inendage lek inom, inendage warak inom, abok aret ambi kolaawok nduk, mugurok nugwi, It an yorage neegak yoraga inom, it an neebe unde inom, abok ndak-ndak inoone pilit pugunggo logonet, aakumi wi-wi aganabit nugwi, Eeko menggaarak.

¹¹ Eeko logonet, inawin kunik kwak an napuri inoba aaninggin wonage kwe, Ti iya lek o, yinuk, yorogwe, Iniki ugun tayenak lek iigak, Kiniki ugun tayenak logonip o, kiniki ugun tayenak logonip o, yinuk, yorogwe, Eeko menggaarak.

¹²Ineraambe maluk lombok logonet, ogole warak mendek eerit nugwi nogo paga inenggali mbariyak kwe, Inenggali lek aret nugwi, Inenggali nen inuut wutik nugu logorak op kwe, inenggali lek a'nuk nugwi, Eeko menggaarak. Togop me, aap inoorak kanggo logonet, it inom aret inoorak kanggwi, Ndi, maluk eekwi onggo eeppiige neegak, it inom aret inenggaawak lek ogwe, Eerugun o,” yinuk, Aliku ALA nen aret yegerak o.

¹³Aliku ALA nen ari logonet, “It an napuri nogo yabume anggen mbanogo kuwak eeko mengga kwak, kuwak eeppiyoorak kwe, Eyo anggur agaro paga anggen yega'lek wonage, Eyo wuli agaro paga anggen yugu lek wonage, Engga mbuk eerogo pit nagaarak wonage, Eerak wonage pogom napuri togop aret wonogwe me, Inanggween wogoragagirak nogo it aap inambik nen ndinogo unde eekkolaagun,” yegerak o.

¹⁴It Ala apuri nen yogo logonet, “Nonggop nduk nit yime kwi'ndik-kwi'ndak mban ogoorik? Nit nen at Aliku ninogoba Ala maluk eeppogoorak paga at nen niyo kanggo menggaarak mendek toologo wo'nirage, Ninenggaawak lek eerogo pinanikit nduk koonogo pege, Eereegerak me, Nit mbet-mbet kuwak eekwi, Kuwak eeppunuk, o kota-kota yugum pak wurik me time unggwi nogo logomonggoorik, kambit nogwe, Eeruwok o.

¹⁵Nit niniki ugun tayenak logorak niniki lunik wonogoorak kwe, obeelom mendek ambi eeppinanit wage lek Maluk mban eeppinanit wage, Yogondak yi eyom paga andi obeelom eerogo pinaniyak niniki lunik wonogoorak kwe, Ninamineeri ne agan noorak mban ee'ninake, Eeke agaarik o.

¹⁶Wim eeriyak wogwe iinok, ninawim inaguda inogobak oone yogwe o Ndan nen ninaruk konenggwi, Inaguda wali inoone nggwek yogwe paga o nggween yi abok aret nuk-nuk ari kogwe, Eeko ogoorik o. It wogo logonet, o nggween yi inom, yi mendek ndi mendek nggween paga wonage inom, O kota inom, lek eerogo pogo logonet, yi aap ndi aap o kota wonogwe abok aret ne ambit lek eerogo piyaagun o,” yinuk, yagaarak.

¹⁷At Aliku ALA nen ari logonet, “Waalo aakumi inooka kwak, Aliirumbuk yanggoninaburak meek nogo mendek kwak, Inawim inenggela'me tek eerogo nappiya woraagin me, iya tit aganakwi iyaagun o,” yinuk, yegerak.

¹⁸An niniki abu puru aago wonage, Neebe andi negen ee'nabit unggwage, eeke me, Obeelom ee'naburak meek aret o.

¹⁹It an nowe-nawot o nda nen le yogo logonet, “Aliku ALA o Tiyon wonage ilik lek a? O kota time inowe endagembogut wonage ilik?” Yinuk, inoone nggwok paga yogwe nogo karuk konenu o. Yoge mbaki, at Aliku ALA nen, “An niniki wariyak it nonggop nduk inagugi ogut eerogo pugwi, Nonggop nduk it aap inambik inagugiwak aanom warogo kagak mippit nogwe, Eekaarak?”

²⁰Ari mbaki, Iterali nen inoone nggwok paga yogo logonet, “Anggen mbaniyak eyom muk lek aret age, Ndi, o kibi eyom kunduk muk yobok ari, Eekerak kagak kwe, Nit perak, ninagap ndaka'lek awo aret agaarik o,” yinuk, yogo agaarik o.

²¹Yogo mbaka, an nen, “It aakumi an nowe-nawot iniki andi negen wonogwe iinok, An kunduk, niniki andi negen logonet, niniki puru ari, nomanggen tayok ari, eeke agaarik o.

²²O Nggileyat time inawin amburu eeppiigak wonage ilik? Aakumi obeelom eeginaka time ambi wonage ilik, lek a? Wonage kenok, it aakumi nowe-nawot yi, iniki andi negen wonogwe iigak, Obeelom eeginaburak waga'lek nonggop nduk wonage agaarik o?