Read Western Dani Yeremiya 9 Bible Online

Yeremiya 9 - Western Dani bible

Yeremiya 9

¹Nanobak me niyo yenggenak kwak wonage, Ndi, niyo kila-kila wundi wage menggi kwak, nenegen me nen wundi wage, Eeke logowak lak, ao! Togop aret logonetak en, it aakumi an nowe-nawot inoorak nogo liingge-oonikiya inale ari logonetak o.

²Aakumi tu paga wogwe nogo, nogo yegak inake o karume nawi wurik wonage logowak lak, ao! Togop wonage nen, it aakumi nowe-nawot abok aret ti, Kumi ugun-ugun eeginabit nugwi, Wone yugu liippunuk, eekwi lek taganogo mbo pugwi, Eeko menggaarak me, Time mbo piinok, nalik o karume tayorogon time ari nanetak o,” Yinuk, yagarak o.

³Aliku ALA nen ari logonet, “It aakumi ti, inamili yigin agale wurik paga maale lumbunuk tekkoorak kwak logonet, Pilit pugunogo nappit noorak mban koonogo pugwi, It wone abet aret agan nugwi nogo o yime wiganogo pugwi lek pilit wone mban wiganogo pugwi, Ala ti, ninogoba aret o, yinuk, yaga'lek maluk ambi eekak mban eerit nugwi, Eeko menggaarak o,” yinuk, yegerak o.

⁴Aliku ALA nen an yo'nege logonet, “Inom ndarak aret kwe, inambokan laganggwi, Iniki kunik aret mbakwi kwe, meek eerogo piinet nugwi, Eeko menggaarak me, Inom kunik mbakwi nogo maluk eeppiyookwak liippiyaawak o. Ndi, inom ndarak nogo nen, Kit ninowe-ninawot aret me, obeelom eeppinagagun o, yorogwe iinok, abet mbarugwaarik o.

⁵At oreeluk ambi nen oreeluk ambi ambokan lagangge, Aap ambi nen abet ariilik pilit mban ari, Eeko menggaarak. Inoone pilit agan nugu logorak mendek abu mamunggologogwaarak me, ti mendek mban agan nugwi, Maluk mban eerit nugu logonet, inomaawi lek eerogo pakwi, Eeko menggaarak.

⁶Inoone pilit mban kilirogo pit nogo menggaarak inenggela'me menggendak o. It aap ti, Ala ninogoba aret o, yinuk, yuurak ineebi mbako menggaarak o,” yinuk, an yo'negerak o.

⁷Togop me, at Omaawi Lombok Menggerak Aliku ALA nen yegerak nogo yi aret. “An napuri ti, maluk mban eerit nogwe paga an nonggop eeri? Mili leennaruwak nduk, mbuti worako mengga kwak, napuri ti, togop aret eeginake, inabut mbangge, Eerogo piyaakit mbake agarik o.

⁸It inamili ti, wim komenggabili kwak wonage me, pilit mban agan nugu menggaarak. Inambe paga nen, Nimbirak niniki ambit o, agan nugu menggaarak kwe, inikime perak, Pagi wariyak ta'na pugu kwak, inoreewi maluk eeppiyoorak koonogo pogo menggaarak.

⁹It ti eerit nugwi nogo, onggo eeppiiga'lek teppiyoorak mbakop? It aakumi ti eerit nugwi paga nanini mbake nogo tayo yuwak nduk, maluk eeppiyoorak lek mbakop? Eeppiyaagin aret o,” yinuk, Aliku ALA nen aret yegerak o.

¹⁰Puut-puut inom, o karume inom, time aakumi lek me, tu ti paga nugwi iige, Lembu-tapi iri'ngga mbanogo nenet nugu logonet, inoone yogwe konengge, Yi towe ndi towe wiga agan nugwi nogo mendek abu mbaganeegwaarak me nenegen ambi iige, Ndiimbu-nggwiya wonogwe me, nenegen iige, Eeka'lek me, Puut-puut eeppiinet noorak nogo inale ari, inaleenggu maake, Eeke logonet, O karume iri'ngga mbanogo nenet nugu menggam ariyak nogo kunduk, niniki puru ari logonet, inaleendawi piyanigin o.

¹¹At Aliku ALA nen ari logonet, “O Yerutalem ti, an nen o langgu-langgu aago nigabak negen eerogo pigin me, Nggeewo owo iname ari unggwogo logogun o. Ndi, o Yekura kota-kota ti kunduk, o owak mbanak aret eerogo pigin me, Aakumi inawi time logogun lek aret,” yegerak o.

¹²Aap iniki warak ta nen wone ti, liippege, ta nen Aliku ALA oone ari waganeegerak me, “Wone ti, ndogop o,” yinuk, yo'nirage, eeriyak op mbakop? O nggween yi maluk eerogo pege, o karu nggween mbuk aago kenok aakumi time noorak meek menggi kwak eerogo pege, eereegerak ti, nonggop nduk?

¹³Yoge mbaki, at Aliku ALA nen, “It eeko logorak wone yoragagirak nogo mbo pugwi, noone inaruk konembunuk eekwi, an eeriyak yorage nogo mugurok nogwe, eeka'lek logonet, inogogumbuk a'nuk it eeriyak mbakwi mban mugurok nogwe, it inombomini nen mamunirogogwaarak ndak-ndak inagugi Mba'an mban mugurok nogwe, eekwi iinok, inanggween ti, togop eerogo pigirak o,” yinuk, yegerak o.

¹⁵Togop me, at Omaawi Lombok Menggerak Iterali inogoba Aliku Ala nen eeriyak, yegerak nogo yi aret. “An nen it aakumi yi, eyo anggen ale mendek mban nunggwi, niyo kambuurak mendek mban nunggwi, eeko logowak nduk, wogorage neyaamunggun o.

¹⁶It inom, inombomini inom, aakumi abu ineenggo'lek mendek ineenggime mak eerogo piige, ineebe inooruwak nduk, nappiya woraminggirak muguren nogwe iigak, an nen inenggaawak lek eerogo piige, eerigin,” yegerak o.

¹⁷At Omaawi Lombok Menggerak Aliku ALA nen yegerak nogo yi aret. “O yime arit wage nogo iniki liippuwak o. It kumi leendawi piyangga nogo wiirogwe, Kumi leendawi iyagalo woraawak nduk, yonggo nappiigwi, Eeko logowak o.

¹⁸It aakumi ti nen yogo logonet, Mbet-mbet wogo logomenggaarik, eeppinanegaarak paga ninaleendawi aanggili-aanggelo yogwe iigak, Ninale ninigen me yenggembunuk, wuranet wage, Ninamunggut-ninale nggaru-nggaru ninamik paga ndooni wangge, Eeke logowak o.

¹⁹Ninawi wurik langgunogo pit wagaarak paga ninanggween mbo punuk, mbaganiyak agaarak me, Nineebe lek eerogo pinanugwi, ninenggali eerogo pinanugwi, Eekwi me, Ninabuwa o! yinuk, O Tiyon nen leendawi ari nogo konenit nogo agaarik o,” yinuk, yegerak me, yokkiragi o.

²⁰Togop me, kit kumi yi wae. Aliku ALA wone yegerak yokkirage yi, kinaruk konenggwi, At ambe me nen wone wungge nogo kinaruk konembunuk waganggwi, Eeko logonip o. Kinaagalogwe komologwe leenggu maakak yuwak nduk, mamunirogwe, Kit ambi nen leendawi it ambi mamuniragak eekwi, Eeko logonip o.

²¹Nineebe kambuurak ninawi wurik pugagi ambe mbanak me nen muk unggwi wage, Ninawi nggwok abe wurik kagak unggwi wage, Eeke logonet, Elege-aabologwe tu paga nugwi nogo inoorogo piinet nage, Wologwe tawe o kota-kota nugwi nogo ambeme yonggorinabit nage, Eekerak o.

²²“Aliku ALA nen yegerak yi aret o,” yinuk, yorage logorak yo'negerak nogo yi aret. “Liirubu koorogo yabu yarak me yumbunogo pit nogo mengga kwak, aakumi ineebe inoorak nogo yumbunogo piinet nogwe, Gandum anggen mbanogo pit nogo logonet, eegu yumbu-yumbu wanggetak anebeniyak anggon menggi kwak, Inowak nggininik togop aret kalo logonak wonage, Eerak aret logogin,” yegerak o.

²³Aliku ALA nen yegerak yi aret. “Aap iniki warak ambi nen, Niniki warak me, an iya o, mba'nuk, tiyappake, Aap omaawi ambik ambi nen, Nomaawi ambik me, an iya o, mba'nuk, tiyappake, Ndi, aap eenggi warak ambi nen, An neenggi warak me, an iya o, yinuk, tiyappake, Eerugwaarik o.

²⁴ Ata, aap ambi nen wone tiyappuurak mbake kenok, wone eebe tiyappuurak nogo yi aret. O nggween paga yime aakumi inabuwa mbakwi, Eekaatak a'me nggelok eeppiigwi, obeelom mban eeppiinet nugwi, Eekwi paga ninikilom mbake minggirak Naliku ALA neebe at eenu wonage, Ndi, an eeke minggirak liippanege, Eeke logorak ti aret o,” yinuk, Aliku ALA nen aret yegerak o.

²⁵At Aliku ALA nen ari logonet, “It aap inagabolo mban mbanak aakumi Metit mendek inom, Yekura mendek inom, Erom mendek inom, Amon mendek inom, Mowap mendek inom, it aakumi inawi karume menggaarak ineeruwak kirinom kagak owa'nggan-owa'nggan mban mbanak nogo inom, it abok aret maluk onggo eeppiyoorak eyom panggoni woraagin o. It yi aakumi ndi aakumi ti, inagabolo mbanak kwe, inagabolo mbanak kenok wone yugu eeko menggaarak nogo eeka'lek wonogwe, ndi, it Iterali paga wiganak abok aret kunduk, inagabolo mbanak kwe, inagabolo mbanak lek negen iniki omaawi mban wonogwe, eekwi me, it abok aret aaninggin mondok inoba kwippiyaagin,” yegerak o.