Read Western Dani Leendawi 2 Bible Online

Leendawi 2 - Western Dani bible

Leendawi 2

¹Ndugwi nen puut lenggenogo pit nage menggi kwak, Nogoba Ala anini o Tiyon Aagalukwe oba lenggenogo pereegerak ti mondok iya o! Iterali endage tiya agan mbogut paga ari laganeegerak nogo nggween paga mbo wuppi wage, At anini eeppiyoorak eyom paga at iyok pi wangge menggim teppega'lek anini inoba kwippege, Eereegerak o.

²Abuwa mbaka'lek nogoba Ala nen it Yakup mendek wonogo menggam abok aret pup eerogo pege, At anini nen o Yekura Aagalukwe obak wurik abok aret yigirik-noonom eerogo wurabit nage, At abu'me piige menggim inom, at arum menggaarak nagawan-nagawan inom, inendage maluk eerogo pege, Eereegerak.

³Anini kani negen wunuk ari logonet, it Iterali inomaawi menggaarak nogo inomaawi lek eerogo piige, At awim nen inooriyak panggoni wogwe iinok, at eenggi abe'nggan uwikkolage, Yi mendek ndi mendek kani omoonuk nen pup eerogo nengge menggi kwak, It Yakup mendek inenggela'me anini kani kunik negen ineebe lek eerogo piinet nage, Eereegerak o.

⁴Aap inawim negen a'nuk, omaale eegin agale paga lumbunuk abinak lan agan nutik wage kwak eeri wage, Inom ogoorak nen inooko mengga kwak, inooriyak inikilom mbaketak nogo aret inoorit nage, O Tiyon Aagalukwe awooliya wurik paga kani kunik negen anini oba kilirogo pege, Eereegerak o.

⁵Nogoba Ala ti, aap inom wim mbanak kwak wonage me, Iterali ambeme yonggorinake, Aap inendagembogut inawi nggwok abe wurik nogo yinik-minik eerogo pit nage, At obak wurik yigirik-noonom eerogo pege, Ndi, o Yekura Aagalukwe nogo ambinom iniki wakkolage, leenggu maake, eeke logowak nduk, eerogo pege, Eereegerak o.

⁶Ooliya yabume wurik minogo pogo mengga kwak, Aliku ALA nen at awi wurik nogo langgunogo pit nage, At alut eeruwak nduk kuwak eeko menggam nogo minogo pege, O Tiyon ale'nggen nen lako logorak yugu inom, nogo 6 yippunuk, ko'lu paga yonggonggoloorak yugu nogo inom, mari eerogo puwak nduk, eeppege, Ndi, aap endagembogut inom, it aap at eebe unde inom, anini kani kunik negen inoba piinok mbo piige, Eereegerak o.

⁷Inogoba Ala nen at ake warogo kani kunggak ogobakkigirik nogo mbo pege, At awi wurik alik leenak nogo mbo punuk nage, O Tiyon oweewi inendagembogut inawi o nggwok abe wurik nogo, yigirik-noonom eerogo puwak nduk, awim ineenggime pege, Eereegerak me, Iterali inale'nggen paga laago lariyak koonak nogo lako logonet, inale'nggen nen keekok piyanggogo mengga kwak awim nen Aliku ALA awi wurik me unggunuk logonet keekok piyanggogogwaarak.

⁸Aliku ALA nen o Tiyon Aagalukwe obak wurik ti, mondok yigirik-noonom eerogo puurak koonogo pereegerak o. At nen eenggi paga ko wapporogo wonaga'lek yigirik-noonom eerogo puwak nduk, Yagat wurik ti abok aret keele wakkagak paga wakkage mbareegi, “Pup eerogo pinanigin kogo o,” yinuk, yugum pak wurik endekem aken imbirak nen le yogo logonet, langgu-langgu wambit nogogwaarak o.

⁹O Tiyon tu unggwi wogo menggam taannage, Tungga nappegak-wappegak eerak inom, wa'mbit narak inom, maluk age, Eereegerak. At owe endagembogut inom, oweewi nagawan-nagawan inom, yi aakumi ndi aakumi inenggela'me mbo piya nagagerak wonogwe, Aliku ALA nen, “Yogop eeriyak,” yoraga'lek aret wonage, Ndi, Ala yorage kagak yoraga kunduk, Aliku ALA nen inabinggaanggo paga yorage nogo wagangga'lek aret wonogwe, Eeko agaarik o.

¹⁰O Tiyon Aagalukwe oweewi nen inarugup nggobok togon eerak nggween paga kwi'ndak wonogwe, Liirubu inanobak paga yumbunogo pakwi, Inayum nibinik maluk mendek yikkologwe, Ndi, o kota Yerutalem aagalogwe komologwe nogo nggween paga inanep kumbunuk wonogwe, Eeko agaarik o.

¹¹An nanebunu mendek inenggaawak lek ogwe, Inapuri wologwe komologwe inom, elege ngget ndarak inom, o kota tu paga tu paga time inambuluk pit nogwe, Eekwi ti paga Le ari logonet nenegen piirogo panege, niniki andi lombok ee'nake, niniki awi lik-lek eerogo panege, Eeke agaarik o.

¹²Elege ti nen aap inoorak kwak o kota tu paga tu paga inambuluk pit nogwe, Inagalomini inaawi paga logonet kambit nogwe, Eeko logonet, “Kwiya wae. Mbi wo'niru o. Niyo wo'niru o,” yinuk, yorogo agaarik o.

¹³O Yerutalem Aagalukwe kat yi wae. Kat eekkakerak wonage ti, kin kaamunggun nduk nano wakkagak yokkege, O Tiyon Aagalukwe Aap Kigin Waka'lek kat yi wae. Kiniki eyak wappagarak nano paga wakkagak yokkege, Eeri o? Niyo laut kiiniki lombok menggi kwak kat koba kwi'nagaarak paga kiniki andi eekkake ti, Alik negen mondok iya eekkake me, ta nen obeelom eerogo pagarak? Lek aret o.

¹⁴“Ndogop arigin o,” yinuk, yokkega nen yokkogo nogogwaarak nogo ti, pilit aret yokkugwi, Ambi eeppagarak lek kagak yokkugwi, Keele maakkeren pagi nookwak, “Maluk ndogop eeke agandik o,” yinuk, kin paga yokkega'lek kat eeke nogo kagaarogo pugwi, “Ala nen yegerak me, yokkogo o,” yinuk, yokkogo nogogwaarak nogo ti, pilit-pilit yokkugwi, Tu abe kagak alik paga nomonggeren nogwe, Eeko nogogwaarak o.

¹⁵It aakumi nen, “O kota kigirikwe abu abe lombok aret o,” yinuk, yogwe, “It aakumi o nggween paga menggaarak abok aret iniki ale'nggen alik negen kogwe, Eeko menggaarak O Yerutalem Aagalukwe nogo, Yi aret agaarak ya?” yinuk, Kat keegak nogo logonet, “Ha!” yinuk, kagi'ndok kanggwi, Meek eerogo pagagwi, ineenggi ineyak mbanggologwe, Eeko agaarik o.

¹⁶Kinom wim mbanak abok aret nen yonggokkabuwok nduk, inambe a aago wonogwe, “At eeppuurak niniki lunik wonogwe, Mandenom maluk eerogo puurak tokkogwe, Eeko nogogurak nogo Muk ari wagaarak me, Ninambe me muk yonggokoorak o,” yinuk, Meek eerogo pogo logonet, ineyak nggilik maakwi, Eeko agaarik o.

¹⁷Aliku ALA nen eeriyak koonogo pereegerak nogo aret eeke. “Ndogop eerigin o,” yinuk, aa'nduk lombok wone lengganogo yoragagerak a'me nggelok eeke, Eeke logonet, Kabuwa mbaka'lek aret yigirik-noonom eerogo pagage, Kinom wim mbanak nen ineegin tiyak yinuk, “Op togon eeppogo a!” mba'nuk inale'nggen aruwak nduk eeppiige, Kinom ogoorak nen kat tebenogo paganuk inomaawi tiyak yuwak nduk, eerogo piige, Eereegerak.

¹⁸It aakumi ti, inoone nggwok paga inogoba Ala yogwi me, O Tiyon Aagalukwe obak wurik kat yi wae. Tat yonggonggolage, kale yaga'lek puk wonage, eeka'lek niyo nage menggi kwak Liingge-oonikiya kali-kale mban nggininogo wurabit wage logot o.

¹⁹It aap tum waka nen, nogo iniki mbere eeke paga tum ambi wakak awo eekwi iinok, mi'na'nuk koone nggwok ari, Niyo kilirogo pogo mengga kwak, kiniki mbake nogo kogoba Ala enggaanom paga kilirogo pege, Kaagalogwe mbi abu nen inambuluk pit nagaarak tu ambet-ambet paga ngginnarit nagaarak wonogwe nogo Ineenik logowak nduk, inake keenggi at paga nippunuk, yoge, eeke logot o.

²⁰“Kaliku ALA wae. An eeppanege yi kwak, Ambi ta eeppigirak, nduk eeppanege agandik? Lek aret me, An yi, kenegen pe'neege, liippanege, eeru o. It kumi inaagalogwe inikime nen lombok ndarak inabuwa mbako logonet, ndegeninakwi nogo inoorogo nunggwi, Ndi, it aap keebe unde inom, yorage keegak yoraga inom, nogoba Ala kawi wurik alik leenak me nogome nen inoorogo piigwi, Eekwi ti, op mbaken?

²¹It aap inanggok inom, tawe inom, tu paga tu paga liirubu enggela'me ngginnarit nogwe, Napurilogwe komologwe tawe inom, wologwe tawe inom, wooluwak paga inoorak kambit nogwe, Eerak aret agaarik o. Kanini nen eeppiyoorak eyom ari wage kenok inoorogo piige, Inabuwa mbaka'lek logonet, inoorogo piige, Eereegindak o.

²²Inale'nggen paga lariyak inayonggo pogo mengga kwak Kat nen inamineeri ne agan noorak mendek nenaagan-nambokan wanggeri woraawak nduk, inayonggo piyareegindak o. Kaliku ALA kanini eeppaneegindak eyom paga aap ambit ambi mbagangge, agap ndakkolage, eerulik aret o. It an nen yanggoninake, tawe eeginake, eereegirak nogo nawim nen lek eerogo piyareegerak o,” yinuk, yoreegerak.