Read Western Dani Leendawi 3 Bible Online

Leendawi 3 - Western Dani bible

Leendawi 3

¹Aliku ALA anini nen aakumi yawi inooka nogo paga nooke andi kagagirak nogo ti an aret o.

²An o eya paga naakit nduk, wo'neren noolik, o apit aago me naakit nduk mbo panege,

³Kulinik-kalinik kuubondendok nen nok, oonikiya nabuwa mbaka'lek nookak mban eeke, Eeke nagagerak o.

⁴Neebe mbuuluk eerogo panege, nagabolo mbuk eerogo panege, Nowak neno eerogo panit unggwage, Eereegerak o.

⁵O tebenogo pi ungguwok nduk wanggeppunuk, nda'nggi pogo mengga kwak, at nen aaninggin-paaninggin noba kwippanege, Niniki andi lombok eerogo panege,

⁶It aap maan kambeegwaarak o apit me wonogo mengga kwak, at nen niniki apit eerogo panege, Eereegerak.

⁷An wungge neyo, yagat wurogo negen panege, Mbagangge neyo, mbuti keele aaninggin lombok paga maarogo panege,

⁸Noone nggwok paga, “Yeenggwa niru o,” yinuk, yoge kwe, an tamban eeke nogo at aruk konengga'lek mbo pege,

⁹Yugum poorak paga naru non mbanogo pit nage, Tu ti paga noorak meek kenok, yelok-nggolok naakit nduk eeppanege, Eereegerak o.

¹⁰Beruang enaarak wonage, singa kiraarak wonage, Eeko nagaatik, it noorak mendek wage kenok, kok nggerembunuk, Nikkenok ku'mbanak me unggunuk nibinik-ndelenak eerogo mbo punuk mbaganggo mengga kwak, an neebe togop aret eerogo panege,

¹¹

¹²At eegin agale wuppunuk, omaale namburogo neebe paga nappi wage, Eereegerak o.

¹³Maale ta'mbanak eenggime wonok nege nogo paga ninikime polonogo paneegerak.

¹⁴An nanebunu mendek abok aret nen nagi'ndok kanggwi, O kuubondendok nen nok, oonikiya ndawi meek eerogo paniyak mendek wakwi, Eeko agaarik o.

¹⁵Eyoonggen ale mendek ndonggorogon naakit nduk wo'nege, Wam ambiki kwak amburu naakit nduk wo'nege, Eereegerak o.

¹⁶Yugum anggen naakit nduk, wo'nereegerak paga neyak langgunik-panggunik eerogo panege, Liirubu paga aan lebenogo panege, Eereegerak me,

¹⁷Niniki ugun tayenak wonagagirak nogo lek age, Niniki ale'nggen wonagagirak nogo kobak age, Eereegirak wonage neegak,

¹⁸Nendage tiyanak, “Wi!” nugwi nogo lek age, Aliku ALA eeppaniyak niniki lunik nogo lek aret age, Eereegerak.

¹⁹An yagan wake, ya agak nda agak nege, ale mendek nengge, wam ambiki kwak nengge, Eeke nagagirak nogo niniki aberak aret agarik o.

²⁰Ti nogo abet aret abe'nage kenok, ninikime kiyo agan unggwage kwe,

²¹An wone ambi liippege nagarik, niniki lunik wonage ti,

²²Aliku ALA ninabuwa mbake logonet eeppinanege nogo ti, lek aga'lek eeppinanegak mban eeke, Iniki kunik lombok ee'ninake paga ninoorogo pinanega'lek teppinanege, Eeke menggerak ti aret.

²³Ninabuwa nen eeppinanege nogo ti, kubondendok ari wagak eeke paga alik ngget mendek mban eeppinanege, Iniki kunik nen liirogon eeppinanege ti, abu nggwok lombok eeppinanege, Eeke menggerak.

²⁴An niniki nen mbake logonet, “Yate kwak niniki kundugu ti, Aliku ALA aret me, At nen eeppaniyak nogo mban niniki lunik aret agaarik o,” yinuk, ari minggirak o.

²⁵It aakumi Aliku ALA iniki lunik wonogwe, Iniki nen at mugurok nugwi, Eekwi iinok, At nen obeelom eeppiige menggerak o.

²⁶“Aliku ALA nen aret yeenggwa niraawak o,” yinuk, Iniki nu'lek kwi'ndak logonet at tokkogwe nogo ti, obeelom lombok aret o.

²⁷Eyo aaninggin tapi uut paga pugu kwak aap ambi awo tawe wonage logonet aaninggin piyaninuk nage logorak ti op aret o.

²⁸Aap ti nogo, aaninggin oba age kenok, “Aliku ALA nen aret noba panegerak o,” yinuk, Yi yagak ndi yagak yaga'lek oone lek alik aret logowak o.

²⁹Iniki lunik nogo, eeppege kagak eerukwak, iniki tebeppatinuk liirubu enggela'me anep kumbunuk logowak o.

³⁰Aap ambi nen aap ti wariyak eeke kenok, waruwak nduk, agandin wogoge, Endage maluk eerogo pugwi iinok, “Nendage maluk aret aruwak o,” yinuk, puk age, Eeruwak o.

³¹Ninogoba Ala nen nit mondok-mondok mbo pinanegeelik o.

³²At Aliku ALA ninabuwa nen iniki kunik ee'ninake nogo, lek aga'lek itok kunik aret menggerak me, Inikilom ninombake logonet, nit aakumi nen ndarak nogo aaninggin eeppinanege, Nit niniki puru yuwak nduk eeppinanege, Eekeelik o. Ata, niniki puru yuwak nduk eeppinanege nagaatik, ti'nuk, ninabuwa mbake menggerak o.

³³

³⁴It o nggween paga keele maarak wonogwe nogo, aakumi nen iniyok aan lebenogo piinet nogwe,

³⁵At Tiyanak Lombok Menggerak enggaanom paga obeelom eeppiyoorak kagak alik eeppiigwi,

³⁶Inowak longgo logonet, inawone liirogon mbaniyak kagak yiluk-yiluk mbanggwi, Eekwi nogo ti, Ninogoba Ala enegen iigeelik mbakop? Lek o! Abok aret liippiige menggerak o.

³⁷Ninogoba Ala nen eeriyak wone lengganogo wumbenetak lek en aap ta nen, “Togop aruwak o,” ari kenok, a'ne mbakop?

³⁸At Tiyanak Lombok Menggerak nen ari kenok, maluk mendek inom, obeelom mendek inom, ninoba age menggerak nogo lek a?

³⁹Nit aakumi aret me, maluk eekwi paga aaninggin ninoba kwippinanege kenok, nonggop togon, “Yi eeppinanege ao,” yinuk, yuurak mbakop?

⁴⁰Nit eerit nugwi nogo maloppakwi, ninabut mbanggologwe, eeppunuk, yungguk togon Aliku ALA mugurok nogwe,

⁴¹At Ala mbogut paga wonage me nineenggi nippugwi, niniki wogogwi, eeppunuk, at yogo logonet,

⁴²“Nit nen maluk eekwi, Eeriyak, yo'nirage nogo nineebi nen mbo pugwi, eekoorak me, Kat kunduk ninomaluk lek eerogo pinangga'lek aret agandik o.

⁴³Yum tabak lenggenggologo mengga kwak kanini keebe paga luurik logonet mu'niren nege, Ninabuwa mbaka'lek aret ninoorit nage, Eereegindak o.

⁴⁴Ndugwi apit aago kwak keebe togop aago wonage me, nit tamban eekwi nogo kat wonage me ari naga'lek aret agaarik o.

⁴⁵Yi aakumi ndi aakumi inenggela'me, Inambeebuk kwak yi, Inogole o, yinuk, yogo logowak nduk eerogo pinaneegindak o.

⁴⁶Ninom ogoorak nen inambeme yonggo'ninabuwok nduk inambe a aago wonogwe,

⁴⁷Niniki mak eerogo pinanugwi, Labu pugume wambuwok nduk, eerogo pinanugwi, Nineebe lek eerogo pinanugwi, maluk eerogo pinanugwi, Eeko agaarik o,” Yinuk, yogo logowok o.

⁴⁸An nanebunu mendek pup eerogo piigwi me, nale niyo wurik negen wurabit wage agaarik o.

⁴⁹Nale amburu lek aga'lek ko'lu-kii'me nali-nale ngganggik-ngganggok eerogo wurabit wage tit wonage me, Aliku ALA mbogut paga nen wu'neya wage, liippanege, eeke kenok perak, nale nggaruk yigin o.

⁵⁰

⁵¹Nagota aagalogwe komologwe eeginakerak wonogwe iinok, niniki andi lombok ee'nake agaarik o.

⁵²Towe mugurok-magarok nugu mengga kwak it alom lek kagak ineebi nombakwi nogo nen an mu'neren nugwi,

⁵³An kambikit nduk nggween kabunik me mbo wuppaninuk yugum paga togu eerogo nookwi, Eereegwaarak o.

⁵⁴Ti eekwi iigak, niyo nanobak kuli taani lagangge mbareegi, “An abu tebennabigin kagi,” mbareegirak.

⁵⁵Togop mbake logonet, Kaliku ALA wae. An nggween kabunik kiiniki paga lombok logonet, kendage kunogo yokkege,

⁵⁶“Yeenggwa niru o, yinuk, noone nggwok paga yokkege yi, karuk nappatinuk logorak mage o,” yinuk, yokkege, eeke mbareegi, An nggino yokkereegirak nogo karuk konengge,

⁵⁷Noone yokkereegirak karuk konembunuk, neya wage nagagindik, “Kagabiti mbarugun o,” yinuk, yo'nege, Eereegindak o.

⁵⁸Nogoba wae. An nawone mondok koonogo panege, Neenik logokit nduk, nagap ndarogo panege, Eereegindak o.

⁵⁹Kaliku ALA wae. An maluk eeppanugwi nogo iyareegindak me, naana'le mbanogo panu o.

⁶⁰It ineebi lombok nombakwi abok aret kenegen iige, An maluk eeppanuwok nduk iniki ambit eeppunuk koonggwi nogo maloppiige, Eereegindak o.

⁶¹Kaliku ALA wae. It an ninom ogoorak nen an miyuk-meya eerogo panugwi nogo karuk konengge, Iniki ambit eeppunuk, inoone yagap wone paga an eeppaniyak o kubondendok nen nok, oonikiya ari nage kagak koonogo pugwi nogo keenu age, Eereegindak o.

⁶²

⁶³It kwi'ndak logonet, mi'ndak logonet, ndawi an meek eerogo paniyak mendek tiyanggwi yi, pegiyet o.

⁶⁴Kaliku ALA wae. It ineenggi eereegwaarak mugurok onggo ndak-ndak eeppiige,

⁶⁵Iniki omaawi eerogo piinok, pulunogo piige, eeru o.

⁶⁶Kaliku ALA wae. Kanini nen muguren-magaren nege logonet, o mbogut abu'me yime nen ineebe lek eerogo piyet o.