Read Western Dani Leendawi 5 Bible Online

Leendawi 5 - Western Dani bible

Leendawi 5

¹Kaliku ALA wae. Nit ninoba agagerak nogo abe'ninake, Nit tebenogo pinaneegwaarak ninendage lek agagerak nogo kenegen pe'niige, liippinanege, Eeru o.

²Yate kwak ninanggween nogo aakumi inambik ineenggime age, Ninawi wurik me aap nggiru nen ye mbanggola unggwogwe, Eereegwaarak o.

³Nit ninogobamini lek moono aret wonogwe, Ninagalomini nogo nanu pugu aret wonogwe, Eerak aret ogoorik o.

⁴Ninaniyo noorak ti, onggo punuk nunggwi, Ninaga'ni kunduk, onggo mbanggologwe, Eeko ogoorik o.

⁵Eyo aaninggin tapi uut paga pugu kwak, inoone omaawi nabek lek yo'nirogwe, Nineebe ndeyak ee'ninake kwe, “Yonggonggolaanip o,” yinuk, yo'niraga'lek wonogwe, Eeko agaarik o.

⁶Ninambi ndak noorak wo'niraawak nduk, aakumi Metit mendek nineenggi ndek yorogwe, Aakumi Atiyut mendek nggino yorogwe, Eereegurak o.

⁷Nit ninogobamini nen maluk eeko nogogwaarak nogo ineebe lek ogogwaarak iigak, It inomaluk onggo inoba piyoorak nogo nit aret ninoba agagerak o.

⁸Aakumi inayeloman nen wone lengganogo yo'nirogwe me, it ineenggime nen wondet eerogo pinaniyak aap ambi lek aret o.

⁹O karume time wooluwak mban mik-kwit aago wonage me, “Ninoorugun ilik?” mbako logonet, ninambi kwaakko'net wundi nogo monggoorak o.

¹⁰Kani kunggaatak ka'luk nen mili purunogo pege menggi kwak, ninambi abu nen ninetenggen paga kuri'nggin luk-lak eerak wonogo ogoorik o.

¹¹O Tiyon time kumi maluk eerogo piigwi, O Yekura kota-kota time komologwe aap kigin waka'lek mendek maluk eeppiigwi,

¹²It ninoweewi nagawan-nagawan nogo ineenggi keele maappiinok tugunogo piigwi, Aap inanggik-inanggok inayuk wuka'lek mbo piigwi,

¹³Ninapuri wologwe tawe nen gandum yigiruwak nduk, inoone omaawi paga yorogwe, Wologwe kani wurik wonok nogo logonet, aaninggin nen ngginnarit nogwe,

¹⁴Aap inanggok o kota tu unggwogo menggam kuwak ari waga'lek wonogwe, Wologwe tawe nggitat oone eeka'lek wonogwe, Eeko agaarik o.

¹⁵Niniki ale'nggen wonogogurak nogo lek aret age, Ninale'nggen nen kwirabik-kwirabok yogo nogogurak nogo obaane'me le yuurak mban ee'ninake,

¹⁶Nggare-nggare ninanobak paga yirik wonagagerak nogo nggorok togon wambit nage, Eereegerak o. Nit maluk lombok eeko nogogurak paga ee'ninake me, ninabuwa o!

¹⁷Puut Tiyon ti, yi oone ndi oone lek o wogome mba'ngge mban nugwi iinok, Niniki andi lombok ee'ninake, Ninigen yumaak eerogo pinanege, Eeke agaarik o.

¹⁹Kaliku ALA wae. Kendagembogut logonet, wone lengganogo mondok-mondok yo'nirage logot o. Kat wone lengganogo yorage menggenom ti, lek aga'lek wonage aret kagak aakumi nda'narit wundi wogo logogun o.

²⁰Kat nonggop nduk kobak eerogo pinanege, Nonggop nduk o maan togon mbo pinanege, Eereegindak o?

²¹Kaliku ALA wae. Kat nen nit mondok-mondok mbo pinanege, Kanini kuli pega'lek ninoba pinanegak mban eeke, Eeriyak mbaka'lek lek keenok, Niniyokan wo'niren kat wonage me pinani woraanok nduk, wo'ninake, Aa'nduk wonogogu kwak eerogo pinanege, Eeke logot o.