Read Western Dani Yetikiyen 11 Bible Online

Yetikiyen 11 - Western Dani bible

Yetikiyen 11

¹Ti'nuk, Aberiniki nen an piyanogo wo'neren Aliku ALA awi wurik me tu unggwogo menggam oonegen wundi wage menggim pa'nggwe nogome pani nagagerak. Panege mbareegi, tu unggwogo menggam ungguwam taati aap ineebe 25 wonogwe iige nagagirik, inenggela'me aakumi inarum waka inoweewi aap Atut aput Yaataniya inom, aap Mbenaya aput Pelata inom, wonogwe iyareegirak.

²Iige mbareegi, Aliku ALA nen an yo'nege logonet, “Aakumi nen ndarak yi wae. It iniki ambit eeppunuk, maluk eeppiyoorak wone kote koonogo pugwi, o kota yime maluk awi mbilanuwok nduk, aap kini wuppiigwi, eeko menggaarak it yi aret o.

³It nen yogo logonet, Logonuk lek aret yi o ndi o wurik lek agaarak obaane'me wurugun nogo lek a? O kota yi ti, kuwali kwak, ndi, enggaanggum kwak ti, nit aret me, op aret logogun o, yinuk, yogwe me,

⁴aakumi nen ndarak yi wae. Ndogop eeppinagagin o, yinuk, yorage, Eeriyak, yokkege neegak, yorage, eeru o,” yinuk, yo'nege kagagirak.

⁵Kage mbareegi, Aliku ALA Aberiniki noba age nagagerik, yoroorak yo'nege kagagirak nogo yi aret. “At Aliku ALA nen ari logonet, It Iterali mendek yogwe ti, an muk konenggirak o. Ndi, inikime nen koonggwi kunduk, abu iigirak kwe,

⁶it nen yi aap ndi aap ambik lombok o kota yi paga inoorogo piinet nagaarak tu paga ineebe inoorak yagabit eerak wonage o,” yinuk, yoroorak yo'nege kagagirak.

⁷Togop aret me, at Aliku Itok Menggerak ALA nen yo'nege kagagirak nogo yi aret. “It nen ineebe inoorak tu paga mbo piinet nagaarak nogo ti, enggaanggum kwak, ndi, o kota yi, kuwali kwak aret me, op aret logogun, mbakwi kwe, an o kota yime nen wumbiyaagin,” yegerak o.

⁸Aliku Itok Menggerak ALA nen ari logonet, “Wooluwak paga inooriyak inagabiti mbakwi nogo paga aret inooruwak nduk nappiya woraagin o.

⁹An nen it o kota yi paga nen wumbiinok, aap inambik ineenggime piige neenok, it nen inomaluk onggo aaninggin lombok inoba piyaawak nduk, eeppiyaagin o.

¹⁰Wooluwak paga inookwi iinok, kambugun o. It Iterali inanggween paga lombok inomaluk onggo inoba piige neenok, it nen Naliku ALA an aret ineenu arugun o.

¹¹O kota yi ti, kuwali kwak, ndi, ineebe ti, enggaanggum kwak me, Nit obeelom logogun, mbakwi nogo mbarugwaarik o. It Iterali inanggween lombok paga maluk onggo aaninggin lombok inoba kwippiyaagin ti paga

¹²Naliku ALA an aret ineenu arugun o. An nen wone lengganogo yorage nogo mugurok nogwe, ndi, eeko logorak noone yugu nogo porogo wonogwe, eeka'lek yi aakumi ndi aakumi inaagan-ambokan wonogwe eeko menggaarak nogo mugurok nogwe me nduk, eeppiyoorak o,” yinuk, yo'nege kagagirak.

¹³Yo'nege kagagirak nogo nabi paga negen awo yorage neegak, aap Mbenaya aput Pelata nogo aret kangge kagagirak. Kage nagagirik, netenggen wanduk nggween paga ngginna'nuk logonet, noone nggwok paga, “Kaliku Kitok Menggendak ALA ao. It Iterali ando yumbunik yi, tigitogon inoorogo piige agandik ya?” yinuk, an nen at yoge kagagirak.

¹⁴Yoge mbareegi, Aliku ALA nen an yo'nege logonet,

¹⁵“Aakumi nen ndarak yi wae. It aakumi o Yerutalem wonogwe nogo nen yogo logonet, Yetikiyen owe-awot abok aret inom, oreewi Iterali mendek mbo piya nogogwaarak inom wonogwe inom, nogo ti, o nda time wonogo logonet, Aliku ALA alut eeri woraagun lek me, inanggween yi, nit unde eeppatinuk logorak Ala nen muk wo'niragagerak kogo o, yinuk, yogwe me,

¹⁶Aliku Itok Menggerak ALA nen wone yegerak nogo yi o, yinuk, yoroorak yo'nege kagagirak nogo yi aret. An nen yi aakumi ndi aakumi o nda time wonogwe inenggela'me nappiige, yi awi ndi awi mak eerogo piige, eereegirak kwe, nappiyareegim nogome laalu wonogwe iigak, nalut eeko menggam nawi wurik kwak ti, an neebe aret o.

¹⁷Neebe aret me, Aliku Itok Menggerak ALA nen wone yegerak nogo yi o, yinuk, yoroorak nogo yi aret o. An nen yi aakumi ndi aakumi wonogwe me nen ambit me lambunogo piige, mak eerogo piyareegim yi awi ndi awi wonogwe me nen kuwak eerogo piige, eeke logominggirik, wogoren inanggween lombok o Iterali unde logowak nduk piya woraagin o.

¹⁸It iname o yime iniyokan wogo logomenggaarik, inagugiwak ogole warak mendek inom, ogole warak yi kugi ndi kugi inogut eerak inom, o yime nen eeko nogogwaarak nogo abok aret mbo pugun o.

¹⁹ Mbo pugwi iinok, an nen iniki ambit eerogo piige, iniki alik ngget eerogo piige, iniki omaawi yugum pogom wonogwe nogo obaane'me iniki ndeyak eerogo piige, eeke neenok,

²⁰wone an lengganogo yorage nogo mugurok nogwe, ndi, eeko logorak noone yugu nogo liirogon porogo wonogwe, eekwi iinok, it nen an napuri ogwe, ndi, an it inogoba age, eerugun o.

²¹Togop eeppiyaagin kwe, iniki nen inagugiwak ogole warak mendek inom, yi kugi ndi kugi ogole warak mendek inom, eerit nugu logorak mbakwi iinok perak, it ineraambe nggolo eekkolamenggaarak paga aret maluk inoba kwippiyaagin o,” yinuk, Aliku Itok Menggerak ALA nen an yo'nege kagagirak.

²² Yo'nege kage nagagirik, it kerub nogo nawok nduk, ina'naabit mbiganogo punuk, it wuru iyok kwak perek-parek naga nogo inom lagi nogwe iigak, Iterali inogoba Ala abinak nogo it inirimbaga aret wonage kagagirak.

²³Kage neegak, Aliku ALA abinak nogo o kota enggela'me nen agi lagangge nagagerik, oonegen wundi wage menggim pa'nggwe puut irimbaga taati ari nage kagagirak o.

²⁴Kage mbareegi, Ala Aberiniki nen nabinggaanggo paga yo'nege kage neegak, Aberiniki nen an piyanogo wo'neren niyokan it aakumi wogoren o Mbaben mbo piya nagagerak wonogwe me nogome pani wage kagagirak. Pani wage nagagerik, nabinggaanggo kagagirak nogo eenggi-iyok lek aret lek age kagagirak.

²⁵Lek age mbareegi, Aliku ALA nen nabinggaanggo paga yo'nereegerak nogo abok aret it aakumi wogoren mbo piya wogogwaarak wonogwe nogo mbininogo yoragagirak.