Read Western Dani Yetikiyen 14 Bible Online

Yetikiyen 14 - Western Dani bible

Yetikiyen 14

¹Wone ti abu aret yorage mbareegi, it aap Iterali inoweewi ineebe mande negen wogo nogogwaarik, nowagam kwi'nogogwaarak.

²Kwi'nogo mbareegwa, Aliku ALA nen an yo'nege logonet,

³“Aakumi nen ndarak yi wae. It aap yi nen, Kugi eeko logowok o, yinuk, koonogo punuk eekwi, iniyogobit lik togon yigeebu wambuwok nduk ti mban inenggaawak paga punuk eerit nugwi, eeko logonet, yo'nugwi iinok, inoone an nonggop togon koneniyak? Lek aret me,

⁴Aliku Itok Menggerak ALA nen, Yogop yokkiraga o, yinuk, it yoroorak nogo yi aret. It Iterali mendek ambi nen, Kugi eeko logowok o, yinuk, koonogo punuk eekwi, ndi, iniyogobit lik togon yigeebu wambuwok nduk, ti mban inenggaawak paga punuk mugurok nogwe, eeko logonet, an Ala nen yoge neegak yoraga nogo ari kaawok nduk wogwe iinok, Naliku an ALA wonage neegak, inagugi eerit nugwi nogo ndak-ndak Naliku ALA nalik nen aret wone onggo yoraagin o.

⁵Ti eerigin nogo ti, it aakumi Iterali mendek nen yi kugi ndi kugi ambik mugurok nogo logonet, an mbo paneegwaarak nogo, iniki yungguk togon nowagam woraawak nduk, eerigin o.

⁶Togop aret me, Aliku Itok Menggerak ALA nen yegerak yi aret o, yinuk, it Iterali mendek yoroorak nogo yi o. Inomaluk mbo pugwi, inagugiwak mbo pugwi, ogole warak mendek eerit nugwi nogo mbo pugwi, eeppunuk, yungguninuk wogo logowak o.

⁷It aakumi Iterali mendek ambi a, it aakumi nggiru Iterali inenggela'me wonogwe ambi a, nen an mbo paninuk, Kugi eeke logokit o, yinuk, koonogo pege, iyogobit lik togon yigeebu wambikit nduk ti mban enggaawak paga punuk, mugurok nage, eeke logonet, Ala yegerak ngge o, yinuk, an nen yoge neegak yoraga ka wage kenok, Naliku ALA nalik nen aret wone at onggo yorigin o.

⁸An nalik nen aret aap ti, neebi nen eeppegak mban eeke, aakumi ineenu agak logowak nduk, eerogo pege, at eekerak wakkagak agan nugu logowak nen eerogo pege, eeke logominggirik, aakumi an napuri inenggela'me nen enggaawak lek eeppigin o. Ti eeppege neenok, it nen Naliku ALA an aret ineenu arugun o.

⁹An nen yoge neegak yoraga ti nen wone abe lek ambit iluk alik ambi yoroorak inikime eeke kenok, Naliku ALA an nen aret wone alik yoraawak nduk, inikime eeppege me, yoraagin o. At wone alik yoraawak nduk, iniki me mambege neenok, yoramenggerak ti paga an napuri Iterali inenggela'me nen aap ti, enggaawak lek eerogo pigin o.

¹⁰It wone maluk yoramenggaarak onggo inobaalombok aret kolaagun o. At wone maluk yoramenggerak inom, At yoraga nen yo'niruwak o, yinuk, at ka wogwe nogo inom, imbirak ndak-ndak it inobaalombok eekkolamenggaarak paga aret aaninggin inoba patugun o.

¹¹Ti eeke neenok, it Iterali mendek nen an mbo paninuk, tu alik paga nomo agan nogwe, it maluk eerit nugwi paga ineebe maluk eerogo pakwi, eekwi nogo ambinom eeko logogun lek o. It an napuri aret ogwe, ndi, an it inogoba Ala aret age, eerugun o, yinuk, Naliku Nitok Minggirak an ALA nen aret yagi o,” yinuk, an yo'negerak me, yokkiragi o, yoragagirak.

¹²Ti'nuk, Aliku ALA nen ambinom yo'nege logonet,

¹³“Aakumi nen ndarak yi wae. It aakumi o ambime mendek nen an liirogon mu'neren nogwe nogo mbo paninuk, maluk eerogo panugwi iinok, an neenggi omaawi paga it eeppiige logonet, inambi ndakkola wundiyak meek eerogo piige, mbi noogelo inoba nappi woraminggirak o time aap inom, wam inom, lek eerogo piige, eeke neenok,

¹⁴it aap ineebe kenagan aap Nu inom, Ndaniyen inom, Ayup inom, o ti enggela'me logomenggaarak kwe, it iniki abe koonak eerit nugwi paga ineebe kenagan ti mban inili eerogo piige logonet, o time wonogwe nogo abok aret lek eerogo piyane o, yinuk, Naliku Nitok Minggirak an ALA nen aret yagi o.

¹⁵O time nggwiya nappiya woraminggirak elege-aabologwe nibininabit namenggaarak paga yi oone ndi oone lek age, ndi, nggwiya ti kenok, aakumi tu ti paga noorak inagabiti age, eeruwak nduk, nappiya woraminggirak aakumi nibininabit nugwi iigak,

¹⁶it aap ineebe kenagan o time enggela'me logomenggaarak kwe, inapuri wologwe inom, komologwe inom, inagap ndarogo piyoorak lek, it aakumi o time wonogwe nogo nibininabit nogo logonet inapuri inom inoorogo piinet nogwe, ndi, o time aakumi ineebe lek eerogo piigo logonet, it ineebe kenagan ti mban inagap ndarogo piige, ee'ne o, yinuk, neenik Naliku Nitok Minggirak an ALA nen aret yagi o.

¹⁷Aakumi nen wooluwak wonok woraawak nduk, nappiya wage logonet, O yime kinawooluwak paga inoorogo piinet nanip o, yoraminggirak wonok nogwe iigak, an nen aakumi inom, inaanggumi inom, abu lek eerogo piinet nage logonet,

¹⁸it aap ineebe kenagan ti nogo, inenggela'me logomenggaarak paga inapuri wologwe inom, komologwe inom, inagap ndarogo piyoorak lek aakumi ando inom aret inoorit nage logonet, ineebe kenagan ti mban inagap ndarogo piyane o, yinuk, neenik Naliku Nitok Minggirak an ALA nen aret yagi o.

¹⁹An nen o ti paga kugilingga nappi wage, nanini inoba piige logonet, o ti paga aakumi inom, inaanggumi inom, inamiya kilirik ndoonak eerogo inoorogo piinet nage, eeke logonet,

²⁰it aap Nu inom, Ndaniyen inom, Ayup inom, inapuri wologwe kunduk, komologwe kunduk, inagap ndarogo piyoorak lek, inooke logonet, it inogobamini ti mban iniki abe koonak paga inagap ndakkolane o, yinuk, neenik Naliku Nitok Minggirak an ALA nen aret yagi o,” yinuk, an yo'nereegerak.

²¹ At Aliku Itok Menggerak ALA nen ari logonet, “Ti eeppiyoorak yagarak nogo ti, iya negen kwe, inomaluk onggo aaninggin alom 4 eeppiyoorak nogo ti, wooluwak paga nen, mbi noogelo paga nen, nggwiya anini warak paga nen, kugilingga paga nen, it Yerutalem wonogwe aap inom, inaanggumi inom, kambuwak nduk, inoba kwippiyaagin ti perak, abu iya o!

²²Togop aret kwe, inapuri wologwe inom, komologwe inom, ando yumbunik mbaganit wundi namenggaarak wogoren o yime piya wogwe iinok, ineraambe inom, eerit nugwi inom, kenegen iige logomenggendik, an nen o Yerutalem aaninggin-paaninggin nogo mendek abok aret oba kwippiminggirak nogo kage logomenggendik, kiniki kwi'narigin o.

²³Alom lek kenok lek, wonage kenok o Yerutalem eeppiyoorak nogo keenu arumunggun me, it ineraambe inom, eerit nugwi inom, maloppiige logomenggendik, Ti, ti nduk eekerak kagi, yinuk, kiniki kwi'narigin, Naliku Nitok Minggirak an ALA nen aret yagi o,” yinuk, an yo'nereegerak o.