Read Western Dani Yetikiyen 15 Bible Online

Yetikiyen 15 - Western Dani bible

Yetikiyen 15

¹Aliku ALA nen wone ambi an yo'nege logonet,

²“Aakumi nen ndarak yi wae. Yi eyo ndi eyo eyonggaame wonage inom, eyo anggur inom, wakkogo logonet, eyo anggur abe lombok ngge o?

³Eyo anggur ti paga nen yi mendek ndi mendek ogobakkigiriyak nduk waganggwi, yi mendek ndi mendek tugunogo pegak ogobakkigirogo puwak nduk waganggwi, eeko menggaarak ilik, lek a?

⁴Ndi, eyo anggur ti, kani nawak nduk kani kumbugwi iinok, irip-irip kani abu nenet oolo mban mulunogo pemenggerak ti paga nen yi mendek ndi mendek eeriyak ambi wonage ilik, lek a?

⁵Eyo ti, kani kungga'lek abe kagak yi mendek ndi mendek eekulik aret me, kani nen nengge logonet, mulunogo pegetak paga ambi abu eekulik aret menggerak o,” yinuk, yegerak.

⁶Togop aret me, Aliku Itok Menggerak ALA nen ari logonet, “Yi eyo ndi eyo enggela'me eyo anggur kani kunggo logorak ake mban eerogo pereegirak kwak, it aakumi o Yerutalem wonogwe nogo togop aret eerogo piyaagin o.

⁷Neebi nen it eeppiigak mban eeke logorak koonggirak o. It kani ambi kunik me nen mbaganit wundeegwaarak kwe, kani ambi nen ineebe nenet nage logogin o. Neebi nen it eeppiigak mban eeke neenok, kat nen Naliku ALA an aret keenu arumunggun o.

⁸It nen an liirogon mu'neren wogwe lek me, o time yi oone lek ndi oone lek logowak nduk, eeppigin o, yinuk, Naliku Nitok Minggirak an ALA nen aret yagi o,” yinuk, an yo'nereegerak o.