Read Western Dani Yetikiyen 16 Bible Online

Yetikiyen 16 - Western Dani bible

Yetikiyen 16

²“Aakumi nen ndarak yi wae. Kota Yerutalem ogole warak mendek eerit nage nogo wone yori nak o.

³Nage logomenggendik, Aliku Itok Menggerak ALA nen, Wone yogop yokkegerak o, yinuk, yoriyak nogo yi aret. At Yerutalem alom inom, nda'nagagim inom, ti, it o Kanan wonogo menggam aret wonage o. At ogoba ti, aap Amori mendek, ndi, agalo ti, kwe Ket mendek aret o.

⁴At nda'nage eyom paga amun mbanggwi, eebe mili kenok niyo paga ngguu'mo warogo pugwi, tonggo-tonggo kwak mayu paga abin koorogo pugwi, yum tabak paga eebe paga perenogo pugwi, eerulik o.

⁵Aap ambi nen at abuwa mbake, at arigi nen yi eeppegak ndi eeppegak eeke logonet, enaani ndegengge, eerulik o. Ata, at nda'nage ti eyom paga, Elege yi, ogole o, yinuk, amiya inom munogo yabu yarak me time mbo nappereegwaarak o.

⁶Nappereegwaarak wonage me, an tu ti paga nage logonet, at amiya paga lagak-mbagak ari nenegen kage nagagirik, amiya lengge aago wonage mbareegi, Mondok keenik aru o, yinuk, yoreegirak.

⁷Yoge nagagirik, iri'ngga yabume lagangge menggi kwak, at eebe tawe eeke neegak, eebe nggwok age, owak nggik ari, enete abu kigirikwe age, eereegerak o. Eeke nagagerik, elak abu aret wungge, amoori abu aret wungge, eereegerak kwe, agali yirik lek we agap mbelanak aret wonagagerak o.

⁸Ti'nuk, peebi an tu ti paga nage logonet, eebe nenegen kage nagagirik, at abu tawe aap miikkoloorak aret agagerak kenok, nayum nggorek irip paga at agabolo kin wonage nogo lenggenogo pereegirak. Pege nagagirik, at nimbirak wone abuk nggaruk togon koonogo punuk, Nore kat aret o, yinuk, Naliku Nitok Minggirak an ALA nen kumbuk mbangge mbareegi, at an nore aret agagerak.

⁹An nen aret at oba amiya lenggenak nogo niyo paga koorogo pege, amburu eeppege,

¹⁰ayum yabenggek-ndabenggek eerak yirippege, iyogogut lumba-lumba agabolo paga penggaarak yirippege, ayum yawenak paga lenggenogo pege, ayum nggorek onggo nggwok mendek yippege, eerogo pereegirak o.

¹¹Eeke nagagirik, obaanggi-obaangge li'luk eerogo pege logonet, amberaarenggen obaak paga yippege, agiinggen-kaleenggen enggaanok me ngginuk eerogo pege,

¹²ogobak ayo ogobak me mambege, aruk ayo eeppege, nggare-nggare abu iya lombok anobak paga yirippege, eereegirak o.

¹³Mbuti emas-perak paga obaanggi-obaangge li'luk eerogo pege, ayum abu yawenak inom, onggo nggwok inom, yabenggek-ndabenggek eerak inom, yirippege, ndi, at nengge logorak ti, gandum yigirik abu abe inom, nggiin amburu inom, tayitun amburu inom, abu li'luk eerogo wogoge, eereegirak paga eebe abu kigirikwe lombok a'nuk, kwe nggwok aap endagembogut akwe negen aret agagerak.

¹⁴At enete abu kigirikwe aret kwe, namendek abu abe paga at li'luk eerogo pereegirak me, kwe abu kigirikwe amuni mbanak lombok agagerak kenok, yi aakumi ndi aakumi inenggela'me endage abu wigak yereegerak o, yinuk, Naliku Nitok Minggirak an ALA nen aret yagi,” yegerak kenok, yokkigi o.

¹⁵“At togop aret eerogo pereegirak kwe, at nen, Natenggen abu kigirikwe, mbake, ndi, Nendage abu wigak yegerak kagi, mbake, eeke nagagerik, kumi ya wurinakak kwak kumbunuk, aap tu at wonage me ti paga wogwe iinok, inom nogo yege logonet, Ee'nabuwak, mban mbake, aap ugun nen, Nimbirak nogo yuwok o, ari kenok, eebe kigirikwe kagak aret imbirak nogo yugwi,

¹⁶ayum ando wagangge nagagerik, agugi ake warogo wogoge menggim puut paga yabenggek-ndabenggek eerogo punuk, time logonet, aap inom ugun-ugun eerit nage, eeke nagagerak. Ti eeke nagagerak kwak ti, it aakumi ambi kogolik me, peebi togop ambi kaagun lek aret kagak, eeke nagagerak.

¹⁷Obaanggi-obaangge abu abe eerak nambuti emas-perak paga ogobakkigirik nogo, waganogo kugi ogut aap kwak ogobakkigirogo punuk, aap inom eeko mengga kwak, agugi ogut aago inom eerit nage,

¹⁸at ayum yabenggek-ndabenggek eerak it kugi ogut ti, lenggembiyoorak nduk wagangge, tayitun amburu inom, obari abe kaga inom, wogoreegirak nogo, it kugi inake wogorage,

¹⁹gandum yigirik abu abe inom, tayitun amburu inom, nggiin amburu inom, at noorak wogoreegirak nogo, wagangge nagagerik, it obari abe kaawak nduk, inake pege, eereegerak o, yinuk, Naliku Nitok Minggirak an ALA nen aret yagi o.

²⁰Ti eeke logonet, at nen at aagalogwe wologwe inom, komologwe inom, ndaganake nagagerik, It yi kunduk, at Ala apuri aret o, yinuk, yereegerak kwe, agugi inambi negen nawak nduk inoorogo inake wogorage nagagerak. Kwe yawukak negen eerit nage ti, maluk aret me, Yi kuli aret, yuurak kagak, eerit nage ti, iya lek, yinuk, eeke agaarik ya?

²¹An napuri aret iigak kwe, inoorogo kugi inake kani kunogo piige nagagerak o.

²²Ogole warak mendek eerit nage, kwe ya wukak eerit nage, eeke logonet, at awo elege paga ayum yirik lek we agap mbelenak amiya paga lagak-mbagak eeke nagagerak ti nogo abeka'lek aret wonage agaarik o,” yinuk, yegerak.

²³At Aliku Itok Menggerak ALA nen ari logonet, “Abuwa o! At abuwa o! Maluk ti aret eerit nage logonet,

²⁴nggween pit lagi nanuk kugi awi wurogo pege, wone mbaniyak kuwak eeko menggam abok aret kugi aanggo warogo wogogak ogobakkigirogo pit nage, eereegerak ti, inom maluk aret eereegerak o.

²⁵Tu andogon-andogon abok aret agugi ake warogo wogoragak eyo tiyarogon ndoonogo pit nage, yi aap ndi aap tu ti paga wogo logonet, iniki nawak nduk, Ugun ee'nabuwak o, yinuk, amendek wogorage nagagerak paga eebe amuni mbanak kigirikwe nogo maluk eerogo pake, eereegerak o.

²⁶At inom koorok wonage iniki abu nenet unggwage o Metit nogo, Ee'nabuwak o, yinuk, inom eerit nagak mban eereegerak paga an Ala nanini mi'nagagerak.

²⁷Mi'nage mbareegi, neebi nen neenggi omaawi paga anggween wogoreegirak nogo mbuuluk eerogo pege, inom ogoorak nen, At enggali lek ugun eerit nage yi iya, mbareegwaarak it Pilitin mendek nogo ineenggime piige, eereegirak o.

²⁸At eerit nege nogo ame'lek kundugu kenok, aap Atiyut mendek kunduk, Ee'nabuwak o, yinuk, inom eereegerak. Inom eereegerak kwe, ame'lek kundugu mban kenok,

²⁹yi mendek ndi mendek kunit nega wonogo menggam it aap o Mbaben mendek, Ee'nabuwak o, yinuk, inom eerit nege nagagerak kwe, ame'lek kundugu tit agagerak o,” yinuk, yegerak o.

³⁰Aliku Itok Menggerak ALA nen ari logonet, “Ee'nabuwak, mbake nogo tebenogo puurak meek kenok, kwe ya wukak enggali lek eerit nege menggi kwak aret eerit nege agaarik o.

³¹Tu andogon-andogon abok aret nggween pit lagi nanuk, agugi awi wurogo pit nage, wone mbaniyak kuwak eeko menggam abok aret kugi aanggo warogo wogogak ogobakkigirogo pit nage, eeppunuk, aap ugun-ugun inom eerit nage logonet, Onggo lek we ee'nabuwak, mbareegerak me, kwe ya wukak onggo wo'niruwak, mba'nuk eeke menggi kwak eeke logolik at iya lombok eeke nagagerak.

³²At kwe ya wukak ti, Nogonggelo nen ee'nabuwak, mbakeelik, Aap ugun ee'nabuwak, mban mbarit nege me, iya!

³³It aap nen kumi ya wurinakak ti, onggo wogoraanuk eeginako menggaarak kwe, at ti perak, Ee'nabuwak o, yinuk, it aap yi o ndi o wonogwe nen eeri wagak yuwak nduk, onggo wogorage menggerak o.

³⁴Togop me, at eerit nage ti, aap nen at mugurok nogwe lek, at nen, Ee'nabinip o, yinuk, aap muguren nage me, kumi ya wurinakak eeko mengga kwak eeke lek at alik lombok aret eeke, it kumi ando ti, eeginakwi onggo kologwe kwe, at perak, Ee'nabuwak o, yinuk, onggo wogorage, eeke menggerak o,” yinuk, yegerak me, yokkigi o.

³⁵Togop aret me, kwe ya wukak yi wae. Aliku ALA nen yokkege yi, karuk konengge logot o.

³⁶At Aliku Itok Menggerak ALA nen ari logonet, “At iniki nengge ti mban mugurok nage, Ee'nabuwak o, yinuk, it inom eerit nege nogo inenggaanom paga amendek kin eerogo pege, ogole warak agugi nogo inake warogo wogorage, at aagalogwe inamiya kilirogo agugi inake wogorage, eereegerak me,

³⁷at inom iniki kunik logonet eerit nege inikilom mbareegerak nogo inom, at, Eebi, mbareegerak nogo inom, abok aret yi o ndi o wonogwe me nen kuwak eerogo piinok, at enggali aruwak nduk, inigen iigak, agali nggoorogo pege neenok, agabolo abok aret kin eerogo pege inigen kaagun o.

³⁸It kumi inogonggelomini warak kagak aap alik inom eerit nugwi, ndi, it aakumi inamiya kilirogo piinet nugwi, eekwi iinok, onggo eeppiyoorak yorogo mengga kwak at oba pege, nanini nen inoorit nage, ndi, An neegak, kugi eeke yi, neebi o, yinuk, nanini mi'nage logonet, aakumi inamiya kilirogo piige, eeke minggirak nogo at oba pege, eerigin o.

³⁹At inom iniki kunik nogo ineenggime piige neenok, it nen at nggween pit lagi nanuk, kugi awi wurogo pereegerak nogo minogo pugwi, agugi aanggo warogo wogoge menggim tiyarogon wurik nogo, lek eerogo pugwi, ayum yirik nogo nggoorogo mbo pugwi, obaanggi-obaangge abu abe eerak nogo ko'nok ndi yogwe, eeko logonet, amendek lek we agap mbelenak aret mbo pugun o.

⁴⁰It ti nen at waruwok nduk, aakumi kuwak aago nogo wogoren piya wogwe iinok, yugum paga togu eerogo wakwi, inobaloowi paga eebe nggarenak-pugunik eerogo pugwi, eerugun o.

⁴¹At awi apit wurit nagagerak nogo, kani mbilanogo pugwi, it kumi abok inigen iigak maluk eeke nagagerak onggo at oba kwippugwi, eerugun. Ti eeppugwi iinok, at ugun, Ee'nabuwak, mbarit nege nogo, lek eerogo pege, Ee'nabuwak o, yinuk, onggo wogorage menggerak nogo, lek eerogo pege, eerigin o.

⁴²Ti eeke neenok, an nanini ombake nogo nini tayok ari, an neegak alik eekwi iinok, nanini mbake nogo lek aret age, eeke kenok, nanini mbake nogo lek age logonet, niniki kwi'narigin o.

⁴³At awo tawe kagak eeppege nagagirak nogo aberak lek aret wonage o. Maluk ogole warak lombok eerit nage logonet, Ugun ee'nabuwak, mban mbake nogo ti inom eerit nege nagagerak nogo lek a? Inom eerit nege nagagerak paga nanini nen naganak piyak-piyak abet aret ee'nake me eerit nage nagagerak onggo mondok at oba kwippigin o, yinuk, Naliku Nitok Minggirak an ALA nen aret yagi,” yegerak me, yokkigi o.

⁴⁴“It aap wone eegu laarogo yaga nen at wone eegu nobat yogo logonet, Agalo eeke menggi kwak aagaluk ndak-ndak aret eeke menggerak o, yinuk, yogwe, iyaagin o.

⁴⁵Agalo nen at ogonggelo inom, aagalogwe wologwe inom, Inogole o, yinuk, eebi inombake nagagerak nogo, aagaluk ti, abu ndak-ndak eeke, ndi, at oreewologwe nen kunduk inogonggelomini inom, inaagalogwe wologwe inom, ineebi lombok inombako nogogwaarak nogo, it inoreeluk Yerutalem ti, abu ndak-ndak aret eeke, eeke agaarik o. At agalo ti, kwe Ket mendek, ndi, ogoba ti, aap Amori mendek aret.

⁴⁶At oweeluk aa'nduk ndarak aagalogwe komologwe inom o omarip paga pa'nggwe wonogwe nogo ti, o Tamariya aret. Ndi, awuluk aagalogwe komologwe inom o ame paga pa'nggwe wonogwe ti, o Torom aret o.

⁴⁷It eerit nugwi nogo, at mugurok nage, it maluk ogole warak mendek eekwi nogo at ndak-ndak eeke, eeke nagagerak. It maluk eerit wundi wogo logonet, irip paga maluk nggwok lombok eeko nogogwaarak kwe, at perak, ne ambit maluk mondok iya lombok eereegerak o.

⁴⁸At awuluk o Torom aagalogwe komologwe inom eeko nogogwaarak nogo ti, at aagalogwe komologwe inom eeko nogogwa kwak eerulik o. At aagalogwe inom ti, maluk mondok iya mendek eeko nogogwaarak o, yinuk, neenik Naliku Nitok Minggirak an ALA nen abet aret yagi o.

⁴⁹Awuluk o Torom nen maluk eeke nagagerak nogo yi aret. At aagalogwe inom ti, iniki wogoppatit nugwi, inambi-mbiingga ndonggorogon nunggwi, Nit mban, mbarit nugwi, eeko logonet, aap aaninggin inoba wonogwe inom, aap ineenggi lek inom, yeenggwaaraga'lek aret wonogogwaarak o.

⁵⁰It nen, Nit iya, mbako logonet, an nenggaanom paga ogole warak mendek eerit nugwi an nenegen iinok, mbo piyareegirak.

⁵¹Ndi, at maluk eerit nage nagagerak ndak-ndak at Tamariya togop eerulik, ando mban eeke nagagerak. At Tamariya maluk mbuuluk negen eeke nagagerak kwe, at perak, abunuk maluk ogole warak nggwok lombok eeke nagagerak me, Oreewologwe iniki op negen iigak, at perak, iniki abu maluk aret wonage, kogo o, yinuk yogo agaarik o.

⁵²It maluk eeko nogogwaarak kwe, at abu maluk lombok eerit nage nagagerak alom ti paga, Oreewologwe ti op negen eeko nogogwaarak iigo o, yinuk, yogwe me, at obaalombok aret enggali mbakak nege logowak o. Oreewologwe op negen eeko nogogwaarak iyaawak nduk eereegerak paga endage maluk agagerak me, obaalombok enggali mbakak nege logowak o,” yinuk, yegerak me, yokkigi o.

⁵³“Togop aret kwe, It op negen wonogwe iigo o, yinuk, yuwak nduk, inoreeluk Yerutalem eerit nage nagagerak paga endage maluk age, enggali age, eereegerak nogo, Op aret o, yinuk, wagangge logowak nduk, o Torom aagalogwe komologwe inom, o Tamariya aagalogwe komologwe inom, aa'nduk wonogogwa kwak, obeelom eerogo piige logonet, at togon aa'nduk wonagagi kwak obeelom eerogo pigin o.

⁵⁴

⁵⁵At oreewologwe o Torom aagalogwe komologwe nogo inom aa'nduk wonogogwa kwak eerogo piige, o Tamariya aagalogwe komologwe inom aa'nduk wonogogwa kwak eerogo piige, eeke logonet, at kunduk aa'nduk wonagagi kwak eerogo pigin o.

⁵⁶At omaluk awo kin aga'lek kagak aa'nduk iniki tiyappake logonet, at awuluk o Torom aaninggin oba agagerak kenok, abok mbanit nege nagagerak nogo lek a? Nogo ndak-ndak yogondak o Erom aagalogwe komologwe inom, it at inom koorok wonogwe inom, o Pilitin aagalogwe komologwe inom, yi o ndi o at enaagan-ambokan wonogwe abok aret, At ogole o, yinuk, yogwe nogo nen at meek eerogo pogo agaarik o.

⁵⁷

⁵⁸Ugun ee'nabuwak o, yinuk, agan nege, ogole warak mendek eeke, eerit nage onggo obaalombok oba aret arigin o,” yinuk, Aliku ALA nen aret yegerak o.

⁵⁹At Aliku Itok Menggerak ALA nen yegerak nogo yi aret o. “At nimbirak wone abuk nggaruk togon koonogo punuk, kumbuk mbaneegirak nogo, at nen meek eerogo punuk, mbo pereegerak me, at eereegerak ti, ndak-ndak onggo eeppigin o.

⁶⁰Togop kwe, at awo tawe wonage paga nimbirak wone koonogo pereegirak nogo abeke logominggirik, wone lek ariyak lek mondok logorak mendek at nimbirak koonogo pigin o.

⁶¹At oreewologwe aa'nduk ndarak inom, peebi ndarak inom, nogo ti, an nen at aagalogwe negen aruwak nduk, wogoge neenok, at maluk eerit nage nagagerak nogo abeke logomenggerik, Ndogop eekirak, ao, yinuk, yigin o. At aagalogwe negen aruwak nduk, wogoriminggirak nogo alom ti, nimbirak wone koonogo pereegirak paga eerigin lek o. Ata, an alik aret koombunuk eerigin o.

⁶²Togop aret me, at nimbirak wone eeko logorak koonogo piminggirak nogo ti, at nen Naliku ALA an aret eenu arigin o.

⁶³Ndi, at eerit nege nagagerak nogo lek eerogo punuk, nimbirak lambungge neenok, at eeke nagagerak abe'nage logonet, Ndogop eeriyak mendek eekirak, ao, yinuk, mbake, ndi, mondok enggali mbarit unggwage kenok, wone ambi yigin lek mondok-mondok puk age, eerigin o, yinuk, Naliku Nitok Minggirak an ALA nen aret yagarak me, yoru o,” yinuk, wone yi abok aret an yo'nege mbareegi, yoreegirak.