Read Western Dani Yetikiyen 17 Bible Online

Yetikiyen 17 - Western Dani bible

Yetikiyen 17

¹At Aliku ALA nen wone an yo'nege logonet,

²“Aakumi nen ndarak yi wae. Wone wakkagak yorage, wone eegu laarogo it Iterali mendek mbininogo yorage, eeke logot o.

³Aliku Itok Menggerak ALA nen yegerak nogo yi aret o, yinuk, yorage logonet, Towe nggindooni nggwok a'naabit nggorek eeruwak yabenggek-ndabenggek eerak wiga agan puut Libanon paga nanuk eyo nggabina era'nggup pigagangge nagagerik,

⁴era'nggup lombok nogo kalenogo punuk, wonok it aakumi inamendek kunggologo menggam o nenaarak ambime pi nage nagagerik, it aakumi inamendek kunggologo menggam o kota ambime time yareegerak.

⁵Yake nagagerik, iri'ngga awi ambi Iterali anggween ti paga nen waganogo yabu abu wogome iri'ngga awi nogo nggween mili paga eyo moowi kwak niyo eneeri wungge mban menggim nogome yareegerak.

⁶Yake mbareegi, awi nogo mbilangge nagagerik, eyo anggur kwak kuwagaluk lagangge logonet, eno'mbak wiganogo pereegerak. Eno'mbak wiganogo towe nogo wonage me pa'nggwe nappege, omanggen wutik wurabit nage, eereegerak. Togop aret eeke nagagerik, eyo anggur kwak aret a'nuk, eno'mbak wiganogo pege, anggup abu abe lake, eereegerak.

⁷Ne ti eyom paga mban towe nggindooni nggwok alik ambi a'naabit nggorek eeruwak mondok ku'mbin wagagerak me, At towe ti nen niyo amburu eerogo wo'niruwak o, yinuk, yarak menggim nen omanggen towe nogo wonage me pa'nggwe nagabit nage, eno'mbak ndarogo towe nogo wonage me nappit nage, eereegerak.

⁸Eyo anggur nogo ti, eno'mbak yiganak-wiganak eerogo pege, anggen abe mendek yigogo wurabit wage, eeke logonet, eyo anggur abe mili lombok kwit agan lagangge logowak nduk, niyo kila-kila wungge menggim time nggween mili paga lombok yareegerak, yoraamunggun o.

⁹Yorage logomenggendik, At Aliku Itok Menggerak ALA nen yegerak yoroorak nogo ambi yi aret. Eyo anggur ti, abe lagagin ilik, lek a? Aakumi nen omanggen kinogo nappugwi, anggen mbanogo pugwi, eekwi iinok, we lalin aret anggup awo lake nogo mbuk arigin nogo lek a? Mbuk aret arigin me, omanggen kinogo nappuurak ti, iya me aap eenggi omaawi paga, aap ineebe aago paga, nen eeriyak mbakop? Lek aret o.

¹⁰Eyo yarak ti, luurogo alik me yaremenggaarak kwe, abe lagagin mbakop? O wiya oonegen wundi wage menggim nen warit wage logonet, aganggen nen luurogo yaremenggam nogome aret teebat a'nuk, mbuk arigin nogo lek a? yinuk, yoret,” yo'negerak me, yokkiragi o, yoragagirak.

¹¹Yorage mbareegi, Aliku ALA nen wone ambinom an yo'nege logonet,

¹² “It aap noone eeriyak ineebi mbaka mendek wone yoroorak nogo yi aret. Wone eegu laarak eebe ti, kineenu ilik, lek a? Yorage logomenggendik, it yorage logonet, Aap endagembogut o Mbaben mendek nen o Yerutalem nage nagagerik, it Yerutalem wonogwe inowe endagembogut wagangge, aap inengga warak o Yerutalem wonogwe nogo wogonake, eeke nagagerik, wogoren o Mbaben iyokan piya woraakit nduk, eeke logonet,

¹³it Yekura mendek at abu'me piirogo menggim time mi'nariyak lek tebenak mban wonage, ndi, Wone yogop eeko logowok o, yinuk, koonogo pugu nogo mban eerit nogwe iinok, ineebe op mban wonogwe, eeko logowak nduk, aap endagembogut Yekura mendek paga wiganak ambi wagangge nagagerik, Kat koone mban konengge logokit o, yinuk, kumbuk mbanu o, yoge, ndi, it aap o ti, pipporogo wonogogwaarak nogo wogonake nagagerik, wogoren nage, eereegerak.

¹⁵Eereegerak kwe, aap endagembogut Yekura mendek nen pilak ari logonet, it Metit mendek nen kuda inom, aap ineegin warak aago inom, Nappiya woraawak o, yinuk, wone eerogo awuri nappiyareegerak. Eeriyak mba'nuk, nappiyareegerak nogo ti, a'me aret arigin ilik, lek a? It togop eekwi iinok, inagap ndakko'nok mbaganggwi, ndi, wone koonogo pugu taganogo pugwi iinok, inagap ndakkologwe, eerugun mbakop? Lek aret o.

¹⁶At togop eekerak ti, aap endagembogut ti nen at aap ti, endagembogut logowak nduk, mippege mbareegi, Kat koone mban konengge logokit o, yinuk, kumbuk mbambunuk, ti'nuk, Ti iya lek o, yinuk, taganogo pereegerak me, aap endagembogut wonage menggim o Mbaben time kambigin o, yinuk, neenik Naliku Nitok Minggirak an ALA nen aret yagi o.

¹⁷At wone inom koombunuk, kumbuk mbaneegerak ti, Iya lek o, yinuk, taganogo pege, Wone abet aret eeko logowok o, yinuk, ineenggi pit-pit yogo logonet, koonogo pereegwaarak kagak, ti abok aret eeke, eereegerak me, it Mbaben mendek nen aakumi ambik inoorogo piyaawok nduk, yugum pak wurik eraanu ya'na wurogo pugwi, nggween pit laganggwi, eekwi ti eyom paga at Pirawun nen yeenggwaaraakit nduk, awuri ineegin warak ambik aago nappiya wage, aakumi apit aago nappiya wage, eerigin lek me, agap ndakkolaagin lek aret o,” yinuk, yegerak.

¹⁹Togop aret me, at Aliku Itok Menggerak ALA nen yegerak nogo yi aret o. “At nimbirak wone koonogo punuk, kumbuk mbaneegirak ti, Iya lek o, yinuk, mbake, nimbirak wone koonogo pereegirak nogo taganogo pege, eereegerak onggo aaninggin at oba kwippege logonet,

²⁰towe yum paga yiluk yuwak nduk pugwi kwak, nayum mbiganogo pigin me, at eebe yiluk ari kenok, an noone liippunuk, eerulik me, eebe wonok o Mbaben pi wage logominggirik, yime nen awone amburu mbanogo eeke nagagerak nogo onggo eeppigin o.

²¹Ndi, at awuri ineegin warak wakaa'ngget mendek abok aret mbaganggugak wooluwak paga inoorak kanggwi, ndi, yumbunogo piyamenggaarak mbaganit nogwe nogo ti, o wiya nen iri'ngga-kale'ngga wonok ndi ari menggi kwak, yi awi ndi awi ma'nogwe, eerugun o. Ti eekwi iinok, it nen, Aliku ALA nen yegerak nogo aret eeke kogo o, yinuk, ineenu arugun,” yegerak o.

²²Aliku Itok Menggerak ALA nen yegerak nogo yi aret. “An nalik nen aret eyo nggabina nggorek era'nggup lombok me mbangge logominggirik, awi yarigin o. Era'nggup lombok awo lake nogo nggarunogo wonok puut ambi nggorek mbogut ndak warak paga nalik nen awi yarigin.

²³Iterali inabuut nggorek tiyarogon paga yappiminggirak nogo eno'mbak yiganak-wiganak eerogo pege, anggen yigogo pege, eyo nggabina abe tawe age, eeke kenok, towe inetenggen lombok abok aret eyo nogo paga inawi mbani unggwogwe, eyo eno'mbak wiganak nogo, abu'me ineebe op lombok logowok nduk, ari unggwogwe, eeko logogun o.

²⁴Togop eeke neenok, Naliku ALA nen eyo nggorek kenok kuwagaluk eerogo pege, eyo kuwagaluk kenok nggorek eerogo pege, eyo ki ti, mbuk eerogo pege, ndi, eyo mbuk kenok agarip wunduwak nduk eeppege, eeke minggirak nogo yi eyo ndi eyo penaame menggerak abok aret ineenu arugun o. Wone yi, Naliku an ALA nen aret yagarak me, eerigin aret,” yo'negerak kenok, yokkiragi o, yinuk, yoragagirak.