Read Western Dani Yetikiyen 18 Bible Online

Yetikiyen 18 - Western Dani bible

Yetikiyen 18

¹At Aliku ALA nen an yo'nege logonet,

² “It Iterali wonogo menggam eekwi iinok, wone wakkagak yogo logonet, Ninogobamini eyo anggen ale mendek nunggwi paga nit inapuri nineyak ne agan nage menggerak o, yinuk, yogo monggotak ti, alom ngge nduk yogo monggotak o?

³Wone wakkagak yi, o Iterali time ambinom yogo logogun lek o, yinuk, neenik Naliku Nitok Minggirak an ALA nen aret yokkege agarik o.

⁴It aakumi iniki abok aret an unde minggirak o. Inogobamini iniki kunduk, inapuri iniki kunduk, an mban unde minggirak. It maluk eekwi nogo inobaalombok aret kambugun o.

⁵Aap ambi iniki abe koonak wone a'me nggelok mban eeke, obeelom mban eerit nage, eeke kenok,

⁶At nen puut paga aakumi inagugi aanggo warogo pugwi mbanak nogo nengge, Iterali mendek inagugiwak nen yeenggwa niruwak o, yinuk, ayuk wuke, Oreewi inakuwi maluk eeppiige, Kwe amiya eeke kagak, imbirak nogo yege, Eekeelik aret o.

⁷At ti nen aap wiwi aganaka'lek awu luulu wogoge logonet amendek waganggetak nogo, mbet-mbet iyokan wogoge, Aakumi inamendek ndinggolaga'lek logonet aakumi inambi abu iinok, at ambi mendek wogorage, Aap inayum yirik lek iinok, yum yirippiige, Eeke menggerak o.

⁸At awu porogo wonogwe nogo onggo wu ambik nabenggolage, Ambinom wo'niru o, yinuk, yorage, eekeelik o. Aakumi maluk eeppiiga'lek eenggi awiirak wonage, Aakumi inowak loongge logonet, inetenggen lombongga'lek onggo liirogon aret eeppiige,

⁹ Wone lengganogo yorage minggirak nogo, at mugurok nage, Eeko logorak nawone yugu nogo, liirogon aret eeke, Eeke menggerak o. Aap ambi wone ti abok aret at eeke kenok, at aap abe iniki koonak me, mondok eenik aret logogin o,” yinuk, Aliku Itok Menggerak ALA nen aret yegerak o.

¹⁰“Togop aret kwe, ogoba nen maluk ambiriluk ambi eeka'lek kagak, apuluk ogogun mbuk me, aakumi inoorit nage, Aakumi inagugi aanggo warogo puut paga pugwi mbanak nengge, Oreewi inakuwi maluk eerogo piige,

¹²Aap aaninggin inoba wonogwe, aap ineenggi lek wonogwe, eerak nogo wi-wi aganake, Awu luulu wogorage logonet, inamendek wagangge nogo iyokan wogoraga'lek kolage, Kugiwak nen yeenggwaaruwak nduk ayuk wuke, Maluk ogole warak lombok eeke,

¹³Awu porogo wonogwe nogo onggo ambik nabenggolage, Ambinom wo'niru o, yinuk, oone omaawi paga yorage, eeke menggerak abok aret ti, eerit nage me, aap togop eeke kenok, eenik logogin mbaken? Mondok lek aret o! Ogole warak yi, abok aret eeke paga at warogo pugun aret me, amiya wundigin nogo ti, at obaalombok aret oba logogin o.

¹⁴Togop aret kwe, aap apuluk ti nogo nen at ndaremenggerak nogo nen ogoba maluk ambik eerit nage nogo enegen kamenggerak kwe, Nogoba eeke ti, an eerigin lek o, yinuk, mbo pege logomenggerik,

¹⁵Puut paga inagugi aanggo warogo pugwi mbanak nogo nengge, Iterali mendek inagugiwak ti, Yeenggwa niruwak o, yinuk, wiige, Oreewi inakuwi maluk eeppiige, Eekeelik o.

¹⁶Aap wi-wi aganaka'lek wu luulu wogorage logonet, inamendek waganggetak nogo mbet-mbet iyokan wogorage, Aakumi inamendek ndinggolaga'lek aakumi inambi abu iinok, at ambi mendek wogorage, Aap inayum yirik lek iinok, yum yirippiige,

¹⁷Maluk eeka'lek mbo pege, Eeke menggerak o. At awu porogo wonogwe onggo ambik nabenggolage, Ambinom wo'niru o, yinuk, oone omaawi paga yorage, Eeka'lek logonet, Eeko logorak nawone yugu nogo aret eeke, Wone lengganogo yorage minggirak nogo mugurok nage, Eeke menggerak. Aap ti nen togop aret eeke kenok, ogoba omaluk paga nen kambigin lek at mondok eenik aret logogin kwe,

¹⁸ogoba nen perak, aakumi wi-wi aganake, at owe-awot inamendek ugun-ugun wagangge, at mendek inenggela'me maluk eerit nage, eeke kenok, omaluk ti paga obaalombok aret kambigin o.

¹⁹Togop aret kwe, it nen yogo logonet, Ogoba maluk eeke nagagerak onggo nogo eeppogo logonet, apuluk inom eeppuulik ti, nonggop nduk? yogwe iigi o. Apuluk ti, a'me nggelok mban eeke, abe koonak mban eeke, wone lengganogo yorage minggirak nogo liippunuk eeke, eeke kenok, alom ti paga at mondok eenik logogin o.

²⁰ It maluk eekwi inobaalombok aret kambugun o. Ogoba maluk eeke onggo aput oba pege, ndi, aput maluk eeke nogo onggo ogoba oba pege, eerigin lek o. Ndi, aap iniki abe koonak nen obeelom eerit nage onggo ti, at obaalombok obeelom aret kolage, aap maluk mendek nen maluk eerit nage onggo ti, obaalombok maluk aret kolage, eerugun o.

²¹Togop kwe, aap maluk mendek nen at maluk eeke abok aret mbo pege logomenggerik, an wone lengganogo yorage nogo liirogon aret eeke, at a'me nggelok mban eeke, obeelom mban eerit nage, eeke kenok perak, at kambigin lek mondok eenik aret logogin o.

²²An nawone yugu taganogo punuk maluk eeke logomenggerak nogo abok aret an nen, Aap ti, togop eekerak o, yinuk abeke logogin lek o. Abe mban eerit nage logomenggerak paga at mondok eenik aret logogin o.

²³Naliku Nitok Minggirak an ALA nen aap maluk mendek kangge kenok, an nen nale'nggen mbake minggirak mbaken? It aap maluk mendek nen ineenik logowok nduk, maluk eerit nugwi nogo, mbo pugwi iinok perak, nale'nggen mbake lek mbaken? Mbake minggirak aret o.

²⁴Togop kwe, it aakumi iniki abe koonak mendek nen noone yugu ndak-ndak eeko menggaarak nogo mbo punuk, nomoninuk maluk eerit nogo logonet, it aap maluk mendek nen ogole warak mendek eeko mengga kwak eerit nugwi iinok, it ineenik logogun mbaken? Lek aret o! It aa'nduk obeelom eerit nogo logomenggaarak nogo abok aret an abeke logogin lek o. Wone yugu liirogon eeka'lek alik eerit nogwe, maluk eerit nogwe, eeremenggaarak paga ineebe mondok kambugun aret o.

²⁵Togop kwe, it nen yogo logonet, Ninogoba nen eeriyak koongge ti, ndak-ndak lek kagak koongge agaarik o, yogwe iigirak kwe, it Iterali mendek ti, an ari yi, inaruk konenggo logowak o. An eeriyak koongge ti, ndak-ndak lek ilik? It eeriyak koonggwi ti, ndak-ndak lek a? It mban iniki kwaakkolaawak o!

²⁶Aap iniki abe koonak nen obeelom eerit nage nogo mbo punuk, maluk eerit nage ti paga aret kambigin o. At maluk eeremenggerak paga at kambigin aret kwe,

²⁷aap maluk mendek nen maluk eeke logomenggerak nogo mbo pege logomenggerik, a'me nggelok mban eeke, obeelom mban eerit nage, eeke kenok perak, at eebe agap ndakkolaagin aret o.

²⁸At maluk ambik eeke logomenggerak nogo, Abet aret eeke nagagirak o, yinuk, mbo pemenggerak ti paga at kambigin lek abet aret eenik mondok logogin o.

²⁹Togop kwe, it Iterali mendek nen yogo logonet, Ninogoba nen eeriyak koongge ti, ndak-ndak lek kagak koongge agaarik o, yinuk, yogwe iigi o. An eeriyak koongge ti, ndak-ndak lek ilik? It eeriyak koonggwi ti, ndak-ndak lek a? It Iterali mendek mban iniki kwaakkolaawak o!

³⁰Togop me, it Iterali mendek ti, inalitik-inalitak eeriyak koonggwi paga inowak loonogo piinok, onggo ndak-ndak eeppiyaagin o, yinuk, Naliku Nitok Minggirak an ALA nen aret yagi o. It maluk eekwi paga ineebe nggelenggolookwak inomaluk mbo pugwi, noone yugu taganogo punuk, maluk eerit nogwe nogo yungguninuk wogwe, eeruwak o.

³¹It Iterali mendek ti, nonggop nduk kambuwok, mbako agaarik? Noone yugu taganogo punuk maluk eerit nugwi nogo mbo punuk, iniki inom, inobaabut inom, alik ngget mendek eerogo pako logowak o.

³²It aakumi kanggwi iinok, an nale'nggen mbakeelik me, ineenik logowak nduk inomaluk mbo puwak o,” yinuk, at Aliku Itok Menggerak ALA nen aret yo'negerak me, yokkiragi o, yinuk, yoragagirak.