Read Western Dani Yetikiyen 19 Bible Online

Yetikiyen 19 - Western Dani bible

Yetikiyen 19

¹Iterali inoweewi nagawan-nagawan inaleendawi tiyanggo logonet,

²“Singa inenggela'me singa kooli abu abe kwak kagalo ti, iya o! Singa awoologwe inenggela'me windak logonet, aagalogwe elak kuninake,

³At aagalogwe inenggela'me aagaluk ambi tawe eerogo pege, Aagaluk ti, tawe age nagagerik, wakaa'ngget age, At noorak nogo nibinogo puurak mamunggolage, Aakumi nibinogo piinok, ambeme yonggorinake logorak mamunggolage, Eereegerak o.

⁴At togop eeke nogo yi aakumi ndi aakumi nen inaruk konenggwi, Nggween labu pugume wangge kenok, tebenogo pugwi, Tebenogo punuk, nikkenok o Metit pi nogwe, Eereegwaarak o.

⁵Togop eeko mbareegwa, singa iyagalo nen eeriyak kooneegerak nogo mbeyok ari, Iniki lunik wonagagerak nogo lek age, eeke kage nagagerik, Aagaluk alik ambi tawe eerogo pege, Singa awooluk wakaa'ngget eerogo pege, Eeke mbareegi,

⁶Singa aagaluk nogo ti, abu wakaa'ngget agagerak me, orewologwe inom nege, At noorak nogo nibinogo puurak mamunggolage, Aakumi nibinogo piinok, ambeme yonggorinake logorak mamunggolage, Eereegerak.

⁷Eeke nagagerik, aakumi ineebe op logorak pak wurogo pereegwam langgunogo pege, Inawi wurik kota-kota nogo yigirogo pit nage, Eeke logonet, Nggween inom, it aakumi nggween ti paga wonogwe inom, at oone kole ari nogo inaruk konembunuk, inamineeri ne agan nage nagagerak o.

⁸Ne agan nage mbareegi, yi aakumi ndi aakumi at enaagan-ambokan wonogwe nen pilak yinuk, at tebenogo puwok nduk wogwe, At yiluk yuwak nduk, keele pit nogwe, Nggween labu pugume wangge kenok, tebenogo pugwi,

⁹Nik eerogo mbuti keele yiluk-yiluk eerak me mambugwi, Mambunuk, wonok aap inowe endagembogut Mbaben mendek wonage me pi wogwe, Pi nanuk, keele maarogo piigo menggam nogome mambugwi, Eereegwaarak me, Puut-puut Iterali wonogo menggam time oone kole ari konenggo nogogwaarak nogo, ambinom konengga'lek aret wonogogwaarak.

¹⁰Kagalo ti, keyabu anggur yarak me eyo anggur niyo eneerime yarak kwak wonage, Niyo eneeri ambik wungge me yarak me eno'mbak yiganak-wiganak eerogo pege, Anggen ambik yege, Eereegerak o.

¹¹Ero abe lagangge nagagerik, eno'mbak nogo omaawi ambik me, Ti paga aap endagembogut ambim mbanak ogobakkigirogo puurak op aret wonagagerak. Eno'mbak ninggirik-komaarak aago enggela'me ero nggorek lombok wonagagerak o. Ero abu nggorek wonage, ndi, eno'mbak ambik wonage, eerak me, Eyo ti, kin paga lombok wonagagerak o.

¹²Togop aret kwe, aakumi inanini nen kinogo nggween paga nggimbogo mbareegwa, O wiya oonegen wundi wage menggim pa'nggwe nen warit wage logonet, aganggen nen eyo nogo teebat eerogo pege kenok, Anggen yugu nogo mono-mono wambit nagagerak o. Ndi, eno'mbak omaawi nogo kalenak-pugunik nagagerak mbuk age mbareegi, kani nen tigitogon nenggegerak.

¹³O yogondak eyo nogo ti, nggween mbuk niyo yawenogo pegeelik me karume yarak aret agaarik o.

¹⁴Eyo aro paga nen kani wunuk ari nagagerik, Nenet eno'mbak paga wundi nage logonet, anggen yugu inom nenggegerak me, Eno'mbak omaawi paga aap endagembogut ambim mbanak ogobakkigiriyak nogo lek aret agagerak o,” yinuk, tiyanggo nogogwaarak. Wone yi ti, leendawi aret me, aakumi kanggwi iinok, tiyanggo nogogwaarak o.