Read Western Dani Yetikiyen 2 Bible Online

Yetikiyen 2 - Western Dani bible

Yetikiyen 2

¹At nen an yo'nege logonet, “Aakumi nen ndarak yi wae. An kat nimbirak wone mbaniyak me, mi'na'nuk karuk konengge logot o.”

²Awo yo'nege kagak, Aberiniki ninikime unggunuk, mippanege nagagerik, oone yo'nege koneneegirak nogo yi aret.

³“Aakumi nen ndarak yi wae. It aakumi an yorage eeriyak ineebi mbaka Iterali nogo, wone yora nanok nduk nappagage agarik o. It inom, inogobamini inom, o maan nen nok, yogondak kuli an ineebi eerogo mbo paneegwaarak o.

⁴It aakumi ti mendek awi mbilanak ti, inanobak yugum pogom logonet iniki omaawi wonogwe me time nappagaminggirak nage logomenggendik, it yorage logonet, At Aliku Itok Menggerak ALA nen yegerak nogo yi aret o, yinuk, yoraamunggun o.

⁵It ti, an yorage eeriyak ineebi mbaka mendek aret me, yoramenggendak inaruk konenggwi kenok konenggwi, mbo pugwi kenok mbo pugwi, togop eerugun me, kat yora namenggendak ti paga an nen yorage neegak yoraga mendek ambi nen inenggela'me logonet, wone yoragagerak nogo ineenu arugun o.

⁶Aakumi nen ndarak kat yi wae. It ineebe paga inom, inoone yokkugwi paga inom, kagabiti mbake, An muun alok inom, nggonggoondu alok inom, enggela'me wonage, nggitamuru awi mbanak me wonage, eeke agarik, mbarumunggun kwe, kagabiti mbake, it an yorage ineebi mbaka mendek aret me, it inoone yogwe paga kagabiti mbake, kiniki ma'nage, eerubok o.

⁷It ti, an yorage eeriyak ineebi mbaka aret me, an noone inaruk koneniyak mbakwi kenok konenggwi, mbo puurak mbakwi kenok mbo pugwi, eerugun me, noone yi, yora nak mban o.

⁸Aakumi nen ndarak yi wae. It ti, an yorage eeriyak ineebi mbaka mendek me, kat ti kwak logorak mage o. Ata, an wone yokkege nogo karuk konengge, an nano mendek wokkege neenok, Kambe a, yinuk, nengge, eeke logot o,” yinuk, yo'nereegerak.

⁹ Yo'nege nagagerik, ambi mendek eenggime logonet, titik nege kagagirak. Titik nege nagagerik, nenegen neegak mbuku pirik-perek eerak mbiganogo punuk, leendawi paga ndawi pugu inom, iniki wakkoloorak wone inom, aaninggin inoba ariyak me inabuwa o, yuurak wone inom, liiru mbanak peenok-peenok wonage kagagirak.