Read Western Dani Yetikiyen 20 Bible Online

Yetikiyen 20 - Western Dani bible

Yetikiyen 20

¹Wo'niren pinani wogogwaarak wonogwe niigak, tahun 6 abu eeppunuk, ambi eeke tut 4 penembunuk, ambi penenak tanggal 10 tut ti paga it Iterali mendek inoweewi ineebe mande negen nen, “Aliku ALA yegerak nogo yo'niraawak o,” yinuk, wogo nogogwaarik, an nowagam kwi'nogogwaarak.

²Kwi'nogo mbareegwa, Aliku ALA nen an yo'nege logonet,

³“Aakumi nen ndarak yi wae. Iterali inoweewi ti, yorage logonet, Aliku Itok Menggerak ALA nen yegerak yoroorak nogo yi aret. An ari neyaawok nduk, wagaarak ya? An ari it ambi kaagun lek aret o, yinuk, neenik Naliku Nitok Minggirak an ALA nen aret yagi o.

⁴Aakumi nen ndarak yi wae. Kat nen it inawone amburu mbaniyak ya? Kat nen it inowak looninaburak op mbaken? Op kenok, it inombomini nen maluk ogole warak mendek eeko nogogwaarak nogo mbininogo yoret o.

⁵ Yorage logonet, Aliku Itok Menggerak ALA nen wone yegerak nogo yi o, yinuk, it yoroorak nogo yi aret. An nen it Iterali miirinabeegirak ne ti paga, Wone yi abet aret o, yinuk, at Yakup mendek paga wiganak nogo, ninom kumbuk mbaneegirak. It o Metit paga wonogwe me, nomaawi neyaawak nduk, eeke logonet, Naliku kinogoba Ala ti, an aret o, yinuk, kumbuk mbaneegirak.

⁶Ne ti eyom paga it yorage logonet, Kit o Metit nen wokkiren wundi woraanuk, yi o ndi o enggela'me nggween abu obeelom lombok yilak amburu inom, nggiin amburu inom, niyo eneeri negen kila-kila wungge menggim nggween an nen kit kinake leenogo pereegim nogome wokkiren pinagi nagin o, yinuk, yorage nagagirik, kumbuk mbaneegirak o.

⁷Kumbuk mbangge nagagirik, it yorage logonet, Naliku kinogoba Ala an aret neegak, Yeenggwa niraawak o, yinuk, ogole warak ogut eerak ayuk wukwi nogo, kinalitak lombok mbo pinip o. It Metit mendek inagugi mugurok nogwe paga maluk eekkologwe kiyo, mugurok noorak mage o.

⁸Yoragagirak kwe, an yorage nogo eeriyak ineebi mbako nogogwaarik, an noone konenulik mbo punuk, Yeenggwa niraawak o, yinuk, ogole warak ogut eerak ayuk wukwi nogo mbo pugwi, it Metit mendek inagugi nogo teppugwi, eeka'lek iinok, an nanini kilirogo inoba piige, it o Metit wonogwe me nanini kani kunik negen inoba kwippiige, Eerikit o, yinuk, koonogo pereegirak.

⁹Ti koonogo pereegirak kwe, yi aakumi ndi aakumi inenggaanom paga an nen it Iterali o Metit nen wogoren wundi woroorak wone yereegirak me, yi aakumi ndi aakumi it inom wonogwe ti nen an nendage abe nogo maluk eerogo pukwak, koonogo pereegirak nogo eerulik mbo punuk,

¹⁰o Metit nen wogoren wundi wage nagagirik, o karume piya wagagirak o.

¹¹ Piya wagagirak wonogwe iigak, wone lengganak inom, nawone yugu inom, eekwi iinok, ineenik aret logogun me, ineenik logowak nduk, wone lengganogo yorage, eeko logorak wone nogo yorage, eereegirak o.

¹² Naliku ALA an nen aret it leenogo piyareegirak nogo ineenu ogwe, wone ninom yereegurak nogo abekwi, eeko logowak nduk, ineenu agak nogo 6 yippunuk, nogo 7 paga yonggonggologo logorak wone nogo kunduk yoragagirak.

¹³Ti eereegirak kwe, it aakumi Iterali o karume nen an yorage nogo eeriyak ineebi mbakwi, noone yoragatak eekwi iinok, ineenik logogun kwe, kagak wone lengganogo yoragagirak nogo taganogo pugwi, eeko logorak wone yoragagirak nogo mbo pugwi, ndi, nogo 6 yippunuk, ko'lu paga yonggonggologo logorak leenogo pateegirak kunduk, maluk eerogo pugwi, eereegwaarak. Eeko mbareegwa, o karume time aret nanini mondok nggwik togon inoba kwippiinok, ineebe lek eerogo piyaakit kooneegirak kwe,

¹⁴yi aakumi ndi aakumi inigen iigak, Iterali wogoren wundi wagagirak ti nen nendage abe nogo maluk agaarak neyookwak, eeriyak kooneegirak nogo lek eerogo pereegirak.

¹⁵ Inagugi ogut eerak mugurok noorak lombok mbareegwaarak paga eeko logorak wone yoragagirak nogo mbo pugwi, wone lengganogo yoragagirak nogo mugurok naga'lek tayoppugwi, ndi, nogo 6 yippunuk, ko'lu paga yonggonggologo logorak leenogo pateegirak nogo taganogo pugwi, eeko nogogwaarak me, it yorage logonet, Yi o ndi o abok aret enggela'me nggween abu obeelom wokkiragagim yilak amburu inom, nggiin amburu inom, niyo eneeri negen kila-kila wungge menggim time pinagi nagin lek o, yinuk, wone ti, it abet mbaruwak nduk, o karume time kumbuk mbaneegirak o.

¹⁶

¹⁷Kumbuk mbaneegirak kwe, nenegen pegiinok it inabuwa mbake nagagirik, o karume time ineebe pup eerogo piige, inenggaawak abu lek eerogo piige, eerulik o.

¹⁸It inapuri o karume wonogwe nogo yorage logonet, Kinogobamini nen wone lengganogo yokkirogo nogogwaarak nogo mugurok nogwe, eeko logorak wone koonogo pereegwaarak nogo eerit nugwi, ndi, it inagugi ogut eerak ayuk wukwi paga kinoba maluk eekkolookwak, eerit nugwi, eeriyak mage o.

¹⁹Naliku kinogoba Ala ti, an aret me, an nen wone lengganogo yokkirage nogo mugurok nogwe, eeko logorak noone yokkirage nogo liirogon eekwi,

²⁰ndi, nogo 6 yippunuk, ko'lu paga yonggonggologo logorak leenogo pateegirak ti, kit ninom wone yereegurak abekak aret me, eekwi, eekwi kiinok, Naliku kinogoba Ala an aret kineenu arumunggup o, yinuk, yoragagirak.

²¹Yoragagirak kwe, it inapuri ti nen an yorage nogo, eeriyak ineebi mba'nuk, noone yoragatak eekwi iinok, ineenik logogun kwe, kagak, wone lengganogo yoragagirak nogo mugurok naga'lek tayoppugwi, eeko logorak noone yoragagirak nogo liirogon eeka'lek mbo pugwi, ndi, nogo 6 yippunuk, ko'lu paga yonggonggologo logorak leenogo pateegirak nogo kunduk, maluk eerogo pugwi, eereegwaarak. Eeko mbareegwa, o karume time nanini inoba kilirogo piige, nanini kani kunik negen inoba kwippiige, Eerogo piyaakit, kooneegirak kwe,

²²neenggi awiippatinuk, puk aret agagirak o. Yi aakumi ndi aakumi inigen iigak Iterali wogoren wundi wagagirak ti nen nendage abe nogo maluk agaarak neegwi iyo, eeppiyoorak kooneegirak nogo lek eerogo pereegirak.

²³ Inogobamini inagugi ogut mugurok noorak uugwe lombok mbako logonet, eeko logorak noone yoragagirak nogo eeka'lek mbo pugwi, wone lengganogo yoragagirak nogo taganogo pugwi, nogo 6 yippunuk, ko'lu paga yonggonggologo logorak leenogo pateegirak nogo maluk eerogo pugwi, eereegwaarak me, it yorage logonet, Yi aakumi ndi aakumi inenggela'me nappinagage, yi o ndi o abok aret mappinagage, eerigin o, yinuk, o karume time yorage nagagirik, wone ti, abet mbaruwak nduk, kumbuk mbaneegirak o.

²⁴

²⁵Eeko logowak nduk, wone maluk lengganogo yorage, eeko logorak meek kagak eeko logowak nduk, wone yorage,

²⁶ndi, Naliku ALA an aret ineenu a'nuk, inamineeri ne agan nage logowak nduk, inapuri manggu ndarak inagugi ake inoorogo wogorogwe ti paga inoba maluk eerogo patuwak nen teppiige, eereegirak o.

²⁷Togop aret eeppiyareegirak me, aakumi nen ndarak yi wae. At Aliku Itok Menggerak ALA nen wone yogop yegerak o, yinuk, it aakumi Iterali yoroorak nogo yi aret. It inombomini nen an mbo paninuk meek eerogo panogo logonet, ambi eereegwaarak nogo yi aret.

²⁸An nen, Nggween wokkiraagin o, yinuk, kumbuk mbaneegim nogome wogoren piya unggwage mbareegi, it nen puut-puut tiyarogon paga, eyo eno'mbak yiganak-wiganak aago abu'me paga, kogwe kenok, nogome inagugi aanggo warogo wogogwi, nanini aruwak nduk, inake pi wogwe, inagugi ake obari abe kaga kani kunggwi, inake amburu kilirogo pugwi, eereegwaarak.

²⁹Eekwi iinok, an nen it yorage logonet, Puut tiyarogon ti paga nano kaawok nduk lagi nogo ogotik? yinuk, yoragagirak, yoret o,” yinuk, yo'negerak me, yoragagirak. Puut ti endage, Puut Tiyarogon Kugi Eeko Menggam o, yinuk, o yogondak yogwe wonogwe aret.

³⁰“Togop me, At Aliku Itok Menggerak ALA nen, Wone yogop yokkiragaarak o, yinuk, it aakumi Iterali mendek yoroorak yegerak nogo yi aret. Inombomini inoba maluk eerogo pateegwa kwak it inombowologwe yi, ndak-ndak eerogo pako logonet, inombomini inagugi ogut eerak nogo mugurok noorak mbakwi ya?

³¹Inagugi inake wogorogo logonet, inapuri manggu ndarak inoorogo inagugi inake kani kuninakwi paga aa'nduk nen nok, o yogondak ineebe maluk eerogo pako agaarik o. Eeko logonet, it Iterali mendek ti, At Aliku ALA ari yo'niraawak o, yinuk, an nowagam wogwe iinok, an nen, Yo'ninip o, yinuk, yoroorak op ya? An togop yoraagin mondok lek o, yinuk, neenik Naliku Nitok Minggirak an ALA nen aret yagi o.

³²It nen yogo logonet, Nit yi aakumi ndi aakumi alik mendek kwak, yi o ndi o aakumi inanebunu lombok nen eyo inom, yugum inom, alut eeka kwak, ariyak uugwe mbako ogoorik o, yogwe iigirak ti, ndak-ndak arigin abu lek o.

³³Noone omaawi paga nen wone lengganogo yorage, neenggi omaawi paga eeppiige, nanini inoba piige logonet, inowak looninake, eerigin o, yinuk, neenik Naliku Nitok Minggirak an ALA nen aret yagi o.

³⁴Noone omaawi paga nen, neenggi omaawi paga nen, nanini paga nen, it yi aakumi ndi aakumi wonogwe inenggela'me nen wogoren wundi wage, yi o ndi o mak eerak nugwi me nen kuwak eerogo piige, eerigin o.

³⁵O karume wogoren wagagi kwak, it wogoren yi aakumi ndi aakumi inenggela'me piya nanuk, time aret ninigen pet-pet yogo logonet, Ndogop eekotak o, yinuk, inowak loonogo maluk onggo inoba piyaagin o.

³⁶Karume nggween o Metit paga an nen inombomini inowak loonogo maluk onggo eeppiyareegi kwak, it togop aret eeppiyaagin o, yinuk, Naliku Nitok Minggirak an ALA nen aret yagi o.

³⁷Ndomba ineebe liirogon lingginako mengga kwak, it nowaanggun abu'me unggwi wagak eekwi iigak, ninom wone mbaneegurak nogo ndak-ndak eeko logowak nduk, nomaawi paga ina koonogo piyaagin o.

³⁸It an yorage nogo eeriyak ineebi mbaka inom, noone tagangga inom, inenggela'me nen ogoorogo piinok, o it wonogwe me nen wogoren wundi woraminggirak kwe, Iterali inanggween paga unggwi nagun lek o. Ti eeke neenok, Naliku ALA an aret ineenu arugun o.

³⁹It Iterali mendek ti perak, Naliku Nitok Minggirak an ALA nen wone ambi yoroorak yokkege nogo yi aret. It Iterali mendek ti, inalitik-inalitak lombok nen inagugi ogut eerak ayuk wurit nogo logowak o. Togop eerit nogo logomenggaarik, irip paga an noone inaruk konembunuk, inagugi inake pugwi, aanggo warogo wogogwi, eekwi paga an nendage abe alik leenak maluk eerogo pugwi nogo ambinom maluk eerogo pugun lek o.

⁴⁰An nabuut alik leenak Iterali wonogo menggam abu tiyanak time it Iterali mendek abok aret an nalut eeko logogun o. Ndi, time aret nake pi wogwe iinok, nale'nggen nen wagangge logogin o. It an nake warogo wo'nugwi inom, anggen iyaalok mbanak nake pugwi inom, nake alik leenogo punuk, wo'nugwi inom, o time aret nake pi wagak eeko logorak, yoraagin o, yinuk, Naliku Nitok Minggirak an ALA nen aret yagi o.

⁴¹It yi aakumi ndi aakumi inenggela'me nen wumbiya wage, yi o ndi o mak eerak wonogwe me nen kuwak eerogo piya wage, eeke logonet, obari abu abe kaga kwak nale'nggen nen ineebe togop aret wogoninake, yi aakumi ndi aakumi inigen iigak an abu abe alik leenak minggirak neyaawak nduk eeppiige, eerigin o.

⁴²Nggween wokkiraagin o, yinuk, inombomini yorage logonet, kumbuk mbaneegim Iterali inanggween nogome piya unggwi wage neenok, Naliku ALA an aret ineenu arugun o.

⁴³O time logonet, inobaabut wonogogwaarak inom, eerit nugwi paga maluk eerogo pako nogogwaarak inom, abeppunuk, Maluk lombok kagak eeko nogogurak paga nit ninogole warak aret kogo o, yinuk, yugun o.

⁴⁴It Iterali mendek ti, maluk eerit nugwi, ogole warak mendek eerit nugwi, eekwi nogo, an onggo ndak-ndak eeppiyaagin lek nendage maluk eerukwak abe logowak nduk, eeppiige neenok, Naliku ALA an aret ineenu arugun o, yinuk, Naliku Nitok Minggirak an ALA nen aret yagi,” yo'negerak me, yokkiragi o, yinuk, yoragagirak.

⁴⁵At Aliku ALA nen an yo'nege logonet,

⁴⁶“Aakumi nen ndarak yi wae. Kena o ame pa'nggwe na'nage logot o. Na'nage logomenggendik, o ame pa'nggwe time nggween ti mberege, o ame pa'nggwe eyonggaame time, Ndogop eekkabigin o, yinuk, yoge, eeru o.

⁴⁷O ame pa'nggwe eyonggaame time yoge logonet, At Aliku Itok Menggerak ALA nen, Wone yogop, yokkege me, Aliku ALA nen yokkege yi, karuk konengge logot o. Yi eyo ndi eyo ki wonage inom, mbuk wonage inom, kani nenet nawak nduk, an nen kani wuninogo puurak eeke agarik o. Wuninogo piminggirak nogo nogonogo puurak meek me, o ame pa'nggwe nen nok, o omarip paga pa'nggwe iri'ngga-kale'ngga abok aret kani nen yogonogo pit nagin o.

⁴⁸Kani ti, nogonogo puurak meek kenok, Aliku ALA nen aret kani wuninogo pegerak kogo o, yinuk, yi aakumi ndi aakumi abok aret yugun, yoru o.”

⁴⁹Yo'nege mbareegi, an nen at yoge logonet, “Kaliku Kitok Menggendak ALA, ao! An yorage neenok it nen nabok yogo logonet, At yi, wone eegu laarogo mban yo'nirage menggerak nogo lek a? yinuk, yogo agaarik,” yoreegirak.