Read Western Dani Yetikiyen 23 Bible Online

Yetikiyen 23 - Western Dani bible

Yetikiyen 23

²“Aakumi nen ndarak yi wae. Kwe ambit aagalogwe kumi mbere ndarak wonogogwaarak me,

³it imbirak tawe paga o Metit time wonogo logonet, kumi ya wurinakak a'nuk, Wu'ninabinip o, yinuk, agan nugu nogogwaarak. O time iigak inelak maakwi, tawe inelak pigagangga'lek me, piginok-paganok eeginabit nugwi, eeko nogogwaarak.

⁴Oweeluk endage ti, Okola, ndi, awuluk endage ti, Okoliba aret. It imbirak ti, an nakuwi kwak aret me, inaagalogwe wologwe-komologwe ndaganabeegwaarak. Okola ti, o Tamariya aret. Ndi, Okoliba ti, o kota Yerutalem aret.

⁵At Okola ti, nakwe kwak aret kwe, mbabi eerit nage logonet, at inom kunik inayum mbogut mili negen yirik o unde waka inom, aap ineegin unde inoweewi inom, kuda paga kwi'na'nuk nogo nogogwaarak aap wim eeka aakumi Atiyut mendek aap tawe abu amuni mbanak mban nogo nen, Ee'nabuwak o, yinuk, it paga iniki nenet nege nagagerak me,

⁶

⁷it aap Atiyut mendek inendage warak abok aret nogo nen eeruwak nduk, yoranet nage, ndi, Ee'nabinip o, yinuk, iniki nengge nogo, inagugiwak ayuk wukwi abok aret inom eerit nege paga at eebe aret maluk eerogo pake, eeke nagagerak.

⁸At awo tawe o Metit paga nen aap inom nogo yege logonet, elak pigagangga'lek nogo aret piginok-paganok eekwi, at eebe paga iniki nengge kenok ugun eeppit mban nugwi, eeko nogogwaarak nogo mbo puulik kundugu eeke nagagerak.

⁹Togop aret eerit nage nagagerak me, at inom iniki kunik iniki nengge aap Atiyut mendek nogo, ineenggime pereegirak.

¹⁰Pege mbareegi, it nen kwe ti, agali nggoorogo mbo pugwi, aagalogwe wologwe-komologwe nogo keele maageren nogwe, ndi, at eebe wooluwak paga warogo pugwi, eereegwaarak. Kwe ti, togop eerit nege nagagerak paga onggo eerogo pega o, yinuk, at abok kumi inenggela'me wiganinuk nagagerak.

¹¹At eeppereegerak ti, awuluk Okoliba nogo enegen kagagerak kwe, oweeluk eeke nagagerak mbuuluk negen kagak, awuluk perak, abu nggwok lombok iniki nenet nage, ya wukak lombok eerogo patit nage, eeke nagagerak.

¹²Wim eeka li'luk eerak o unde waka inom, it aap yigin unde inoweewi inom, aap kuda paga kwi'na'nuk nega it Atiyut mendek aap tawe amuni mbanak nogo mban at nen kunduk, iniki nengge nagagerak me,

¹³at kunduk eeke paga maluk eerogo patit nage kagagirak. Imbirak ndak-ndak aret eerit nugwi iyareegirak kwe,

¹⁴awuluk yi perak, Ambinom mban ee'nabuwak, mbarit nege nagagerak. At nen aap Mbaben mendek ndarak inomarip paga inagabee'le yirik, inanobak paga yum perenak, aap Mbaben mendek inaworak wim wakaa'ngget negen inogut eerak amburu maa'ngga paga ayo wogo kobat paga wonage enegen iige nagagerik,

¹⁵

¹⁶mbet-mbet aret it paga iniki nengge nagagerik, wone eerogo o Mbaben paga nappiyareegerak

¹⁷aap Mbaben mendek nogo at ka woraanuk, iniki nengge kenok, eeri unggwogo menggam at nogo yege menggim paga nen inoba tayok yuwak nduk, eerit nogo logonet, maluk eerogo pereegwaarak. Maluk eerogo pogo mbareegwa, eebi nen mbo piyareegerak.

¹⁸At nen kin paga, Ugun ee'nabuwak, mba'nuk eerit nage logonet, amendek wogoranet nage kenok, an nen, Ogole warak eerit nege kwe yi, neebi o, yinuk, oweeluk mbo pereegi kwak awuluk togop aret mbo pereegirak.

¹⁹Mbo pereegirak kwe, at o Metit paga tawe logonet, kwe ya wukak eerit nage nagagerak eyom paga abeppunuk, abunuk ambik lombok eerit nege nagagerak.

²⁰It aap iniki kunik inooli kole keledai inooli kwak, ndi, inamburu nagakwi ti, kuda amburu nagake menggi kwak, It nen mban ee'nabuwak o, yinuk, it paga iniki nengge nagagerak.

²¹An o Metit paga awo tawe wonage neegak, nelak maakwi, nelak piginok-paganok eekwi, eeko nogogwaarak nogo, yogondak ndak-ndak ee'nako logowak lak, ao, mbake nagagerak o,” yinuk, an yo'nereegerak.

²²“Togop aret me, Naliku Nitok Minggirak an ALA nen at Okoliba eeppuurak nogo yi aret. At inom iniki kunik logonet eekak mban eekwi iinok, anggon a'nuk mbo piyareegerak nogo nen aret at tebenogo pi woraawak nduk, inikime nggaganogo piyaagin o. At enaagan-ambokan wonogwe abok aret

²³it Mbaben mendek inom, Katirim mendek abok aret inom, aap Pekot mendek, Towa mendek, Kowa mendek nogo inom, aakumi Atiyut mendek abok aret it inom, abok aret ti, aap tawe amuni mbanak o unde waka inom, aap ineegin warak inoweewi inom, nggweendo paga wim eeka inoweewi inom, aap inendage warak inom, it abok kuda paga nega nogo ti,

²⁴at tebenogo puwok nduk, ineegin-inomaale inom, nggweendo wim eeka inom, we ugun mendek inom, li'luk aago aakumi apit kuwak eerak inom wogo logomenggaarik, nggeemu nggwok inom, mbuuluk inom, waganggwi, petagi omaawi mendek yikwi, eeppunuk, oonda mbani ungguwok nduk, wanggekwi iigak, it nen maluk onggo at oba puwak nduk ineenggime piyaminggirak it aakumi inoone konenggwi lek iinok, eeppiigo mengga kwak ndak-ndak aret eeppugun o.

²⁵An ninom niniki kunik eeriyak mbake neegak, it aakumi alik inom iniki kunik eekwi ti, neebi o, yinuk, nanini nen ineenggime piyaminggirak iniki aagi nen inooko logonet, inogobak inom, inaruk inom, tabonogo piigwi, yumbunogo piyamenggaarak nogo wooluwak paga inookwi, at aagalogwe wologwe-komologwe keele maageren nogwe, ndi, ando yumbunik nogo kani nen nawak nduk kumbugwi, eerugun o.

²⁶At ayum ti, nggoorogo agap mbelanak eerogo pugwi, obaanggi-obaangge abu abe aago ti, ko'nok ndi yogwe, eerugun o.

²⁷At o Metit time enggali lek amendek kin eerogo pit nage, Ee'nabuwak, mba'nuk, ugun eerit nage, eeke nagagerak kunik eerit wage nogo, an nen lek eerogo pigin o. Lek eerogo pege neenok, at nen o Metit paga logonet, eerit nage nagagerak nogo abeppunuk, Ambinom eeke logokit lak, ao, yinuk, ambinom yigin lek o.

²⁸Naliku Nitok Minggirak an ALA nen, It aap at eebi inombake, ndi, inom eekak mban eekwi iinok, anggon nen mbo piige, eereegerak nogo, ineenggime pikit nduk eeke agarik o.

²⁹Pege neenok, ineebi lombok ombako logonet, at liirit-laarit eeke logonet waganeegerak nogo, it ndinggologwe, at ayum yirik lek agap mbelak-mbalak eerogo pugwi, eerugun me, at aap inom ugun eerit nage kenok, Kwe yi iya, yinuk, inenggali mbako nogogwaarak nogo, abu kin aret arigin o. Ti eerogo puurak nogo ti, at enggali lek amendek kin eerogo pit nage, Op aret ee'nabuwak o, yinuk, eerit nage, eeke nagagerak paga maluk onggo at oba lombok kwippatigin o.

³⁰Yi aakumi ndi aakumi, Ugun ee'nabuwak o, yinuk, iniki nenet nage, inagugiwak ayuk wuke paga maluk eerogo pake, eereegerak o.

³¹At oweeluk maluk eerit nage nagagerak nogo awuluk aret eerit nage me, oweeluk eeke nagagerak onggo niyoowa'na toolak kwak wogoreegirak nogo aret awuluk nawak nduk, eenggime pigin o,” yinuk, yegerak o.

³²At Aliku Itok Menggerak ALA nen yegerak nogo yi aret. “Oweeluk aniyoowak ti, ambe nggwok o'lu warak lombok eno korok togon toolak wonage me, awuluk aret nagin o. Ti nengge kenok, aakumi nen miyuk-meya eerogo pugwi, Ha! yinuk, agi'ndok kanggwi, eerugun o.

³³Oweeluk Tamariya aniyoowak ti, amineeri ne agan nage, Yi oone lek ndi oone lek age, Eeke logorak toolak kwak me, at nengge kenok, Kumili lombok kungge, iniki mondok puru ari, eeke kaagin o.

³⁴At nen toolak nogo nengge logonet, ameneno inom nengge logomenggerik, togolowak telenogo punuk, Telenak ambi waganogo elak nggarik-nggarek eerogo patigin o, yinuk, Naliku Nitok Minggirak an ALA nen aret yagi,” yegerak o.

³⁵Togop aret me, Aliku Itok Menggerak ALA nen yegerak nogo yi aret. “At nen an mari eerogo panege, ndi, ambokan munogo panege, eereegerak me, enggali lek amendek kin eerogo pit nage, Ugun ee'nabuwak, mba'nuk eerit nage, eeke nagagerak onggo eeppuurak toolak nogo, at aret nengge logowak o,” yinuk, yegerak me, yokkigi o, yoreegirak.

³⁶Aliku ALA nen an yo'nege logonet, “Aakumi nen ndarak yi wae. Kat nen Okola Okoliba imbirak inowak loonogo maluk onggo yoroorak mbaken? Inowak loonogo maluk onggo yoroorak mbake keenok, kwe ogonggelo mbo punuk ugun eerit nege menggi kwak eerit nugwi, ndi, ineenggi paga aap inamiya wonage, eekwi ti, ogole warak lombok eerit nugwi me, kin paga koone omaawi aret yoraamunggun o. Kwe ogonggelo mbo punuk, aap alik imbirak lambungge menggi kwak an wonage neegak kwe, it yi kugi ndi kugi inayuk wukwi, inaagalogwe ndappiinok, Yi Aliku ALA apuri aret o, yinuk, leenogo paneegwaarak iigak inagugi inambi negen nawak nduk, inake warogo kani kunggwi, eeko nogogwaarak.

³⁷

³⁸Ti mban eerulik o. Ata, ambi meek nombako logonet, eereegwaarak nogo yi aret. Ne ti eyom paga aret an nawi alik leenak menggim nogo, maluk eerogo pugwi, ndi, nogo 6 yippunuk, ko'lu paga yonggonggologo logorak nake leenogo pateegirak kagak ne ti paga ugun eerit nugwi, eeko nogogwaarak.

³⁹Inaagalogwe inoorogo inagugi inake kani kuneegwaarak ne ti paga aret, an nawi alik leenak menggim nogome unggunuk, ogole warak lombok eerogo pit nogogwaarak. Abet aret an nawi wurik ti aret maluk eerogo pit nogogwaarak.

⁴⁰Ndi, ambi eereegwaarak nogo yi aret. Aap o nda wonogwe nogo woraawak nduk, yonggo nappiyareegwaarak wogwe iigak, it inale'nggen nen oweeluk awuluk imbirak ngguu'mo abu mbuk-mbak wappunuk, amburu inigen ambeeri paga mbenanogo pugwi, inobaanggi-inobaangge li'luk eerogo yirikkologwe, eeppunuk,

⁴¹obari abe kaga inom, tayitun amburu inom, nalut eeko logonet eeko logorak wogoragagirak nogo, waganogo eyo ndoonak paga koorok taati punuk, it nogo yugu menggam abu abe ogobakkigirik nogo paga kwi'na'nuk tooriigo nogogwaarak.

⁴²It inaagan-ambokan endekem taati aakumi inale'nggen nen noone-koone agan nogwe iigak, it aap amburu nenok kumili aganaka o karume mendek aap endekem noone-koone agan nugwi nogo inom unggwogo nogogwaarik, kumi nogo oweeluk awuluk imbirak tenggen inobaak me yirippiigwi, nggare-nggare abu kigirikwe lombok inanobak paga yirippiigwi, eereegwaarak.

⁴³Ti eekwi iinok, an nen mbake logonet, Kumi inogonggelomini mbo piinok, ugun eerit nugu logonet, inale'nggen lek agaarak yi, kumi abe lek ya wurinakak aret me, eeginakak mban yogo logowak, mbake mbareegi,

⁴⁴inom nogo yit nogo nogogwaarak. Aap nen kumi ya wurinakak iya wogwe iinok, inom nogo yogo logonet eeginako mengga kwak, it aap ti nen kumi inenggali lek inamendek kin eeppit nugwi Okola Okoliba imbirak inom nogo yit nugu nogogwaarak.

⁴⁵It kumi ti, inogonggelomini mbo piinok, ugun eerit nugwi, ndi, ineenggi paga aap inamiya wonage, eekwi me, it kumi inogonggelomini mbo piinok, ugun eerit nugwi, aap inoorit nugwi, eekwi iinok, inowak looninako logomenggaarik, Kinomaluk onggo ndogop aret kinoba arigin o, yinuk, yorogo mengga kwak, it aap abu abe iniki koonak nogo nen it oweeluk awuluk imbirak ti, inowak loonogo punuk, maluk onggo eeppiyaagun,” yo'negerak o.

⁴⁶Aliku Itok Menggerak ALA nen ari logonet, “Aap eerak lombok pilak yogo logonet, it ti, tebenogo piigwi, inamineeri ne agan nage kagak inamendek ugun ko'nok ndi yogwe, eeruwak o.

⁴⁷Aap eerak ti nen yugum paga oweeluk awuluk imbirak lomba eerogo inookwi, paloowi paga ineebe nggarik-nggarek eerogo inookwi, inaagalogwe wologwe-komologwe inoorit nogwe, ndi, inawi wurik kani mbelanogo piigwi, eerugun o.

⁴⁸Ti eekwi paga it kumi o time inenggali lek inamendek kin eerogo pit nugwi nogo, lek eerogo pigin me, it kumi ti, abok aret an eeppiyaminggirak yi, liippunuk, Oweeluk awuluk imbirak eeko nogogwa kwak nit togop eerugun lek o, yinuk, yugun.

⁴⁹Ndi, it oweeluk awuluk imbirak perak, inenggali lek inamendek kin eerogo pit nugwi onggo it aret kogwe, ndi, kugi inayuk wuko logonet maluk eerit nugwi onggo inobaalombok aret kogwe, eerugun o. Eeko logomenggaarik, Naliku Nitok Minggirak ALA an aret ineenu arugun o,” yinuk, yo'negerak me, yokkiragi o, yoragagirak.