Read Western Dani Yetikiyen 24 Bible Online

Yetikiyen 24 - Western Dani bible

Yetikiyen 24

¹Wo'niren pinani wogogwaarak wonogwe niigak, tahun 8 eeppunuk, ambi eerak tut 9 penembunuk, ambi penenak tanggal 10 tut ti paga Aliku ALA nen an yo'nege logonet,

² “Aakumi nen ndarak yi wae. Ne tanggal 10 yi, liiru mbanogo pu o. O yogondak ne yi paga aret aap endagembogut o Mbaben mendek nen o kota Yerutalem oonda mbani unggwikit nduk eeke me, tanggal yi liirogon liiru mbanogo pu o.

³It an noone eeriyak ineebi mbaka mendek yi, wone eegu laarogo yorage logot o. Yorage logonet, Aliku Itok Menggerak ALA nen yegerak nogo yi aret. Togolowak kani kunik paga kwippugwi, Kwippunuk, niyo toologo pugwi, eeruwak o.

⁴Niyo la'nage kagak ndomba amok warak kero waganogo wakwi, Enggaanggum abu abe aawi mbanak inom, obaak mbanak inom, waganogo togolowa'na niyo la'nage me nogome wuppugwi, Owak ako wonage kero, togolowa'na niyo la'nage me yagabit eerogo mambugwi, Eeko logomenggaarik, Owak nogo la'naruwak nduk, kani ambinom kunggwi, Owak nogo niyo kila-kila eeke paga lakwi, Eeruwak,” yegerak o.

⁶Aliku Itok Menggerak ALA nen yegerak nogo yi aret. “O kota enggela'me time ineebe inoorak inamiya ti, Liirubu nen kagaarogo pege kero, nggween paga wurabulik o. Ata, yugum eerilek tabak paga kilirogo pereegerak o. Amiya kilirik nenegen kage kenok, nanini mi'nage, Inoorogo piinet nagagerak onggo woorak aberak wonage, Eerak logowak nduk, At amiya ti, liirubu nen kagaarogo pege kero, yugum eerilek tabak paga kilirogo pigin me, Aakumi inamiya kilirogo piinet nugu menggam o kota ti, abuwa o! Togolowa'na enggaanggum la'nage logonet mili lenggenogo pege nogo, kooka'lek lengge aago kagak wonage ti, abuwa o! Enggaanggum mbanak larak ti, Ta koloorak kaamun? yinuk, Yugum wakkaga'lek ugun-ugun ambi waganogo wumbegak, ambi waganogo wumbegak, eeke logowak,” yegerak o.

⁹Togop aret me, Aliku Itok Menggerak ALA nen yegerak nogo yi aret. “Aakumi inamiya kilirogo piinet nogo menggam o kota ti, abuwa o! An kunduk, kani wurogo pit lagagin me,

¹⁰Kani ambinom ndoonogo pit lagangge, kani wuninogo pege, eeppunuk, Enggaanggum nogo ombat abe eekak inom nenggelak-kenggelak eerogo punuk abu libik-lobak la'nage, Owak nogo ti, kani mu eerogo la'nage, eeruwak o.

¹¹Eeke logomenggerik, togolowak yonggolak lek we kani anggen paga lunogo puwak o. Kani paga lunogo pemenggerak eyak nen mbuti kwindagala eerogo pege logonet, Togolowak mbuti paga ogobakkigirik enggela'me mbuti lek alik mendek ambi wonage kero kani nengge, Ndi, mili-mili lengge aago wonage nogo lek age, eeruwak o.

¹²Mili-mili lengge aago wonage ti, lek aruwak nduk, an nen ta'liila eekak mban ari logonet, kani kunggitak kwe, Mili ti, lengge eerogo pit wundi wagaarak me, lek aga'lek kundugu aret wonage o,” yinuk, yegerak o.

¹³“Mili-mili oba lengge aago kwak nogo ti, at enggali lek amendek kin eerogo pit nage ti aret o. At mili-mili oba lenggenak wonage nogo, an nen inoba eyoongga nggoorogo nappogo mengga kwak, eereegirak kwe, oba lenggenak nogo lek ariyak eebi mbareegerak me, nanini nen eeppuurak nogo tayo yega'lek kagak oba mili-mili lenggenak aret logogin o.

¹⁴Naliku an ALA nen aret yagarak o. Ndi, wone yagarak eeriyak eyom ari wagaarak me, an puk arigin lek, aret eerigin o. An nen at abuwa mbake, eeppuurak koonggirak kagak alik ambi eeppuurak koongge, eerigin lek, at eraambe inom, eerit nage inom, liippunuk, mugurok aret owak loonogo onggo ndak-ndak eeppigin o, yinuk, Naliku Nitok Minggirak an ALA nen aret yagi o,” yinuk, yo'negerak me, yokkigi o, yoreegirak.

¹⁵Aliku ALA nen an yo'nege logonet,

¹⁶“Aakumi nen ndarak yi wae. An nen ne ambit liingge aaninggin lombok ambi koba kwippagage logonet, at kiniki kunik lombok menggendak nogo aret waagin o. Wagangge neenok, kat nen at aleendawi piyangge, aleenggu maake, ndi, kenegen paga kale amburu wuppi wage, eeriyak mage o.

¹⁷Waminggirak kangge kenok, aleendawi tiyaniyak mage o. Ata, koone mbabok mban kiniki wakkolage logonet, kayum kanobak paga lenggenak mban wonage, kiyogogut yirik mban wonage, eerak logot o. Ketenggen nobakkolage, tabun ndoombunuk inambi larogo nunggwi nogo kat nengge, eeriyak mage o,” yinuk, an yo'nereegerak.

¹⁸Yo'nege mbareegi, kubondendok aakumi wone yorage nagagirik, oonikiya nakwe aret kambeegerak o. Kangge mbareegi, ko'lu kubondendok wone lengganogo yo'nereegerak nogo ndak-ndak aret eereegirak.

¹⁹Eeke mbareegi, it aakumi ti nen an yo'nogo logonet, “Kat eerit nage ti, nit eeppinaniyak wonage kagak eerukwak yo'niroorak lek mbaken?”

²⁰Yo'nogo mbareegwa, an nen it yorage logonet, “Aliku ALA nen kit aakumi Iterali mendek yokkiroorak yo'negerak nogo yi aret. At Aliku Itok Menggerak ALA nen ari logonet, Ninomaawi logorak alom yi aret o, yinuk, iniki ale'nggen kogwe, pekkogo logonet iniki aganggen kerek ari, iniki kundugu eekwi, eekwi an nawi wurik alik leenak nogo, an maluk eerogo pikit nduk eeke agarik o. Inapuri wologwe inom, komologwe inom, mbo piinok wogogwaarak nogo, wooluwak nen nagin me,

²²nengge kenok, kat Yetikiyen eeremenggendak nogo it ndak-ndak aret eeruwak o. Inetenggen nobakkologwe, it aakumi tabun ndoombunuk mbi larogo nunggwi nogo, it nunggwi, eerugwaarik o.

²³Inanobak paga yum lenggenak wonogwe, iniyogogut yirik wonogwe, eerak logonet, inaleendawi piyanggwi, inaleenggu maakwi, eerugwaarik o. Ata, it inomaluk onggo inoba piigwi paga ineebe woonoma eerogo piinet unggwage, it-it yogo logonet, Yi nonggop ee'ninake o? yinuk, yogwe, eeko logogun o.

²⁴Kat Yetikiyen ti, it eeriyak in wakkagak aret me kat eeremenggendak ndak-ndak it togop aret eeruwak o. Eekwi iinok, Naliku Nitok Minggirak ALA an aret ineenu arugun o, yinuk, yoraanu o,” yo'negerak me, yokkiragi o.

²⁵“Yoranu o,” yo'nege nagagerik, an yo'nege logonet, “Aakumi nen ndarak yi wae. It inom, inapuri wologwe komologwe inom, nen iniki kundugu eekwi, pekkogo logonet iniki aganggen kerek ari, iniki ale'nggen mbako logonet tiyappugwi, Ninomaawi logorak yi aret o, yinuk, yogwe, eekwi nogo, an nen lek eerogo pege eyom paga

²⁶aap ambi mbaganemenggerak nen ne ti eyom paga mban wone wonok kat yokkiri woraagin o.

²⁷Ti eyom paga koone ambinom yaga'lek logomunggun lek, koone paa'nage logonet, at wone yokkiri woramenggerak nogo, kimbirak wone mbanumunggun o. Ti eeremenggendak paga it aakumi in wakkagak aret arumunggun me, Naliku ALA an aret ineenu arugun o,” yinuk, an yo'negerak me, yokkiragi o, yoragagirak.