Read Western Dani Yetikiyen 25 Bible Online

Yetikiyen 25 - Western Dani bible

Yetikiyen 25

¹ At Aliku ALA nen an yo'nege logonet,

²“Aakumi nen ndarak yi wae. It o Amon wonogwe me, kena na'na'nuk, it eeppiyoorak nogo yorage logot o.

³Yorage logonet, Aliku Itok Menggerak ALA nen yegerak nogo kinaruk konenggo logonip o, yinuk, yorage logomenggendik, Aliku Itok Menggerak ALA nen yegerak nogo yi aret o. An nawi wurik alik leenak nogo maluk eerogo pugwi, it Iterali inanggween paga yi oone lek ndi oone lek logowak nduk, eerogo pugwi, ndi, it Yekura mendek keele maageren mbo piya nogwe, eekwi iinok, it nen, Kayik a! Op togon eeppiiga, yinuk, yereegwaarak me,

⁴an nen o Amon ti, it aakumi oonegen wundi wage menggim pa'nggwe wonogwe nogo nen unde eekkolaawak nduk, ineenggime pigin o. Ineenggime pege neenok, it nen aakumi Amon mendek inenggela'me time inawooliya inom, inawi inom, wuppatinuk wonogo logonet, it Amon mendek inageyo anggen mbanogo nunggwi, inaanggumi inelak amburu toologo nunggwi, eeko logogun o.

⁵An nen o kota Araba nogo ti, unta inagari'ngga mbanogo nenet nogo logowam eerogo pege, ndi, o Amon ti, kambin-ndomba inagari'ngga nenet nugu logomenggaarik, yonggonggologo logowam eerogo pege, eerigin o. Ti eeke neenok, it nen Naliku ALA an aret ineenu arugun,” yegerak o.

⁶Aliku Itok Menggerak ALA nen yegerak nogo yi aret. “O Iterali eeppugwi iinok, it o Amon mendek nen, Op togon eeppega, yinuk, iniki ale'nggen nen ineenggi telak eekwi, iniyok lubuk yogwe, eereegwaarak paga

⁷o Amon eeppuurak koonogo pigirak nogo yi aret o, yinuk, neenggi titik eeke neenok, it aakumi inanebunu lombok nen wogo logomenggaarik, o Amon maluk eerogo pugwi, o ti paga yi mendek ndi mendek wonage nogo kugun wonok nogwe, eerugun o. Yi aakumi ndi aakumi inenggela'me o ti, lek eerogo pege neenok, O Amon nogo yi aret o, yinuk, ambinom yogo logogun lek aret. An nen o Amon lek eerogo pege neenok, Naliku ALA an aret eenu arigin, yoret o,” yinuk, yo'negerak me, yokkiragi o, yoragagirak.

⁸ At Aliku Itok Menggerak ALA nen yegerak nogo yi aret. “O Mowap inom, Teyit inom, nen yogo logonet, It Yekura mendek ti, yi aakumi ndi aakumi ndak-ndak aret agaarak o, yinuk, yagaarak me,

⁹o Mowap anggween kuli pugu paga inawim nen unggwi worookwak kota-kota abu abe mondok iya omaawi wonage yogwe Mbet-Yetimot inom, Mba'an-Meyon inom, Kiriyatayim inom, nogo ti, aa'nduk tebenggola woraawak nduk, eerogo piyaagin o.

¹⁰Aakumi inanebunu Amon mendek yi aakumi ndi aakumi inenggela'me nen inendage aberak logorak lek nduk, an nen it aakumi oonegen wundi wage menggim pa'nggwe wonogwe nogo nen o Amon unde eekkolaawak nduk, ineenggime pege logonet, o Mowap inom aret wogoraagin o.

¹¹Wogorage logonet, it Mowap mendek inomaluk onggo inoba kwippiyaagin me, kwippiige neenok, Naliku ALA an aret ineenu arugun o,” yinuk, yegerak me, yokkiragi o, yoragagirak.

¹² Aliku Itok Menggerak ALA nen yegerak nogo yi aret. “It o Erom mendek nen it Yekura mendek inanini nen eeppiyareegwaarak paga maluk nggwok lombok eereegwaarak me,

¹³o Erom an nomaawi paga eeppege logonet, aakumi at paga wonogwe inom, inaanggumi inom, lek eerogo piige, yi oone ndi oone lek o wogo logowak nduk, eeppege, o Teman nen nok, o Nderan kuli wooluwak paga inoorak kambuwak nduk eeppiige, eerigin o, yinuk, Naliku Nitok Minggirak an ALA nen aret yagi o.

¹⁴It Erom mendek eereegwaarak paga nanini nen onggo eeppiyoorak mbake nogo, eeppiyaawak nduk, napuri Iterali inikime eeppiyaagin me, an nanini mbake, nanini kani kunik negen eeke, eeke nogo, it ndak-ndak eeppiinet nogo logogun o. An nanini nen onggo eeppiige minggirak nogo, it o Erom mendek ineenu arugun o,” yinuk, at Aliku Itok Menggerak ALA nen yegerak me, yagi o, yinuk, yoragagirak.

¹⁵ Aliku Itok Menggerak ALA nen yegerak nogo yi aret. “It Pilitin mendek nen yogo logonet, Iterali mendek ti, abu nineebi o, yinuk, inanini nen eereegwaarak onggo inookwi, ndi, O maan aa'nduk nen ninom wim mbanak yi aret o, yinuk, it Yekura mendek mondok pup eerogo piyoorak mbakwi, eekwi iinok,

¹⁶Naliku Nitok Minggirak an ALA nen eeppiyoorak ari nogo yi aret. It aakumi Pilitin mendek an nanini paga eeppiyoorak nduk eeke me, it aakumi Kereta mendek lek eerogo piige, ndi, it Pilitin mendek ando niyo laut aa'nggi paga wonogwe nogo, inenggaawak lek eerogo piige, eerigin o.

¹⁷Nanini nen eereegwaarak onggo eeppiyoorak mbake nogo, mondok alik lombok eeppiige, ndi, nanini kani kunik negen mi'nage logonet, eereegwaarak onggo inoba kwippiige, eerigin o. Nanini nen eereegwaarak onggo inoba piige neenok, Naliku ALA an aret ineenu arugun o,” yinuk, yegerak me, yagi o, yoragagirak.