Read Western Dani Yetikiyen 26 Bible Online

Yetikiyen 26 - Western Dani bible

Yetikiyen 26

¹ Wo'niren pinani wogogwaarak wonogwe niigak, tahun 10 eeppunuk, ambi eerak tut awo penenak tanggal 1 tut ti paga Aliku ALA nen an yo'nege logonet,

²“Aakumi nen ndarak yi wae. O kota Tirut nen o Yerutalem abok mbangge logonet, Yi aakumi ndi aakumi yinggwi-unggwogwe eeko menggam kota Yerutalem ti, abu yigirik-noonom agaarak wonage me, yogondak tu an paga wogo logogun o. At yinik-minik eerak wonage kagak, an perak, iya lombok arigin o, yinuk, yereegerak me,

³at kota Tirut ti, iniki koongge nogo, an nen lek eerogo pigin o, yinuk, Naliku Nitok Minggirak an ALA nen aret yagi o. Niyo laut kilaarak-mogonik eeke menggi kwak, yi aakumi ndi aakumi nen at tebenogo pi wagak eeko logowak nduk, yoraagin o.

⁴Yorage neenok, nogo logomenggaarik, o Tirut yugum pak wurik nogo pup eerogo pugwi, nggayo logorak o yerek-nggorek wurik nogo yigirik-noonom eerogo pugwi, eerugun o. Eekwi iinok, yigirogo pugu nogo an nen abu mbilik-mbelek eerogo mbo nappege logominggirik, yugum eerilek tabak ndoonak kwak eerogo teppigin o.

⁵O Tirut ogobak mbanik laut inikime wonage me, yikwe yonggoka yum yugu wolonogo pogo logowam aret arigin o, yinuk, Naliku Nitok Minggirak an ALA nen aret yagarak me togop aret arigin o. O Tirut ti, yi aakumi ndi aakumi nen kugun kologo logowam inake aret age,

⁶ndi, at aagalogwe negen yi yaga'lelo ndi yaga'lelo o nggwok nenaarak niyo aa'nggi paga wonogwe nogo, wooluwak nen nenet nage, eeke logogin o. Ti eeke kenok, Naliku ALA an aret it Tirut mendek ineenu arugun o,” yinuk, yegerak o.

⁷At Aliku Itok Menggerak ALA nen wone ambi yegerak nogo yi aret. “Aap inendagembogut abok aret inowe endagembogut o Mbaben mendek Nebukanetat nogo nen kuda paga inom, nggweendo wim eeka paga inom, it kuda paga nega inom, aap ineegin warak nggwok aago inom, o omarip paga pa'nggwe nen o Tirut tebeni woraawak nduk, nappiya woraagin o.

⁸Wogo logomenggaarik, at Tirut aagalogwe negen yi yaga'lelo ndi yaga'lelo o nggwok nenaarak niyo aa'nggi paga wonogwe nogo, inawooluwak paga inoorogo piinet nogwe, oonda mbani ungguwok nduk eyo lumbit nogwe, nggween kabunogo pit laganggwi, Ninawim o, yinuk, inanggeemu yikkologwe, eeruwak nduk, awuri yoraagin o.

⁹O kota Tirut yugum pak wurik langguk yuwak nduk, eyo mbanak paga, Yime punggogwe, time punggogwe, ee'nip o, yinuk, yorage, at ambuti tegewa paga nggayo logorak wurik nogo langgunogo wurake, eerigin o.

¹⁰At aguda ambik lombok me, iniyok pit nogo logonet, aagi paga o ti abok liirubu aagi lenggenogo pit nage, it aap wim eeka nen pak wurik eno pelenak me kota unggwogo mengga kwak, at Nebukanetat nen kota Tirut tu unggwogo menggam unggwi nage kenok, wim namburiyak kuda paga kwi'naga inom, nggweendo wim eeka inom, nggweendo ugun mendek inom, nggele'mbuk-nggele'mbak agan nogwe paga yugum pak wurik nogo nuk-nuk ari, eerigin o.

¹¹O kota yiru-ndiru time at aguda ambik aago iniyok paga aambiranogo pit nogwe, o kota aagalogwe negen aakumi nogo wooluwak paga inoorogo pit nogwe, eeko nogogwaarak abekak yugum abe paga wurik nogo langgunogo pit nogwe,

¹²O Tirut paga yi mendek ndi mendek kugun wonok nogwe, yi mendek ndi mendek kungge menggerak wonage nogo, wonok ndi yogwe, eeko logonet, obak wurik yinik-minik eerogo pugwi, aakumi inawi abe ambik wurik o kota inikime wonage nogo, yinik-minik eerogo pugwi, eeppunuk, ayugum inom, ageyo inom, anggween mbo pugu inom, waganogo niyo laut inikime mbo nappugun o.

¹³ O kota time inale'nggen nen ndawi warit nogo logonet, noone-koone yogwe, nggitat oone eerit nogwe, eekwi nogo an nen lek eerogo pigin me, ambinom inaruk konenggo logogun lek o.

¹⁴An nen o kota ti, yugum tabak eerilek ndoonak kwak eerogo pege, yum yikwe yonggoka wolombogo logowam eerogo pege, eerigin me, obaane'me wurogo pugun mondok lek aret o, yinuk, Naliku ALA nen aret yagarak me, eerigin o,” yinuk, Aliku Itok Menggerak ALA nen aret yegerak me, kat o Tirut aret yokkigi o.

¹⁵Aliku Itok Menggerak ALA nen wone ambi o Tirut yoriyak yo'negerak nogo yi aret. “O Tirut tebenogo pit unggwogo logonet, kota enggela'me time aakumi inoorit nogwe inoone ya-kwa yogwe, aakumi inoorak iniki oone agan nogwe, eekwi konenggo logonet, it o nggwok nenaarak niyo aa'nggi paga wonogwe nogo, inaganak warugun lek mbaken?

¹⁶ O Tirut eeppege neenok, it niyo aa'nggi paga wonogwe inoweewi nagawan-nagawan nen it wone lengganogo yorogo menggam mbo pugwi, inendagembogut logonet inayum nggorek yiko menggaarak nogo nggoorogo pugwi, inayum yabenggek aago nogo nggoorogo pugwi, eerugun o. Eeppunuk, inamineeri ne agan nage kagak nggween paga kwi'na'nuk, inaganak wako logonet, O kota Tirut eekerak ti iya! yinuk, ineenggi ineyak tikkologo logogun o.

¹⁷Tikkologo logomenggaarik, ale yogo logonet, o kota Tirut ndawi paga anep pugun nogo yi aret. O kota kendage mondok wigak yereegerak niyo laut inikime lek agandak yi, iya! Kat inom, kat piirogo menggendak inom, niyo laut paga eeka unde wonogwe kiigak, Yi aakumi ndi aakumi o nggwok nenaarak niyo aa'nggi paga wonogwe kinayuk nen inaganak wako nogogwaarak o.

¹⁸Ndi, o yogondak perak, kendage lek age paga it o nggwok nenaarak niyo aa'nggi paga wonogwe nogo inaganak nugiranet nage, Ndi, it nggween ogobak mbanik paga wonogwe nogo nen keebe lek agandak konembunuk, inamineeri ne agan nage, Eereegerak o, yinuk, yogo logogun,” yegerak o.

¹⁹At Aliku Itok Menggerak ALA nen yegerak nogo yi aret. “Yi kota ndi kota aakumi wonogolik kwak, an nen o kota Tirut yi oone lek ndi oone lek o wogo eerogo pege, niyo laut kilanogo oba kwippege, niyo wurik at oba taanogo pi wage, eeke neenok,

²⁰yi aap ndi aap o maan aa'nduk togon mbuun ambena wambit nogogwaarak wonogwe me, inom logowak nduk wuppigin o. O maan aa'nduk togon yigirik-noonom eerogo pereegerak nggween abena lombok wonage kwak, at nggween inikime lombok time inaa'nduk kambeegwaarak mbuun ambena wonogwe me, inom logowak nduk, wuppigin o. Time nen lagi wage, aakumi ineenik wonogo menggam obaane'me ari wage, eerigin lek aret o.

²¹ At wonage logorak kuli irip paga inamineeri ne agan noorak mendek eerogo pigin me, eebe lek aret kaagun o. Eebe kwaarit namenggaarak kwe, eebe mondok-mondok lek aret kaagun o,” yinuk, Aliku Itok Menggerak ALA nen aret yegerak me, kat o Tirut aret yokkigi o, yinuk, yoreegirak.