Read Western Dani Yetikiyen 27 Bible Online

Yetikiyen 27 - Western Dani bible

Yetikiyen 27

¹At Aliku ALA nen wone an yo'nege logonet,

²“Aakumi nen ndarak yi wae. O Tirut eeppuurak nogo, leendawi ambi tiyangge logot o.

³Yi aakumi ndi aakumi o niyo laut aa'nggi paga menggaarak inake yi mendek ndi mendek kunit nege, niyo laut paga yinggwi-unggwogwe eeko menggam wonage, eeke menggerak o Tirut ti, yoru o, yinuk, Aliku Itok Menggerak ALA nen yegerak nogo yi aret o. O Tirut nen, An yiiro kwak abu kigirikwe lombok wonage o, yinuk, yikkolage agaarik o.

⁴At unde logonet nege menggim ti, niyo laut oolo time aret wonage o. Aap yiiro ogobakkigika abu ineenu nen at abu kigirikwe lombok ogobakkigirogo pogo logonet,

⁵Eyo kilu-kilu puut Keremon poorak eebe paga ogobakkigirogo pugwi, Eyo nggabina o Libanon mendek paga o wiya nen wonok negak yum tugunggak mippugwi,

⁶Eyo teno o Mbatan mendek paga niyo alelo mbanggak tabonogo pugwi, Eyo ndiindi o Kitim ogobak mbanik aa'nggi paga nen at andik ndoonogo punuk, gajah eyak enggela'me nabenogo pit nogwe,

⁷Yugum abu yawenak yabenggek-ndabenggek eerak o Metit mendek paga o wiya nen wonok negak yum nogo pugunogo pugwi, Yum tugunik ti paga, At ti mendek o, yinuk, ineenu agak eerogo pugwi, O Elita ogobak mbanik aa'nggi paga nen yum tabak maa'ngga kunik inom, maa'ngga anggup kunik inom, mo andi wake kero, oo'ngget kwak maarogo pugwi, Eereegwaarak o.

⁸Aap Tiron mendek inom, Arawat mendek inom, nen at eebe niyo alelo mbanggwi, At nage kagak, aap at aagalogwe lombok ineenu nen ndegenggwi,

⁹Maluk age kero, ogobakkigika aap pambanak abu ineenu o Nggeban mendek inom yiiro at paga wonogwe, Eeko logonet, Amindik-amendek wonok nogwe me, kunuwok nduk, Yi yiiro ndi yiiro niyo laut paga nugwi it ndegeninaka inom abok aret at oba nabennari wagak eeko nogogwaarak o.

¹⁰It aap o Peritiya mendek inom, Lut mendek inom, Put mendek inom, nen at awuri ineegin warak awim eeka ogwe, Inanggeemu inom, inabetagi omaawi mendek inom, at agobat nabenak paga tugunik-taganik eerogo pegaarak wonage kenok, Aakumi nen, Wi! yinuk, tiyappugwi,

¹¹It aap Arawat mendek inom, at awuri ineegin warak inom, nen at awe aago yendok-wandok arum wakwi, It aap o Nggamat mendek nen inigen logorak tiyarogon wurik paga ari laganggwi, Eeko logonet, Eebe abu kigirikwe lombok wonage kwe, it inanggeemu at agobat nabenak paga abu li'luk eerogo tugunogo pit nagaarak me, Abunuk kigirikwe alik lombok agaarak wonage o.

¹²At amindik-amendek ambik wonage kenok, it Taritit mendek nen at inom onggo-onggo eeko logonet, it inamendek mbuti perak inom, mbuti owak inom, mbuti timah abinak warak inom, mili inom, wonok at ayigirak-ndigirak wonage nogo kunggola wogwe,

¹³It Yawan mendek inom, Tuban mendek inom, Metek mendek inom, nen inom inamendek onggo-onggo eeko logonet, amendek kolaawok nduk, inayeloman mini waganogo at wogogwi iinok, inamendek mbuti tembaga paga ogobakkigirik nogo waganggwi,

¹⁴It aap Mbet-Togarama mendek nen amindik-amendek kolaawok nduk, nggweendo nikkenok nega kuda inom, kwi'na'nuk wim eeka kuda inom, yi mendek ndi mendek wonok nega keledai inom, wogogwi,

¹⁵It aap o Ororut mendek nen at inom onggo-onggo eekwi, it aakumi ambik o niyo aa'nggi paga wonogwe nen amendek kunggolagak mendek ogwe, eeko logonet, gajah eyak inom, eyo amu kunik inom, wonok at amendek onggo mbanggola wogwe,

¹⁶It Erom mendek nen at amendek ambik wonage kenok, inamendek paga onggo-onggo eeko logonet, it inamendek yugum etenggen kere'li-kere'lo eerak inamiya negen inom, yum maa'ngga kunik inom, yum yabenggek-ndabenggek eerak inom, yum abu yawenak mendek inom, yugum moolingget negen inom, yugum yebibit negen inom, nogo paga amendek onggo mbanggologwe,

¹⁷It Yekura mendek kunduk, it Iterali mendek kunduk, nen at inom inamendek onggo-onggo eeko logonet, gandum o Minit mendek inom, yibinggami inom, nggiin amburu inom, tayitun amburu inom, obari abe kaga inom, paga nen amendek onggo mbanggologwe,

¹⁸At yi mendek ndi mendek ambik lombok eerogo pit nage, amendek etenggen alik-alik lombok wonage, eerak kenok, it Ndamitik mendek nen inom onggo-onggo eeko logonet, anggur amburu o Kelebon mendek inom, ndomba eeruwak o Takat mendek inom, wonok at oba kuni wogwe,

¹⁹It Weran mendek inom, Yawan mendek inom, nen at amendek onggo-onggo eeko logonet, inamendek mbuti paga yi mendek ndi mendek ogobakkigirik inom, ombat abe eeka anggen inom, en inom, nogo paga amendek onggo kunggola wogwe,

²⁰It Nderan mendek nen kuda amborowak paga ndoombunuk, kwi'nagak eerak nogo paga at inom onggo-onggo eekwi,

²¹It Arap mendek inom, aap inoweewi nagawan-nagawan o Kerat mendek abok aret inom, nen amendek kunggolagak a'nuk, inom onggo-onggo eeko logonet, ndomba aagalogwe inom, ndomba ngguunok inom, kambin ngguunok inom, ti paga amendek kunggola wogwe,

²²It Tiyeba mendek inom, Arayema mendek inom, at inom onggo-onggo eeko logonet, yi mendek ndi mendek ombat abe eeka abu abe lombok inom, yugum kere'li-kere'lo eerak enete alik-alik onggo iya nogo inom, mbuti emas inom, nogo paga amendek onggo kunggola wogwe,

²³It Karan mendek inom, Kane mendek inom, Eren mendek inom, yi mendek ndi mendek onggo kunit nugwi it Tiyeba mendek inom, Atiyut mendek inom, Kilimat mendek inom, nen at inom onggo-onggo eeri wogo logonet,

²⁴it inamendek yum yerek-nggorek abu kigirikwe lombok inom, yugum maa'ngga amu kunik inom, yum yabenggek-ndabenggek eerak inom, yum ndoombunuk kwi'nagak yabenggek-ndabenggek eerak oragik omaawi yugu inom, at yi mendek ndi mendek kungge logonet, kungge menggim nogome kunggologwe, eeko nogogwaarak.

²⁵ Yiiro o Taritit mendek nen at amindik-amendek kunggolaawak nduk, yi o ndi o wonok nugwi, Niyo laut oolo time amindik-amendek wonok nugwi aaninggin nen tebeninuk, wangge kagak nugwi,

²⁶It at eebe alelo mbangga nen niyo laut nggwok oolo kilaarak-mogonik eeke menggim taati wonok nugwi, Eekwi iigak kwe, O wiya oonegen wundi wage menggim nen oonebu wage logonet, niyo laut oolo taati kalenak-pugunik eerogo pigin o.

²⁷At ayigirak-ndigirak iniki kundugu inom, amindik-amendek kungge menggerak inom, amendek onggo-onggo eeke menggerak inom, It yiiro ndegengga inom, eebe wonok nega inom, maluk age kenok ogobakkigika inom, Amindik-amendek kunit nega inom, at arum waka ineegin warak inom, aakumi wogoren nage abok aret inom, At eebe kalenak-pugunik eerogo pege ne ti paga aret niyo laut inikime tebeninabigin o.

²⁸It at eebe wonok nega tebeninake kagak Inoone ya-kwa yogwe it endekem niyo aa'nggi paga wonogwe nogo konenggo logonet, inaganak warugun o.

²⁹It yi yiiro ndi yiiro alelo mbangga abok aret At niyo laut inikime wambit nage inigen kogo logonet, inayiiro mbo pugwi, It wonok nega nogo inom, it at ndegengga abok aret inom, nen yi laut aa'nggi paga mi'nari na'nuk,

³⁰Inoone nggwok paga le yogwe, Yi eekerak nineebi o, yinuk, yogwe, Liirubu inanobak paga yumbunogo pakwi, wun inikime nden-wan yogwe,

³¹At eeremenggerak paga it inanobak puluk ko eerogo pakwi, Yum maluk nibinik mendek yikkologwe, Eeppunuk, At eeremenggerak paga iniki puru yogo logonet, aleenggu maakwi, Leendawi aanggili-aanggelo yogwe, eerugun o.

³²At eeremenggerak paga it nen ale yogwe, aleenggu maakwi, Eeko logonet, Aleendawi paga anep pugun nogo yi aret. O kota Tirut ti, ogobak mbanik niyo laut oolo wonage kagak oone lek agaarak kokwak, Kota ambi o nggeeme oone togop lek agagerak mbakop?

³³Amindik-amendek kunuwak nduk, niyo laut paga wonok nugwi iinok, Yi aakumi ndi aakumi kunggologo nagaatik, Op kunggologo, yinuk, iniki kwi'nage, Amendek ambik lombok iniki kundugu nogo wonok nege, Amendek onggo kunit nege, eeke paga aap inendagembogut o nggween paga wonogwe nogo ineenggi warak eeppiinet nage, Eeke nagagerak o.

³⁴Eeke nagagerak kwe, yogondak perak, niyo laut nen kalenak-pugunik eerogo pege, Yi laut kiiniki lombok tebenogo pi wangge, Eeke logonet, Yi mendek ndi mendek kunit nege inom, it aakumi at inikime yonggolak wonogwe inom, Abok aret tebenogo piigerak o.

³⁵It aakumi niyo aa'nggi paga wonogwe abok aret inigen kenok inogut nage, It aap inendagembogut nen inamineeri ne agan nage logonet, inenete omoogi lu eerogo piige, eeke agaarik o.

³⁶At eeppuurak age yobok ari wagaarak kenok eeke, At enggaawak mondok-mondok lek eerogo pege, Eekerak ti iya me, It aap yi mendek ndi mendek kunit nega yi aakumi ndi aakumi inenggela'me wonogwe nogo nen, Nit togop ee'ninabukwak me iya! yinuk, iya'uwa yogo logogun o, yinuk, ndawi paga o Tirut eeppuurak anep pugun nogo ti aret,” yegerak me, yagi o, yoreegirak.