Read Western Dani Yetikiyen 29 Bible Online

Yetikiyen 29 - Western Dani bible

Yetikiyen 29

¹Mbo pinani wogogwaarak wonogwe niigak, tahun 9 eeppunuk, ambi eerak tut 9 penembunuk, ambi penenak tanggal 12 tut ti paga aret at Aliku ALA nen an yo'nege logonet,

²“Aakumi nen ndarak yi wae. Kat kena aap Metit mendek inowe endagembogut Pirawun wonage me na'na'nuk, at inom, it o Metit mendek abok aret inom, eeppiyoorak wone yoret o.

³Aliku Itok Menggerak ALA nen yegerak nogo yi o, yinuk, yoroorak nogo yi aret o. O Metit niyo nage elaganggen inikime time waalo kole ndenen wappunuk wonage kwak, Aap o Metit mendek inowe endagembogut Pirawun ti, nimbirak ogoorak aret agarik o. At nen ari logonet, Niyo Nin nogo ti, nage logorak an nen aret eerogo pateegirak me, Niyo ti, an namendek aret o, yinuk, yereegerak kwe,

⁴An nen at ondogowak paga keele nggelenogo pege, Niyo elaganggen at unde menggim yikwe wonogwe nogo At arinon paga nabek yi ungguwak nduk koonogo pege, Eeppunuk, At niyo elaganggen unde menggim nogome nen yikwe nogo waalo arinon paga nabenak kagak nigogo wumbigin o.

⁵Nigogo wumbunuk, at eebe inom, at niyo elaganggen unde menggim yikwe abok at arinon paga nabenak nogo inom, O karume mbo nappigin o. Mbo nappiminggirak o karume time ngginnarit namenggaarak me, aakumi nen ineebe kuwak eerogo piigwi, Inagabolo nggween taanogo piigwi, eerugun lek, it ndiimbu-nggwiya inom, yirowe ndirowe wiga agan nugu menggaarak inom, Inambi-mbiingga aruwak nduk, wogoraagin o.

⁶ Ti eeke neenok, it aakumi o Metit wonogwe abok aret Naliku ALA an aret ineenu arugun o. At ti, it Iterali mendek inowaanggun longgop kwak aret o.

⁷Ineenggime wonok nogwe me, nggoguk togon inane'nggen me nonggo-nonggo nage, ineebe longgop ti paga panggombegak nogwe me, kalok togon inamborowak kalok ari, eeke nagagerak,” yegerak o.

⁸Togop aret me, at Aliku Itok Menggerak ALA nen yegerak nogo yi aret. “Wooluwak wonok at owagam nawak nduk, nappiyaminggirak nogo logomenggaarik, awuri inom, inaanggumi inom, lek eerogo piyaagun o.

⁹Lek eerogo piigwi iinok, o Metit ti, yi oone lek ndi oone lek karume aret arigin o. Ti age kenok, Naliku ALA an aret ineenu arugun o. At nogo nen ari logonet, Niyo Nin nage logorak ti, an nen aret eerogo pereegirak me, niyo ti, an namendek aret o, yinuk, yereegerak ti paga

¹⁰at inom, at niyo elaganggen unde menggim inom, an neebi nen o Metit maluk eerogo pege, ndi, o Migiron panggombunuk, nok, o nggween Kuti kuli mbanak paga o Tiyene kuli aret yi oone lek ndi oone lek o karume eerogo pege, eerigin o.

¹¹Aakumi ambiriluk ambi tu ti paga nogwe, inaanggumi kunduk tu ti paga nogwe, eeko logogun lek o. Nggween ti paga aakumi ambiriluk ambi ye mbambatinuk wonogwe lek iigak, tahun 40 aret eerigin o.

¹²Yi o ndi o maluk eerogo pit nogogwaarak enggela'me o Metit ti perak, abunuk abu maluk yi oone lek ndi oone lek o wogo aret arigin o. Yi kota ndi kota yigirik-noonom eerogo pit nogogwaarak enggela'me o Metit kota-kota ti perak, abunuk abu maluk yi oone lek ndi oone lek eerogo piminggirak wonage kagak, tahun 40 aret eerigin o. Ndi, it aakumi o Metit mendek ti, waganogo yi aakumi ndi aakumi inenggela'me nappiige, yi o ndi o abok aret mak eerogo piige, eerigin o,” yinuk, yegerak.

¹³Togop eerigin kwe, Aliku Itok Menggerak ALA nen yegerak nogo yi aret. “Tahun 40 eeppunuk, an nen it aakumi o Metit mendek yi aakumi ndi aakumi inenggela'me mak eerogo piyaminggirak nogo, kuwak eerogo piya woraagin o.

¹⁴Kuwak eerogo piya wa'nuk, o Metit aa'nduk wonagagi kwak eerogo pege logonet, iniyokan inawi alom paga o Patarot piya woraminggirak inowe endagembogut nen abu'me piinok wonage kagak, it inendage ambi yogo logogun lek aret o.

¹⁵Yi aakumi ndi aakumi inabu'me piinok menggam inenggela'me time at endage lek abu tebenak wonage logonet, yi aakumi ndi aakumi inendage tiyanak kagak it inirimbaga at endage ambi tiyappake logogin lek o. Aa'nduk yi aakumi ndi aakumi inabu'me piinok, wone lengganogo yorage nagagerak kokwak, peebi togop aret yorage logokwak, an nen at endage lek eerogo pege logogin o.

¹⁶Ti eerogo pege neenok, it aakumi Iterali nen o Metit ambinom iniki panggombogo logogun lek aret. O Metit mendek nen yeenggwa niraawak o, yinuk, it Iterali nen it Metit mendek yorogogwaarak paga maluk eereegwaarak nogo it abekak aret logogun o. Ti age kenok, it Metit mendek nen Naliku Nitok Minggirak ALA an aret ineenu arugun o,” yinuk, yo'negerak me, wone yi abok aret kit Metit mendek yokkiragi o, yinuk, yoragagirak.

¹⁷Mbo pinani wogogwaarak wonogwe niigak, tahun 26 eeppunuk, ambi eerak tut iyaalok penenak tanggal 1 tut ti paga Aliku ALA nen an yo'nege logonet,

¹⁸“Aakumi nen ndarak yi wae. It Mbaben mendek inowe endagembogut Nebukanetat nen o Tirut oonda mbani unggwikit nduk, eeke logonet, awuri ineegin warak oone omaawi paga lengganogo yorage kenok, eerit nogo logonet, ineeruwak wuro-wuro nage, inuum mbela-mbela nage, ineenggi penagap ndarogo pege, eereegerak kwe, o Tirut tebenogo pikit nduk awuri yoragagerak eereegwaarak nogo at inom, at awuri inom, onggo kolaga'lek aret wonogwe iigirak o,” yinuk, yegerak.

¹⁹Togop me, Aliku Itok Menggerak ALA nen yegerak nogo yi aret. “An nen o Metit ti, it Mbaben mendek inowe endagembogut Nebukanetat wogorigin o. Wogoge neenok, inamindik-inamendek time wonage nogo abok aret kabelogo wagangge, at awuri ineegin warak eeremenggaarak onggo eeppiyoorak nduk, iname unggunuk inamendek kologwe, yi mendek ndi mendek o time wonage nogo kugun waganggwi, eerugun o.

²⁰At inom, awuri ineegin warak inom, eeriyak an nen inikime mambege mbaremenggi, eeremenggaarak me, at eerit namenggerak nogo, onggo o Metit aret eenggime pigin o,” yinuk, Aliku Itok Menggerak ALA nen aret yo'nereegerak.

²¹“Ne ti eyom paga an nen it Iterali inomaawi arit nage logowak nduk, eerogo piige, ndi, kat inenggela'me nen wone yorage keenok, Abet aret yo'nirage kogo o, yinuk, konenggo logowak nduk, eerogo pagage, eerigin o. Ti eeppagage neenok, Naliku ALA an aret ineenu arugun o,” yinuk, yegerak me, an yo'nereegerak.