Read Western Dani Yetikiyen 30 Bible Online

Yetikiyen 30 - Western Dani bible

Yetikiyen 30

¹At Aliku ALA nen an yo'nege logonet,

²“Aakumi nen ndarak yi wae. Aliku Itok Menggerak ALA nen eeriyak yegerak nogo yi o, yinuk, yoroorak yegerak nogo yi aret. Ne ti paga eeriyak nogo ari wage, Aliku ALA nen eeppiya woroorak eyom abu panggoni wage, Eekerak me, Ne ti abu ari wagaarak me, iya, yinuk, leenggu maako logowak o. Ne ti paga ndugwi yumaak eerogo pi wage, Ti eyom paga yi aakumi ndi aakumi aaninggin inoba kwi'nari wage, Eerigin o.

⁴O Metit time wooluwak paga inoori unggwi nogwe, O Kuti time inookwi iinok, iniki wakkologwe, O Metit time inooremenggaarak kambit nogwe iigak, inamindik-inamendek kugun wonok nogwe, Inawi eyak wurabak nogo langgunogo pit nogwe, Eerugun o.

⁵Wooluwak nen it Metit mendek ineebe nenet nage logonet, it Kuti mendek inom, Put mendek inom, Lut mendek inom, o Arap mendek abok aret inom, Libiya mendek inom, ndi, it aakumi Ala nen, Kinanggween wokkiraagin o, yinuk, yoragagerak inom wone koonogo pereegwaarak nogo inom, it abok aret wooluwak nen nenet nage logogin,” yegerak o.

⁶At Aliku ALA nen yegerak nogo yi aret. “Aakumi it Metit mendek inom ogogwaarak nogo inoorak kanggwi, It Metit mendek nen, Ninomaawi ambik o, yinuk, iniki wogoppakwi nogo tebenogo piigwi, It o Migiron nen nok, o Tiyene kuli wonogwe nogo wooluwak paga inoorak kanggwi, Eerugun o,” yinuk, Aliku Itok Menggerak ALA nen aret yegerak.

⁷“Yi o ndi o, yi oone lek ndi oone lek agagerak wonage nogo, at ndak-ndak yi oone lek ndi oone lek age, Yi kota ndi kota abu yigirik-noonom eerogo pereegwaarak nogo ndak-ndak, o Metit mendek inawi kota-kota nogo togop aret yigirik-noonom nage, Eerigin o.

⁸An nen o Metit kani piminggirak nenet nage logonet, It aakumi o Metit yeenggwaareegwaarak nogo inom aret lek eerogo nengge kenok, Naliku ALA an aret ineenu arugun o.

⁹Ne ti eyom paga it o Kuti mendek iniki ugun ale'nggen wonogwe me, inogut nggigik yuwak nduk, it aap an nappiyaminggirak yiiro paga mbet-mbet nogo logomenggaarik, O Metit ndogop eeri woraagun o, yinuk, yoraagun o. Yoramenggaarak eeppiyoorak ne nogo ti, abet aret ari woraagin me, ari wage kenok, Iya! yinuk, iniki ma'narigin,” yegerak o.

¹⁰At Aliku Itok Menggerak ALA nen yegerak nogo yi aret. “It Mbaben mendek inowe endagembogut Nebukanetat nen it Metit mendek ineebe ambik lombok wonogwe nogo, Lek eerogo piya nawak nduk, an nen inikime eeppigin o.

¹¹Eeppege neenok, it yi aakumi ndi aakumi inanini ambik wonogwe iigak kwe, At Nebukanetat awuri ineegin warak inom inanini ambik lombok me, o Metit pup eerogo puwak nduk, An nen wogoren piya naminggirak o Metit tebenogo pogo logonet, Inawooluwak paga inooremenggaarak o Metit nggween enete mondok lek aret arigin o.

¹²An nen niyo Nin elaganggen wage nogo, poronogo pege, Nggween ti, it aap maluk mendek ineenggime pege, Ndi, nggween inom, nggween ti paga wonage abok aret inom, pup eerogo punuk, o wogo logowak nduk, Aap inambik ineenggime pege, Eerigin o, yinuk, Naliku ALA an nen aret yagi,” yegerak o.

¹³At Aliku Itok Menggerak ALA nen yegerak nogo yi aret. “O Metit time inagugiwak pup eerogo pege, O Membit time inagugi ogut aago nogo lek eerogo pege, Eerigin o, O Metit time aap inowe endagembogut ambinom logogin lek me, Aakumi o time inagabiti mbakak nugu logowak nduk, eerogo piige,

¹⁴O Patarot yi oone lek ndi oone lek o wogo aret eerogo pege, O Towan kani pege, o Tebe inomaluk onggo inoba kwippiige,

¹⁵O Metit tebeni unggwogwe iyo, kota omaawi eeppunuk menggerak Tin nogo, nanini nggwik togon oba kwippege, Aakumi ambik lombok o Tebe wonogwe nogo, ineebe lek eerogo piige,

¹⁶O Metit kani mbelanogo pege, Eerigin o. It o Tin mendek yagan yobak-nggolak waruwak nduk, eeppiigwi, O Tebe pak wurik yinik-minik eerogo punuk, ineebe ambik aago tebenggola unggwogwe, It Membit mendek nen ko'lu-kii'me aaninggin-paaninggin inoba age kogwe,

¹⁷Aap tawe o On mendek inom, o Pi-Mbetet mendek inom, wooluwak nen namenggerak kambit nogwe, It kumi kugun wogoren nogwe, Eerugun o.

¹⁸Eyo aaninggin tapi inuut paga pugu kalenogo mbo pogo mengga kwak, It o Metit mendek inomaawi wonogwe nogo, lek eerogo piige ne ti eyom paga kota Tapanaket yumaak eerogo pigin o. Ninomaawi ambik aret o, yinuk, iniki wogoppakwi nogo, o time nen age yobok togon lek aret arigin me, O kota ti, ndugwi nen lenggenogo pege kagak, At aagalogwe nogo kugun wogoren woraagun o.

¹⁹It Metit mendek inomaluk onggo inoba kwippiyaagin me, kwippiige neenok, Naliku ALA an aret ineenu arugun,” yegerak me, yokkiragi o, yinuk, yoragagirak.

²⁰Mbo pinani wogogwaarak wonogwe niigak, tahun 10 eeppunuk, ambi eerak tut iyaalok penenak tanggal 7 tut ti paga Aliku ALA nen an yo'nege logonet,

²¹“Aakumi nen ndarak yi wae. An nen it Metit mendek inowe endagembogut Pirawun eenggi omaawi wonage nogo kalenogo pigirak me, eenggi nogo omaawi eeppunuk, wooluwak ambinom wonok nege logokwak, an nen obeelom aruwak nduk, nggerenogo pege, eyo mbanak nabenogo punuk, keele maake, eeka'lek aret agarik o,” yinuk, yegerak o.

²²Togop aret me, Aliku Itok Menggerak ALA nen yegerak nogo yi aret. “It Metit mendek inowe endagembogut Pirawun ti, an nimbirak ogoorak aret me, eenggi peenok awo omaawi lek kalenak kagak peenok omaawi wonage nogo, kalenogo pege neenok, imbirak kalenak me, wooluwak at eenggime wonok nege nogo ndik togon wambigin o.

²³An nen it Metit mendek ti, yi aakumi ndi aakumi inenggela'me nappiige, yi o ndi o abok aret mak eerogo piige, eerigin o.

²⁴It Mbaben mendek inowe endagembogut eenggi imbirak omaawi eerogo pege, nawooluwak at eenggime pege, eerigin kwe, at Pirawun perak, eenggi imbirak kalenogo pigin me, at Nebukanetat owagam ta logonet, inoorak iniki ngguluk yogo mengga kwak, at togop aret ari logogin o.

²⁵It Mbaben mendek inowe endagembogut eenggi omaawi eerogo pigin kwe, at aap Pirawun perak, eenggi kalenogo piminggirak tanep nduk yigin o. Nawooluwak it Mbaben mendek inowe endagembogut eenggime piminggirak o Metit tebeni unggwage logonet, nutik nage kenok, Naliku ALA an aret ineenu arugun o.

²⁶It Metit mendek ti, yi aakumi ndi aakumi inenggela'me nappiige, yi o ndi o abok aret mak eerogo piige, eeke neenok, it Metit mendek nen Naliku ALA an aret ineenu arugun o,” yinuk, an yo'nereegerak.