Read Western Dani Yetikiyen 32 Bible Online

Yetikiyen 32 - Western Dani bible

Yetikiyen 32

¹Mbo pinani wogogwaarak wonogwe niigak, tahun 11 abu eeppunuk, ambi eerak tut 11 penembunuk, ambi penenak tanggal 1 tut ti paga Aliku ALA nen an yo'nege logonet,

²“Aakumi nen ndarak yi wae. It Metit mendek inowe endagembogut Pirawun eeppuurak nogo paga aleendawi tiyangge logonet, yoriyak nogo yi aret. At yi aakumi ndi aakumi inenggela'me singa kwak wonage agaarik o. At niyo laut inikime waalo kole anini warak logonet, at wonage menggim niyo nage nogo inikime lagak-mbagak ari, Iyok paga niyo kilaarogo nippit wage, Niyo nggut eerogo pit wage, Eeke menggi kwak eeke agaarik o,” yinuk, yegerak o.

³Aliku Itok Menggerak ALA nen yegerak nogo yi aret. “At eebe yonggo'naruwak nduk, Yi aakumi ndi aakumi ambik kuwak aago ninom nen yikwe yonggokak nayum mbiganogo oba nappumonggoorak yonggo'nage kenok, Nigogo niyo ambet paga wumbi woraagun o.

⁴Wumbi wogo logomonggoorik, nggween paga kilirogo wuppunuk, endekem time mbo tek eerogo wumbege neenok, Towe wiga agan nugu menggaarak abok aret nen at eebe paga nagabi wogwe, Nggween paga nugu menggaarak ndiimbu-nggwiya abok aret nen inaanogum palek togon na wogwe, eeruwak nduk, Eeppiyaagin o.

⁵Puut-puut time enggaanggum yumbunogo nappit nage, O kobappaga time owak nenenak mban yagabit eerogo pege,

⁶Amiya kiliriminggirak nggween miin lombok eerogo pit nage logonet, puut-puut inom miin eerogo pit nage, Puut nggelok-nggobok niyo nage menggim kunduk, amiya yenggenogo pit lagawak nduk eerogo pege, Eerigin o.

⁷ At enggaawak lek eerogo pege ti eyom paga mbogut eya nogo nobarogo pege, Laaluguragan abinak lek eerogo pege, Ndugwi paga oonegen nobaruwak nduk eeppege, Tut eya eeke kero, Keya eerugun o, yinuk, yoge,

⁸Mbogut paga nen at eya eerogo pit nage menggerak abok aret yumaak eerogo pege, Eerogo punuk, Anggween paga time o apit eerogo pi woraagin o,” yinuk, at Aliku Itok Menggerak ALA nen aret yegerak o.

⁹“Yi o ndi o at eenggo'lek yi aakumi ndi aakumi inenggela'me wonage me, At maluk oba kwippege neegak, It aakumi inanebunu ambik nen, Yi nonggop eeppigi? yinuk, Iniki piirik logowak nduk, eerogo piyaagin o.

¹⁰An nen at eeppege nogo, yi aakumi ndi aakumi inigen kenok, Yi eeppege yi, iya, yinuk, yogwe, At eeke paga nawooluwak nutik wage inigen neegwi iinok, it inoweewi inendagembogut nen kunduk inamineeri ne agan nogwe, Eeruwak nduk, Eeppiyaagin o. At eeppuurak ne ti eyom paga it inalitik-inalitak nen, Nineenik logorak op me, kambuurak kagi, yinuk, Ko'lu-kii'me inaganak wakak mban yogo logogun,” yegerak o.

¹¹Aliku Itok Menggerak ALA nen yegerak nogo yi aret. “At eeke paga it Mbaben mendek inowe endagembogut awooluwak mit-kwit eerogo pi woraagin o.

¹²Yi aakumi ndi aakumi inenggela'me aakumi ambi inogogumbuk lombok menggaarak inapuri aap wim nambuka wakaa'ngget Inawooluwak paga at awuri ineebe ambik aago wonogwe nogo inoori woraawak nduk, eeppiyaminggirak wogo logonet, It Metit mendek nen, Nit iya o, yinuk, wogoppakwi nogo lek eerogo piige, Aakumi at apuri at oone eeka ineebe ambik nogo abok aret inenggaawak lek eerogo piige,

¹³At aanggumi niyo nggwok aa'nggi paga iri'ngga nenet nugwi nogo abok aret lek eerogo piige, Eeke neenok, Niyoome time, aakumi iniyok pi nogwe kenok, abolok eeke, Inaanggumi niyoome time iniyok pi nogwe iinok, nggut eerogo pugwi, Eekwi nogo ambinom eerugun lek o.

¹⁴At wonage menggim time niyo nggut agaarak nogo mili-mili age, At wonage menggim yi niyo ndi niyo nage nogo eyo tayitun amburu nggi agan nage menggi kwak nage, Eeruwak nduk, eerogo pigin o,” yinuk, at Aliku Itok Menggerak ALA nen aret yegerak o.

¹⁵“O Metit yi oone lek ndi oone lek eerogo pege, O time wonage abok aret mbilik-mbelek eerogo wumbege, It aakumi time menggaarak abok aret inenggaawak lek eerogo piige, Eeke neenok, Naliku ALA an aret ineenu arugun o.

¹⁶Leendawi paga at anep pege logonet, tiyaniyak nogo ti aret. Yi o ndi o kumi inanebunu lombok nen leendawi tiyanggwi, o Metit eeppuurak inom, it aakumi ineebe ambik o time menggaarak abok aret eeppiyoorak inom, anep pogo logonet tiyanggwi, eerugun nogo ti aret o,” yinuk, Aliku Itok Menggerak ALA nen aret an yo'nereegerak.

¹⁷Mbo pinani wogogwaarak wonogwe niigak, tahun 11 eeppunuk, ambi eerak tut iyaalok penenak tanggal 15 tut ti paga Aliku ALA nen an yo'nege logonet,

¹⁸“Aakumi nen ndarak yi wae. It aakumi Metit mendek ineebe ambik wonogwe nogo, inaleenggu maake, it aakumi o mbuun ambena wambit nogwe nogo, kanggo menggam time inom nawak nduk, o Metit inom, yi o ndi o omaawi lombok menggam inaagalogwe negen inom, wuppiige, eeru o.

¹⁹Wuppiyaanok nduk, yorage logonet, Kit abu kigirikwe me, it eeppiige nogo kit eeppinagarak lek mbakop? Eeppinagarak aret me, it aap inagabolo mbanak lek mendek kinom time ari wambinip, yoret o.

²⁰Yoramenggendak it o Metit mendek wooluwak paga inoorak kambit nogwe nogo, inoorak inom aret kambugun o. Wooluwak muk ineenggime nutik wonogwe me, o maluk eerogo pugwi, aagalogwe negen ineebe ambik wonogwe nogo nigiren piya nogwe, eerugun o.

²¹It aap inomaawi ambik wim wakaa'ngget nogo kambunuk nogo menggam nen yogo logonet, It o Metit mendek kunduk, inom ogogwaarak kunduk, yime wambi wogo nagaarik, nit aap ninagabolo mbanak lek mendek wooluwak paga ninoorak kambeegurak wonogwe me, ari wagaarak ninom wonogwe o, yinuk, yugun o.

²²O Atiyut inom, aagalogwe negen awuri ineegin warak abok aret inom, time wonogo agaarik o. O Atiyut yendok-wandok time aagalogwe at awuri ineegin warak wooluwak paga inoorak kambeegwaarak nogo inabiruwak yinogo pit nagagerak wonage agaarik o.

²³Inabiruwak yinik nogo mbuun ambena ogu kiiniki lombok o Atiyut eebe taanak wonage me time yinogo pit nagagerak wonage agaarik o. It wonogwe nogo ti, ineenik nggween paga nugu menggam logonet, inamineeri ne agan noorak mendek aakumi eeginabit nugu nogogwaarak nogo, wooluwak paga inoorak kambeegwaarak time wonogo agaarik o.

²⁴O Elam kunduk, time wonage me, at kambeegerak eebe taanak wonage yendok-wandok time at awuri ineebe abok aret inoorak kambeegwaarak nogo, inabiruwak yinogo pit nagagerak wonage agaarik o. It aakumi ineenik nggween paga nugu menggam logonet, inamineeri ne agan noorak mendek eeginabit nugu nogogwaarak abok aret ti, inagabolo mbanak lek kagak nggween abu'na kiiniki paga wambit nogogwaarak wonogo agaarik o. It mbuun ambena aa'nduk wambit nogogwaarak inenggali mbakak wonogwe nogo, inom ndak-ndak inenggali kogo agaarik o.

²⁵It inoorak kambit nogogwaarak wonogwe inenggela'me at eebe taanak me yendok-wandok at awuri ineebe ambik inoorak kambeegwaarak inabiruwak yinogo pit nagagerak wonage agaarik o. It abok aret ti, inagabolo mbanak lek mendek wooluwak paga inoorak kambeegwaarak o. It ti, aakumi ineenik nggween paga nugu menggam logonet, aakumi inamineeri ne agan noorak mendek eeginako nogogwaarak paga aa'nduk inoorak kambit nogogwaarak nogo, inenggela'me inom tabonak wonogo logonet, aakumi mbuun ambena wambit nogwe iinok, inenggali mbakak wonogwe nogo, inom ndak-ndak inenggali kogo agaarik o.

²⁶O Metek inom, Tuban inom, time wonogwe mban o. It kambeegwaarak ineebe taanak wonogwe yendok-wandok time inawuri ineebe ambik lombok inoorak kambeegwaarak inabiruwak yinogo pit nagagerak wonage agaarik o. Aakumi ineenik nggween paga nogo menggam logonet, aakumi inamineeri ne agan noorak mendek eeginabit nogo nogogwaarak paga inagabolo mbanak lek mendek wooluwak paga inoorak kambeegwaarak o.

²⁷Aa'nduk it aap wakaa'ngget aakumi ineenik wonogo menggam nggween paga nugu logonet, inamineeri ne agan noorak mendek eerogo piinet nogo nogogwaarak me, aap wim eeka inagabolo mbanak lek kagak inoorak kambit nogogwaarak taambiigo logonet, inanggeemu ineebe paga lunogo pugwi, ineegin-inomaale inanep mbanogo piigwi, eeko nogogwa kwak, it aap ti nogo togop eerogo piyoolik o.

²⁸Togop aret me, at Pirawun kunduk waremenggaarak aap inagabolo mbanak lek mendek wooluwak paga inoorak kambeegwaarak taanak wonogwe me time inom tabonogo taambugun o.

²⁹O Erom kunduk time wonage mban o. It Erom mendek inoweewi inendagembogut inom, aakumi inoweewi nagawan-nagawan inom, inomaawi wonogogwaarak kwe, wooluwak paga inoorak kambit nogogwaarak nogo, inom aret taanak wonogwe, ndi, aakumi inagabolo mbanak lek mendek mbuun ambena wambit nogogwaarak wonogwe nogo, inom ari nogogwaarak wonogwe, eerak aret agaarik o.

³⁰It aap nagawan-nagawan o omarip paga pa'nggwe wonogwe abok aret inom, aakumi o Tiron mendek abok aret inom, nen inomaawi paga aakumi inamineeri ne agan noorak mendek eeginabit nogo nogogwaarak kwe, inoorak kambunuk wambit nogogwaarak wonogwe nogo, it ndak-ndak inendage lek kanggo nagaatik, wambit nogogwaarak wonogo agaarik o. It wooluwak paga inoorak kambeegwaarak wonogwe me, inagabolo mbanak lek kagak wambeegwaarak inom wonogwe, it aap mbuun ambena wambit nogogwaarak wonogwe nogo, inom wonogo logonet inenggali mbakak wonogwe, eerak aret agaarik o.

³¹At Pirawun nogo ti, at inom, awuri ineegin warak inom, wambi nanuk, it time aago wonogwe nogo, inigen iigo logomenggaarik, Ninawuri ineebe ambik lombok wooluwak paga kambeegwaarak nogo togop ogogwaarak wonogwe iigo o, yinuk, iniki kwi'narigin o,” yinuk, Aliku Itok Menggerak ALA nen aret an yo'nereegerak o.

³²“Aap Pirawun ti, aakumi ineenik wonogo menggam nggween paga nege logonet, aakumi inamineeri ne agan noorak mendek eeginabit nege logowak nduk, an nen inikime eeppereegirak kwe, at kunduk, at awuri ineebe ambik lombok wonogwe nogo kunduk, it aap inagabolo mbanak lek mendek wooluwak paga inoorak kambeegwaarak wonogwe me ari nanuk, inom wonogo logogun o,” yinuk, at Aliku Itok Menggerak ALA nen aret an yo'nereegerak o.