Read Western Dani Yetikiyen 33 Bible Online

Yetikiyen 33 - Western Dani bible

Yetikiyen 33

¹Aliku ALA nen an yo'nege logonet,

²“Aakumi nen ndarak yi wae. It aakumi kat mendek wone yorage logonet, yoroorak nogo yi aret. An nen aakumi o ambi me wonogwe nogo, wooluwak paga inooruwak nduk nappiya wage me, aakumi o time mendek nen inenggela'me aap ambi leenogo punuk, nggayo logowak nduk, mippemenggaarak enegen wonage logonet,

³aakumi nen wooluwak wonok wogwe enegen iige kenok, Wogwe yi aret o, yinuk, kurumbi yorage logonet, oone nggwok eeka trompet nogo oone eeremenggerak

⁴inaruk konenemenggaarak kwe, Abet aret kurumbi yo'nirage kogo o, yinuk, liippunuk, mbagangga'lek puk mban wonogwe me, wooluwak paga inoori wogwe iinok, inamiya wambemenggerak nogo ti, it inobaalombok aret inoba logogin o.

⁵Oone nggwok eeka trompet nogo oone eeke konenemenggaarak kwe, Yi kurumbi yo'nirage kogo o, yinuk, mbaka'lek kobak wonogwe me, inooremenggaarak inamiya wambemenggerak nogo ti, it inobaalombok inoba aret logogin o. Kurumbi yoramenggerak nogo, abet mba'netak en it ineebe inagap ndakko'nok mbaganninetak o.

⁶Ti togop aret kwe, at tum waka nen wooluwak wonok wogwe enegen iige logomenggerik, aakumi kurumbi yorage logonet, oone nggwok eeka trompet nogo oone eeka'lek mbo pege paga it aakumi inookwi iinok, it maluk eeko logomenggaarak paga inoorugun kwe, inamiya wambemenggerak nogo perak, at aap tum waka nogo yoge logonet, Kat liirogon kurumbi yoroolik me, inamiya wanggerak ti, kat kobaalombok aret koba wonage o, yinuk, yorigin o.

⁷Aakumi nen ndarak yi wae. An nen it aakumi Iterali mendek inarum waka logonok nduk, mippagareegirak o. Mippagareegirak me, it yoroorak noone ari nogo karuk konembunuk, Ala nen ndogop eeppinagagin o, yinuk, kurumbi yorage logomunggun o.

⁸Aap maluk eeka ti, mondok aret kambigin o, yinuk, aap maluk eeka ambi yorenok nduk, yokkiriminggirak kagak, aap ti, maluk eerit nage nogo mbo punuk, iyokan woraawak nduk, kurumbi yoga'lek keenok, aap ti, maluk at eeremenggerak paga kambigin kwe, kat kurumbi yoga'lek keegak kambigin me, amiya perak, kat kobaalombok aret koba pigin o.

⁹Ndi, aap maluk eeka ti, eerit nage nogo mbo punuk, yungguninuk woraawak nduk, kurumbi yoremenggendak kwe, at nen maluk mbo puurak eebi mbake kenok ti, at omaluk paga aret kambigin kwe, kat perak, kagap ndakkolaamunggun o.

¹⁰Aakumi nen ndarak yi wae. It Iterali mendek yoroorak nogo yi aret o. Kit nen yogo logonet, Nit wone yugu kagak alik eekwi, maluk eerit nugwi, eekwi paga niniki aaninggin ndugu aago nugwi, eeko monggoorak paga nineebe mbuuluk ee'ninabit unggwage, eeke me, nit nonggoti nineenik logorak, yogwe kiigi o, yinuk,

¹¹yorage logomenggendik, ambi yorage logonet, It aap maluk mendek kanggwi iinok, an niniki ale'nggen mbakeelik o. Ata, ineenik logowak nduk it maluk eerit nugwi nogo mbo punuk, yungguninuk neya wogwe iinok perak, niniki ale'nggen mbake minggirak me, it Iterali mendek ti, iniyokan nowagam wogwe, it maluk eerit nugwi nogo mbo punuk, yungguninuk wogwe, eeko logowak o. It nonggop nduk, Kambuwok, mbako agaarik o? yinuk, neenik Nitok Minggirak Naliku an ALA nen aret yagi, yegerak yoret o.

¹²Togop me, aakumi nen ndarak yi wae. It aakumi kat mendek yorage logonet, Aap iniki abe koonak ambi nen wone yugu eeka'lek mbo pege kenok, at obeelom eeke menggerak kwe, agap ndarak logogin lek o. Ndi, aap maluk eeka ambi nen maluk eerit nage nogo mbo punuk, yungguninuk wage kenok, at maluk eerit nage nagagerak nogo, Onggo ndogop eeppagagin o, yinuk, yorigin lek o. Aap iniki abe koonak ti nen obeelom mban eerit nage menggerak kwe, maluk eeke kenok, at eenik logowak nduk, teppigin lek o.

¹³An Ala nen aap iniki abe koonak nogo yoge logonet, Kat abet aret keenik logomunggun o, yinuk, yoriminggirak kagak, obeelom eeke ti paga panggombunuk, maluk eerit nage kenok, at obeelom mban eerit nage logomenggerak nogo, an aberigin lek me, at maluk eeke logomenggerak paga aret kambigin o.

¹⁴Ndi, an Ala nen aap maluk eeka nogo yoge logonet, Kat abet aret kambumunggun o, yoriminggirak kagak, at nen maluk eeke logomenggerak nogo mbo punuk, obeelom mban eerit nage, a'me nggelok eeppiinet nage, eeke logonet,

¹⁵awu aap luulu wogoremenggerak paga aap ti amendek wamenggerak obaane'me wogoga'lek nogo wogoge, aakumi inamendek ndinggolamenggerak nogo, ageerok unde awi yakkage, eeke logomenggerik, at maluk eeka'lek ineenik logorak wone lengganak nogo mban mugurok nage kenok, at kambigin lek abet aret eenik logogin o.

¹⁶At maluk eerit nage logomenggerak nogo, an nen aberak logonet, maluk onggo eeppigin lek abok aret mbo pigin o. Aap ti nen a'me nggelok mban eeppiinet nage, obeelom eerit nage, eeke kenok, at abet aret eenik logogin o.

¹⁷Togop aret kwe, it aakumi kat mendek nen yogo logonet, Nit eekwi paga ninogoba Ala nen eeppinaniyak yo'nirage nogo ti, ndak-ndak lek o, yogwe kwe, Nit eeko monggoorak op aret, mbakwi nogo kunduk, ndak-ndak lek kagak yogo agaarik.

¹⁸Aap iniki abe koonak ambi nen obeelom mban eerit nage menggerak nogo mbo punuk, maluk eerit nage kenok, eerit nage ti paga at eebe aret kambigin o.

¹⁹Ndi, aap maluk eeka ambi nen at maluk eerit nage nogo mbo punuk, obeelom mban eerit nage, a'me nggelok mban eeppiinet nage, eeke ti paga at eenik aret logogin o.

²⁰Togop aret kwe, it Iterali mendek ti nen yogo logonet, Nit eekwi paga ninogoba Ala nen eeppinaniyak yo'nirage ti, ndak-ndak lek kagak yo'nirage o, yinuk, yogwe me, an nen it eekwi mugurok inalitik-inalitak inowak loonogo inomaluk onggo eeppiyaagin,” yo'negerak me, yokkiragi o, yinuk, yoragagirak.

²¹ Mbo pinani wogogwaarak wonogwe niigak, tahun 11 eeppunuk, ambi eerak tut 9 penembunuk, ambi penenak tanggal 5 tut ti paga aap ambi o Yerutalem nen peberagangge eerak an neya wage nagagerik, yo'nege logonet, “O kota ti, abu aret lek eerogo pegaarak o,” yinuk, yo'nereegerak.

²²Aap mbaganit wagagerak nogo ti, awo waga'lek kagak oonikiya paga Aliku ALA omaawi noba panege logonet, noone lek wonagagirak nogo kuubondendok aap nogo awo neya waga'lek kagak noone warak eerogo panege mbareegi, noone aret yereegirak.

²³Ari mbareegi, Aliku ALA nen an yo'nege logonet,

²⁴“Aakumi nen ndarak yi wae. It aakumi o langgu-langgu wambeegim Iterali inanggween paga wonogo logonet, Abarakam alik aret kagak nggween yi abok aret at unde eeppatinuk logowak nduk, wogoreegerak kwe, nit nineebe ambik lombok me, nggween yi, nit unde eeppatinuk logowok nduk, wo'niragagerak kogo o, yinuk, yogwe me,

²⁵Aliku Itok Menggerak ALA nen yegerak nogo yi aret o, yinuk, yorage logonet, It Iterali ti nen inaanggumi warak inamiya inom nunggwi, inagugi yeenggwaaraawak nduk wiigwi, aakumi inookwi, eeko logonet, Nit nggween yi, unde eeppatinuk logowok o, yinuk, yogwe ti, op aret yogo agaarik?

²⁶It inawooluwak paga iniki panggombunuk wonogwe, ogole warak mendek eerit nugwi, inalitik-inalitak inoreewi inakuwi iigak maluk eerogo piinet nogwe, eeko logonet, Nit nggween yi, unde eeppatinuk logowok o, yinuk, yogwe ti, op aret yogo agaarik?

²⁷It yorage logonet, At Aliku Itok Menggerak ALA nen yegerak nogo yi aret. Yi aap ndi aap o langgu-langgu wambeegim mbo piyareegwaarak wonogwe ti, wooluwak paga inoorak kanggwi, it aakumi karume mbaganit nogogwaarak wonogwe nogo, ineebe ndiimbu-nggwiya inambi-mbiingga negen ogwe, it aakumi ando yugum pak wurogo pereegim wonogwe inom, ndoome ari nogogwaarak wonogwe inom, kugilingga nen kambit nogwe, eeruwak nduk, eerogo piyaagin o, yinuk, neenik menggirak nendage kumbatinuk yagi o.

²⁸Inanggween ti, yi oone lek ndi oone lek o wogo aret eerogo pege, Ninomaawi ambik o, yinuk, iniki tiyappakwi nogo lek eerogo pege, eerigin o. Puut-puut o Iterali wonage nogo, yi oone lek ndi oone lek eerogo pigin me, aakumi tu ti paga noorak inagabiti nen nogo logogun lek o.

²⁹It maluk ogole warak lombok eerit nugwi paga an nen nggween ti maluk eerogo pege logonet, yi oone lek ndi oone lek eerogo pege neenok, it nen Naliku ALA an aret ineenu arugun, yegerak, yoret o.

³⁰Aakumi nen ndarak yi wae. Kat perak, it aakumi kat mendek nen yugum pak wurik me, it inawi tu unggwogwe me nen, kat eerit nage nogo, at ambi nen at ambi yogak eeko logonet, Aliku ALA nen wone yegerak ngge kaamun? yinuk, konenuwok nduk nawok o, yinuk, yogo agaarik o,

³¹yogo nagaatik, ineebe an napuri negen a'nuk, ambik aago wogo nagaatik, kat koone konenuwok nduk kowagam kwi'nari wogo menggaarak kwe, kat nen it yorage nogo eekulik aret menggaarak o. It inambe paga, Aakumi niniki kunik eeginako monggoorak o, yinuk, yogwe kwe, iniki perak, aakumi wiwi aganako logonet, ineenggi warak eekkoloorak nogo mendek mban mugurok nogo menggaarak.

³²Kat koone yorage nogo it konenggwi kwe, eekulik me, kat ti, it aap ndawi inoone amburu piyanggwi paga kumi iniki mbanggwi, aap nggitat mondok abe eekwi, eeko mengga kwak, At aret eeke agaarik, kombako agaarik o.

³³Wone yokkigirak abok aret yoramenggendak ti, eeriyak abet aret ari woraagin me, ari wage kenok, it aakumi nen, Aap Ala nen yoge kagak yoraga ninenggela'me wonagaarak abet aret kogo o, yinuk, ineenu arugun o,” yinuk, an yo'nereegerak.