Read Western Dani Yetikiyen 35 Bible Online

Yetikiyen 35 - Western Dani bible

Yetikiyen 35

¹ At Aliku ALA nen an yo'nege logonet,

²“Aakumi nen ndarak yi wae. Kat kena puut Teyit pa'nggwe time na'nage logomenggendik, Kat ndogop eeppagarak o, yinuk, yoru o.

³Yoge logonet, Aliku Itok Menggerak ALA nen yegerak nogo yi aret. At puut Teyit eeke ti, an neebi mbake me, neenggi omaawi paga nen maluk eeppege logonet, puut time yi oone lek ndi oone lek eerogo pege,

⁴kota-kota at paga wonage nogo yigirik-noonom eerogo pege, eeke neenok, puut Teyit ti, aakumi wonogolik o karume aret arigin o. Ti eeke neenok, Naliku ALA an aret at eenu arigin o.

⁵O aa'nduk nen nok, yogondak kuli at nen it Iterali anini inombarit wage logonet, it Iterali eeko nogogwaarak onggo eeppiyoorak abu aret panggoni wage kenok, aaninggin inoba kwi'nagagerak ti eyom paga wooluwak paga inooruwak nduk inawim ineenggime piyareegerak me,

⁶it Teyit mendek ti, inawim nen inooruwak nduk, ineenggime piyaminggirak muguren-magaren inoorit nogo logogun o, yinuk, neenik Nitok Minggirak Naliku an ALA nen aret yagi o. It inawim nen inookwi iyo, ineenggime piyoorak, Neebi, yuulik, ineenggime piyareegerak inoorit nogogwaarak me, inoorak onggo at waruwak nduk, mugurok nogo logogun o.

⁷An nen puut Teyit ti, yi oone lek ndi oone lek o wogo eerogo pege, aakumi tu ti paga nogwe-wogwe eekwi nogo an nen inenggaawak lek eerogo piige, eerigin o.

⁸O Teyit puut nggelok-nggobok me time aakumi inoorak kambak mban yagabit eerogo pigin o. O Teyit puut-puut paga, at anggween kobak nabunogo pit nagagim paga, puut nggelok-nggobok niyo nage menggim paga, wooluwak paga aakumi inoorak mban yagabit eerak logogin o.

⁹O Teyit time yi oone lek ndi oone lek aago kagak mondok-mondok aret wonage logowak nduk, eerogo pege neenok, at wonage menggim kota-kota time aakumi wonogo logogun lek aret o. Ti eeke neenok, Naliku ALA an aret at eenu arigin o.

¹⁰Naliku ALA an o time wonage neegak kwe, at Teyit nen ari logonet, It aakumi inanebunu mbere ti inom, it inanggween inom, nit unde eeppatinuk logonet, nit mendek aret aruwak o, yereegerak me,

¹¹At Teyit nogo nen, It kwak an arikit lak, ao, yinuk, ineebi lombok inombake, anini it inoba piige, eereegerak nogo ndak-ndak, at togop aret eeppege, ndi, at awone amburu mbanogo punuk, onggo eeppege eyom paga, Aliku ALA nen aret eeppanege kagi, yinuk, eenu aruwak nduk eeppege, eerigin o, yinuk, neenik Nitok Minggirak Naliku an ALA nen abet aret yagi o.

¹²Ti eeke neenok, at Teyit nen, Iterali inabuut ti paga yi oone lek ndi oone lek o wogo eerogo pereegerak me, an aret unde eekkolaakit nduk, neenggime paneegerak kagi, yinuk, Iterali inabuut ti, meek lombok mbake logonet, abok mbanit nagagerak nogo abok aret, Aliku ALA nen aret koneneegerak kagi, yinuk, at eenu arigin o.

¹³At nen an meek nombake logonet wogoppake, Aliku ALA eeke ti neebi o, yinuk, oone puk aga'lek ugun peranogo wunabit nage, eereegerak nogo, an naruk koneneegirak o.

¹⁴Naruk koneneegirak me, at paga yi oone lek ndi oone lek o wogo eeppege neegak, aakumi o nggween paga wonogwe abok aret inale'nggen mbarugun o. It Iterali menggam yate kwak iniki kundugu nogo, yi oone lek ndi oone lek o wogo eerogo pege neenok, at ale'nggen mbareegerak me, at Teyit togop aret eerogo pigin o. Puut Teyit ti inom, o Erom abok aret inom, yi oone lek ndi oone lek o wogo eerogo pege neenok, Naliku ALA an aret ineenu arugun o,” yinuk, Aliku Itok Menggerak ALA nen aret yegerak me, kat puut Teyit aret yokkigi o, yoreegirak.