Read Western Dani Yetikiyen 36 Bible Online

Yetikiyen 36 - Western Dani bible

Yetikiyen 36

¹“Aakumi nen ndarak yi wae. Ndogop eeppinagarak o, yinuk, it Iterali wonogo menggam puut-puut yorage logot o. Yorage logonet, Iterali wonogo menggam puut-puut yi wae. Aliku ALA nen yegerak yi, kinaruk konenggo logonip o.

²At Aliku Itok Menggerak ALA nen yegerak nogo yi aret. It inom wim mbanak nen puut-puut eekwi nogo abok mbanggo logonet, Puut-puut mondok itok tiyarogon menggerak nogo, nit muk unde eekkologogurak me, kayik a! yinuk, yogwe me,

³it puut-puut ti, eeppiyoorak yorage logonet, Aliku Itok Menggerak ALA nen yegerak nogo yi aret. It Iterali inawim inaagan-ambokan wonogwe nogo nen it Iterali menggam puut-puut time yi oone lek ndi oone lek o wogo eerogo pugwi, yi aakumi ndi aakumi unde eekkolaawok nduk, tebenogo piya unggwagak eekwi iinok, aakumi abok aret nen inabok mbanggwi, meek eerogo piigwi, eeko nogogwaarak me,

⁴it Iterali wonogo menggam puut-puut ti, Naliku Nitok Minggirak an ALA nen yorage yi, konenggo logowak o. Puut-puut nggorek inom, puut-puut teberogon inom, o nggelok-nggobok me niyo nage menggim inom, o kobappaga abok aret inom, o langgu-langgu aago yi oone lek ndi oone lek eerak wonage inom, o kugun punuk mbaganggwi, yi aakumi ndi aakumi ando inaagan-ambokan wonogwe nogo nen miyuk-meya eerogo pugwi, eeko menggam o kota-kota inom, at Aliku Itok Menggerak ALA nen wone yoroorak yegerak nogo yi aret.

⁵At Aliku Itok Menggerak ALA nen ari logonet, It an nanggween nogo ndinggologo nogogwaarik, unde eeppatinuk, inale'nggen mbakwi, inanini mbako logonet, meek eerogo pugwi, eeko logonet, yi mendek ndi mendek tigippit unggwogo nogogwaarak me, nanini kani kunik negen eeke logonet, Ndogop eekkinabigin o, yinuk, it Erom mendek inom, yi aakumi ndi aakumi ando abok aret inom, yoragagirak o.

⁶Togop aret me, Iterali inanggween eeppiigo nogogwaarak nogo, kat nen puut-puut nggorek inom, puut-puut teberogon inom, o nggelok-nggobok me niyo nage menggim inom, o kobappaga abok aret inom, yorage logonet, At Aliku Itok Menggerak ALA nen yegerak nogo yi aret. It yi aakumi ndi aakumi nen Iterali maluk eeppiigo logonet, meek eerogo piigak eeko nogogwaarak me, an nanini kani kunik negen eeke logonet, wone ambi yoraagin,” yegerak o.

⁷At Aliku Itok Menggerak ALA nen yegerak nogo yi aret o. “It yi aakumi ndi aakumi Iterali inaagan-ambokan wonogwe nogo it kunduk, maluk eeppiige neenok, aakumi nen, Yi eeppiige, kayik a! yinuk, abet aret yugun o, yinuk, kumbuk mbanggi,” yegerak me, yokkiragi o.

⁸It togop aret eeppiyaagin kwe it Iterali wonogo menggam puut-puut ti perak, an napuri Iterali ti, logonuk lek aret iniyokan iname nagun me, it inake yi eyo ndi eyo agarip ndake, anggen yit nage, eeruwak nduk, puut-puut ti nen amburu eerogo wumbege logogin o.

⁹Iterali wonogo menggam puut-puut ti paga niniki eya eerogo panege paga nale'nggen oba pege neenok, ineyabu ti paga eekkologwe, yi awi ndi awi yarit nogwe, eerugun o.

¹⁰Puut-puut ti paga aakumi ambik eerogo piyaagin nogo ti, Iterali mendek abok aret wiganogo piige neenok, o kota-kota aakumi lek wuum agagerak nogo obaane'me aakumi ambik aret ari unggwogwe, o langgu-langgu nagagim nogo obaane'me wukwi, eerugun o.

¹¹Puut-puut ti paga aakumi inom, inaanggumi inom, ambik aret wiganogo piige neenok, ndaganabit nogo logonet, ineebe ambik aret wigannarugun o. O aa'nduk puut-puut ti paga aakumi ambik ye mbambatinuk wonogogwa kwak eerogo piyaagin me, aa'nduk yi mendek ndi mendek yarak anggen ambik yi'nage nagagi kwak lek, yogondak ti abunuk, alik negen yi'nage logowak nduk, eerogo pigin o. Ti eeke neenok, it nen Naliku ALA an aret ineenu arugun o.

¹²It aakumi an napuri Iterali ti, puut-puut ti paga nugwi-wugwi, at paga unde eeppatinuk wonogwe, it ineyate kwak aret age, eeruwak nduk, eerogo pigin me, at paga logonet, nda'naremenggaarak nogo, at puut-puut nen ambinom lek eerogo piige logogin lek aret, yegerak me, yokkiragi.

¹³Aliku Itok Menggerak ALA nen yegerak nogo yi aret. “Aakumi nen puut-puut yogo logonet, Aakumi ineebe kambeme yonggorinake, aakumi inanebunu kat paga ndarak inaagalogwe mendek nogo lek eerogo piige, eeke menggendak o, yinuk, yogwi me,

¹⁴puut-puut ti, aakumi ambinom ambeme yonggorinake, aakumi inanebunu puut-puut paga ndarak nogo, ambinom lek eerogo piige, eeke logogin lek o, yinuk, Naliku Nitok Minggirak an ALA nen aret yagi o.

¹⁵Yi aakumi ndi aakumi nen, Kayik a! yinuk, yogwi nogo, puut-puut ambinom konenuwak nduk, an nen eeppiyaagin lek o. Aakumi inanebunu lombok nen puut-puut ti, meek eeppugwi nogo, ambinom meek eerogo pugwi, ndi, puut-puut ti nen at paga ndarak inanebunu nogo ambinom lek eerogo piige, eerigin lek o, yinuk, Naliku Nitok Minggirak an ALA nen aret yagi o,” yinuk, yegerak me, yokkiragi o, yoragagirak.

¹⁶At Aliku ALA nen wone ambi an yo'nege logonet,

¹⁷“Aakumi nen ndarak yi wae. It Iterali mendek nen it inanggween lombok paga wonogo logonet, ineraambe maluk paga, maluk eerit nugwi paga, inanggween ti, enete maluk eerogo pereegwaarak o. Kwe tut kegetak yum paga lenggenak kenok, Ogole o, yinuk, yogo mengga kwak, an nenggaanom paga it ineraambe maluk logonet eerit nugwi ti, abu ogole warak aret wonagagerak o.

¹⁸Togop aago wonogo logonet, nggween ti paga aakumi inamiya wunabit nogwe, inagugi ogut ayuk wurit nogwe paga inanggween maluk ogole warak lombok eerogo pit nogwe, eeko nogogwaarak me, an nanini it inoba kwippiige logonet,

¹⁹it ineraambe maluk paga, eerit nugwi paga, mugurok inowak looninake nagagirik, yi aakumi ndi aakumi inenggela'me nappiige, yi o ndi o mak eerogo piige, eereegirak o.

²⁰Yi aakumi ndi aakumi inenggela'me time arit nogo nogogwaarik, wonogwe iigak, it nogogwam nogome nen yogo logonet, At Aliku ALA apuri yi aret kwe, inanggween wogoragagim nogome nen wumbiigerak yi, iyaanip o, yinuk, yogo nogogwaarak paga nendage abu abe alik leenak wonage nogo, maluk eerogo pogo nogogwaarak.

²¹It Iterali mendek nen yi aakumi ndi aakumi inenggela'me nogogwam abok aret nogome logonet nendage abu abe alik leenak nogo, maluk eerogo pereegwaarak kenok, an niniki wakkolage nagagirak o.

²²Togop aret me, it Iterali mendek yorage logonet, At Aliku Itok Menggerak ALA nen yegerak nogo yi aret o. An nen it Iterali obeelom eerogo piyoorak yigin yi nogo ti, it obeelom eekwi paga lek o. Ata, it nen yi aakumi ndi aakumi inenggela'me it nogogwam abok aret nogome logonet, nendage abe alik leenak wonage nogo, maluk eerogo pereegwaarak me, nendage alik leenak nogo obeelom aruwak nduk, eeppiyaagin o.

²³It nen yi aakumi ndi aakumi inenggela'me logonet, nendage abu tiyanak maluk eerogo pereegwaarak nogo, abu abe alik leenak neyaawak nduk eerigin o. Yi aakumi ndi aakumi inenggaanom paga an kikak nakeelik alik leenak it Iterali mendek neyaawak nduk, eeke neenok, it aakumi inanebunu lombok nen Naliku ALA an aret ineenu arugun o, yinuk, Naliku Nitok Minggirak an ALA nen aret yagi o.

²⁴It yi aakumi ndi aakumi inenggela'me nen nggiginogo wumbiige, yi o ndi o nen kuwak eerogo piya wage, eeke logominggirik, it inanggween paga lombok logowak nduk, iniyokan piya nagin o.

²⁵Piya nanuk, inabin koorogo piige neenok, it obeelom aret logogun o. Inoba maluk lenggennage, inagugi ogut alut eerit nogo logonet maluk eerogo pakwi, eereegwaarak nogo, inabin koorogo piinok,

²⁶ iniki ngget eerogo piige, iniki koonggwi nogo alik eerogo piige, eeke logonet, inogogumbuk iniki yugum pogom wonogwe nogo mbo punuk, iniki yanggonak logonet eeko menggaarak mendek eerogo piyaagin o.

²⁷An nen Naberiniki inikime mambiige, wone lengganogo yorage minggirak nogo mugurok nawak nduk, eeppiige, ndi, eeko logorak noone yugu nogo liippunuk eeko logowak nduk, eerogo piige, eerigin o.

²⁸Eerogo piige neenok, nggween inombomini wogoragagim nogome ye mbambatinuk wonogwe iigak, an inogoba Ala aret age, ndi, it an napuri aret ogwe, eerugun o.

²⁹Maluk eerit nogo logonet, inoba maluk lenggenogo pateegwaarak nogo, lek aruwak nduk, inabin koorogo piige, ndi, mbi noogelo inoba kwippiyaagin lek gandum awi yaremenggaarak nogo mbilambunuk, anggen ambik yi'nage logowak nduk, eerogo pege, eerigin o.

³⁰Mbi noogelo nen mbaganit namenggaarak yi aakumi ndi aakumi inenggela'me wonogwe iinok, inenggali wappiigo nogogwaarak nogo, ambinom wappiigo logokwak, an nen yi eyo ndi eyo yarak inom, yi mendek ndi mendek ineyabume yarak inom, anggen ambik yi'naruwak nduk, eerogo pigin o.

³¹Ti eeke neenok, it nen ineraambe maluk lombok wonogogwaarak inom, maluk eerit nogo nogogwaarak inom, abeppunuk, Nit maluk eerit nugwi, ogole warak lombok eerit nugwi, eeko nogogurak nogo ti, peyak wurik kwak kagak eeko nogogurak kogo o, yinuk, mbarugun o.

³²Ti eerogo piyaagin nogo ti, it iinok, eerogo piyaagin lek ineenu aruwak o. It Iterali mendek ti, eerit nugwi paga it nen inenggali eerogo pakwi, ndi, Maluk kagak eeko nogoorak iya, yinuk, inenggali ogwe, eeruwak o, yinuk, Naliku Nitok Minggirak an ALA nen aret yagi,” yo'negerak me, yokkiragi o.

³³At Aliku Itok Menggerak ALA nen yegerak nogo yi aret. “It inomaluk inoba lenggenak wonage nogo, lek aruwak nduk, inabin koorogo piige ne ti eyom paga it iname kota-kota logowak nduk, eerogo piige, o langgu-langgu eerak wonage nogo, obaane'me wurogo pege, eerigin me,

³⁴aakumi apit aret tu ti paga nogo logonet, Nggween mbuk aago wonage yi, kaanip o, yinuk, yogo nogogwaarak nogo obaane'me yabu eeko logogun o.

³⁵Yabu eeko logonet, it nen, Nggween yi, mbuk aago kagak o ambik me agagerak nogo aret yabu Eren yarak me kwak aret aga o. Ndi, kota-kota langgu-langgu eerogo pugwi, yi oone lek ndi oone lek eerogo pugwi, pup eerogo pugwi, eerogo pereegwaarak nogo, o yogondak aakumi nen yugum pak wurogo punuk, wonogo agaarik o, yinuk, yogo logogun o.

³⁶Naliku ALA nen pup eerogo pereegwam nogome obaane'me wurogo pege, nggween mbuk aago wonagagerak nogo obaane'me yi mendek ndi mendek yarogo pege, eeke neenok, yi aakumi ndi aakumi mbo piyareegirak Iterali enaagan-ambokan wonogwe nogo nen, At Aliku ALA nen aret eekerak kogo o, yinuk, ineenu arugun o. Naliku ALA an nen aret yagarak me, an nen aret eerigin o,” yinuk, yegerak o.

³⁷At Aliku Itok Menggerak ALA nen yegerak nogo yi aret. “Aa'nduk it Iterali mendek nen, Nineebe ambik wigannaruwok o, yinuk, yo'nogo mbareegwa, ambik eerogo piyareegi kwak, ambinom yo'niriyak, Op aret, mbake neegak yo'nugwi iinok, ndomba ineebe ambik lombok mengga kwak,

³⁸o Yerutalem laago lako logorak wone yugu eeriyak eyom ari wage kenok, nake warogo wo'nogo logonet, ndomba ineebe ambik kuwak eerogo piya wogo mengga kwak, it Iterali ineebe togop aret eerogo piyaagin o. Ti eeke neenok, kota-kota langgu-langgu aago me nogome aakumi ineebe ambik lombok yagabit ari unggwogo logogun o. Togop aago wonogo logonet, Naliku ALA an aret ineenu arugun,” yegerak me, yokkiragi o, yinuk, yoragagirak.