Read Western Dani Yetikiyen 37 Bible Online

Yetikiyen 37 - Western Dani bible

Yetikiyen 37

¹Ti'nuk, Aliku ALA omaawi noba panege logonet, at Aberiniki yoge mbareegi, neebe wo'neren wundi nanuk, o kobappaga aakumi inowak nggininik yagabit aago wonage me enggela'me time pani nagagerak.

²Pani nage nagagerik, inowak nggininik wonage me yendok-wandok wo'neren nege kagak, aakumi ambik lombok inowak nggininik neno-pono aago kobappaga taati wonage kagagirak.

³Kage mbareegi, at nen an yo'nege logonet, “Aakumi nen ndarak yi wae. Aakumi inowak nggininik yi, ineenik eerogo piyoorak op mbaken?” Yo'nege mbareegi, an nen at yoge logonet, “Kaliku Kitok Menggendak nogoba ALA kat kalik mban keenu o.”

⁴Yoge mbareegi, at nen an yo'nege logonet, “Inowak nggininik yi, eeppiyoorak wone yoret o. Yorage logonet, Aakumi inowak neno-pono aago yi, Aliku ALA nen wone yegerak nogo konenggo logonip o.

⁵Aliku Itok Menggerak ALA nen inowak nggininik yi, yoroorak yegerak nogo yi aret o. An nambe aagi inikime mambiige neenok, ineenik aret arugun o.

⁶Inowak nggininik nogo paga inomanggen kunogo piinet nage, inenggaanggum inowak nogo paga nabenogo piinet nage, inagabolo endekem nabenogo piige, eeke logominggirik, nambe aagi mambiige neenok, ineenik aret arugun o. Ineenik ogwe iinok, Naliku ALA an aret ineenu arugun o,” yinuk, yo'nege kagagirak.

⁷“Togop yoret,” yo'nereegerak nogo ndak-ndak yoragagirak. Yorage neegak, inabilik-inabolok yogwe konengge logonet, inowak yerenak-werenak aago nogo inobaane'me lombok ambi paga kunnagak, ambi paga kunnagak, eerit wage kagagirak.

⁸Kage neegak, inowak paga inomanggen kunnarit nage, inenggaanggum nabennarit nage, inagabolo endekem lenggennarit nage, eerit wage kagagirak kwe, inambe aagi perak, wunaka'lek aret wonogwe iyareegirak.

⁹Inambe aagi wunaka'lek aret iige neegak, at nen an yo'nege logonet, “Aakumi nen ndarak yi wae. Inambe aagi eeriyak nogo yoret o. Inambe aagi eeriyak nogo yorage logonet, Aliku Itok Menggerak ALA nen yegerak nogo yi o. Aakumi inambe aagi ti, wiya o agi-ogu nen, aru-ogwe nen, warit wage menggim nen warit wage logonet, aakumi inoorak inowak nggininik yi, ineenik aruwak nduk, inikime unggwit woraawak o, yinuk, yoret,” yo'nereegerak me,

¹⁰ yo'nereegerak nogo ndak-ndak yorage neegak, unggwit wage mbareegi, ineenik a'nuk mi'nogogwaarak. Ineenik a'nuk, mi'nogogwaarak ineebe nogo ti, aap wim eeka ambik aago kwak aret mi'nogwe iyareegirak.

¹¹Mi'nogwe iige mbareegi, at nen an yo'nege logonet, “Aakumi nen ndarak yi wae. Aakumi inowak nggininik yi ti, it Iterali mendek abok aret. It Iterali mendek nen yogo logonet, Ninowak abu aret neno-pono nage, niniki lunik wonogwe nogo lek aret age, ninenggaawak kunduk lek age, eekerak o, yinuk, yogo agaarik o.

¹²Togop aret me, it eeppiyoorak nogo yorage logonet, Aliku Itok Menggerak ALA nen yegerak nogo yi aret. It an napuri ti, an nen ineebe nggween taanak wonogwe me nen tu paarogo punuk, wumbiya wage logominggirik, wogoren inanggween o Iterali time piya nagin o.

¹³It an napuri ti, nggween taanak wonogwe me nen tu paarogo punuk, ineebe wumbiige neenok, it nen Naliku ALA an aret ineenu arugun o.

¹⁴An Naberiniki inikime mambiige neenok, ineenik aremenggaarak piya nage logomenggirik, it inanggween paga time logowak nduk, teppiyaagin o. Ti eeke neenok, Nit eeppinaniyak Aliku ALA yereegerak nogo aret eerogo pinaneegerak kogo o, yinuk, Naliku ALA an aret ineenu arugun o,” yinuk, Aliku ALA nen aret an yo'nereegerak o.

¹⁵Ti'nuk, at Aliku ALA nen an yo'nege logonet,

¹⁶“Aakumi nen ndarak yi wae. Kat nen eyo mbanak ambi wagangge logomenggendik, At Yekura inom, Iterali mendek at inom ogogwaarak nogo inom, inake o, yinuk, eyo ti paga liiru mbanogo pege, ti'nuk, eyo alik ambi wagangge logomenggendik, Eyo yi ti, Eparayim mendek me, at Yutup inom, Iterali mendek at inom ogogwaarak nogo inom, inake o, yinuk, eyo ti paga liiru mbanogo pege,

¹⁷eeppunuk, eyo ti ambit keenggime wonage kaawak nduk, imbirak ambit tek kunogo pu o.

¹⁸Kunogo pege keenok, koreewi kat mendek nen yokkogo logonet, Yi eerak alom nanonduk eerak nogo yo'niret o, yinuk, kin wokkeegwi iinok,

¹⁹it yorage logonet, Aliku Itok Menggerak ALA nen yegerak nogo yi aret. Eyo mbanak at Yutup inom, Iterali mendek at inom ogogwaarak nogo inom, inake at Eparayim eenggime wonage nogo, waganogo at Yekura ageyo paga imbirak tek kunogo pege neenok, eyo ti, imbirak neenggime ambit aret arugun, yegerak, yoraamunggun o.

²⁰Yoraanuk, eyo mbanak paga liiru mbanogo pemenggendak nogo titik irage logonet,

²¹Aliku Itok Menggerak ALA nen yegerak nogo yi aret. An nen it Iterali mendek yi aakumi ndi aakumi inenggela'me ma'nogogwaarak wonogwe me nen kuwak eerogo wogonake, yi o ndi o wonogwe me nen kuwak eerogo piya wage, eeke logominggirik, wogoren it inanggween paga piya nagin o.

²²Piya nage logominggirik, it inanggween puut-puut paga time inanebunu ambit aret eerogo piyaminggirak wonogwe iigak, inanebunu mbere wonogwe, inoweewi inabu'me piinok menggam mbere wonogwe, eeko nogogwaarak nogo, ambinom eeko logogun lek aap inowe endagembogut ambit nen it abok aret at abu'me piinok, wone lengganogo yorage logogin o.

²³It maluk yungguk-melak mban eekwi nogo ambinom eekwi iyo, inagap ndake, maluk inoba lenggenak nogo, inabin koorogo piige, eerigin me, inagugi ogut aago inom, inagugiwak ogole warak mendek inom, alut eerit nugwi, wone yugu taganogo pit nogwe, eekwi paga maluk eerogo pakwi nogo ambinom eeko logogun lek o. It an napuri ogwe, ndi, an nen it inogoba aret age, eerugun o.

²⁴ Nayeloman Ndawut nogo inowe endagembogut a'nuk, wone lengganogo yorage logogin me, ndomba ndegeninaka kwak, it abok aret ndegeninaka ambiret aret arigin o. At ndegeninake kagak eeko logorak wone an yorage minggirak nogo ndak-ndak mugurok nogwe, ndi, wone lengganogo yorage minggirak nogo pippunuk, liirogon eekwi, eeko logogun o.

²⁵Ti eeko logonet, nggween it inombomini wonogogwam nayeloman Yakup wogoreegim nogome wonogo logogun o. It inom, inapuri inom, inombowologwe inom, mondok-mondok time aret wonogwe iigak, nayeloman Ndawut nen inowe endagembogut mondok-mondok aret logogin o.

²⁶It wone ambi inoba aga'lek iniki ugun tayenak logowak nduk, it ninom wone abuk nggaruk togon koonogo pigin o. Ninom wone abuk nggaruk togon koonogo pigin nogo ti, lek arigin lek mondok-mondok logowak nduk, koonogo pigin o. An nale'nggen inoba piige, ineebe ambik eerogo piige, nalut eeko menggam alik leenak it inenggela'me mondok-mondok logowak nduk, inake koonogo pege, eerigin o.

²⁷ An logowam it inenggela'me aret logogin me, an nen it inogoba aret age, ndi, it an napuri aret ogwe, eerugun o.

²⁸An nalut eeko menggam alik leenak nogo, it inenggela'me mondok-mondok wonage kenok, yi aakumi ndi aakumi nen Naliku ALA an nen aret it Iterali napuri logowak nduk leenogo piyareegirak nogo, ineenu arugun, yegerak, yoraamunggun o,” yinuk, an yo'nereegerak.