Read Western Dani Yetikiyen 38 Bible Online

Yetikiyen 38 - Western Dani bible

Yetikiyen 38

¹At Aliku ALA nen an yo'nege logonet,

² “Aakumi nen ndarak yi wae. Kena o nggween Magok paga na'nage logomenggendik, it o Metek mendek inom, o Tuban mendek inom, inowe endagembogut abu tiyanak endage Nggok nogo eeppuurak yoru o.

³Aliku Itok Menggerak ALA nen yegerak nogo yi aret o, yinuk, yoge logonet, It o Metek mendek inom, o Tuban mendek inom, inowe endagembogut abu tiyanak at Nggok nogo nimbirak ogoorak me,

⁴at ena nomonogo punuk, at ondogowak paga keele nggelenogo pit nage logominggirik, nigogo wumbi wage logonet, at awuri wim eeka inom, it at aguda paga kwi'na'nuk wim eekak li'luk aago nugwi inom, ineebe ambik aago inanggeemu nggwok kunduk, mbuuluk kunduk, yirik wooluwak ineenggime nutik wogwe abok aret at inom nigogo wumbiige,

⁵it yi aakumi ndi aakumi inom a'nuk wonogwe aap Peritiya mendek inom, Kuti mendek inom, it o Put mendek inom, nen inanggeemu kunduk, inabetagi omaawi mendek kunduk, yirik nogo at inom wumbiya wage, o Nggomet mendek ineegin warak abok aret inom, it o nda o omarip paga pa'nggwe Mbet-Togarama mendek ineegin warak abok inom, at inom wumbiya wage, eerigin o.

⁷Togop me, at inom, it ambik lombok at inom a'nuk kuwak eerak wonogwe inom, ineebe abok aret li'luk eeppunuk pipuk aago wonogwe iigak, at nen wone lengganogo yorage logowak o.

⁸Ne ambik ari nage kenok, at ambi nen wim eeriyak nduk yonggo pigin o. Peebi tahun ambik eeppunuk, o ambime wim eeko logonet, pup eerogo pereegwam obaane'me wurogo pugwi, aakumi time mendek it aakumi inanebunu ambik lombok inenggela'me wonogwe me nen kuwak eerogo Iterali wonogo menggam puut-puut yi oone lek ndi oone lek agagim nogome piya wagagerak time wonogwe, eeko menggam nogome tebeni woraawak nduk, yorigin o. It aakumi o time wonogwe nogo ti, yi aakumi ndi aakumi inenggela'me nen wumbiyaminggirak inanggween paga time it abok aret iniki ugun tayenak aret wonogwe me

⁹at inom, at awuri ineegin warak aago inom, it aakumi inanebunu lombok ambik aret inom, at inom a'nuk, o wiya nabuninuk warit wage menggi kwak o ti, tebeni unggwogo logonet, o iyaagi apit eerak menggi kwak o nggween ti paga etenggen kuurik lek eeppunuk, logogun,” yokkigi o, yinuk, an yo'negerak o.

¹⁰At Aliku Itok Menggerak ALA nen yegerak nogo yi aret. “Eekwi ne ti eyom paga eeriyak inikime koongge logonet, maluk lombok eeriyak koonigin o.

¹¹At nen koongge logonet, An mi'nage logominggirik, o kota-kota yugum pak wurik lek me oonda mbani unggwage, it aakumi inawi kota-kota pak wurik lek wonage, tungga ogobakkigirik lek ambe pan aago wonage, eerak kagak, aakumi iniki ugun tayenak inale'nggen mban wonogwe me, time inoba kwi'nari unggwage, eeke logominggirik,

¹²kugun wagangge, inamendek kabelogo wagangge, kota-kota langgu-langgu eerogo pereegwam obaane'me wurik me wonogwe nogo inom, it aakumi inanebunu lombok wonogwe inenggela'me nen kuwak eerogo piya wagagerak o nggween oolo time wonogo logonet, inaanggumi inom, inamindik-inamendek inom, ambik unde wonogwe nogo, neenggi omaawi paga tebenogo piinok, wagangge, eerigin o, yinuk, koonogo pigin o.

¹³Koonogo pemenggerak nogo it o Tebe mendek inom, o Nderan mendek inom, it aap yi mendek ndi mendek kungga o Taritit mendek inom, o Taritit enaagan-ambokan yaga'lelo lombok menggaarak inom, nen inaruk konembunuk, at yogo logonet, Kat nen aakumi inamendek kabelogo waakit nduk wagandak ya? Aakumi inagugun waganggwi, mbuti perak inom, emas inom, inaanggumi inom, inamindik-inamendek inom, kugun iya negen wonok nawak nduk, kawuri kuwak eeppiinok wogoren wagandak ya? yinuk, yorugun o.

¹⁴Togop aret me, aakumi nen ndarak yi wae. At Aliku Itok Menggerak ALA nen yegerak nogo yi aret o, yinuk, at Nggok eeppuurak nogo yoge logonet, Napuri Iterali iniki ugun tayenak wonogwe iinok, at liippigin lek ya? Liippigin aret me,

¹⁵at wonage menggim o nda o omarip paga pa'nggwe wonage me nen it aakumi inanebunu ambik lombok wim eeka wakaa'ngget ineebe alik negen aago abok aret kuda paga kwi'na'nuk inom woraagun o.

¹⁶Napuri Iterali tebenogo piyaawak nduk, o iyaagi nggween enete kuurik lek eerogo pege menggi kwak, togop aret eerit woraagun o. Ndi, peebi ne ambi paga at Nggok nogo ti, napuri nanggween paga wonogwe nogo tebenogo piyaawak nduk, an nen wonok woraagin me, yi aakumi ndi aakumi inigen iigak, at eeppege paga, Aliku ALA kikak nakeelik alik leenak menggerak kogo o, yinuk, an neebe ineenu arugun o,” yinuk, yegerak me, yokkigi o, yoreegirak.

¹⁷At Aliku Itok Menggerak ALA nen yegerak nogo yi aret. “O aa'nduk lombok, Aap ambi nen ndogop eeri woraagin o, yinuk, nayeloman mini yorage neegak it Iterali yoraga nen yorogo nogogwaarak nogo, at aap yi aret nogo lek a? An napuri tebenogo piyaawak nduk, Aliku ALA nen aap ti wonok woraagin o, yinuk, it an yorage neegak yoraga nen ne ti paga yorogwe iigak, yi tahun ndi tahun eeke nagagerak.

¹⁸Aap Nggok nen Iterali inanggween tebenggola wage ti eyom paga nanini kani kunik negen mi'narigin o, yinuk, Naliku Nitok Minggirak an ALA nen aret yagi o.

¹⁹Neebi lombok ee'nake, nanini kani kunik negen mi'nage, eeke logonet, ne ti eyom Iterali inanggween paga time o mi ndipuk mondok iya tit eerigin o, yinuk, yagi o.

²⁰Ti eeke logonet, yi yikwe ndi yikwe niyo nggwok laut paga wonage inom, yi towe ndi towe o oolo ya'i wiga agan nugwi inom, ndiimbu-nggwiya eyonggaame mendek inom, yi mendek ndi mendek o nggween paga inaanogum paga tu agan nugwi inom, yi aakumi ndi aakumi o nggween paga wonogwe abok aret inom, an netenggen neego logomenggaarik, inaganak wake kagak, yi puut ndi puut yanggunogo nagabit nage, puut eegwak-eegwak nggwi wonet wage, yugum pak wurik abok aret langgu-langgu nggween paga wambit nage, eerigin o.

²¹Iterali wonogo menggam puut-puut paga nen wooluwak wonok aap Nggok tebenogo pi woraawak nduk, inayonggo piminggirak wonok wogwe iinok, inagabiti nen at ore nen at ore ambi wakak eeko logogun o, yinuk, Naliku Nitok Minggirak an ALA nen aret yagi o.

²²Ndi, at inom, awuri ineegin warak inom, aakumi inanebunu ambik lombok at inom ogogwaarak nogo inom, it maluk eekwi onggo kugilingga inoba kwippiige, ineebe inoorogo piige, mayu lubu-lubu inoba wuppi wage, mayu kumulinggen inom, mayu negen kani kunik kwindagala aago inom, inoba kwippiige, eerigin o.

²³Ti eeriminggirak paga an mondok tiyanak minggirak inom, an kikak nakeelik alik leenak minggirak inom, neyaawak nduk, eerigin o. It aakumi inanebunu ambik lombok nen an neyaawak nduk, inenggaanom paga eeke neenok, it nen Naliku ALA an aret ineenu arugun o,” yinuk, yegerak me, yokkigi o.