Read Western Dani Yetikiyen 39 Bible Online

Yetikiyen 39 - Western Dani bible

Yetikiyen 39

¹“Aakumi nen ndarak yi wae. At Aliku Itok Menggerak ALA nen yegerak nogo yi aret o, yinuk, at Nggok nogo tebenogo puurak yoge logonet, It o Metek mendek inom, o Tuban mendek inom, inowe endagembogut abu tiyanak endage Nggok ti, nimbirak ogoorak me,

²at ena nomonogo punuk, o nda o omarip paga pa'nggwe nen nikkenok wage logominggirik, it Iterali wonogo menggam puut-puut tebenogo piyaawak nduk, pi woraagin o.

³Pi woraminggirak tebenogo piige kenok, eenggi kwaare'nggan wake neenok, eenggi tanep age logonet, eegin ndik togon wangge, eenggi abe'nggan wake neenok, omaale wonage nogo ngginu-ngginu wangge, eerigin o.

⁴Iterali wonogo menggam puut-puut ti paga at inom, awuri ineegin warak inom, yi aakumi ndi aakumi at inom ogogwaarak inom, abok aret inoorak wambit nagun o. Wambit nogwe iinok, an nen ineebe waganogo towe inenggaanggum nengga anebunu lombok abok aret inom, ndiimbu-nggwiya inom, inambi-mbiingga aret aruwak nduk, wogoraagin o.

⁵Yabu penaame time inoorak wambit nagun o, yinuk, Naliku Nitok Minggirak an ALA nen aret yagarak me, eerigin o.

⁶An nen kani kunik o Magok oba pege, yi aap ndi aap o niyo aa'nggi paga iniki ugun tayenak wonogwe nogo inoba kwippiige, eerigin me, eeke neenok, it nen Naliku ALA an aret ineenu arugun o.

⁷Nendage abu abe alik leenak nogo an napuri Iterali kaawak nduk eerigin me, it an nendage abu abe alik leenak nogo maluk eerogo pugwi iigak, an nen ambinom teppiyaagin lek, eeppiige neenok, yi aakumi ndi aakumi nen, Aliku ALA ti, it Iterali inogoba kikak nakeelik alik leenak menggerak at aret kogo o, yinuk, ineenu arugun o.

⁸Ti eeriyak nogo aret eeri woraagin o. Eeriyak eyom yagarak nogo abet aret eeri woraagin o,” yinuk, Aliku Itok Menggerak ALA nen aret yegerak me, yokkigi o.

⁹“Eeri wage kenok, it Iterali kota-kota wonogwe nogo wundi nogo logomenggaarik, wim eekak inanggeemu mbuuluk nggwok inom, ineegin-inomaale inom, yawi inookak eyo mbanak inom, inawooluwak inom, abok aret kani wurik negen eeppunuk, ti paga inambi larogo nunggwi iigak, tahun 7 aret eerigin o.

¹⁰Wim eekak yi mendek ndi mendek ti, Mbi lariyak ninaga'ni wurik aret o, yinuk, ti mban kunggo logonet, penaame time inaga'ni wuri nogwe, eyonggaame time inaga'ni muuri nogwe, eeko logogun lek o. Aakumi nen Iterali inamendek kugun wonok nogogwaarak nogo onggo it Iterali mendek nen it aakumi ti, inamendek togop aret kugun wonok wogwe, it aakumi nen Iterali inageerok kabekko'nok wundeegwaarak nogo, onggo togop aret it Iterali nen it aakumi ti, inageerok kabulogo kologwe, eerugun o,” yinuk, Aliku Itok Menggerak ALA nen aret yegerak me, yagi o.

¹¹“Ne ti eyom paga it Iterali wonogo menggam oonegen lagi wage menggim pa'nggwe tu niyo nggwok laut paga nogo menggam kobappaga time, at Nggok eebe taambuurak nggween mbanogo wogorigin o. At Nggok inom, at awuri ineebe ambik aago inom, ineebe time taambiigwi iinok, tu ti, non mbanogo pigin me, aakumi tu ti paga nogo logogun lek o. Togop me, o ti endage, Aap Nggok Awuri Ambik Aago Taambiyareegwam Kobappaga o, yinuk, yogo logogun o.

¹²It Iterali inanggween ti, obeelom aruwak nduk, it Iterali mendek nen aakumi inoorak ti, nggween taambiigwi iigak, tut 7 aret penenigin o.

¹³It o Iterali time wonogwe abok aret neenggi-keenggi nggween taambiigo logomenggaarak me, an neegin tiyak ari eyom paga it eeremenggaarak ti nogo inendage agan nogo logogun o, yinuk, Naliku Nitok Minggirak an ALA nen aret yagi o.

¹⁴Tut 7 penengge mbaremenggi, nggween time obeelom eerogo puwak nduk, o time aap ando inigen yambonit nugwi, it ando nen inoorak yumbunik wonogwe iyo, taambiigwi, eeruwak nduk, aap mande negen leenogo piyaagun o.

¹⁵It leenogo piyamenggaarak nogo nen o time yambonit nogo logonet, inowak kalenak ambiriluk ambi wonage kenok, yelok kaawak nduk, eyo yinogo pemenggaarak me, it taambiiga nogo wa'nuk, inowak kalenak ti, wonok aap Nggok Awuri Ambik Aago Taambiyareegwam Kobappaga nogome taambiya nogo logogun o.

¹⁶Kobappaga time kota ambi endage, Aap Ambik Aago, wonage o. It ti eekwi paga o time obeelom aret eerogo pugun o.

¹⁷ Aakumi nen ndarak yi wae. Naliku Nitok Minggirak an ALA nen yagarak yoroorak nogo yi aret. Towe anebunu lombok inom, ndiimbu-nggwiya inom, abok aret woraawak nduk koone nggwok paga yoret o. An Naliku ALA nen inake warogo pipuk eerogo piige, Iterali wonogo menggam puut-puut paga inake pipuk eerogo piige, eeke me, yi o ndi o nen kuwak eeri woraawak o. Wogo logomenggaarik, it nen enggaanggum inom, amiya inom, nonggo logogun o.

¹⁸Ndomba ngguunok inom, ndomba inaagalogwe inom, kambin ngguunok inom, lembu ngguunok inom, abok aret inamok warak o Mbatan mendek nonggo mengga kwak, aap wim wakaa'ngget inenggaanggum nunggwi, o nggween paga yime it aap nagawan-nagawan inamiya nunggwi, eeko logogun o.

¹⁹An nen warogo inake pipuk eerogo piminggirak nogo ti, amok nonggo logonet, inaanogum palek ari, inamiya nonggo logonet, kumili kunit nogwe, eerugun o.

²⁰Kuda inom, kuda paga nega aap inom, aap wim wakaa'ngget inom, aap wim eeka lombok abok aret inom, inooppiinok, pipuk eerogo piminggirak nonggo logonet, inaanogum palek yigin o, yinuk, Naliku Nitok Minggirak an ALA nen aret yagi o.

²¹Yi aakumi ndi aakumi inenggela'me an mondok tiyanak neyaawak nduk eeke logonet, it yi aakumi ndi aakumi abok aret it inomaluk onggo eeppiige nogo neegwi, neenggi omaawi lombok paga inooke nogo neegwi, eerugun o.

²²Nendage tiyanak neyaawak nduk, eeke ne ti paga nen nok aret eeppiinet nage paga it Iterali mendek nen Naliku inogoba Ala an aret ineenu arugun o.

²³Ndi, it Iterali mendek nen an yorage nagagirak liirogon mugurok noolik, mbo punuk, maluk eeko mbareegwa, nenete kumaappatinuk logonet, inawim ineenggime piige mbareegi, ineebe ambik wooluwak paga inookwi, eegu ambik wogoren mbo piya nogwe, eeruwak nduk, eeppiyareegirak nogo, yi aakumi ndi aakumi ineenu arugun o.

²⁴Eerit nogo logonet, maluk inoba lenggennage, wone yugu taganogo pugwi, eeko nogogwaarak mugurok, onggo ndak-ndak eeppiige, ndi, netenggen neyo kwak, kumaappatinuk wonage, eereegirak me, yagi o.

²⁵Togop me, Naliku Nitok Minggirak an ALA nen yagarak nogo yi aret. An nen o yogondak Yakup paga wiganak aa'nduk wonogogwa kwak obeelom eerogo piige, it Iterali mendek abok aret inabuwa mbake, ndi, an nendage kikak nakeelik alik leenak logowak nduk, niniki aganggen kerok togon eerit nage, eeke logogin o.

²⁶Eeke neegak, it Iterali ti, it inanggween paga aakumi ambi nen mbaaniiga'lek iniki ugun tayenak obeelom aret wonogo logonet kwe, an yorage nogo liippunuk, eeka'lek mbo paninuk, maluk eerit nogo nogogwaarak paga inenggali arit nugwi nogo, inami eerogo pugun o.

²⁷Yi aakumi ndi aakumi inenggela'me nen wogoren iniyokan piya wage, it inawim inanggween paga nen kuwak eerogo piya wage, eeke logominggirik, ne ti eyom paga it aakumi inanebunu ambik lombok inenggaanom it Iterali eeppiige paga an kikak nakeelik nalik leenak minggirak it aakumi ti, neyaagun o.

²⁸Ndi, yi aakumi ndi aakumi inenggela'me logowak nduk mbo piya nagagirak kwe, ti'nuk, inanggween paga lombok logowak nduk, ambi teppiyaagin lek, it abok aret wogoren piya woraminggirak ti paga Naliku inogoba Ala an aret ineenu arugun o.

²⁹An Naberiniki it Iterali mendek inoba piyaagin me, eeppiige neenok, it neegwi iyo, netenggen kumaappatinuk logogin lek aret o,” yinuk, at Aliku Itok Menggerak ALA nen aret yegerak me, yagi o, yinuk, yoragagirak.