Read Western Dani Yetikiyen 44 Bible Online

Yetikiyen 44 - Western Dani bible

Yetikiyen 44

¹Ti'nuk, aap nogo nen an niyokan Ala awi wurik oore'nggam oolo tu unggwogo logowam ena oonegen lagi wage menggim pa'nggwe koonak nogome pani wage mbareegi, tu ti, narak wonage kagagirak.

²Kage mbareegi, at Aliku ALA nen an yo'nege logonet, “Tungga yi, paakwi, aakumi ambiriluk ambi tu yi paga unggwi wogwe, eeriyak mondok mage me, narak mban logowak o. Iterali inogoba Naliku Ala tu yi paga muk unggwi wagarak me, tu yi mondok narak aret logowak o.

³Aap endagembogut ti, alik mban tu unggwogo logowam yi paga unggwi woraanuk akem time Naliku an ALA nenggaanom paga mbi nengge logowak o. Wone mbanggo logowam tu unggwogo logorak nogo yi paga aret unggwi wage, yi paga mban wundi nage, eeke logowak o,” yinuk, yo'nege kagagirak.

⁴Kage mbareegi, an wo'neren o omarip paga pa'nggwe tu unggwogo logowam unggunuk Ala awi wurik enaame pani unggwagagerak. Pani unggwage mbareegi, pekkage logonet, Aliku ALA abu tiyanak eya ambik aago nogo, Aliku ALA awi wurik me endak wa'nage kage nagagirik, nenete wanduk nggween paga ngginnagagirak.

⁵Ngginnage mbareegi, Aliku ALA nen an yo'nege logonet, “Aakumi nen ndarak yi wae. Naliku ALA nawi wurik me eekak yuurak wone yugu abok aret li'lak maloppit nage, karuk liirogon konengge, eeke logonet, an nawi wurik me time taani nen unggwogo logorak inom, taani nen unggwogo logorak lek inom, liippiige logot o.

⁶Liippiinok, it wone yugu eeriyak ineebi mbaka Iterali mendek yorage logonet, At Aliku Itok Menggerak ALA nen yegerak nogo yi aret o. It Iterali mendek ti, ogole warak mendek eerit nugwi nogo, ti kuli aret teppuwak o.

⁷It nen yi eekak ndi eekak ogole warak mendek eerit nogo logonet, aakumi inambik inagabolo mbanak lek iniki omaawi mendek nawi wurik alik leenak nogome wogoren piya unggwogo mbareegwa, nawi wurik maluk eerogo pugwi iigak, it an napuri ti, nale'nggen mbarikit nduk, mbi inom, amok inom, amiya inom, wo'nugo logonet kwe, ninom wone abuk nggaruk togon koonogo pereegurak nogo, lek eerogo pugwi,

⁸An namindik-namendek abu alik leenak nogo unde logorak it aret kwe, unde wonaga'lek logonet, nawi wurik me eeko logorak aap alik eeko logowak nduk, mippiigwi, eereegwaarak,” yegerak o.

⁹Aliku Itok Menggerak ALA nen ari logonet, “Aakumi inambik inagabolo mbanak lek iniki omaawi ti, an nawi wurik alik leenak me ungguurak lek o. It aakumi inambik Iterali inenggela'me wonogwe nogo kunduk, ungguurak lek mban o, yinuk, yoragagirak kwe kagak eereegwaarak o,” yinuk, yo'nege kagagirak o.

¹⁰“It aakumi Iterali nomo agan tu alik paga nogwe iigak, it Lewi mendek nen an mbo panugo nogogwaarik, an wonage neegak kwe, inagugiwak ayuk wurit nogo nogogwaarak me, maluk eeko nogogwaarak onggo eeppiyoorak ti, it inobaalombok aret inoba logogin o.

¹¹An nawi wurik alik leenak nogome eeko logonet, nawi wurik me inom, tu unggwit nogo logowam inom, arum wonogwe, ndi, nake warogo kani kuniyak wonok wogwe, nake warogo an wo'niriyak nogo, niri wogwe, eekwi iinok, inake warogo pugwi, ambi inake eeriyak age kenok, inenggaanom paga inake eekwi, eeko logorak op kwe,

¹²inagugi ogut inenggaanom paga it aakumi ti, inake eekwi paga Iterali mendek inaganak waganogo nggimbiyaawak nduk, eereegwaarak me, it maluk eeko nogogwaarak onggo eeppiyoorak ti, it inobaalombok aret inoba logogin o, yinuk, kumbuk mbaneegirak o.

¹³It nen an neebe unde logowak nduk, nowagam wogwe, namindik-namendek alik leenak nogo piga wogwe, nake abu alik leenak warogo wo'nugwi nogo koorok ari wogwe, eeriyak mondok mage o. Ogole warak lombok eerit nogo nogogwaarak paga inenggali ogogwaarak nogo, inenggali mbakak nogo logowak o, yinuk, Naliku Nitok Minggirak an ALA nen aret yagi o.

¹⁴Togop aret kwe, nawi wurik me unde logonet, ambi maluk age kenok eekwi, ndi, ambi eeriyak age kenok eekwi, eeko logowak nduk, mippiyaagin o,” yinuk, yo'nege kagagirak.

¹⁵“It Iterali mendek nen an mbo paninuk nomo agan tu alik paga nogwe iigak, an nawi wurik alik leenak me yabu li'lak eeko nogogwaarak it aap neebe unde Lewi mendek inanebunu Tarok paga wiganak nogo nen mban an nowagam wa'nuk, nenggaanom paga nake eekwi, nenggaanom paga nake warak amok inom, amiya inom, pugwi, eeko logowak o, yinuk, Naliku Nitok Minggirak an ALA nen aret yagi o.

¹⁶It nen mban nawi wurik alik leenak me unggwi wogwe, it nen mban nageyo ndoonak me ari wa'nuk, eeriyak an yorage nogo nenggaanom paga eekwi, eeko logowak o.

¹⁷ Togop aret me, it nen an nawi wurik oore'nggam akem time tu unggwogo logowam unggwi nanuk, nawi wurik oore'nggam akem time tu unggwogo logowam inom, an nawi wurik me inom, eeko logonet, inayum ndomba eeruwak paga penggaarak yirippunuk eeko logorak mage o. Ata, yum abe yawenak mendek mban yikkologo logomenggaarik, unggwi nanuk eeko logowak o.

¹⁸Yum abe yawenak mendek inanobak paga perenogo pakwi, inayum abe yawenak mendek inakom paga yirikkologwe, eeko logowak o. Liigak wundukwak, togwi yum yikkologo logorak mage o.

¹⁹ Ndi, nawi wurik oore'nggam endekenggwe napuri wonogwe me iya wunggo logonet, inayum alik leenak nogo paga aakumi mbaaniigwi iinok, maluk eerogo piyookwak, akem time eeko logonet inayum yiko logomenggaarak nogo, nggoorogo o ko alik leenak me time punuk, yum we'lek mendek yikko'nok iya wunggo logowak o.

²⁰ It ineeruwak inanobak puluk ko eerogo mbanggologwe, ineeruwak nggorek teppugwi, ti eerugwaarik o. Ata, ineeruwak tibik-tebek mban mbanggologo logowak o.

²¹ It aap an neebe unde nen an nawi wurik oore'nggam akem time unggwi nogo logonet kenok, amburu kumili aganaka mendek nenok, unggwogo logorak mage o.

²² It nen kumi nanu pugu inom, aap nen kumi mbo piyamenggaarak inom, wogonako logorak mage o. Ata, komologwe aap kigin wogonaka'lek Iterali paga wiganak kenok ilik, it aap an neebe unde inakuwi nanu piyamenggaarak kenok a, ti mban wogonako logowak o.

²³ It nen yi mendek ndi mendek eraambe liippogo logonet, Ambi ti, Ala ake eekak yuurak leenak kagi. Ambi yi, we ugun eekak yuurak ake kagi, yuwak nduk, napuri mamunirogwe, Ambi eeriyak mage aret kagi. Ndi, ambi eeriyak op aret kagi, yinuk, yelok kaawak nduk yorogwe, eeko logowak o.

²⁴Wone ambi age kenok, it an neebe unde nen inowak loongga negen logonet, eeko logorak an yorage nagagirak mugurok aret inawone amburu mbanggwi, inale'nggen nen laago lako logorak ne koonogo pereegirak nogo eeko logonet, Ndogop eeko logonu, yinuk, yorage nagagirak inom, wone lengganogo yorage nagagirak inom, pippunuk liirogon eekwi, ndi, nogo 6 yippunuk, ko'lu paga alik leenak logowak nduk eekwi, eeko logowak o.

²⁵ It aap an neebe unde nen inoba maluk eekkolookwak, aakumi kanggwi iinok, mbaaniyoorak mage o. Togop yugu aret kwe, it mendek liirogon inagalo ilik, inogoba a, inaput wulaga ilik, kolaga a, inowe-inawot aap a, iniriluk ogonggelo awo kolaga'lek a, it perak, mbaaniyoorak op aret o.

²⁶It mbaaniyamenggaarak inoba lu kolamenggaarak nogo, inabin koorogo punuk wonogwe iigak, ne 7 aret ari nawak o.

²⁷Ndi, an nawi wurik alik leenak oore'nggam akem time nawi wurik alik leenak me eeko logowok nduk, unggwogo logonet, it inomaluk lek eerogo piyoorak inake warogo wo'niruwak o, yinuk, Naliku Nitok Minggirak an ALA nen aret yagi o.

²⁸ It aap an neebe unde nogo yate kwak unde logorak an neebe aret me, it Iterali mendek yate negen nggween wogorage logonet, it an neebe unde inom wogoroorak mage o. Yi mendek ndi mendek unde logorak lek an neebe mban aret unde logowak o.

²⁹ Gandum anggen nake pi wogwe, inomaluk lek eerogo piyoorak nake warogo wo'nugwi, nake pugu lalembunuk, iniki aberak wonage me, obaane'me wo'niri wogwe, eekwi nogo abok ti, it aret nunggwi, yi mendek ndi mendek o Iterali time Naliku ALA nake nggomoorogo pugwi nogo ti, it aret unde eekkologwe, eeko logowak o.

³⁰Anggen iyaalok mbanak abu abe kero, nake pugwi, aakumi iniki ale'nggen nen yi mendek ndi mendek abok aret nake leenogo punuk, pi wogwe, eekwi nogo ti, it aap an neebe unde inamendek aret o. Nale'nggen it aakumi ugun inawi paga logowak nduk, anggen iyaalok abu abe yigirik nogo, mogonogo aa'nduk it an neebe unde wogora wogo logowak o.

³¹ It aap an neebe unde nen yi towe ndi towe inom, ndiimbu-nggwiya inom, ti mendek kambak abok aret waganogo nunggwi, nonggo logonet eegu pugwi nogo waganogo nunggwi, eeko logorak mondok mage o,” yinuk, ari kagagirak.