Read Western Dani Yetikiyen 47 Bible Online

Yetikiyen 47 - Western Dani bible

Yetikiyen 47

¹ Ti'nuk, aap nogo nen an wo'neren Ala awi wurik me tu unggwogo logowam pani wage kagagirak. Wage kage neegak, Ala awi wurik ena oonegen lagi wage menggim pa'nggwe wonage me, tu unggwogo logowam abu'me time nen niyo nggwok ambi wungge nagagerik, oonegen lagi wage menggim pa'nggwe time nage kagagirak. Niyo nogo ti, Ala awi wurik abu'me o ame paga pa'nggwe nen wundi wage nagagerik, ake warogo kani kunggo logowam o ame pa'nggwe eraanu time nen ena oonegen lagi wage menggim time nage kagagirak.

²Nage kage neegak, at nen tu unggwogo logowam o omarip paga pa'nggwe ti paga nen an wo'neren wungge nagagerik, endekenggwe time nen wo'neren nomorogon tu unggwogo logowam endekenggwe ena oonegen lagi wage menggim pa'nggwe time pani nage mbareegi, niyo nogo o ame pa'nggwe nen nage kagagirak.

³Kage neegak, aap ti, keele wakkagak eenggime wonok oonegen lagi wage menggim pa'nggwe nage nagagerik, niyo nogo, metet lima ratus paga wakkage nagagerik, wo'neren niyo nogo inikime pani unggwage mbareegi, niyo alobok ti, nandelen kuli age kagagirak.

⁴Kage mbareegi, ti'nuk, at nen niyo nogo, metet lima ratus paga ambinom wakkage nagagerik, wo'neren niyo nogo inikime ambinom pani unggwage mbareegi, niyo alobok ti, nendobanggun kuli age kage, ti'nuk, metet lima ratus kuli ambinom wakkaanuk, wo'neren niyo nogo inikime ambinom pani unggwage mbareegi, niyo alobok ti, naa'ndok kuli ari laganggerak kage, eeke nagagerik,

⁵ne ambinom metet paga lima ratus kuli wakkage nagagerik, niyo nogo abu kole aakumi wunda noorak meek aloboguk ambik kenok, aakumi ngguu'mo wariyak ndak aret age kage neegak,

⁶at nen an yo'nege logonet, “Aakumi nen ndarak yi wae. Yi eeke nogo kenegen kagan ilik?” Yo'nege nagagerik, niyokan wo'neren niyo nogo aa'nggi paga pani wagagerak.

⁷Pani wage mbareegi, niyo nogo aa'nggi yi pagan ene pagan eyo ambik lombok wonage kagagirak.

⁸Kage mbareegi, at nen an yo'nege logonet, “Niyo yi, o oonegen lagi wage menggim pa'nggwe nage me, o Yoraran kobappaga nanuk, niyo kole yenggenak Mayu Ale Menggim kuni nage kenok, niyo ale nogo obeelom eerogo pigin o.

⁹Niyo yi, nage menggim iniki me yi mendek ndi mendek nugut-tiyak agan nugu menggaarak mendek abok aret ambik wigannarit nogo logogun o. Niyo yi ti, yi kole yenggenak me, unggwi nage logonet, niyo ale nogo, abe eerogo pigin me, yi yikwe ndi yikwe ambik nugut-tiyak agan nugwi, niyo yi nage menggim inikime anebunu lombok abok aret ineenik wonogwe, eeko logogun o.

¹⁰Togop aret eerogo pigin me, it aap yikwe wagangga nogo, niyo ti aa'nggi paga o En-Nggeri panggombunuk, nok, o En-Egalayim kuli abok aret yagabit a'nuk, yikwe wagangga yum ti, manabit nanuk, ambet paga time wolonogo pit nogo logogun o. Niyo kole yenggenak laut paga yikwe inete alitik-alitak lombok wonage menggi kwak, niyo yi paga yikwe inete alitak lombok wonage logogin o.

¹¹Togop eerigin kwe, purok me inom, niyo amburu wungge logowam inom, ti perak, abe arigin lek me, mayu waganggak aret logogin o.

¹² Niyo aa'nggi yi pagan, ene pagan, yi eyo ndi eyo inete alitak lombok anggen abe yege menggerak mendek logogin me, engga mbuk arigin lek ki aret wonage, ndi, anggen yugu lek aga'lek yugu mban wonage, eeke logogin o. Niyo Ala awi wurik me nen wundi wage logonet, wogoge logogin me, tut ambi penenggak eeke paga anggen yegak mban eeke logogin o. Anggen yemenggerak ti paga it aakumi inambi-mbiingga negen age, ndi, engga ti paga aakumi obeelom eeppiiga iinggen aret age, eeke logogin o,” yinuk, yo'nege kagagirak.

¹³Aliku Itok Menggerak ALA nen yegerak nogo yi aret. “It Iterali inanebunu 12 mendek inanggween yate unde eeppatinuk logowak nduk, tumburogo kuli mbanogo wogorage logonet, at Yutup nggween mbere mbanogo wogoriyak kwak wogoroorak nogo yi aret o.

¹⁴Nggween yi, eelu-ando mbaniyak lek ndak-ndak aret mbanogo wogorogo logowak o. Kit abet aret wokkiraagin o, yinuk, nendage kumbatinuk, kumbuk mbangge logonet, inombomini wogoragagirak me, nggween yi, yate kwak it inanggween aret arigin o.

¹⁵Nggween kole nenaarak kuli pit noorak nogo yi aret. O omarip paga pa'nggwe kuli puurak ti, niyo nggwok yenggenak laut panggombunuk, nok, tu o Ketelon nawak nduk nogo menggam o Kamat kagak, o Terat kagak,

¹⁶o Mberota kagak, nok, o Ndamitik inom, o Kamat inom, oolo kota Tiberayim nen nok, o Kawuran nggween kuli mbanak wonage kota Katat-Enom ti kuli pi noorak o.

¹⁷O omarip paga pa'nggwe kuli puurak ti, niyo nggwok yenggenak laut panggombunuk, nok, o Kamat nggween kuli mbanak o omarip paga pa'nggwe wonage kagak, o Ndamitik nggween kuli pugu paga o omarip paga pa'nggwe mugurok o Katat-Enom kuli pi noorak o. O omarip paga pa'nggwe nggween kuli puurak nogo ti aret.

¹⁸Ndi, oonegen lagi wage menggim pa'nggwe kuli puurak nogo ti, o Kawuran inom, o Ndamitik inom, oolo kagak kota Katat-Enom nen o Nggileyat inom, o Iterali inanggween paga inom, oolo kagak niyo Yoreran ndirok mugurok niyo Mayu Ale Menggim yenggenak nen nok, niyo yenggenak irip me o Tamat kuli pi noorak o. Oonegen lagi wage menggim pa'nggwe nggween kuli puurak nogo ti aret.

¹⁹O ame pa'nggwe nggween kuli puurak nogo ti, o Tamat panggombunuk, nok, o Kareti koorok niyo eneeri ambik wungge menggim Meriba nen nok, o Metit kuli paga niyo nage nogo mugurok niyo nggwok yenggenak laut kuli pi noorak. O ame pa'nggwe nggween kuli puurak nogo ti aret.

²⁰Ndi, oonegen kilu yi nage menggim pa'nggwe nggween kuli puurak nogo ti, niyo nggwok yenggenak laut ambet paga mugurok o Kamat nogo menggam kuli pi noorak. Oonegen kilu yi nage menggim paga pa'nggwe nggween kuli puurak nogo ti aret.

²¹Nggween yi, it Iterali nen inanebunu lenok lombok tumbukkolaawak o.

²²Tumbukkologo logonet, it Iterali inom, it aakumi inambik inom wonogwe nogo inom, inom logonet ndaganabemenggaarak nogo inom, “It ti, nit Iterali ndarak ninom ndak-ndak aret o,” mba'nuk, Iterali inanebunu lenok ineyate kwak nggween tumbukkologo logonet, it inom unde eeppatinuk logowak nduk, tumburiraawak o.

²³Ndi, it aakumi alik mendek ambi it Iterali inanebunu ambi inenggela'me wonogwe iinok, nggween it Iterali ineyate kwak kologwe nogo mendek it ineyate kwak unde eekkolaawak nduk, eegu mbanogo it wogorogo logowak o,” yinuk, at Aliku Itok Menggerak ALA nen aret ari kagagirak o.