Read Western Dani Yetikiyen 48 Bible Online

Yetikiyen 48 - Western Dani bible

Yetikiyen 48

¹“Inanebunu lenok lombok nggween tumburiroorak nogo inendage yi aret. O omarip paga pa'nggwe lombok nggween kuli pemenggaarak nogo ti, inanebunu Ndan mendek nggween kuli mbanogo wogoroorak ti aret. It inanggween mbanogo wogoroorak nogo ti, niyo nggwok yenggenak laut panggombunuk, tu Ketelon nawok nduk, nogo logowam o Kamat kagak, o Katat-Enom kagak, o Kamat o omarip paga pa'nggwe kagak, o Ndamitik o omarip paga pa'nggwe kuli pemenggaarak nogo, mugurok wogoroorak ti aret o. It inanebunu Ndan mendek inanggween oonegen lagi wage menggim pa'nggwe kuli nen nok, kilu yi nage menggim kuli mbaniyak nogo ti aret.

²It Ndan mendek inanggween kuli mbanemenggam nogo panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, it Atet mendek mbanogo wogorogwe,

³it Atet mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, it Natali mendek mbanogo wogorogwe,

⁴it Natali mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, it Manate mendek mbanogo wogorogwe,

⁵it Manate mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, it Eparayim mendek mbanogo wogorogwe,

⁶it Eparayim mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, it Uruben mendek mbanogo wogorogwe,

⁷it Uruben mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, it Yekura mendek mbanogo wogorogwe, eeruwak o,” yinuk, ari kagagirak o.

⁸“It Yekura mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, alik ambi eeriyak ake me, ambe wiganak agi-ogu ti, metet dua belas ribu lima ratus kuli wakkogwe, ndi, irip aru-ogwe nggorek ti, it Iterali inanebunu lenok lombok inanggween oonegen lagi wage menggim pa'nggwe kuli nen nok, kilu yi nage menggim pa'nggwe kuli mbanemenggaarak nogo ndak-ndak wakkogwe, eeppunuk, oolo taati an nawi wuriyak ake leenogo puwak o.

⁹Nggween ti ando Naliku ALA nake leenogo puurak nogo ti, irip nggorek aru-ogwe ti, metet dua belas ribu lima ratus kuli wakkogwe, ndi, ambe agi-ogu ti, metet lima ribu paga wakkogwe, eeruwak o.

¹⁰Nggween ti ando an nake puurak mbanemenggam nogo ti, it an neebe unde inake aret me, wakkogo logonet, irip nggorek aru-ogwe o omarip paga pa'nggwe inom, o ame pa'nggwe inom, ti, metet dua belas ribu lima ratus kuli wakkogwe, ndi, ambe wiganak agi-ogu oonegen lagi wage menggim pa'nggwe inom, kilu yi nage menggim pa'nggwe inom, ti, metet lima ribu kuli wakkogwe, eeremenggam oolo muundak nogo ti, Naliku ALA nawi wuriyak ake aret.

¹¹Nggween mbanemenggaarak yi nogo ti, it Iterali mendek tu abe kagak nomo agan nogwe iigak, it Lewi mendek inom nomo agan nogogwaarak kwak eerulik, nake li'lak eeko nogogwaarak it an neebe unde nake eeka leenak inanebunu Tarok nogo mendek inake aret o.

¹²Nggween ti ando nake leenogo mbanemenggam nogo ti, it Lewi mendek eeko logowam mbanemenggaarak panggonak me, abu alik leenak aret logowak o.

¹³It aap an neebe unde eeko logorak mbanemenggam imbirak tabonak nogo ti, it Lewi mendek logorak mbanemenggam wakkogo logonet, irip nggorek aru-ogwe ti, metet dua belas ribu lima ratus paga wakkogwe, ambe wiganak agi-ogu ti, metet lima ribu paga wakkogwe, eeppunuk, wogoraawak o. Irip nggorek aru-ogwe ti, metet dua belas ribu lima ratus wakkogwe, ndi, ambe agi-ogu ti, metet lima ribu paga wakkogwe, eeruwak o.

¹⁴It inanggween logorak mbanemenggam nogo ti, Naliku ALA nake leenogo puurak nggween abu abe me aakumi alik ineenggime ariyak mage o. Nggween ti, it nen onggo kunggologwe, onggo-onggo eekwi, eeriyak abu mage mban o.

¹⁵Nggween oolo ambi nake leenogo puurak ndiinogo pemenggaarak nogo ti, wakkogo logonet, ambe agi-ogu metet dua ribu lima ratus paga wakkogwe, ndi, irip nggorek aru-ogwe metet dua belas ribu lima ratus paga wakkogwe, eeremenggam nogo ti, o kota eerogo pit nogo logonet, o wurit noorak ake, ndi, inaanggumi inagari'ngga nenet noorak ake, eerogo puwak o. Nggween mbanemenggam oolo taati o kota wuriyak nogo ti,

¹⁶wakkogo logonet, o omarip paga pa'nggwe inom, o ame pa'nggwe inom, ti, metet dua ribu dua ratus lima puluh paga wakkogwe, ndi, oonegen lagi wage menggim pa'nggwe inom, kilu yi nage menggim pa'nggwe inom, ti, metet dua ribu dua ratus lima puluh kuli wakkogwe, eeruwak o.

¹⁷Ndi, o kota enaagan-ambokan nggween we teppemenggim iri'ngga nenet nogo logowam o omarip paga pa'nggwe inom, o ame pa'nggwe inom, ambe wiganak ti, metet seratus dua puluh lima paga wakkogwe, ndi, oonegen lagi wage menggim paga pa'nggwe inom, kilu yi nage menggim pa'nggwe inom, ambe wiganak ti, ndak-ndak metet seratus dua puluh lima paga wakkogwe, eeruwak o.

¹⁸Ando ndiinogo pemenggaarak nggween an nake leenogo puurak imbirak tabonak irip nggorek ndak-ndak nogo ti, oonegen lagi wage menggim pa'nggwe wakkogo logonet, metet lima ribu paga wakkogwe, ndi, oonegen kilu yi nage menggim pa'nggwe wakkogo logonet, metet lima ribu mban wakkogwe, eerogo pemenggaarak nogo ti, it o kota yabu eeko logomenggaarak nen inambi noorak inake aret o.

¹⁹It inanebunu Iterali mendek abok aret o kota ari woraanuk eeko logomenggaarak nogo nen nggween ti paga ineyabu eekkologo logogun o.

²⁰Nggween ando nake mbanemenggaarak abok aret ti, irip agi-ogu inom, aru-ogwe inom, nggorek imbirak ndak-ndak metet dua belas ribu lima ratus paga wakkagak eerogo pugun me, nggween irip-ambe metet ndak-ndak wakkamenggaarak nogo ti, nake leenogo mbanemenggaarak ti inom, o kota logowam mbanemenggaarak inom, At ake leenak aret logowak o, yinuk, nake leenogo puwak o.

²¹Nggween nake mbanggwi, o kota logorak mbanggwi, eeremenggaarak peenok-peenok we teppemenggam ti, aap endagembogut nogo ake aret o. At anggween mbanogo pemenggaarak nogo ti, nggween an nake mbanemenggam irip nggorek metet dua belas ribu lima ratus paga wakkamenggaarak kuli nen nok, Iterali inanggween kuli mbanemenggaarak oonegen lagi wage menggim pa'nggwe wonage nogo ti kuli ari nage, ndi, nggween nake mbanemenggam metet dua belas ribu lima ratus paga wakkamenggaarak peenok ti, Iterali inanggween kuli mbanemenggaarak oonegen kilu yi nage menggim pa'nggwe wonage nogo ti kuli ari nage, eerigin o. At anggween peenok-peenok nakkagak nggween nake mbanemenggaarak nogo ti, an nawi wuruwam oolo lombok time aret logowak o.

²²Togop me, nggween it Lewi mendek logowam inake mbanggwi, nggween o kota logorak ake mbanggwi, eeremenggam nogo ti, aap endagembogut anggween mbanemenggaarak oolo taati aret wonage, ndi, aap endagembogut anggween mbanemenggam agi-ogu ti, it Yekura inom, Mbeniyamin inom, inanggween mbaremenggam oolo taati aret wonage, eerak logogin o.

²³It inanebunu Iterali ando inanggween mbanogo wogoroorak nogo yi aret. It Mbeniyamin mendek inanggween mbanemenggam nogo ti, oonegen lagi wage menggim pa'nggwe nen nok, kilu yi nage menggim pa'nggwe kuli mbanogo wogorogwe,

²⁴it Mbeniyamin mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, it Timeyon mendek mbanogo wogorogwe,

²⁵it Timeyon mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe kuli ti, it Itakat mendek mbanogo wogorogwe,

²⁶it Itakat mendek inanggween mbanemenggam panggombunuk, oonegen lagi wage menggim nen nok, kilu yi nage menggim pa'nggwe ti, it Tebulon mendek mbanogo wogorogwe,

²⁷it Tebulon mendek inanggween mbanemenggam panggombunuk, oonegen lagi wage menggim pa'nggwe nen nok, kilu yi nage menggim pa'nggwe ti, it Nggat mendek mbanogo wogorogwe, eeruwak o.

²⁸Ndi, at Nggat mendek inanggween mbanemenggam o ame pa'nggwe kuli nogo ti, it Iterali inanggween kole pemenggam o ame pa'nggwe kota Tamat panggombunuk, nok, o Kareti koorok niyo eneeri ambik wungge menggim Meriba nen nok, o Metit kuli mbanak paga niyo nage nogo mugurok niyo kole yenggenak laut kuli pi nawak aret o.

²⁹It inanebunu lombok Iterali inanggween ineyate kwak unde eeppatinuk logowak nduk, mbanogo wogoroorak ti aret o,” yinuk, at Aliku Itok Menggerak ALA nen yegerak me, yagi o.

³⁰ “O kota nen endekem wundi nogo logorak tu nogo yi aret. O omarip paga pa'nggwe yugum yagat wuremenggaarak irip nggorek metet dua ribu dua ratus lima puluh wakkagak eerugun ti, tu wundi nogo logorak kenagan wonage, ndi, o kota tu wundi nogo logorak ti, it Iterali inanebunu ndak-ndak toonogo pugwi, eerugun me, ambi endage ti, Uruben Arungga Mbanak o, yogwe, ambi ti, Yekura Arungga Mbanak o, yogwe, ndi, ambi ti, Lewi Arungga Mbanak o, yogwe, eeko logogun o.

³¹

³²O kota oonegen lagi wage menggim pa'nggwe yugum yagat wuremenggaarak nggorek metet dua ribu dua ratus lima puluh wakkagak eerugun ti, tu wundi nogo logorak kenagan logogin me, ambi ti, Yutup Arungga Mbanak o, yogwe, ambi ti, Mbeniyamin Arungga Mbanak o, yogwe, ndi, ambi ti, Ndan Arungga Mbanak o, yogwe, eeko logogun o.

³³O kota o ame pa'nggwe yugum yagat wuremenggaarak irip nggorek metet dua ribu dua ratus lima puluh wakkagak eerugun ti, tu wundi nogo logorak kenagan logogin me, ambi ti, Timeyon Arungga Mbanak o, yogwe, ambi ti, Itakat Arungga Mbanak o, yogwe, ndi, ambi ti, Tebulon Arungga Mbanak o, yogwe, eeko logogun o.

³⁴Ndi, o kota oonegen kilu yi nage menggim pa'nggwe yugum yagat wuremenggaarak irip nggorek metet dua ribu dua ratus lima puluh wakkagak eerugun ti, tu wundi nogo logorak kenagan mban logogin me, ambi ti, Nggat Arungga Mbanak o, yogwe, ambi ti, Atet Arungga Mbanak o, yogwe, ndi, ambi ti, Natali Arungga Mbanak o, yogwe, eeko logogun o.

³⁵O kota yendok-wandok irip nggorek wakkogo logonet metet sembilan ribu paga wakkaagun o. Ne ti paga nen o kota ti endage, ALIKU ALA YIME AGAARIK, yogo logogun o,” yinuk, yegerak me, ti aret yagi o.