Read Western Dani Yetikiyen 5 Bible Online

Yetikiyen 5 - Western Dani bible

Yetikiyen 5

¹Aliku ALA nen an yo'nege logonet, “Aakumi nen ndarak yi wae. Paloowi ngget ambik wagangge logomenggendik, inamboro mbangga kwak eeppunuk, keeruwak mbanggolage, kamboro mbanggolage, eeke logomenggendik, aaninggin wakkaanuk, kenagan mogonogo pu o.

²Mogonogo punuk, o kota oba kwi'nari ungguurak wakkagak eeke logonet, Nogo ndogop yuurak o, yugu nogo abu aret age kenok, keeruwak mbanak ambi mogonak nogo, o kota ogut eerak eraanu kani kungge, ambi mogonak nogo, o kota enaagan-ambokan waruk ti paga mbanogo wuppit nage, ndi, ambi mogonak nogo, o wiya wage paga mak eerogo nappege, eerumunggun o. Ndi, o wiya wage paga mak eerogo nappemenggendak nogo, an nen wooluwak nutik muguren nage logogin o.

³Ndi, keeruwak ambitak nggigik eerogo kayum yirik irip paga nggerenogo puurak kwe,

⁴ambitak nggigik eerogo kani kunik me mbo mambemenggendak kani aret nawak o. Time nen kani wunuk agan wundi wage logonet, it Iterali mendek abok aret nenet nage logogin o.

⁵Naliku Nitok Minggirak an ALA nen, Yi aakumi ndi aakumi inawi eraanu wanggerak wonogwe iigak, o kota oolome lombok pereegirak ti, kota Yerutalem yi aret kwe,

⁶yi aakumi ndi aakumi inom, yi o ndi o wonogwe inom, at eraanu wanggerak wonogwe nogo ti, an noone yugu kunduk, wone lengganogo yorage nagagirak kunduk, Eeko logorak nineebi o, yinuk, mbo pereegwaarak nogo ti, iya negen kwe, at Yerutalem ti, maluk eerit nage logonet, mbo pereegerak ti perak, mondok iya lombok aret o. Noone yugu nogo mbo pege, wone lengganogo yorage nagagirak nogo mugurok naga'lek taganogo pugwi, eereegwaarak o,” yinuk, an yo'nege kagagirak.

⁷Togop me, at Aliku Itok Menggerak ALA nen yegerak nogo yi aret. “Yi aakumi ndi aakumi enaagan-ambokan wonogwe ti, inobaabut maluk negen wonogwe kwe, at Yerutalem ti perak, obaabut abu maluk lombok wonage, an noone lengganogo yoge nogo mugurok naga'lek mbo pege, eeko logorak wone nogo eeka'lek taganogo pege, it yi aakumi ndi aakumi enaagan-ambokan wonogwe nogo nen eeko logorak wone lengganak nogo kunduk, eeka'lek mbo pege, eeke menggerak,” yegerak me, kat o Yerutalem yokkigi o.

⁸At Aliku Itok Menggerak ALA nen ari logonet, “Togop me, at Yerutalem ti, nimbirak ogookkolage, yi aakumi ndi aakumi inigen iigak maluk onggo aaninggin oba kwippege, eerigin o.

⁹At ogole warak mendek alut eerit nage nogo, an neebi lombok mbake me, an nen eeppegeelik mendek at eeppege, ndi, peebi at eeppuurak lek mendek eeppege, eerigin me,

¹⁰ at enggela'me time nen it inogobamini nen inapuri lombok inoorogo nunggwi, it inapuri nen inogobamini inoorogo nunggwi, eeko logogun o. Maluk onggo aaninggin oba kwippege logonet, it ando yumbunik nogo o wiya kwak yumbunogo mappiyaagin o.

¹¹At nen ogole warak ogut eerak an nawi abu alik leenak wurik me mambege logonet, maluk eerogo pege, ogole warak mendek eerit nogo logowak nduk teppiige, eeke paga an nen obeelom eeppege, abuwa mbake, abuwa nen teppege, eeke nogo, ambinom eeppege logogin lek o, yinuk, Neenik Naliku Nitok Minggirak an ALA nendage kumbatinuk, yagi o.

¹²O kota Yerutalem inikime time at aagalogwe ando mogonak kugilingga paga nen ilik, mbi noogelo paga nen a, kanggwi, kota pak wurik endekem ando mogonak wooluwak paga inoorak kanggwi, ndi, ando mogonak o wiya irip-irip warit nage menggi kwak mappiige logominggirik, nawooluwak nutik muguren nage neenok kanggwi, eerugun o.

¹³Ti eekwi iinok, nanini wungge nogo lek age, nanini nen eeppiyoorak mbake nogo tayok ari, Abu ndak-ndak aret eeppigi o, yinuk, nini tayok ari, eerigin o. Nanini mbake nogo abok aret eeppiyaminggirak lek age kenok, Aliku ALA mondok anini mbake logonet yo'niragaarak kogo o, yinuk, ineenu arugun o.

¹⁴Kota Yerutalem ti, yigirik-noonom eerogo pege, yi aakumi ndi aakumi at enaagan-ambokan wonage nogo, tu ti paga nogo logonet, eeriminggirak inigen kenok, Yogobi ariyak kagak wonagaarak, ha! yinuk, yogo logowak nduk eeppiige, eerigin o.

¹⁵An nanini mbake, niniki aagi wungge, noone lok togon mberege, eeke logonet, maluk onggo eeppege neenok, it yi aakumi ndi aakumi enaagan-ambokan wonogwe nogo nen, at meek eerogo pugwi, Op togon eeppigi, yinuk, Kayik a! yogwi, pekkenok inagabiti mbakwi, At paga ninamineeri ne agan nage yi, iya, yogwe, eerugun o, yinuk, Naliku an ALA nen aret yagi o.

¹⁶Maale namburogo nappogo mengga kwak, it kambuwak nduk, mbi noogelo mondok iya lombok inoba nappi wage, mbi abu nen yagan yobak-nggolak wakak mban eeko logowak nduk, inambi lek eerogo piige, eerigin o.

¹⁷ Mbi noogelo inoba nappi wage, inanini warak penaame menggaarak mendek inowagam nappi wage, eeke neenok, unggwi wogo logomenggaarik, inapuri ineebe lek eerogo nagun o. Kugilingga inoba kwippiige, inamiya ndoonit nawak nduk eeppiige, wooluwak paga inooruwak nduk nappiya wage, eerigin o, yinuk, Naliku ALA nen aret yagi,” yegerak me, yokkiragi o, yinuk, yoragagirak.