Read Western Dani Yetikiyen 7 Bible Online

Yetikiyen 7 - Western Dani bible

Yetikiyen 7

¹At Aliku ALA nen an yo'nege logonet,

²“Aakumi nen ndarak yi wae. Naliku Nitok Minggirak an ALA nen it Iterali inanggween yoriyak nogo yi aret. Age yobok yi waga o. Inanggween irip agi-ogu, aru-ogwe, eeppuurak nogo muk panggoni waga o.

³Iterali wonogo menggam nanini inoba piige, ineraambe maluk wonogwe nogo ndak-ndak inowak looninake, maluk ogole warak mendek eerit nogo menggaarak onggo ndak-ndak aret eeppiige, eeriyak eyom o yogondak aret panggoni waga o.

⁴An nen it inabuwa mbake, inarigi nen teppiige, eerigin lek it ineraambe maluk wonogwe ti ndak-ndak onggo inoba piige, inenggela'me maluk ogole warak mendek eerit nugwi nogo onggo eeppiige, eeke neenok, it nen Naliku ALA an aret ineenu arugun o,” yinuk, yo'negerak me, yokkiragi o.

⁵Aliku Itok Menggerak ALA nen yegerak nogo yi aret. “Aaninggin ambi inoba ari wage, ambi inoba ari wage, eekak eeke kaagun o.

⁶It eeppiyoorak eyom ari wage, it eeppiyoorak eyom panggoni wage, it tebenogo piyoorak eyom muk kin age, abu aret wage, eekerak o.

⁷It nggween ti paga menggaarak nogo aaninggin-paaninggin inoba ariyak eyom wage, eeppiyoorak eyom koonak nogo ari wage, eeginaburak ne nogo muk wonage, eekerak me, it menggam puut-puut paga time inale'nggen mbakwi lek iniki ma'nogo logonet, noone-koone agan nugu agaarik o.

⁸An nanini inoba pege, nanini abok nggwik togon inoba kilirogo piinet nage, eerikit nduk, eeke me, ineraambe maluk wonogwe nogo ndak-ndak aret inowak looninake, maluk ogole warak lombok eerit nogo menggaarak nogo, onggo ndak-ndak aret eeppiige, eerigin o.

⁹An nen inabuwa inombake, inarigi nen teppiige, eerigin lek ineraambe maluk wonogwe ti ndak-ndak aret onggo inoba piige, inenggela'me maluk ogole warak mendek eerit nugwi nogo, onggo eeppiige, eeke neenok, it nen Naliku ALA an nen aret ineebe lek eerogo piige ineenu arugun o.

¹⁰Ti eeppiyoorak ne nogo ari wage, abu aret panggoni wage, aaninggin-paaninggin inoba kwi'nage, it aakumi inogogumbuk nen eerit nugwi nogo wigak ari, iniki tiyappatit nugwi ti mendek mban nik ari, eeke agaarik o.

¹¹Iniki worokot logonet agan nugwi paga ti mendek mban wigak ari logonet, it aret ineebe inom, inamindik-inamendek inom, inamendek abu kigirikwe lombok wonage nogo inom, ambi teppaka'lek abok lek eerogo pako agaarik o.

¹²Ti eeppiyoorak eyom ari wage, eeginaburak ne abu koonak nogo panggo ari, eeke agaarik o. Maluk onggo Naliku ALA nanini aakumi abok aret inoba kwippiyaakit nduk eeke me, it aakumi inoona kunggologwe nogo iniki ale'nggen mbakwi, ndi, aakumi kunggolaawak nduk, inamendek porogo wonogwe nen iniki wakkologwe, eerugwaarik o.

¹³It aakumi abok aret eeppiyoorak kabinggaanggo paga yokkigirak nogo ti, mbeyok yigin lek me, at anggween kunemenggerak nogo peebi unde eekkola waga'lek kagak aret kambigin o. It aakumi inoona kunggologwe, aakumi kunggolaawak nduk, inamendek porogo wonogwe, eekwi nogo nen maluk eerit nugwi paga ineebe inili yikkolaga'lek inenggaawak lek eerogo patugun o.

¹⁴Nanini it abok inoba piyoorak koonak nogo muk ari wagaarak me, wim inom eeruwok nduk oone nggwok eeka trompet nogo oone pu eekwi, yi mendek ndi mendek wim eekak pipuk eekwi, eeremenggaarak kwe, aap ambit iluk ambi wim eeri unggugun mondok lek aret o,” yinuk, yegerak me, yoragagirak.

¹⁵“O kota endekem paga wooluwak mik-kwit aago wonage, o kota akem ti, kugilingga inom, mbi noogelo inom, wonage, eerak me, it o kota endekem wonogwe kenok, wooluwak paga inoorak kanggwi, o kota akem time wonogwe nogo, mbi noogelo paga inom, kugilingga paga inom, nen aret kanggwi, eeko logogun o.

¹⁶It ando inenggela'me nen peberagangge eerak mbaganit puut-puut paga ari namenggaarak wonogo logonet, it inobaalombok inomaluk paga towe puume inoone yogo mengga kwak iniki wakkologo logonet, Ai-au, yogwe,

¹⁷It apit ineenggi ndeyak aganake, it abok aret inameyo tenak-tenak eerit mbaganggwi, eerugun o.

¹⁸Eeko logonet, inayum nibinik maluk mendek yirikkologwe, inagabiti mban inagabolo paga ninggirik wonogwe, inenggali nen inete kumaakko'nok nugwi, inanobak puluk ko eerak wonogwe, eerugun o.

¹⁹ It inawu mbuti perak nogo, tu paga mbo pit nogwe, Ninambuti emas ti abe lek maluk aret o, yinuk, yogwe, eeko logogun o. Naliku ALA nanini inoba piyoorak eyom paga inambuti perak inom, emas inom, nen it inagap ndaganake, ti paga it ndonggoppiige, ti paga nen inaanoma'le age, eerigin lek kagak we, Niniyogobit lik togon maluk eekkolaawok nduk mban porogo wonogoorak kogo o, yinuk, yogo logogun.

²⁰It mbuti perak paga, emas paga, inobaanggi-inobaangge abu kigirikwe eerogo punuk, tiyappatit nugu nogogwaarak nogo, nggoorogo ti paga ogole warak mendek inagugiwak nogo eerogo pugwi, inagugi ogut ogole warak mendek ogobakkigirogo pugwi, eeko nogogwaarak me, it ineraaket nen, Ogole warak me, Iya, yuwak nduk, eerogo pigin o.

²¹Eerak nogo ti abok aret it aap inambik nen ko'nok nawak nduk, ineenggime pege, it aap maluk eeka o nggween paga yime mendek nen kugun wonok nawak nduk wogorage, eeke neenok, inamendek eerak ti, maluk eerogo pogo logogun o.

²²It wonogwe me nen nena nambokan na'nage neenok, it aap yogoot iyagalo unggwi wogo logomenggaarik, an nawi wurik me yi mendek ndi mendek onggo nggwok wonage nogo maluk eerogo pugwi, nawi wurik inom ayuk lek eerogo pugwi, eerugun o.

²³O time aakumi ambik inoorak yagabit age, o kota time, iniki worokot nen ugun eerit nugwi nogo mban wigak ari, eeke me, mbutigeele pipuk eerogo pako logowak o.

²⁴Yi aakumi ndi aakumi inanini ambik lombok wogo logomenggaarik, it aakumi Iterali ti, inawi wurik unde eekkolaawak nduk eeppiige, it inomaawi paga iniki tiyappatit nugwi nogo tebenogo piige, eeke neenok, yi o ndi o magame nogome ayuk lek aret arigin o.

²⁵Inamineeri ne agan noorak mendek inoba ari wage kenok, Niniki ugun tayenak logowok lak, ao, mbaremenggaarak kwe, lek aret kaagun o.

²⁶Aaninggin-paaninggin eeppiya wagak mban eeke, Ndogop eeppinagi woraagun o, yinuk, yora wagak mban eekwi, eekwi iinok, Ala yorage kagak yoraga nen inabi paga yo'niraawak, mbakwi, Ala unde nen eeko logorak wone mamunniraawak o, yinuk, yogwe, ndi, Ninoweewi nen wone kini wuppinanuwak o, yogwe, eeremenggaarak kwe, lek aret kaagun o.

²⁷Aap endagembogut nen le ari, awuri nagawan-nagawan nen, Nit ambi eeriyak lek aret kogo o, yinuk, iniki ma'nage, aakumi o time menggaarak abok aret inaganak nugiranet nage, eerigin o. It eeko nogogwaarak onggo ndak-ndak aret eeppiige, it aakumi maluk eekwi iinok, inowak looninako menggaarak mugurok aret inowak looninake, eeke neenok, Naliku ALA an aret ineenu arugun o,” yinuk, yegerak me, yokkiragi o, yoragagirak.