Read Western Dani Yetikiyen 8 Bible Online

Yetikiyen 8 - Western Dani bible

Yetikiyen 8

¹Wo'niren pinani nagagerak wonogwe niigak, tahun 5 eeppunuk, ambi eeke tut 5 penembunuk ambi penenak tanggal 5 tut ti paga aap Yekura mendek inoweewi an name ninom kwi'ndak wonage me, at Aliku Itok Menggerak ALA omaawi noba panege kagak,

² nabinggaanggo paga aap pogom ambi wonage kagagirak. At omarip kuli nen ogu paga ti, kani kunik pogom wonage, ndi, omarip kuli nen agi pa'nggwe ti, eya kwindagala mbuti tembaga pindan-pindan eerak pogom wonage, eerak kagagirak.

³At ti, aap eenggi negen ngginogo neeruwak pi'nake kagagirak. Ti'nuk, nabinggaanggo kage logonet, Aberiniki nen an piyanneren mbogut agi, nggween ogu, kagak o oolo taati lagangge nagagerik, wo'neren o Yerutalem oore'nggam akem o omarip paga pa'nggwe tu unggwogo menggam Ala alut eeriyak kagak alik alut eekwi eebi mbake ogut eerak wonage me nogome pani nagagerak.

⁴ Pani nage mbareegi, Iterali inogoba Ala tiyanak lombok eya aago o kobappaga niyo Kebat aa'nggi paga aa'nduk nabinggaanggo kagagirak nogo ndak-ndak, taati wonage kagagirak.

⁵Kage mbareegi, at nen an yo'nege logonet, “Aakumi nen ndarak yi wae. O omarip paga pa'nggwe time kenegen na'naru o.” Yo'nege mbareegi, na'nage nagagirik, o omarip paga pa'nggwe ake warogo wogori ungguurak tu unggwogo menggam koorok taati Ala alut eeriyak kagak alik alut eekwi Ala eebi mbake kugi ogut eerak nogo wonage kagagirak.

⁶Kage mbareegi, at nen an yo'nege logonet, “Aakumi nen ndarak yi wae. It Iterali mendek nen abu maluk ogole warak mendek eekwi paga an nawi wurik alik leenak me nen mbo puurak eeke yi, kenegen kage agandik ilik? Kenegen kage ti, ogole warak iya negen kwe, maluk ogole warak mondok iya lombok eekaarak ambi wonage kaamunggun o.”

⁷Yo'nege nagagerik, an wo'neren Ala awi wurik me oore'nggam tu unggwogo menggam pani nage mbareegi, yugum yagat wurik eno kole pelenak wonage kagagirak.

⁸Kage mbareegi, at nen an yo'nege logonet, “Aakumi nen ndarak yi wae. Yugum pak wurik me eno kole pelenak ti, wigakket o.” Yo'nege mbareegi, wigakkage nagagirik, tungga ambe mbanak wonage kagagirak.

⁹Kage mbareegi, at nen an yo'nege logonet, “Akem time maluk mendek eerit nugwi, ogole warak mendek eekwi, eekwi nogo kaanok nduk, unggwi nak o.”

¹⁰Yo'nege mbareegi, unggwi nage nagagirik, waalo inaanogum paga tu agan nega inogut inom, yi mendek ndi mendek iniyok paga nega ogole warak inogut eerak inom, Iterali inagugi ogut eerak inom, kobat yendok-wandok paga ayo wogo kagagirak.

¹¹Ogut eerak wonage nogo eraaninu aap Iterali mendek inoweewi ineebe 70 mi'ndak wonogwe, ndi, aap Tapan aput Yaataniya it inenggela'me mi'ndak wonage, eerak logonet, it inalitik-inalitak obari abe kaga kani anggen ndoongga ineenggime porogo wonogwe iigak, obari abe kaga nogo kani ndoonak nogo paga nen ka'luk lagangge kagagirak.

¹²Kage mbareegi, at nen an yo'nege logonet, “Aakumi nen ndarak yi wae. It aap Iterali mendek inoweewi inagugi ogut eerak menggim lombok o apit aago kagak eekwi nogo kenegen iigen ilik? It nen yogo logonet, At Aliku ALA enegen niiga'lek wonage, Aliku ALA nen ninanggween yi, abu mbo pegerak wonage, eekerak o, yogwe ti, iyet o.”

¹³Yo'nege nagagerik, ambi yo'nege logonet, “Kenegen iige ti, ogole warak iya negen kwe, maluk ogole warak mondok iya lombok ambi eekwi iyaamunggun o,” yinuk, yo'nege kagagirak.

¹⁴Kage mbareegi, at nen an wo'neren Aliku ALA awi wurik me ungguurak tu unggwogo menggam o omarip paga pa'nggwe nogome panege nagagerik, time it kumi nen kugi Tamut ale yogwe iyareegirak.

¹⁵Iige mbareegi, at nen an yo'nege logonet, “Aakumi nen ndarak yi wae. Ti eekwi iigen ilik? Ti iigendak ti, ogole warak iya negen kwe, maluk ogole warak mondok iya ambi eekwi iyaamunggun o,” yinuk, yo'nege kagagirak.

¹⁶Kage mbareegi, at nen an wo'neren Aliku ALA awi wurik oore'nggam akem time pani nage mbareegi, at awi wurik me tu unggwogo menggam enaame wone mbanggo menggam inom, ake warogo wogogo menggam inom, oolo taati aap ineebe 25 negen nen Aliku ALA awi wurik inambokan punuk, ina oonegen wundi wage menggim pa'nggwe na'na'nuk, oonegen wundi wage nogo inendobanggun yindumbunuk, ayuk wukwi iyareegirak.

¹⁷Iige mbareegi, at nen an yo'nege logonet, “Aakumi nen ndarak yi wae. Ti eekwi kenegen iigen ilik? It aakumi Yekura mendek nen maluk ogole warak lombok eekwi ti, iya lek we aret eeko agaarik mbaken? Ti eerit nugu logonet, iniki worokot nen ugun eerit nugwi paga, o nggween paga yime maluk mban ndak wa'narit nage kenok, nanini mi'nagak eeke yi, op mbaken? Kat abu meek o, yinuk, noba peyak wurogo panugwi yi iyet o.

¹⁸Togop aret me, inoone nggwok paga nabinik-nabenak an yo'nirimenggaarak kwe, inoone konengge, inabuwa mbake, inabuwa nen teppiige, eerigin lek nanini inoba kwippiyaagin o,” yinuk, yo'nege kagagirak o.